Asan'ny Apôstôly

Toko faha-16

²⁸ Fa niantso mafy i Paoly nanao hoe: Aza mamono tena, fa indreto avokoa izahay!

²⁹ Dia nangataka jiro ilay mpiambina ka niditra faingana nankao amin'ny fonja anatiny indrindra; ary tora-kovitra izy no niantoraka teo anoloan'i Paoly sy i Silasy.

³⁰ Dia navoakan'ilay mpiambina izy roa lahy sady nanontaniany hoe: Inona, tompoko, no tokony hataoko mba hovonjena aho?

³¹ Dia novaliany hoe: Minoa an'i Jesoa Tompo, dia hovonjena ianao mbamin'ny ankohonanao!

³² Dia nitorian'i Paoly sy i Silasy ny tenin'ny Tompo ilay mpiambina mbamin'izay rehetra tao an-tranony.

³³ Tamin'izany ora izany, iny alina iny ihany, dia nandray azy roa lahy ilay mpiambina ka nanasa ny feriny; ary natao batisa niaraka tamin'izay izy sy ny ankohonany rehetra.

³⁴ Nentin'ilay mpiambina niakatra tao an-tranony i Paoly sy i Silasy ka norosoany sakafo. Ary niravoravo niaraka tamin'ny olona rehetra tao an-tranony ralehilahy, noho izy efa tonga mpino an'Andriamanitra.

³⁵ Nony maraina ny andro, dia naniraka mpitan-defona ireo mpanao fanjakana romanina hilaza amin'ny mpiambina hoe: Alefaso ireo olona ireo.

³⁶ Dia tonga ny mpiambina ka nampita hafatra tamin'i Paoly hoe: Nandefa baiko hanafahana anareo roa lahy ny mpanao fanjakana. Mahazo mivoaka ianareo, ka mandehana soa aman-tsara.

³⁷ Fa hoy i Paoly tamin'ireo mpitan-defona: Olona mizaka ny zom-pirenena romanina izahay, kanefa nodarofana kapoka teo imason'ny vahoaka na dia tsy voatsara ara-dalana aza; ary koa nampidirina am-ponja. Ka ankehitriny ve dia havoakan-dry zareo an-tsokosoko izahay? Sanatria! Aoka ny tenan'ireo mpanao fanjakana mihitsy no ho tonga aty hamoaka anay!

³⁸ Dia notaterin'ny mpitan-defona tamin'ny mpanao fanjakana romanina izany teny izany. Raiki-tahotra ry zareo nony nandre fa olona mizaka ny zom-pirenena romanina i Paoly sy i Silasy.

³⁹ Dia tonga ireo mpanao fanjakana ka niteny moramora tamin'izy roa lahy ary nitondra azy nivoaka ny fonja sady nangataka azy mba hiala amin'ny tanana.

⁴⁰ Rehefa tafavoaka ny fonja i Paoly sy i Silasy, dia nankany an-tranon'i Lidia. Ary lasa nandeha izy roa lahy nony avy nahita sy nampirisika ny havana iray finoana.

Toko faha-17

¹ Dia nandalo an'i Amfipoly sy i Apolonia ry i Paoly sy i Silasy ka tonga tao Tesalonika izay nisy sinagoga anankiray fivavahan'i Jiosy.

² Nankao amin'ilay sinagoga i Paoly araka ny fanaony. Sabata telo nifanarakaraka no nifanakalozany hevitra momba ny Soratra Masina tamin'ny olona tao;

³ nohazavainy sady nasehony taminy fa, araka ny Soratra Masina, dia tsy maintsy nijaly ny Mesia ary nitsangana velona avy tany amin'ny maty. Ka hoy i Paoly: Izao Jesoa ambarako aminareo izao no ilay Mesia!

⁴ Nisy sasantsasany resy lahatra tamin'ireo mpiangona ka niray anjara tamin'i Paoly sy i Silasy. Nanao toy izany koa ny olona marobe tamin'ireo Grika mpanaja an'Andriamanitra, ary tsy vitsy tamin'ireo vehivavy ambony toerana.

