Bena-Siràka

Toko faha-36

⁵ Aoka ho fantany Ianao toy ny nahafantaranay koa fa tsy misy Andriamanitra afa-tsy Ianao, Tompo o !

⁶ Havaozy ny famantarana fahiny ary indrao zy ny zava-mahagaga.

⁷ Omeo voninahitra ny hery amam-pahefanao.

⁸ Aoka ho hetsehinao ary hatosakao ny fahavinirana amam-pahatezeranao

⁹ mba handringana ny mpanohitra anay ary hamongotra ny fahavalonay!

¹⁰ Hafaingano ny fotoanandro farany ary tsarovy fa efa voatendrinao izany; dia hambaran'ny olona ny zava-dehibe nataonao.

¹¹ Aoka ny afom-pamaizanao handevona izay afa-mandositra; ary aoka ho tojo fahaverezana ireo mpampahory ny vahoakanao!

¹² Torotoroy ny lohan'ireo lehibem-pahavalo, dia ireo manao hoe: "Tsy misy tahaka anay!"

¹³ Angony avokoa ny foko taranak'i Jakoba.

¹⁶ Ka avereno aminy indray ny zarataniny toy ny nananany azy tamin'ny voalohany.

¹⁷ TOMPO o, amindrao fo ilay vahoaka mitondra ny anaranao, dia i Israely izay nataonao hoe lahimatoanao.

¹⁸ Angorahy ilay tanana misy ny Toeramasinao, dia i Jerosalema izay toeram-pitsaharanao.

¹⁹ Ataovy manenika an'i Tsiona ny fankalazana ny asanao mahagaga ary manenika ilay tempolinao ny voninahitrao.

²⁰ Aoka hijoroanao ho vavolombelona ny aminay vahoakanao izay noarinao tany am-boalohany; ary tanteraho ny faminaniana izay notononina tamin'ny anaranao.

²¹ Omeo valisoa ireo olona manantena Anao mba ho hita fa azo itokiana ireo mpaminaninao!

²² TOMPO o, henoy ny vavak'ireo mpanomponao araka ny hamoram-ponao amin'ny vahoakanao; dia ho fantatry ny mponina rehetra ambonin'ny tany fa Ianao no Tompo Andriamanitra maharitra mandrakizay.

²³ Hanina isan-karazany nolevonin'ny kibo kanefa misy hanina tsaratsara kokoa noho ny hafa.

²⁴ Ny biby voahaza dia avahan'ny lanilany amin'ny alalan'ny tsiron-kenany; toy izany koa ny teny mamitaka dia avahan'ny fo mieritreritra.

²⁵ Hahatonga fahasahiranana ny fo miolikolika; fa hamaly bontana azy ny olona voasedra.

²⁶ Hoekem-behivavy ho vady izay lehilahy aroso ho azy; kanefa ny zazavavy sasany dia tsaratsara kokoa noho ny hafa.

²⁷ Mahamirana endrika ny lahy, ny hatsaran-tarehin'ny vadiny, ary mihoatra noho izay zavatra iriny;

²⁸ raha hatsaram-po sy halemem-panahy no manenika ny tenin'io vehivavy io, dia mihoatra noho ny an'ny lehilahy hafany anjaran'izany lehilahy izany.

²⁹ Ny lehilahy mahazo vady no manana santatry ny harena, dia mpanampy mitovy aminy sy andry natao hiankinany.

³⁰ Ny tany izay tsy misy fefy dia hanjakan'ny fandrobana; ary ny lehilahy izay tsy manam-bady dia hirenireny homban-tsentosento.

³¹ Tsy azo itokiana ny jiolahy fetsy izay mitsipika mifindrafindra tanana; toy izany koa ny lehilahy tsy manam-ponenana ka mandry any amin'izay aharivan'ny andro.

Toko faha-37

¹ Olona isan-karazany no milaza hoe: "Izaho koa sakaizanao", kanefa misy ihany ny sakaiza izay anarany fotsiny ihany.

² Alahelo mila hahafaty tokoa, raha namana aman-tsakaiza no mivadika ho fahavalo.

³ Ry hevi-dratsy o, voatefy avy aiza ianao no manarona ny tany amin'ny fitaka?

