Levitîka

Toko faha-16

²⁶ Ilay lehilahy nandroaka ny osilahy ho osy mikarenjy dia hanasa fitafiana sy handro, vao mahazo miditra ny toby.

²⁷ Ary ny ombilahy sy osilahy, izay natao sorona fanalana ny ota sady samy efa nangalana ra mba hanaovana ny fombam-pivavahana famelan-keloka ao amin'ny Toeramasina Indrindra, dia hindaosina any ivelan'ny toby, ka hodorana ny hodiny sy henany ary dikin-drorohany.

²⁸ Ilay lehilahy nandoro azy dia hanasa fitafiana sy handro koa, vao hiditra ny toby.

²⁹ Izao no lalana raikitra ho anareo: Ny andro fahafolo amin'ny volana fahafito, dia aoka ianareo hifady hanina sady tsy hanao raharaha akory, na ianareo Israelita tompontany na ireo vahiny valovotaka eo aminareo.

³⁰ Fa amin'io andro io no hanaovana ny fombam-pivavahana famelan-keloka mba hanadiovana anareo, ka dia hadio ho afaka amin'ny fahotana rehetra eo anatrehan'ny TOMPO ianareo.

³¹ Ho tena andro fitsaharana sy fifadian-kanina ho anareo io andro io. Lalana raikitra izany.

³² Any aoriana any, dia ny mpisorona izay voahosotra sy voatokana ho mpisorombe hisolo ny rainy no hanao ireo fombam-pivavahana famelan-keloka sy fanadiovana ireo; ny fanamiana masina, ireo fanamiana vita kiran-drongony fotsy, no hiakanjoany amin'izany;

³³ dia hanao ny fombam-pivavahana fanadiovana ho an'ny Toeramasina Indrindra sy ho an'ny faritra sisa amin'ny Tranolay fihaonana ary ho an'ny alitara fisoronana izy, ary koa hanao ny fombam-pivavahana famelan-keloka ho an'ny mpisorona sy ho an'ny Fiangonan'ny Israelita tsivakivolo.

³⁴ Lalana raikitra ho anareo izany, mba hahazoana, indray mandeha isan-taona, ny famelana ny heloka rehetra ho an'ny Israelita. Dia araka izay zavatra nandidian'ny TOMPO an'i Mosesy no nataon'i Aharona.

Toko faha-17

¹ Dia niteny tamin'i Mosesy ny TOMPO

² mba hamepetra an'i Aharona sy ny zanany ary ny Israelita hoe: Izao no zavatra nandidian'ny TOMPO:

³ Na iza na iza Israelita mamono omby na ondry na osy, ao anatin'ny toby na any ivelan'ny toby,

⁴ dia tsy maintsy mitondra azy ho eo anoloan'ny varavaran'ny Tranolay fihaonana mba hanolorana azy ho fanatitra ho an'ny TOMPO eo anoloan'ny fonena-masin'ny TOMPO. Raha tsy izany no ataony, dia ho meloka ny amin'ny ram-biby nalatsany izy, ka hofongorana tsy ho anisan'ny vahoaka israelita.

⁵ Amin'izay, dia tsy ho eny an-tsaha intsony no hamonoan'ny Israelita ny biby vonoiny; fa an'ny TOMPO ireny biby ireny ka dia hoentin'ny Israelita ho amin'ny mpisorona, eo anoloan'ny varavaran'ny Tranolay fihaonana, mba hatolotra ho sorom-pihavanana amin'ny TOMPO.

⁶ Ilay mpisorona kosa hamafy ny ran'ilay biby eo amin'ilay alitaran'ny TOMPO, eo anoloan'ny varavaran'ny Tranolay fihaonana, ary handoro ny jaborany hanetona ho hanitra ankasitrahina ho an'ny TOMPO.

⁷ Ny sorona fanaon'ny Israelita dia tsy hatolony intsony ho an'ny fanahy ratsy miendrika osilahy, izay nanaovany fanompoan-tsampy. Lalana raikitra ho azy ireo hatrany hatrany izany.

⁸ Na iza na iza, Israelita na vahiny valovotaka eo aminy, manolotra biby hatao sorona dorana manontolo na sorona hafa,

⁹ ka tsy mitondra azy eo anoloan'ny varavaran'ny Tranolay fihaonana mba hatolotra ho an'ny TOMPO, dia hofongorana tsy ho anisan'ny vahoaka israelita izy.

¹⁰ Na iza na iza, Israelita na vahiny valovotaka eo aminy, mihinana ram-biby, na biby inona na biby inona, dia hohandriniko izany olona izany, ka hofongorako tsy ho anisan'ny vahoaka israelita.

¹¹ Fa ny ain'ny zavaboaary mana-nofo manko dia ao amin'ny ra; ary navelako hampiasaina eo amin'ny alitara izany mba hahazoana famelan-keloka ho anareo, satria amin'ny maha aina azy no ampiasana ny ra hahazoana famelan-keloka.

