Apôkalipsỳ

Toko faha-10

⁷ Fa amin'ny andro hitsofan'ilay anjely fahafito ny trompetrany, dia ho tanteraka ny zava-miafina nalahatr'Andriamanitra, araka ny teny soa nambarany tamin'ireo mpaminany mpanompony.

⁸ Ary niteny tamiko indray ilay feo efa reko avy tany an-danitra, nanao hoe: Mandehana, raiso ny horonamboky kely mivelatra eny an-tanan'ilay anjely mijoro eo amin'ny ranomasina sy eo amin'ny tany.

⁹ Dia nankeny amin'ilay anjely aho ka nanao taminy hoe: Mba omeo ahy iny horonamboky kely iny! Ary hoy izy tamiko: Raiso izy ka atelemo avokoa; hangidy ao an-kibonao izy, nefa ao am-bavanao dia ho mamy tahaka ny tantely.

¹⁰ Dia noraisiko ilay horonamboky kely teny an-tanan'ny anjely ka nateliko avokoa; ary mamy tahaka ny tantely izay tao am-bavako, nefa nony voateliko dia nangidy tao an-kiboko.

¹¹ Tamin'izay dia nisy nilaza tamiko hoe: Tsy maintsy mitondra ny hafatr'Andriamanitra indray ianao ny amin'ny vahoaka maro sy firenena maro sy olona maro samy hafa fiteny ary mpanjaka maro.

Toko faha-11

¹ Ary nomena volotara tahaka ny tehina fandrefesana aho, dia nilazana hoe: Mitsangana, ka refeso ny tempolin'Andriamanitra sy ny alitara ary isao izay mivavaka ao.

² Ny kianjan'ny tempoly, ilay eo ivelany, dia avelao ihany fa aza refesina; satria nomena ny hafa firenena izany, ka hanitsakitsaka ny tanana masina izy ireo mandritra ny 42 volana.

³ Ary homeko hery ny vavolombelona roa mpanambara Ahy, ka hitondra ny hafatro mandritra ny 1260 andro sady hitafy gony.

⁴ Ireo vavolombelona roa ireo no fototr'oliva anankiroa sy fitoeranjiro anankiroa, izay mijoro eo anatrehan'ilay Tompon'ny tany.

⁵ Ka raha misy mitady hanisy ratsy azy ireo, dia misy afo mivoaka avy ao am-bavany handevona ny fahavalony; ary tsy maintsy hovonoina ho faty toy izany izay mitady hanisy ratsy azy ireo.

⁶ Ireo no manam-pahefana hanidy ny lanitra, mba tsy hilatsahan'ny ranonorana mandritra ny andro hampitany ny hafatr'Andriamanitra; sady manam-pahefana amin'ny rano, ka mahova azy ho ra; ary manam-pahefana hamely ny tany amin'ny loza rehetra isaky ny te hanao izany.

⁷ Ary rehefa nahavita fijoroana vavolombelona ireo olona roa ireo, dia hiadian'ilay biby miakatra avy amin'ny hantsambe ary ho resiny sy hataony maty.

⁸ Ka ny fatiny dia hiampatra eny an-dalamben'ilay tanana lehibe; io tanana io no nanomboana ny Tompony tamin'ny hazofijaliana sady antsoina koa hoe Sodoma na Ejipta araka ny heviny ara-panahy.

⁹ Vahoaka sy foko ary olona samy hafa fiteny sy firenena maro no misy mijery ny fatin'ireo mandritra ny telo andro sy tapany, sady tsy avela halevina izy.

¹⁰ Mifaly sy miravo ary mifanatitra fanomezana ny mponina ambonin'ny tany noho ny nahafatesan'ireo, fa nampiferinaina ny mponina ambonin'ny tany ireo mpaminany roa ireo.

¹¹ Taorian'ny telo andro sy tapany, dia nisy fofonaina avy tamin'Andriamanitra niditra tao anatin'ireo faty ireo, ary nampijoro azy tamin'ny tongony; ka raiki-tahotra mafy izay olona nahita azy.

