Nomerỳ
Toko faha-13
12 I Hamiela zanakalahin'i Gemaly, avy amin'ny fokon'i Dana;13 I Setora zanakalahin'i Mikaela, avy amin'ny fokon'i Asera;
14 I Nahaby zanakalahin'i Votsy, avy amin'ny fokon'i Naftaly;
15 I Geoela zanakalahin'i Maky, avy amin'ny fokon'i Gada.
16 Ireo no anaran'ny lehilahy nalefan'i Mosesy hisafo ny tany Kanahana. Nataon'i Mosesy hoe Josoa i Hosea zanakalahin'i Nona.
17 Nalefan'i Mosesy hisafo ny tany Kanahana izy ireo ka nataony hoe: Miakara avy any atsimo, dia mianiha ny tendrombohitra
18 hahitanareo ny toetry ny tany sy ny mponina ao na mahery izy na malemy, ary koa na vitsy izy na maro.
19 Jereo ny tany onenan'ireo vahoaka ireo na tsara na ratsy ary ny tanana ipetrahany na mimanda na tobin-day.
20 Jereo ny tany raha lonaka na ngazana, na misy hazo maniry na tsia. Koa mandehana ary mahereza, dia mitondra amin'ny vokatry ny tany. Fahamasahan'ny voaloboka rahateo tamin'izay.
21 Dia niakatra izy ireo ka nisafo ny tany nanomboka teo amin'ny taniefitr'i Tsina ka hatrany Rehoba akaikin'i Lebo-Hamata.
22 Niakatra avy any atsimo izy ireo ka tonga tao Hebrona izay nonenan'ny tarik'i Ahimana sy i Sesay ary i Talmay, samy taranaky ny Hanakita. I Hebrona dia niorina fito taona talohan'i Tsohana any Ejipta.
23 Nankany amin'ny Lohasahan'i Eskola ireo mpisafo tany ka nanapaka tahom-boaloboka misy sampahony, ary nolanjain'olon-droa tamin'ny hazo niaraka tamin'ny ampongabendanitra sy ny aviavy.
24 Dia nomena anarana hoe Lohasahan'i Eskola na Lohasahan-tsampaho izany toerana izany, noho ny sampahom-boaloboka izay notapahin'ny Israelita teo.
25 Nony afaka efapolo andro, dia niverina avy nisafo ny tany ireo iraka.
26 Nankeo amin'i Mosesy sy i Aharona ary ny Fiangonan'ny Israelita rehetra tao an-taniefitr'i Parana any Kadesy izy ireo, ka nanao tatitra tamin'ny besinimaro ary nampiseho azy ny vokatry ny tany.
27 Izao no notantarain'ireo mpisafo tamin'i Mosesy: Nankany amin'ny tany izay nanirahanao anay izahay, ka hitanay fa tany tondra-dronono sy tantely tokoa ilay izy. Itony no vokatra avy tany.
28 Saingy ny mponina ao aminy kosa dia mahery, ary ny tanana dia mimanda sady lehibe. Hitanay tao koa aza ny taranaky ny Hanakita.
29 Ny Hamalekita no monina amin'ny faritra atsimo; ny Hetita sy ny Hivita ary ny Jebosita sy ny Amorita no any an-tendrombohitra, fa ny Kanahanita kosa no mipetraka amoron-dranomasina Mediteranea sy amoron'i Jordana.
30 Nampanginin'i Kaleba ny vahoaka izay nimonomonona tamin'i Mosesy ka nataony hoe: Aoka hiakarantsika ny tany ka halaintsika fa haharesy azy tokoa isika.
31 Ireo olona niara-niakatra tamin'i Kaleba kosa nanao hoe: Tsy afaka manafika ireo olona ireo isika fa mahery lavitra noho isika izy.
32 Dia nanao izay haharatsy laza ny tany izay nosafoiny tamin'ny Israelita izy ireo ka niteny hoe: Ny tany izay nosafoinay dia tany mamono ny olona tonga monina ao, ary ny olona izay hitanay tao dia ranjanana avokoa.
33 Hitanay tao hatramin'ireo olona goavambe taranak'i Hanaka aza; tahaka ny valala izahay miohatra aminy, ary dia toy izany koa no fijeriny anay.
Toko faha-14
1 Nandritra ny alina manontolo dia nikiakiaka sy nitomany avokoa ny vahoaka tafangona teo.2 Nimonomonona tamin'i Mosesy sy I Aharona ny Israelita rehetra ka nanao hoe: Tsara kokoa ho antsika ny maty tany Ejipta na koa maty taty an-taniefitra.
3 Fa nahoana isika no nentin'ny TOMPO ho lavon-tsabatra amin'ny tany toy izany? Ho lasan-ko babo avokoa ny vady aman-janatsika; koa tsy aleontsika ve miverina indray any Ejipta?
