Asan'ny Apôstôly

Toko faha-15

¹⁹ Koa dia izao no hevitro: tsy tokony homentsika fahasahiranana ny hafa firenena mitodika amin'Andriamanitra.

²⁰ Fa aoka hanoratantsika izy ka hangatahina tsy hihinana ny hena maloto natao sorona tamin'ny sampy, tsy hanao fifandraisana mamoafady ara-panambadiana, tsy hihinana ny henam-biby tsy nosomindaina, ary hifady ny ra.

²¹ Satria efa torina hatramin'ny ela isan-tanana ary famaky ao amin'ny sinagoga isaky ny sabata ny lalanan'i Mosesy.

²² Tamin'izay dia hitan'ny apostoly sy ny loholona mbamin'ny Fiangonana manontolo fa mety ny hifidianana solotena avy amin'ny mpivory ka halefa hiara-dia amin'i Paoly sy i Barnaba hankany Antiokia. Dia voafidy i Joda, atao hoe Barsabasy, ary koa i Silasy, samy lehilahy eken-teny teo amin'ny havana iray finoana.

²³ Toy izao no vakin'ilay taratasy nampitondraina azy roa lahy: Izahay apostoly sy loholona havanareo dia manolotra ny fiarahabana ho anareo havana hafa firenena monina any Antiokia sy Siria ary Silisia.

²⁴ Renay fa misy olona avy aty aminay manao fampianarana mampikorontan-tsaina sy mampitebiteby fanahy anareo, kanefa tsy nahazo teny taminay velively.

²⁵ Noho izany, dia hitanay fa mety ary lany eranay rehetra ny hifidianana solotena halefa aty aminareo. Ireo solotena ireo dia hiaraka amin'i Barnaba sy i Paoly, rahalahy malalanay,

²⁶ izay nanao vy very ny ainy ho voninahitr'i Jesoa Kristy Tompontsika.

²⁷ Indreny ary irahinay i Joda sy i Silasy hilaza mivantana aminareo izany teny izany koa.

²⁸ Fa sitraky ny Fanahy Masina sy ny tenanay ny tsy hampitondra enta-mavesatra anareo, afa-tsy ireto zavatra tsy maintsy hotandremana ireto:

²⁹ tsy mihinana ny hena natao sorona tamin'ny sampy; mifady ny ra; tsy mihinana ny henam-biby tsy nosomindaina; ary tsy manao fifandraisana mamoafady ara-panambadiana. Tsara tokoa no ataonareo raha mitandrin-tena tsy hanao izany. Veloma!

³⁰ Dia nalefa ireo iraka mbamin'i Barnaba sy i Paoly ka nidina nankany Antiokia. Novorin'izy efa-dahy ny mpino marobe tao an-tanana ka notolorany an'ilay taratasy.

³¹ Novakina izany ka samy dibo-kafaliana izy rehetra noho ny fampaherezana nentin'ilay taratasy.

³² I Joda sy i Silasy izay samy mpaminany, dia niteny naharitra tamin'ny havana iray finoana ka nampirisika sy nampahery azy ireo.

³³ Ary rehefa nitoetra elaela tao Antiokia izy roa lahy, dia nalefan'ireo hiverina soa aman-tsara any amin'ny naniraka azy. [

³⁴ Kanefa sitrak'i Silasy ny hijanona tao.]

³⁵ Nitoetra tany Antiokia kosa i Paoly sy i Barnaba; ary nampianatra sy nitory ny tenin'ny Tompo izy roa lahy mbamin'ny namany maro.

³⁶ Rehefa afaka andro vitsivitsy, dia hoy i Paoly tamin'i Barnaba: Andeha hiverenantsika hovangiana ireo havana iray finoana any amin'ny tanana rehetra izay efa nitoriantsika ny tenin'ny Tompo mba hahitana izay manjo azy any.

³⁷ Tian'i Barnaba hoentina hiara-dia amin'izy roa lahy i Johany, ilay atao hoe Marka;

³⁸ saingy noheverin'i Paoly fa tsy tokony hoentina izy io satria nandao azy roa lahy tany Pamfilia ka tsy niara-niasa taminy intsony.

³⁹ Dia nifanditra mafy izy roa lahy ka nisara-dia. I Barnaba moa nitondra an'i Marka, ary niondrana an-tsambo ho any Sipra.

⁴⁰ I Paoly kosa nifidy an'i Silasy ho mpiara-miasa, ary niainga rehefa nankinin'ireo havana iray finoana tamin'ny fahasoavan'ny Tompo.

⁴¹ Dia lasa ry i Paoly namakivaky an'i Siria sy i Silisia ka nampahery ny Fiangonana rehetra.

Toko faha-16

¹ Tonga tany Derba i Paoly, ary avy eo dia tany Listra. Nisy mpino anankiray natao hoe Timoty tao Listra, Jiosy niova ho kristianina ny reniny fa ny rainy kosa Grika.

² Tsara laza tamin'ireo havana iray finoana tany Listra sy tany Ikonioma i Timoty

³ ka nokasain'i Paoly ho mpiara-dia aminy. Dia nalain'i Paoly i Timoty ka noforany, mba tsy hanan-kolazaina ny Jiosy mponina amin'iny faritany iny, satria fantatry ny besinimaro fa Grika ny rainy.

⁴ Tamin'ny tanana rehetra notetezin'i Paoly sy ny namany dia notolorany an'ireo hevitra tapaky ny apostoly sy loholona tany Jerosalema ny mpino, ary nasainy nitandrina izany.

