Levitîka

Toko faha-22

⁸ Tsy hohanin'ny mpisorona koa ny henam-biby maty ho azy na voaviraviram-bibidia, mba tsy hahatonga azy ho voaloto. Izaho no TOMPO.

⁹ Aoka ny mpisorona hitandrina izay fepetra nasaiko tandremany, fandrao hitambesaran-keloka ny amin'izany fanimbazimbana zava-masina izany izy ka ho faty. Izaho no TOMPO, Izay efa nanokana ny mpisorona hanompo Ahy.

¹⁰ Aza avela hihinana zava-masina ny Israelita tsy anisan'ny fianakavia-mpisorona; na izay sendra mivahiny ao amin'ny mpisorona, na izay mpikarama, dia samy tsy mahazo mihinana zava-masina.

¹¹ Fa raha misy mpanompo novidin'ny mpisorona, dia hahazo mihinana amin'izany ihany izy; toy izany koa, ny mpanompo izay teraka tao an-tranon'ny mpisorona, dia mahazo mihinana izay fihinany.

¹² Raha misy zanakavavin'ny mpisorona manambady lehilahy israelita tsy anisan'ny fianakavia-mpisorona, dia tsy mahazo mihinana ny navahana tamin'ny zava-masina izy.

¹³ Fa raha maty vady na nariam-bady na tsy nanan-janaka ilay zanakavavin'ny mpisorona ka mody ao an-tranon-dray toy ny fony izy mbola kely, dia mahazo mihinana izay fihinan-drainy. Ankoatra ireo, ny Israelita tsy anisan'ny fianakavia-mpisorona dia aoka tsy hisy hihinana zava-masina.

¹⁴ Raha misy Israelita tsy anisan'ny fianakavia-mpisorona ka nahahinana tsy nahy tamin'ny zava-masina, dia honerany amin'ny mpisorona izay laniny ka hotongavany ny ampahadiminy.

¹⁵ Aoka tsy hisy mpisorona hampanimbazimba ny zava-masina izay natokan'ny Israelita ho Ahy TOMPO;

¹⁶ raha avelany hihinana izany ny Israelita tsy anisan'ny fianakavia-mpisorona, dia manjary itambesaran-keloka sy manonitra. Fa Izaho no TOMPO Izay efa nanokana ireny zava-masina ireny.

¹⁷ Dia niteny tamin'i Mosesy ny TOMPO

¹⁸ mba hamepetra an'i Aharona sy ny zanany mbamin'ny Israelita hoe: Na iza na iza, Israelita na vahiny valovotaka eo aminy, te hanatitra zavatra amiko TOMPO ho sorona dorana manontolo mba ho fanalam-boady na ho fanomezana an-tsitrapo, dia izao no hataony:

¹⁹ lahy tsy misy kilema amin'ny omby na ondry na osy no aoka hateriny mba hahazoany sitraka.

²⁰ Izay biby rehetra misy kilema dia tsy azonareo aterina, satria tsy hahazoanareo sitraka amiko izany.

²¹ Raha misy olona manatitra omby na ondry na osy amiko TOMPO ho sorom-pihavanana mba ho fanalam-boady na ho fanomezana an-tsitrapo, dia biby tsy misy kilema na kely akory aza no aoka hateriny mba hahazoany sitraka.

²² Fa izay biby jamba, na mandringa, na kilemaina na ferena, na hatenina, na kongonina, dia tsy haterinareo ho AHY na hataonareo sorona levonina amin'ny afo ao ambonin'ny alitara ho AHY.

²³ Raha omby na ondry na osy no misy sampona, dia azo aterina ihany ho fanomezana an-tsitrapo; fa raha fanalam-boady dia tsy hahazoana sitraka izany.

²⁴ Izay voaporitra na voatoro vihindahy ary koa voaombotra na voadidy vihindahy amin'ireo biby ireo, dia tsy azonareo aterina ho AHY; ary aza manao famosiram-biby ianareo, rehefa mby eo amin'ny taninareo.

²⁵ Raha misy biby vositra entin'olona hafa firenena, dia tsy azonareo aterina ho sakafo aroso ho Ahy Andriamanitrareo ireny; satria noho izy novosirina, dia misy kilema ka tsy hahazoanareo sitraka.

²⁶ Dia niteny tamin'i Mosesy ny TOMPO nanao hoe:

²⁷ Raha misy omby na ondry na osy vao teraka, dia hitoetra amin-dreniny mandritra ny fito andro izy; fa manomboka amin'ny andro fahavalo no ho miakatra, dia hahazoana sitraka izy raha atao sorona levonina amin'ny afo ho AHY.

²⁸ Kanefa ny ombivavy na ny ondrivavy na ny osivavy, dia aoka tsy hovonoinareo indray andro izy sy ny zanany.

²⁹ Raha manolotra sorom-pisaorana amiko TOMPO ianareo, dia araka izay hahazoanareo sitraka no anolory azy.

³⁰ Iny andro anolorana azy iny ihany no hihinanana azy, fa aza amelana ho tra-maraina. Izaho no TOMPO.

³¹ Imasoy hotanterahina ny didiko. Izaho no TOMPO.

³² Aza manala baraka ny anarako masina, mba hanajana Ahy ho masina eo amin'ny Israelita. Izaho no TOMPO, Izay manokana anareo ho vahoakako.

³³ Izaho no namoaka anareo hiala tany Ejipta. Izaho no TOMPO.