⁴ Misy ny namana finaritra raha faly ianao sakaizany, fa hanohitra anao kosa amin'ny androm-pahoriana.

⁵ Misy ny namana miara-sahirana aminao sakaizany, raha vokisanao sakafo ny kibony; kanjo ny ampingany no raisiny, rehefa manoloana ny ady.

⁶ Tsarovy ny sakaizanao, rehefa an'ady ianao; ary aza hadinoina izy, raha mahazo babo ianao.

⁷ Ny mpanolotsaina rehetra samy mandoka ny toroheviny, kanefa misy manolotsaina hotombontsoan'ny tenany.

⁸ Tandremo ny amin'ny mpanolotsaina ka fantaro aloha izay zavatra ilainy, fa ny tombontsoan'ny tenany no anoroany hevitra; tandremo sao voafandrika ho rembiny ianao,

⁹ ka mody hilazany hoe: "Tsara ny fihetsikao!", nefa hihatakataka izy mba hizaha izay hanjo anao.

¹⁰ Aza maka hevitra amin'izay mangarika anao, ary afeno amin'izay mialona anao ny fikasanao.

¹¹ Aza ny vehivavy no akana hevitra ny amin'ny rafivaviny na ny kanosa no akana hevitra ny amin'ny ady hatao; aza ny mpivarotra no akana hevitra ny amin'ny teti-bidy, na ny mpividy no akana hevitra ny amin'ny varotra; aza ny mpitsiriritra no akana hevitra ny amin'ny fankasitrahana, na ny tsy mangoraka no akana hevitra ny amin'ny fiantrana; aza ny malaina no akana hevitra ny amin'ny asa isan-karazany, na ny mpikarama isan-kerintaona no akanahevitra ny amin'ny famitan-javatra, na ny mpanompo kamo no akana hevitra ny amin'ny lahasa be; aza ireo olona ireo no ianteheranao na amin'ny torohevitra iray akory aza.

¹² Fa mahavara mifandray amin'olona tia vavaka, izay fantatrao ho mpitandrina ny didin'Andriamanitra sady manana toe-panahy mitovy amin'ny anao, ka hiaraka ory aminao raha sendra lavo ianao.

¹³ Aoka hifikiranao koa ny fikasan'ny fonao, satria tsy misy mpanolotsaina mahatoky toa azy;

¹⁴ fa mazana ny fon'olombelona no milaza zavatra betsaka aminy, mihoatra noho ny mpitily fito voapetraka hitily eo ambony havoana.

¹⁵ Fa mihoatra noho izany rehetra izany, dia mangataha amin'ny Avo Indrindra mba hitarihany lalana anao amin'ny fahamarinana.

¹⁶ Alohan'ny asa rehetra, aoka hiady hevitra; alohan'ny atao rehetra, aoka hisaintsaina!

¹⁷ Ao an-tsaina no ifotoran'ny hevitra;

¹⁸ ary karazan-tahony efatra no apoitrany: dia ny tsara sy ny ratsy, ary ny fiainana sy ny fahafatesana; kanefa ny lela hatrany hatrany no tompon'ny fanapahan-kevitra farany.

¹⁹ Misy olona kinga rehefa hananatra ny besinimaro, kanefa tsy vanon-ko inona raha ho an'ny tenany.

²⁰ Misy izay mahay mandahateny nefa halan'olona, ka tsy hanana hanin-kohanina akory izy;

²¹ fa tsy nomen'ny TOMPO azy ny ho ambinina eo anoloan'ny hafa, satria tsy manana fahendrena akory izy.

²² Misy izay hendry ho tombontsoany manokana ihany, ary ny vokatry ny fahalalany dia ho an'ny tenany.

²³ Misy kosa olon-kendry izay mampianatra mba hanasoavana ny mpiray firenena aminy; ary azo antoka ny vokatry ny fahalalany.

²⁴ Ho henika fitahiana ny olon-kendry toy izany; ary izay rehetra mahita azy hanao azy hoe sambatra.

²⁵ Azo isaina ihany ny androm-piainan'ny olona, fa tsy tambo isaina kosa ny andron'i Israely.