¹² Koa izany no nilazako tamin'ny Israelita hoe: 'Aza misy mihinan-dra, na ianareo na ny vahiny valovotaka eo aminareo'.

¹³ Na iza na iza, Israelita na vahiny valovotaka eo aminy, mihaza ka mahazo biby na vorona fihinana, dia hararany amin'ny tany ny rany ka hototofany vovoka.

¹⁴ Ny ain'ny zavaboaary rehetra mana-nofo manko dia ny ra izay ao aminy. Koa izany no nilazako tamin'ny Israelita hoe: Aza mihinana ny ran'ny zavaboaary mana-nofo, satria ny rany no ainy; ka izay rehetra mihinana azy dia hofongorana tsy ho anisan'ny vahoaka israelita.

¹⁵ Na iza na iza, Israelita tompontany na vahiny valovotaka, mihinana biby maty ho azy na voaviravira, dia hanasa fitafiana sy handro sady haloto mandra-paharivan'ny andro izy, vao hadio indray.

¹⁶ Fa raha tsy manasa fitafiana sy mandro izy, dia itambesaran-keloka.

Toko faha-18

¹ Dia niteny tamin'i Mosesy ny TOMPO

² mba hamepetra ny Israelita hoe: Izaho no TOMPO Andriamanitrareo!

³ Aza manao araka ny fanaon'i Ejipta izay tany nonenanareo; aza manao araka ny fanaon'i Kanahana izay tany efa hampidirako anareo; ary aza manaraka ny lalanan'ireny firenena ireny ianareo.

⁴ Ny fitsipiko no tanteraho, ary ny lalanako no imasoy harahina. Izaho no TOMPO Andriamanitrareo.

⁵ Tandremo ny lalana amam-pitsipiko; fa izay manatanteraka izany, dia ho velona amin'izany. Izaho no TOMPO.

⁶ Aoka tsy hisy lehilahy israelita hila vehivavy havany akaiky dia akaiky mba hiray aminy. Izaho no TOMPO.

⁷ Aza miray amin'ny reninao ianao, fa manala baraka ny rainao izany; reninao izy ka aza ifoteranao.

⁸ Aza miray amin'ny renikelinao fa manala baraka ny rainao izany.

⁹ Aza miray amin'ny anabavinao zanakavavy nentin-drainao na nentin-dreninao, ka nobeazina tao an-trano fonenana na tany an-kafa.

¹⁰ Aza miray amin'ny zafinao vavy, nateraky ny zanakalahinao na ny zanakavavinao, fa manala baraka anao izany.

¹¹ Aza miray amin'ny zanakavavin'ny renikelinao, satria anabavinao izy noho ny rainao manjary rainy.

¹² Aza miray amin'ny anabavin-drainao, satria havan-drainao akaiky dia akaiky izy.

¹³ Aza miray amin'ny rahavavin-dreninao, satria havan-dreninao akaiky dia akaiky izy.

¹⁴ Aza alaim-baraka ny rahalahin-drainao noho ny firaisanao amin'ny vadiny, izay nenitoanao.

¹⁵ Aza miray amin'ny vinantovavinao, fa vadin'ny zanakalahinao izy.

¹⁶ Aza miray amin'ny vadin-drahalahinao, fa manala baraka ny rahalahinao izany.

¹⁷ Aza miray amin'ny vehivavy anankiray no sady hiray amin'ny zananivavy na koa hiray amin'ny zafikeliny vavy, nateraky ny zananilahy na zananivavy, satria mpihavana akaiky ilay vehivavy sy ny zanaka aman-jafiny ka firaisana mampifamotitra izany.

¹⁸ Aza mampakatra ny rahavavim-badinao raha mbola velona ilay vadinao, satria hampifandrafy azy mirahavavy izany.

¹⁹ Aza mila vehivavy mbola voaloton'ny fadimbolany mba hiray aminy.

²⁰ Aza miray amin'ny vadin'olona mpiray firenena aminao, satria ho voaloton'izany ianao.

²¹ Aza misy omena hatao sorona dorana hanajana ny sampy Moloka ny zanakao, satria manala baraka ny anaran'Andriamanitrao izany. Izaho no TOMPO.

²² Aza miray amin'ny lehilahy tahaka ny firay amin'ny vehivavy; zava-mamoafady izany.

²³ Aza miray amin'ny biby, satria ho voaloton'izany ianao; ary aoka tsy hisy vehivavy hety hiray amin'ny biby, fa zava-mamoafady indrindra izany.

²⁴ Aza misy andotoanareo tena ireo zavatra ireo; fa tamin'ireo no nandoto tena ny hafa firenena izay efa horoahiko eo anoloanareo.

²⁵ Voaloto mbamin'ny tany aza, ka novaliako ny helony ary naloany ny mponina teo aminy.