Bena-Siràka

Toko faha-40

²⁷ Ny fanajana ny TOMPO dia tahaka ny saha mahavokatra; ary miaro tsaratsara kokoa izany noho ny voninahitra isan-karazany.

²⁸ Anaka, aoka tsy ho fiaina-mpangataka no hataonao; aleo ny ho faty toy izay ny ho mpangata-dava.

²⁹ Ny fiainan'olona manandrandra ny sakafon'ny hafa dia tsy mba azo heverina velively ho fiainana; fa mandoto fanahy amin'ny hanin'ny hafa izy, kanefa zavatra tokony ho fadina mihitsy izany amin'ny olona manam-pahalalana sy tsara taiza.

³⁰ Eo am-bavan'izay tsy manan-kenatra dia toa mamy ny sakafo nangatahiny; fa ao an-kibony dia handoro hoatra ny afo izany.

Toko faha-41

¹ Ry fahafatesana o, akory ity hangidin'ny fahatsiarovana anao ho an'ny velona am-piadanana ao anatin'ny fananany, ho an'ny olona afaka ahiahy sy ambinina amin'ny zava-drehetra sady mbola matanjaka no manao izay mahafinaritra azy !

² Ry fahafatesana o, sitrako ny tendrinao ho an'ny olona mahantra sy mihareraka na efa tratra antitra sy vesaran'ahiahy isan-karazany na mikomy sy tsy mahay mandefitra intsony.

³ Anaka, aza atahorana ny fotoana voatendry hahafatesanao; tsarovy ireo nialoha anao sy izay ho avy any aoriana.

⁴ Tendry ampiharin'ny TOMPO amin'izay miaina rehetra izany; ka nahoana moa no ho lavinao ny sitrapon'ilay Avo Indrindra? Na folo taona no efa niainanao na zato taona na arivo taona, dia tsy horaharahaina izany any amin'ny toeran'ny maty any.

⁵ Zaza maharikoriko toetra ny zanaky ny mpanota izay miaina ao an-tranon'ny tsy mpivavaka.

⁶ Ho rava no alehan'ny lovan'ireo zanaky ny mpanota, ary fahafaham-baraka no miraikitra amin'ny taranany.

⁷ Ny ray tsy mpivavaka dia homen-janany tsiny, satria io rainy io no mahatonga azy ho afa-baraka.

⁸ Mampalahelo ianareo, ry olona tsy mpivavaka izay efa nahafoy ny lalanan'Andriamanitra Avo Indrindra.

⁹ Raha teraka ianareo, dia teraka hiharan'ny ozona; raha ho faty ianareo, dia ny ozona no ho anjaranareo.

¹⁰ Izay rehetra avy amin'ny tsinontsinona dia hiverina amin'ny tsinontsinona; toy izany no alehan'ny tsy mpivavaka izay manomboka iharan'ny ozona ka miafara amin'ny faharavana.

¹¹ Misaona ny olona noho ny hanjo ny vatana, fa tsy ho levona kosa ny lazan'ny mpivavaka.

¹² Imasoy tokoa ny hanan-daza tsara fa haharitra hanjohy anao izany, mihoatra noho ny vongam-bolamena arivo.

¹³ Andro azo isaina ny hoe fiainana sambatra, fa ny laza tsara kosa maharitra mandrakizay.

¹⁴ Tandremo amim-piadanana, rey anaka, ny fampianarako: ny fahendrena afenina sy ny rakitra tsy hita, inona no tombontsoa azo avy amin'izy roa tonta?

¹⁵ Aleo olona manafina ny hadalany toy izay olona manafina ny fahendreny.

¹⁶ Ho lazaiko aminareo ny zavatra tokony hahamenatra, satria tsy tsara fitahiry avokoa ny karazan-kenatra; sady tsy tombana mahatoky hatrany no ataon'ny besinimaro amin'ny zava-drehetra.

¹⁷ Manana henatra ny amin'ny fitondrantena ratsy eo anatrehan'ny ray aman-dreny na ny amin'ny filazana lainga eo anatrehan'ny lehibe sy manampahefana;

¹⁸ manana henatra ny amin'ny fanaovan-keloka eo anatrehan'ny mpitsara sy ny olon-dalana, na ny amin'ny fandikana lalanan'Andriamanitra eo anatrehan'ny fiangonana sy ny vahoaka; manana henatra ny amin'ny famitahana eo anatrehan'ny namana aman-tsakaiza,

¹⁹ na ny amin'ny fanaovana halatra eo anatrehan'ny mpiara-monina. Ataovy henatra ny mandrava fianianana na fifanekena, ny manatsotra tanana hangataka mofo fiantrana na ny manda hanome izay angatahina aminareo,

²⁰ ny tsy mamaly an'izay miarahaba anareo na ny mifantoka mijery vehivavy janga;

²¹ ataovy henatra ny tsy miraika amin-kavana, na ny maka ny anjara izay nomena ny hafa, ny mifantoka mandinika vehivavy vadin'olona ,

²² na ny mivarilena amin'ny mpanompovavinareo sy ny tamana eo akaikin'ny fandriany. Ataovy henatra ny manao teny mandatsa eo anatrehan'ny sakaizanareo; indrindra aza manao fandatsana, rehefa avy nanome zavatra azy.