⁵ Velom-pialonana kosa ny Jiosy, ka namory olon-dratsy avy amin'ireo vahoaka be nahaona teny an-dalambe. Dia nampihotakotaka ny olona ny Jiosy ka nampisavorovoro ny tanana. Notamin-dry zareo ny tranon'i Jasona ary notadiaviny hoentina eo anatrehan'ny vahoaka ry i Paoly sy i Silasy.

⁶ Nony tsy hitan-dry zareo izy roa lahy, dia i Jasona sy ny havana iray finoana vitsivitsy no nosarihiny hanatrika an'ireo lehiben'ny tanana sady nohorakorahiny hoe: Nanakorontana ny lafy valon'ny tany izy roa lahy ireny, ary mby eto amintsika ankehitriny

⁷ ka nampiantranoin'i Jasona. Mifanohitra amin'ny didin'ny amperora romanina anefa ny fihetsik'izy rehetra ireo satria ambarany fa misy mpanjaka hafa koa atao hoe Jesoa.

⁸ Nampisahotaka ny vahoaka sy ny lehiben'ny tanana izany teny izany;

⁹ ka nandoa vola hatao antoka ry i Jasona sy ny namany vao navelan'ireo lehiben'ny tanana handeha.

¹⁰ Nony alina ny andro, dia nasain'ny havana iray finoana hiainga ho any Berea i Paoly sy i Silasy. Nony tonga tany izy roa lahy, dia nankany amin'ny sinagoga fivavahan'ny Jiosy.

¹¹ Tsara toe-po amam-panahy kokoa ireto Jiosy ireto noho ny tany Tesalonika sady nazoto tokoa nandray ny tenin'Andriamanitra. Nodinihin-dry zareo isan'andro ny Soratra Masina hanamarinany izay lazain'i Paoly.

¹² Koa maro tamin'ireo Jiosy no nino; ary, tamin'ireo Grika, dia tsy vitsy ny vehivavy ambony toerana sy ny vadiny no nino.

¹³ Kanefa nony fantatry ny Jiosy tany Tesalonika fa nitorian'i Paoly ny tenin'Andriamanitra koa tao Berea, dia nankany ry zareo nampitabataba sy nampisahotaka ny vahoaka.

¹⁴ Niaraka tamin'izay dia nasain'ny havana iray finoana nankany amoron-dranomasina i Paoly fa i Silasy mbamin'i Timoty kosa no mbola nijanona tao Berea.

¹⁵ Ireo nanatitra an'i Paoly dia nitondra azy hatrany Atena. Ary dia niverina tany Berea indray izy ireo nitondra hafatra ho an'i Silasy mbamin'i Timoty; fa niangavian'i Paoly izy roa lahy mba hamonjy azy faran'izay haingana any Atena.

¹⁶ Raha mbola niandry an'i Silasy sy i Timoty tao Atena i Paoly, dia niontana ny fony tamin'izy nahita ity tanana feno sampy.

¹⁷ Koa tao amin'ny sinagoga i Paoly no nifanakalo hevitra tamin'ny Jiosy sy ny mpanaja an'Andriamanitra, ary teny an-kianja isan'andro tamin'ny olona sendra teo.

¹⁸ Nisy koa filozofy epikorianina sy stoisianina nifanakalo hevitra taminy, ka hoy ny sasany hoe: Inona no tian'ity mpirediredy holazaina? Ny sasany kosa, nony nandre an'i Paoly nanambara ny Vaovao Mahafaly momba an'i Jesoa sy ny fitsanganan'ny maty, dia niteny hoe: Toa andriamanitra vahiny no toriny!

¹⁹ Dia nentin'izy rehetra i Paoly ka notarihiny hankeo amin'ny antenimiera Areopazy sady nilazany hoe: Moa azonay fantarina ve izao fampianarana vaovao resahinao izao?

²⁰ Zavatra hafahafa manko izao renay aminao izao, ka tianay ho fantatra izay mety ho hevitr'izany.

