Asan'ny Apôstôly

Toko faha-18

⁴ Isaky ny andro sabata, dia nifanakalo hevitra tao amin'ny sinagoga i Paoly ary niezahany horesen-dahatra na ny Jiosy na ny Grika.

⁵ Rehefa tonga avy any Masedonia i Silasy mbamin'i Timoty, dia ny toriteny no nimasoan'i Paoly, ary nambarany tamin'ny Jiosy fa i Jesoa no ilay Mesia.

⁶ Kanefa nanohitra sy nanevateva azy ry zareo; ka dia nanopakopa-damba i Paoly sady nanao taminy hoe: Anareo ny andraikitra raha toa ka manalavitra an'Andriamanitra ianareo, fa afaka adidy aminareo aho. Manomboka anio dia any amin'ny hafa firenena no halehako.

⁷ Dia niala teo i Paoly ka nankao amin'i Tisio Josta, mpanaja an'Andriamanitra, izay nanan-trano nifanolotra tamin'ny sinagoga.

⁸ Kanefa nino ny Tompo i Krispo, lehiben'ny sinagoga, mbamin'ny ankohonany manontolo; ary maro koa ny Korintianina nihaino an'i Paoly no tonga mpino ary natao batisa.

⁹ Indray alina dia nisehoam-pahitana i Paoly, ka nilazan'ny Tompo hoe: Aza matahotra, fa mitenena hatrany ary aza mangina.

¹⁰ Fa momba anao Aho, ary tsy hisy olona afaka hihazona anao mba hampahorina, satria vahoaka maro no voatokana ho Ahy amin'ity tanana ity.

¹¹ Nitoetra herintaona sy tapany tao Korinto i Paoly, ka nampianatra ny tenin'Andriamanitra tamin'ny olona.

¹² Fony i Galiona no governora tany Akaia, dia niara-nioko namely an'i Paoly ny Jiosy ary nitondra azy teo amin'ny fitsarana

¹³ ka nanao hoe: Mitaona ny olona hanaraka fivavahana mifanohitra amin'ny lalanan'i Mosesy io lehilahy io!

¹⁴ Efa ndeha hiteny indrindra i Paoly no nilaza tamin'ny Jiosy i Galiona hoe: Ry Jiosy, raha momba ny hoe heloka bevava na zavatra ratsy natao, dia vonon-kihaino anareo aho.

¹⁵ Fa raha voambolana sy anarana ary lalananareo manokana no iadianareo hevitra, dia raharahanareo; fa izaho tsy te hitsara an'izany.

¹⁶ Dia noroahin'i Galiona hiala teo amin'ny fitsarana ny Jiosy.

¹⁷ Fa nosamborin'izy rehetra kosa i Sostena, lehiben'ny sinagoga, ka nokapohiny teo anoloan'ny fitsarana. Nefa tsy nisy nahoan'i Galiona izany.

¹⁸ Mbola tafajanona elaela tao Korinto i Paoly. Avy eo dia nanao veloma ny havana iray finoana izy ka niondrana nankany Siria, niarahan-dry i Prisila sy i Akoila. Talohan'ny hiondrana, dia niharatra volon-doha tao Senkrea i Paoly, satria nisy voady nataony.

¹⁹ Ary tonga tao Efeso izy ireo; dia nandao azy mivady i Paoly ka nankany amin'ny sinagoga ary nifanakalo hevitra tamin'ny Jiosy.

²⁰ Nangatahin-dry zareo izy mba hitoetra maharitraritra, kanefa tsy nety

²¹ fa nanao veloma azy sady niteny hoe: Raha sitrapon'Andriamanitra, dia mbola hiverina aty aminareo aho. Ary dia niondrana an-tsambo niala tao Efeso i Paoly.

²² Nony tody tao Kesaria izy, dia niakatra tany Jerosalema mba hiarahaba ny Fiangonana; izay vao nidina nankany Antiokia.

²³ Rehefa avy nijanona kelikely tao izy, dia lasa indray nitety mifanesy ny faritany Galatia sy Frijia, ka nampahery ny mpianatra rehetra.

²⁴ Tonga tao Efeso ity Jiosy atao hoe Apolao, teraka tany Aleksandria, lehilahy mpandaha-teny mahay sady nahalala tsara dia tsara ny Soratra Masina.

²⁵ Efa nianatra ny lalana nosoritan'ny Tompo izy ary nafana fo nanambara sy nampianatra mazava tsara momba an'i Jesoa, saingy ny batisan'i Johany no hany fantany.

²⁶ Niteny tamim-pahasahiana tao amin'ny sinagoga i Apolao; ary nony nandre azy i Prisila sy i Akoila, dia naka azy ho any aminy ka nanazava marina kokoa taminy momba ny lalana nosoritan'Andriamanitra.

²⁷ Avy eo dia nanam-paniriana ho any Akaia i Apolao; ka nampirisika azy ny havana iray finoana sady nanoratra taratasy ho an'ny mpianatra amin'io faritany io mba handraisany azy tsara. Nony tafapaka tany i Apolao, dia nanampy tokoa ireo olona efa niasan'ny fahasoavan'Andriamanitra ka tonga mpino;

²⁸ teny feno hery tokoa no nandreseny lahatra ny Jiosy ampahibemaso ka nanaporofoany tamin'ny alalan'ny Soratra Masina fa i Jesoa no ilay Mesia.