Toko faha-42

¹ Ataovy henatra ny manao tati-bolana sy ny manambara tsiambaratelo. Dia ho henatra marim-pototra ny anao amin'izay ka hahazoanao sitraka amin'ny olona rehetra. Ireto zavatra ireto kosa dia aza ananan-kenatra ary aza ijeren-tavan'olona ka hanotanao:

² Aza menatra ny manoa ny lalanan'ilay Avo Indrindra sy manoa ny fanekem-pihavanana nataony, na ny mamoaka didim-pitsarana manafaka ny tsy mpivavaka rehefa hita fa manana ny rariny izy.

³ Aza menatra ny manao kaontim-bola amin'ny sakaizanao sy ny mpiray dia aminao, na ny mizara ny lova iombonana miaraka amin'ny hafa.

⁴ Aza menatra ny mampiasa mizana sy vato marina na ny mandray soa be na kely

⁵ na ny mahazo tombony amin'ny varotra atao. Aza menatra koa ny manafay mafy ny zanakaona ny mikapoka ho loa-drany tehezan'ny mpanompo malaina.

⁶ Raha tsy azo antoka ny vadinao, dia mety raha asiana tombokase ny entana; ary raha misy tana-maro fandrairay, dia ataovy tsara hidy ny zavatra.

⁷ Raha misy vola ankininao amin'olona, dia isao sy lanjao; ary ataovy an-tsoratra izay omenao sy izay raisinao.

⁸ Aza menatra ny manafay ny olona adala sy ketrinana ny antidahy voky taona mbola revo amin'ny filibana. Dia hasehonao fa tsara taiza tokoa ianao sady hankatoavin'ny olona rehetra.

⁹ Ny manan-janakavavy, ho an'ny rainy, dia mampanahy azy na tsy miloa-bava aza izy; ary tsy ahitany torimaso ny fanahiana azy. Raha mbola tanora izy, dia atahorany fandrao hihoatra ny taona fanambadiana; rehefa nisy nampakatra indray izy, dia atahorany fandrao hanjary halan-dralehilahy.

¹⁰ Raha mbola virijiny izy, dia ahiny fandrao ho voakolikoli-na tovolahy ka hanana anaka mbola ao an-tranon-dray; rehefa manam-bady indray izy, dia ahiny fandrao hivadika amin'ny lalam-panambadiana; ary raha tamana an-tranom-bady izy, dia ahiny fandrao hitoetra tsy hanan-janaka.

¹¹ Raha maditra ny zanakavavinao, dia ambeno mafy izy fandrao hahatonga anao hihomehezan'ny fahavalonao sy ho ambentin-dresaky ny ao an-tanana ary hampisy fitangorongoronan'olona; ka eo amin'ny fivorian'ny besinimaro, dia hataon-janakao safo-kenatra ianao.

¹² Tsy tokony hisehoseho amin-dehilahy ny zanakavavinao na hiditriditra ao amin'ny efitranom-behivavy ,

¹³ satria ny vehivavy no mamoaka ny haratsiam-panahim-behivavy toy ny ivoahan'ny fositra avy amin'ny fitafiana.

¹⁴ Aleo ny haratsiam-panahin-dehilahy toy izay ny fandambolambom-behivavy! Ny zanakavavy tsy mahalala menatra dia manala baraka ny rainy.

¹⁵ Hotsahiviko izao ny asan'ny TOMPO ary hovisavisaiko izay hitako. Ny tenin'ny Tompo no nampisy ireo asany; ary izay naraikitry ny fandaharany dia tanteraka araka ny hevi-pitiavany.

¹⁶ Toy ny masoandro mamirapiratra izay mibanjina ny zava-drehetra, no ahitana ny voninahitry ny Tompo manenika ny asa rehetra nataony.

¹⁷ Na ireo anjelin'Andriamanitra aza dia tsy afaka hamisavisa mihitsy ny zava-mahagaga rehetra nataony: naorin'ny Tompo Mpifehy ny tontolo ireny mba hampijoro mafy izao rehetra izao ao anatin'ny voninahiny.

¹⁸ Mahalala ny halalin'ny ranomasina ny TOMPO ary mahalala ny halalin'ny fon'olombelona ka mahafantatra ny zava-miafina ao anatiny, satria ilay Avo Indrindra no manana ny fahalalana isan-karazany ka mijery tsara ny famantarana izay manamarika ny fizaram-potoana.

¹⁹ Manambara ny zavatra lasa sy ho avy Izy ary mampiharihary ny zava-miafina lalina.

²⁰ Ny hevitry ny olona tsy mba misy midify Azy; ary ny teny ataony tsy mba misy takona Azy.

²¹ Narindran'ny TOMPO ireo asa lehibe izay novolavolain'ny fahendreny, satria efa nisy talohan'ny taona rehetra Izy ary haharitra mandrakizay mandrakizay; tsy nampiana na inona na inona ny tenany sady tsy nanesorana na inona na inona, ary tsy mba nila mpanolotsaina na iza na iza.

²² Endrey! Mahavariana ny asany rehetra hatramin'ny pitikafo kely indrindra izay azon'ny olona banjinina.

²³ Velona ireo zavatra rehetra ireo ary maharitra mandrakizay avokoa sady manaiky amin'izay rehetra ilana azy.

²⁴ Mifandraika tsiroaroa avy ny zava-drehetra ary tsy nisy nataon'Andriamanitra tsy tomombana.