²¹ (Fa ny Atenianina rehetra mbamin'ny vahiny niara-nonina taminy moa dia nandany andro fotsiny hilaza na hihaino izay zava-baovao farany).

²² Dia nijoro teo afovoan'ny Areopazy i Paoly ka nanao hoe: Ry Atenianina, hitako fa amin'ny lafin-javatra rehetra dia olona fatra-pivavaka ianareo.

²³ Raha nitsangantsangana eran'ny tanana aho, ka nijerijery ireo toeram-pivavahanareo, dia nahita alitara anankiray misy soratra hoe: Ho an'ilay Andriamanitra tsy fantatra. Ka izany tsy fantatrareo izany, kanefa ivavahanareo, no ambarako aminareo.

²⁴ Ilay Andriamanitra Izay nanao izao tontolo izao sy ny zavatra rehetra eo aminy no Tompon'ny lanitra sy ny tany, ka tsy mba mitoetra ao anaty tempoly nataon-tanan'olombelona.

²⁵ Tsy hoe orin-javatra Andriamanitra ka tompoin'olombelona, satria Izy ihany no manome ny aina sy ny fofon'aina mbamin'ny zavatra rehetra ho an'ny olombelona tsy an-kanavaka.

²⁶ Noariny avy amin'olona anankiray ny firenena rehetra mba honina manerana ny tany tontolo; ary nofariparitany koa ny vanim-potoana hiainany sy ny zaratany honenany.

²⁷ Nataon'Andriamanitra izany mba hahazoan'ny olombelona mitady Azy, sao izy ireo mba mety maminavina Azy sy mifandray aminy; fa Andriamanitra dia tsy lavitra antsika tsirairay avy,

²⁸ satria Ao aminy no ivelomantsika sy ihetsiketsehantsika ary isiantsika. Izany indrindra koa no nilazan'ny mpanao tononkira sasany teo aminareo hoe: Avy amin'Andriamanitra no ipoirantsika.

²⁹ Koa satria avy amin'Andriamanitra no ipoirantsika, dia tsy tokony hoheverintsika fa Andriamanitra dia mitovy endrika amin'ny sampy volamena na volafotsy na vato, sary sokitra vokatry ny fahaizana amam-pisaintsainan'olombelona.

³⁰ Kanefa ninian'Andriamanitra tsy jerena intsony ireo andro tsy nahalalana Azy, fa antsoiny hiala amin'ny toe-dratsy avokoa ny olona rehetra, na aiza na aiza.

³¹ Nisy manko andro anankiray natao hitsaran'Andriamanitra izao tontolo izao araka ny rariny, amin'ny alalan'ny lehilahy anankiray efa voatendriny; ary ny nananganany Azy ho velona avy any amin'ny maty no nataony porofon'izany ho an'ny olona rehetra!

³² Vao nandre an'i Paoly niteny momba ny fitsanganan'ny maty ireo olona teo amin'ny Areopazy, dia tao ny naneso azy ary tao kosa ny nilaza hoe: Mbola hihaino anao indray izahay ny amin'io zavatra io.

³³ Dia toy izany no nandaozan'i Paoly azy ireo.

³⁴ Kanefa nisy olona sasantsasany nikambana taminy ary tonga mpino: anisan'ireny i Dionisy, mambran'ny antenimiera Areopazy, sy vehivavy atao hoe Damarida ary ny sasany hafa koa izay niaraka tamin'ireo.

Toko faha-18

¹ Taorian'izany, dia tafala tao Atena i Paoly ka tonga tany Korinto.

² Hitany tao ity Jiosy atao hoe Akoila izay teraka tany Ponto; vao tonga avy any Italia i Akoila mbamin'i Prisila vadiny, satria nodidian'ny amperora Klaody hiala tany Roma daholo ny Jiosy. Nanatona azy mivady i Paoly;

³ ary satria mitovy asa tanana aminy rahateo i Paoly (fa samy mpanao lay izy ireo), dia nitoetra tao amin-dry i Akoila sy i Prisila izy ary nifarimbona asa taminy.