¹² Dia nahare feo mahery avy tany an-danitra ireo mpaminany roa ireo, nanao taminy hoe: Miakara aty! Dia niakatra ho any an-danitra tao anatin'ny rahona ireo, ary nahatazana azy ny fahavalony.

¹³ Tamin'izay fotoana izay dia nisy horohorontany mafy ka nirodana ny ampahafolon'ilay tanana ary olona fito arivo no matin'io horohorontany io. Raiki-tahotra ny olona sisa ka nanome voninahitra an'ilay Andriamanitra monina ao an-danitra.

¹⁴ Lasa izay ny loza faharoa; indro hisosoka faingana ny loza fahatelo.

¹⁵ Dia nitsoka trompetra ny anjely fahafito, ka nisy feo mahery tany an-danitra nanao hoe: Efa lasan'ny Tompontsika sy ilay Mesiany ny fanjakana amin'izao tontolo izao, ka ho fanjakana maharitra mandrakizay izany!

¹⁶ Ary ny loholona 24 izay samy mipetraka eo ambony sezafiandrianany eo anatrehan'Andriamanitra, dia niankohoka nitsaoka an'Andriamanitra

¹⁷ sady nanao hoe: Misaotra Anao izahay, ry Tompo Andriamanitra Tsitoha, Ilay ankehitriny sy taloha, noho Ianao naneho ny herinao lehibe ary noho Ianao efa manjaka.

¹⁸ Tezitra ireo firenena, kanefa tonga ny fahatezeranao sy ny fotoana hitsaranao ny maty; tonga ny fotoana hanomezanao valisoa ny mpaminany mpanomponao sy ny vahoakanao mbamin'ireo manaja Anao, na kely na lehibe; tonga ny fotoana hanimbanao izay olona manimba ny tany.

¹⁹ Dia novohana ny tempolin'Andriamanitra any an-danitra, ka niseho teo anatin'ny tempolin'Andriamanitra ilay vata mirakitra ny fanekempihavanana nataony; ary nisy tselatra sy kotrokorana ary kotro-baratra sy horohorontany mbamin'ny havandra vaventy.

Toko faha-12

¹ Ary nisy famantarana lehibe niseho teny amin'ny habakabaka, dia vehivavy anankiray: ny masoandro no toy ny lamba nisalorany, ny volana no teo an-tongony; ary kintana 12 no satroboninahitra teo amin'ny lohany.

² Bevohoka ilay vehivavy sady mihetsi-jaza ka mitaraina, satria marary fatratra efa hiteraka.

³ Ary nisy famantarana hafa koa niseho teny amin'ny habakabaka: indro nisy dragona mena lehibe, manana loha fito sy tandroka folo, ary misy satroboninahitra iray avy isaky ny lohany.

⁴ Nifaoka ny ampahatelon'ny kintana eny amin'ny habakabaka ny rambon'ilay dragona, ka nanjera ireny tamin'ny tany. Teo anatrehan'ilay vehivavy efa hiteraka no nijanonan'ity dragona, mba handrapaka ny zanany, raha vao teraka.

⁵ Dia teraka ravehivavy ka nahazo zazalahy, izay hifehy ny firenena rehetra amin'ny tehim-by ka nakarina faingana eo anilan'Andriamanitra sy eo anilan'ny sezafiandrianany.

⁶ Ravehivavy kosa nandositra nankany an-taniefitra, izay nisy toerana namboarin'Andriamanitra mba hamelomana azy mandritra ny 1260 andro.

⁷ Dia nisy ady nitranga tany an-danitra: i Mikaela sy ny anjeliny no niady tamin'ilay dragona; ary niady ilay dragona mbamin'ny anjeliny.

⁸ Kanefa resy ilay dragona, sady tsy nahazo nitoetra tany an-danitra intsony.

⁹ Ary nazera ilay dragona, dia ilay bibilava fahizay, ilay atao hoe devoly na hoe Satana, izay mamitaka izao tontolo rehetra izao; nazera tamin'ny tany izy ary nazera niaraka taminy koa ireo anjeliny.