4 Dia nifampilaza izy ireo nanao hoe: Aoka isika hanendry mpitarika, dia hiverina any Ejipta!
5 Niankohoka tamin'ny tany teo anatrehan'ny fiangonan'ny Israelita rehetra vory teo i Mosesy sy Aharona.
6 I Josoa zanakalahin'i Nona sy i Kaleba zanakalahin'i Jefone izay samy anisan'ny nisafo tany kosa dia nandriatra ny fitafiany
7 ary niteny tamin'ny fiangonana israelita tsivakivolo hoe: Ny tany izay nosafoinay dia tany tena tsara tokoa.
8 Raha ambinin'ny TOMPO isika, dia hoentiny any amin'io tany tondra-dronono sy tantely io ka homeny antsika izany.
9 Koa aza mikomy amin'ny Tompo ianareo; ary aza matahotra ny mponin'io tany io, fa tsy misy hataontsika indraim-bava akory ireo. Efa niala taminy ireo andriamanitra fiarovany, fa ny Tompo kosa momba antsika; koa aza matahotra azy ireny ianareo.
10 Nandrahona hitora-bato azy roa lahy ny vahoaka iray manontolo; kanjo indro ny voninahitry ny TOMPO fa niseho tamin'ny Israelita rehetra teo amin'ny Tranolay fihaonana.
11 Dia hoy ny TOMPO tamin'i Mosesy: Mandra-pahoviana no hanamavoan'ity vahoaka ity Ahy? Ary mandra-pahoviana no handavany tsy hino Ahy, na dia teo aza ny famantarana rehetra izay nataoko teo aminy?
12 Hamely azy amin'ny pesta Aho ka hamongotra azy; ianao kosa hataoko firenen-dehibe sy matanjaka noho izy.
13 Fa hoy ny navalin'i Mosesy ny TOMPO: Fantatry ny Ejiptianina fa ny herinao no namoahanao ity vahoaka ity hiala teo aminy.
14 Notantarainy tamin'ny mponin'ity tany anoloanay ity izany. Koa dia fantatr'izy ireo fa Ianao TOMPO no momba ny vahoakanao ary IANAO mifanatri-tava aminy; ny rahonao dia mijanona eo amboniny hialofany; mialoha azy amin'ny andry rahona Ianao nony andro ary amin'ny andry afo kosa nony alina.
15 Ankehitriny, raha indray hofongoranao ny vahoakanao, dia hiteny ireo firenena efa nahafantatra ny lazanao ka hanao hoe:
16 Tsy afaka nitondra ny vahoakany ho any amin'ny tany izay efa nampanantenainy azy ny TOMPO, koa izany no nandringanany azy tany an-taniefitra.
17 Koa ankehitriny, Tompo o, mitalaho aminao aho, asehoy ny herinao araka ny teninao hoe:
18 Izaho no TOMPO Izay tsy mora tezitra sady be fitiavana fa mahazaka ny heloka sy ny fikomiana. Kanefa tsy afa-maina ny meloka, fa ny heloky ny olona kosa dia valiako amin'ny taranany hatramin'ny zafindohalika.
19 Tompo o, araka ny halehiben'ny fitiavanao, dia mamela ny fahotan'ny vahoakanao tahaka ny efa namelanao ny fahotany hatrany Ejipta ka hatraty.
20 Ary hoy ny TOMPO hoe: Mamela azy araka ny fangatahanao Aho.
21 Kanefa velona Aho ary feno ny voninahitra maha TOMPO Ahy ny tany tontolo, koa mianiana Aho fa tsy hisy hiditra amin'io tany io ireo olona ireo.
22 Nahita ny voninahitro sy ny asa mahagaga nataoko tany Ejipta sy tany an-taniefitra izy ireo, nefa tsy nitsahatra naka fanahy Ahy tamin'ny tsy fihainoany ny teniko;
23 koa satria efa nanamavo Ahy izy, dia tsy hisy hahita ny tany izay nampanantenaiko ny razany.
24 Fa i Kaleba mpanompoko, izay nanam-panahy hafa ka tsy nisalasala nanaraka Ahy, dia hampidiriko any amin'ny tany efa nalehany; ary hahazo izany tany izany ny taranany,
25 fa ny Hamalekita sy ny Kanahanita kosa honina amin'ny lemaka. Koa rahampitso, miverena indray ianareo ka mankanesa any an-taniefitra amin'ny lalana mankany amin'ny Ranomasin'ny Volotara.
26 Niteny tamin'i Mosesy sy i Aharona indray ny TOMPO ka nanao hoe:
27 Mandra-pahoviana no mbola handeferako ny fimonomononan'ity fiangonana ratsy ity amiko? Efa mankadilo ny sofiko ny fimonomononany amiko.
28 Mandehana lazao aminy hoe: Velona Izaho TOMPO, ka mianiana fa araka ny teny izay reko taminareo ihany no hataoko aminareo.