Toko faha-19

¹ Raha mbola tany Korinto i Apolao, dia namakivaky ny havoana lembalemban'i Azia Minora kosa i Paoly ka tonga tao Efeso. Mpianatra vitsivitsy no hitan'i Paoly tao

² ka nanontaniany hoe: Efa nandray ny Fanahy Masina ve ianareo fony vao nino? Dia novalian'ireo hoe: Tsy renay akory aza fa misy ny Fanahy Masina.

³ Ka hoy indray i Paoly nanontany hoe: Batisan'iza moa no voarainareo? Dia nataon'ireo hoe: Ny batisan'i Johany.

⁴ Ary hoy i Paoly taminy: I Johany dia nanao batisa ny olona nanaiky hiala tamin'ny toe-dratsy ary nilaza tamin'ny vahoaka mba hino an'Ilay ho tamy aoriany, izany hoe i Jesoa.

⁵ Raha nahare izany teny izany ireto mpianatra, dia nangataka hatao batisa amin'ny anaran'i Jesoa Tompo.

⁶ Nametrahan'i Paoly tanana izy rehetra ka nahazo ny Fanahy Masina, ary dia niteny tamin'ny fiteny tsy fantatra sady nilaza hafatra avy amin'Andriamanitra.

⁷ Lehilahy avokoa ireo mpianatra ireo ary tokony ho 12 no isany.

⁸ Dia nankao amin'ny sinagoga i Paoly, ka niteny tamim-pahasahiana; nandritra ny telo volana izy dia nifanakalo hevitra sady niezaka handresy lahatra ny amin'ny Fanjakan'Andriamanitra.

⁹ Maro anefa no nikiribiby tsy nety nino sady naniratsira teo imason'ny besinimaro ny lalana nosoritan'ny Tompo. Dia niala teo amin-dry zareo i Paoly ary nitondra mpianatra niaraka taminy, ka nitoriteny isan'andro tao amin'ny sekolin'i Tirano.

¹⁰ Naharitra roa taona mahery izany, ka nandre ny tenin'ny Tompo avokoa ny mponina manerana ny faritany Azia, na Jiosy na hafa firenena.

¹¹ Ary asa mahagaga misongadina no nataon'Andriamanitra tamin'ny alalan'i Paoly.

¹² Hatramin'ny tapa-damba isan-karazany nakasika an'i Paoly no nentina teo amin'ny marary, ka nahafaka ny aretina ary nampiala ny fanahy ratsy taminy.

¹³ Nisy Jiosy sasantsasany koa nivezivezy nandroaka ny fanahy ratsy tamin'ny marary ary nanandrana nampiasa ny anaran'i Jesoa Tompo. Fa hoy ry zareo tamin'ny fanahy ratsy: Amin'ny anaran'ilay Jesoa torin'i Paoly no andidiako anareo hiala!

¹⁴ (Ny mpanao izany dia izy fito mirahalahy zanaky ny mpisorombe jiosy atao hoe Seva).

¹⁵ Fa namaly azy ireo kosa ny fanahy ratsy nanao hoe: Fantatro i Jesoa, ary tsy vahiny amiko i Paoly; fa mba iza kosa ianareo?

¹⁶ Dia niantoraka tamin'ireto zanakalahin'i Seva ralehilahy itoeram-panahy ratsy ka nahery noho izy rehetra; nasiany mafy izy fito lahy, ka vaky nandositra ary niboridana sady naratra no niala tao an-tranon-dralehilahy.

¹⁷ Ren'ny mponina tao Efeso izany, na Jiosy na hafa firenena, ka raiki-tahotra izy rehetra ary nankalaza ny anaran'i Jesoa Tompo.

¹⁸ Tamin'ireo tonga mpino, dia maro no niaiky sy nanambara ampahibemaso izay nataony.

¹⁹ Betsaka ny mpanao majika no nitondra ny bokiny ka nandoro izany teo imason'ny olona rehetra. Rehefa natambatra ny tombam-bidin'ireo boky ireo, dia tafakatra 50.000 denary.

²⁰ Niely tsy azo tohaina toy izany ny tenin'ny Tompo ary nanaporofo ny heriny.

²¹ Taorian'ny nitrangan'izany zavatra izany, dia tapa-kevitra i Paoly fa hamakivaky an'i Masedonia sy i Akaia ary hankany Jerosalema, sady hoy izy: Rehefa tonga any aho, dia tsy maintsy ho hitako ihany koa i Roma.

²² Nirahin'i Paoly ho any Masedonia ny roa lahy tamin'ireo mpanampy azy, dia i Timoty sy i Erasta, fa ny tenany kosa dia mbola nisy fotoana nijanonany tany Azia.

²³ Tanatin'izany fotoana izany no nipoiran'ny tabataba be ny amin'ny lalana nosoritan'ny Tompo.

²⁴ Nisy lehilahy mpanefy volafotsy natao hoe Demetry; ilay tempolin'ny andriamanibavy Artemida no nanaovany sary madinidinika vita volafotsy ka niteraka loharanom-bola be ho an'ny mpiasany.

²⁵ Dia nantsoin'i Demetry ireo mpiasany sy izay rehetra mpanao asan-tanana tahaka azy ka nilazany hoe: Tompokolahy, fantatrareo fa izao asan-tanana izao no antoky ny harentsika.