⁵ Koa nihamatotra ara-pinoana ny Fiangonana rehetra ary nitombo isa hatrany isan'andro vaky.

⁶ Noraran'ny Fanahy Masina tsy hitory ny tenin'Andriamanitra tany Azia i Paoly sy ny namany ka nandeha namaky ny faritany Frijia sy Galatia.

⁷ Nihazo ny faritany Mizia izy ireo ary nitady hankany Bitinia, kanjo tsy navelan'ny Fanahin'i Jesoa.

⁸ Dia namaky an'i Mizia ry i Paoly ka nanitsy nankany Troasy, tanana seranana.

⁹ Tamin'ny alina dia nisehoam-pahitana i Paoly: nisy lehilahy Masedonianina nijoro teo anatrehany, sady niangavy azy hoe: Mita mankaty Masedonia, ka vonjeo izahay!

¹⁰ Tsy nangataka andro izahay taorian'izany fahitan'i Paoly izany, fa nivonona hiainga ho any Masedonia, satria azonay antoka fa nantsoin'Andriamanitra hitondra ny Vaovao Mahafaly amin'ny olona any izahay.

¹¹ Niondrana an-tsambo tao Troasy izahay ka nizotra nivantana ho any amin'ny nosy Samotrasy; ary tafapaka hatrany Neapoly, ny ampitson'iny.

¹² Avy eo izahay, dia nankany Filipy, tananan'ny faritany voalohany ao Masedonia, sady zanatany romanina. Nijanona andro maromaro tao amin'io tanana io izahay.

¹³ Tamin'ny andro sabata dia lasa tany ivelan'ny vavahadin-tanana izahay, ka nankeny amoron'ny ony satria noheverinay fa nisy toeram-pivavahana ho an'ny Jiosy teny. Nipetrapetraka izahay ka tafaresaka tamin'ny vehivavy tafavory teo.

¹⁴ I Lidia no anaran'ny anankiray tamin'ireo vehivavy ireo; avy any an-tananan'i Tiatira izy, mpivarotra lamba jaky mena sarobidy, ary mpanaja an'Andriamanitra. Nihaino tsara anay ravehivavy io ary nosokafan'ny Tompo ny fony mba ho babon'ny teny nolazain'i Paoly.

¹⁵ Nony avy natao batisa izy mbamin'ny ankohonany, dia nanasa anay i Lidia nanao hoe: Satria noheverinareo fa mino ny Tompo tokoa aho, dia mandrosoa ianareo hiantrano any amiko. Ary notereny mihitsy izahay.

¹⁶ Raha nandeha nankeny amin'ilay toeram-pivavahana izahay indray andro, dia notsenain'ity zazavavy anankiray mpanompon'olona. Azona fanahy atao hoe Pitona razazavavy; ary asesik'io fanahy io hanambara zavatra izy ka nampahazo vola be ireo tompony noho ny fanambarana nataony.

¹⁷ Nanjohy anay sy i Paoly izy sady niantsoantso hoe: Mpanompon'ilay Andriamanitra Avo indrindra ireo lehilahy ireo! Ny lalam-pamonjena no toriny aminareo!

¹⁸ Andro maromaro no nanaovan-drazazavavy toy izany. Tofoka i Paoly nony ela ka nitodika azy ary niteny tamin'ny fanahy Pitona hoe: Mandidy anao amin'ny anaran'i Jesoa Kristy aho, miala aminy! Dia niala taminy teo no ho eo ilay fanahy.

¹⁹ Nony hitan'ny tompony fa tsy anantenana fahazoam-bola intsony ity mpanompovaviny, dia ry i Paoly sy i Silasy no nosamboriny ka notaritaritiny hankeo an-kianja hiatrika ny manampahefana.

²⁰ Natolony tamin'ny mpanao fanjakana romanina izy roa lahy sady nataony hoe: Mampisavorovoro vahoaka eto amin'ny tananantsika ireto lehilahy ireto. Jiosy izy roa lahy ireo

²¹ ary nampianatra fomba amam-panao tsy azontsika raisina na arahina, noho ny maha romanina antsika.

²² Dia nirohotra namely an'i Paoly sy i Silasy ny vahoaka; ary anisan'ireo mpanao fanjakana nendahina fitafiana sy nokaravasina izy roa lahy.

²³ Nony avy nandalasina kapoka izy roa lahy, dia nampidirina am-ponja ka nofeperana ilay mpiambina mba hanao andrimaso azy tsara.

²⁴ Vao azon'ny mpiambina izany baiko izany, dia nampidiriny tao am-ponja anatiny indrindra izy roa lahy ary nasiany boloky hazo ny tongony.

²⁵ Tamin'ny mamatonalina, dia nivavaka sy nihira fiderana an'Andriamanitra i Paoly sy i Silasy; ary nihaino azy roa lahy ny gadra hafa.

²⁶ Dia injay nisy horohorontany mafy tonga tampoka nanozongozona ny fonja hatrany amin'ny fanorenany. Nivoha nidanadana ho azy ny varavarana rehetra, ary samy nivaha ho azy ny fatoran'ireo gadra rehetra.

²⁷ Tamin'izay dia taitra ilay mpiambina; ary nony hitany fa nivoha avokoa ny varavaran'ny fonja, dia nanatsoaka ny sabany saika hamono tena izy satria nampoiziny ho efa nitsoaka nandositra avokoa ny gadra.