¹⁰ Dia reko nisy feo mahery tany an-danitra nanao hoe: Tonga izao ny famonjena sy ny hery ary ny fanjakan'ilay Andriamanitsika, tonga izao ny fahefan'ilay Mesiany; satria nazera ilay mpiampanga an'ireo havantsika, dia ilay mpiampanga azy ireo andro aman'alina teo anatrehan'Andriamanitsika.

¹¹ Ireo havantsika kosa dia naharesy ilay mpiampanga, ka ny ra nafoin'ny Zanakondry sy ny tenin'Andriamanitra nijoroan'izy ireo ho vavolombelona no nandreseny azy; ary tsy nankamamy ny ainy intsony ireo na dia ho faty aza.

¹² Noho izany, mifalia, ry lanitra sy ianareo monina ao aminy. Mampalahelo ianareo, ry tany aman-dranomasina, fa nidina any aminareo ny devoly sady misafoaka mafy, satria fantany fa kely sisa ny androny!

¹³ Rehefa hitan'ilay dragona fa voazera tamin'ny tany izy, dia ilay vehivavy niteraka ny zazalahy no nenjehiny.

¹⁴ Fa nomena eladroan'ny voromahery lehibe ravehivavy mba hanidinany hankany an-taniefitra, ho any amin'ny toerana izay amelomana azy mandritra ny telo taona sy tapany, ka ho voaaro amin'ny famelezan'ilay bibilava.

¹⁵ Ny vavan'ilay bibilava kosa namoaka rano toy ny riaka hanaraka an-dravehivavy mba hipaoka azy.

¹⁶ Kanjo novonjen'ny tany ravehivavy, fa nitresaka ny tany ka nitelina ny riaka izay nalefan'ny vavan'ilay dragona.

¹⁷ Dia tezitra tamin-dravehivavy ny dragona ka lasa nandeha tamin'ny taranany sisa, izay mitandrina ny didin'Andriamanitra sy mitana ny hafatra nijoroan'i Jesoa ho vavolombelona; ary nijanona teo amin'ny fasi-dranomasina ilay dragona.

Toko faha-13

¹ Dia nahita biby anankiray nipoitra avy tany an-dranomasina aho; nanana tandroka folo sy loha fito izy; nisy satroboninahitra iray avy isaky ny tandrony; ary nisy anarana iray manevateva an'Andriamanitra isaky ny lohany.

² Ilay biby izay hitako dia sahala amin'ny leoparda; saingy tahaka ny tongotr'orsa ny tongony, ary tahaka ny vavan'ny liona ny vavany. Nomen'ilay dragona azy ny heriny sy ny sezafiandrianany ary fahefana lehibe.

³ Ny anankiray tamin'ireo lohany fito dia toa voan'ny ratra ka nila ho faty, nefa sitrana ihany ilay ratra saika nahafaty azy; ary gaga ny tany tontolo ka nanaraka ilay biby.

⁴ Dia nivavaka teo anoloan'ilay dragona ny olona; satria izy no nanome fahefana ho an'ilay biby; ary nivavaka teo anoloan'ilay biby koa ireo ka nanao hoe: Iza no tahaka ilay biby, ary iza no afa-miady aminy?

⁵ Dia nomena vava midaondaona sy manevateva an'Andriamanitra ilay biby, sady nomena fahefana mba hiasa mandritra ny 42 volana.

⁶ Ary nanoka-bava izy hanevateva an'Andriamanitra, dia ny hanevateva ny anarany sy ny toerana fonenany mbamin'ireo mponina any an-danitra.

⁷ Navela hiady amin'ireo olona anisan'ny vahoakan'Andriamanitra sy handresy azy koa ilay biby, ary dia nomena fahefana tamin'ny fokom-pirenena sy ny vahoaka mbamin'ny olona samy hafa fiteny sy ny firenena rehetra.

⁸ Hivavaka eo anoloany daholo ny mponina ambonin'ny tany, izany hoe ny olona tsy voasoratra anarana ao amin'ny horonamboky mirakitra ny lisitr'ireo hanana ny fiaina-maharitra mandrakizay. Io horonamboky io dia hatramin'ny fiandohan'izao tontolo izao no eo am-pelatanan'ilay Zanakondry Izay efa voavono ho faty.

⁹ Izay manan-tsofina, aoka hihaino!