Toko faha-23

¹ Dia niteny tamin'i Mosesy ny TOMPO

² mba hamepetra ny Israelita hoe: Ny fankalazana manetriketrika naraikitro dia hisy fanompoam-pivavahana hivorianareo; ka ireto avy ireo fankalazana manetriketrika naraikitro:

³ Andro enina no hanaovan-draharaha; fa ny fahafito dia sabata tena andro fitsaharana, ka hasiana fanompoam-pivavahana hivorianareo. Aza manao raharaha akory ianareo, fa sabata hanajana Ahy TOMPO izany, na aiza na aiza onenanareo.

⁴ Ireto kosa no fankalazana manetriketrika hafa naraikitro ka hasiana fanompoam-pivavahana koa amin'ny fotoany avy:

⁵ Ny volana voalohany, andro faha-14, rehefa hariva, dia fankalazana ny Paska hanajana Ahy TOMPO.

⁶ Io volana io ihany, andro faha-15, no anombohan'ny fetin'ny mofo tsy misy leviora hanajana AHY. Mandritra ny fito andro, dia mofo tsy misy leviora ihany no hohaninareo.

⁷ Ny andro voalohany amin'ireo andro fito ireo, dia hisy fanompoam-pivavahana hivorianareo, ka aza manao ny raharaha andavanandro ianareo.

⁸ Isan'andro mandritra ireo andro fito ireo, dia sorona levonina amin'ny afo no haterinareo ho AHY. Ary ny andro fahafito, dia hisy indray fanompoam-pivavahana hivorianareo, ka aza manao ny raharaha andavanandro ianareo.

⁹ Dia niteny tamin'i Mosesy ny TOMPO

¹⁰ mba hamepetra ny Israelita hoe: Rehefa tafiditra any amin'ny tany izay omeko anareo ianareo ka hijinja ny vokatrareo any, dia mitondra ilay amboara voalohany amin'ny vary orza hojinjainareo ho any amin'ny mpisorona.

¹¹ Hahevahevany eo anatrehako no fomba fanolorana ilay amboara, mba hahazoanareo sitraka amiko; ka ny ampitson'ny sabata no hanevahevany azy eo anatrehako.

¹² Iny andro hanoloranareo ny amboaram-bary iny, dia manatera zanakondrilahy tsy misy kilema sady iray taona ianareo mba ho sorona dorana manontolo ho Ahy TOMPO.

¹³ Ny fanatitra vokatry ny tany hampombaina io sorona io kosa dia koba lafarinina tsara milanja enina kilao, voadity tamin'ny menaka, ka hatao fanatitra levonina amin'ny afo mba ho hanitra ankasitrahiko; ary ny fanatitra araraka dia divay iray litatra sy sasany.

¹⁴ Alohan'izany andro hitondranareo ny amboaram-bary ho fanatitra ho Ahy Andriamanitrareo izany, dia aza mbola misy ihinanana ny mofo na lango na voambary avy amin'ny vokatra vao niakatra: ho fepetra raikitra hatrany hatrany izany ho anareo, na aiza na aiza honenanareo.

¹⁵ Manisa fito herinandro ianareo, miantomboka amin'io ampitson'ny sabata io, izany hoe miantomboka amin'ilay andro nitondranareo ny amboaram-bary voalohany ho fanatitra hahevaheva eo anatrehako. Ho fito herinandro mipaka izany;

¹⁶ ka amin'ny ampitson'ny sabata fahafito dia dimampolo andro no ho voaisanareo. Amin'io andro io dia manolora fanatitra vaovao ho Ahy TOMPO indray ianareo;

¹⁷ ka mitondra, avy amin'ny fonenanareo, mofo roa ho fanatitra hahevaheva eo anatrehako. Ireo mofo ireo dia hatao amin'ny koba lafarinina tsara, milanja telo kilao, ka hasiana leviora no hanendasana azy: voaloham-bokatra natokana ho Ahy TOMPO izany.

¹⁸ Miaraka amin'ireo mofo ireo, ny haterinareo koa dia zanakondrilahy fito tsy misy kilema samy iray taona, sy ombilahy iray ary ondrilahy roa mba hatao sorona dorana manontolo ho AHY; ho sorona levonina amin'ny afo ireo mba ho hanitra ankasitrahina ho AHY, sady hampombaina izany ny fanatitra vokatry ny tany sy ny fanatitra araraka.

¹⁹ Hisy koa osilahy iray hataonareo sorona fanalana ny ota, ary zanakondrilahy roa samy iray taona hataonareo sorom-pihavanana.

²⁰ Hahevahevan'ny mpisorona eo anatrehako ireo zanakondrilahy roa ireo mbamin'ny mofo avy amin'ny voaloham-bokatra: dia zava-masina ho Ahy TOMPO izany ka ho anjaran'ny mpisorona.

²¹ Amin'io andro io, dia hisy fanompoam-pivavahana hivorianareo, ka aza manao ny raharaha andavanandro ianareo: ho fepetra raikitra hatrany hatrany izany ho anareo, na aiza na aiza honenanareo.

²² Raha mijinja ny vokatry ny tanimbarinareo ianareo, dia aza jinjaina ny eny an-tsisiny; ary aza tsimponina ny salohim-bary natao hotsimponin'ny hafa amin'ny vokatrareo, fa avelao izany ho an'ny mahantra sy ny vahiny. Izaho no TOMPO Andriamanitrareo.

²³ Dia niteny tamin'i Mosesy ny TOMPO

²⁴ mba hamepetra ny Israelita hoe: Ny andro voalohan'ny volana fahafito dia ho andro fitsaharana ho anareo; hisy fanompoam-pivavahana hivorianareo amin'izany ka hihobianareo Ahy mba hahatsiarovako anareo.