Bena-Siràka

Toko faha-34

¹² Betsaka ny zavatra hitako fony aho nitety tany; ary mihoatra noho izay azoko lazaina ny fahalalako.

¹³ Matetika no efa nananontanona ahy ny fahafatesana, kanefa voavonjy aho satria efa ela nihetezana toy izany.

¹⁴ Ho ela velona izay manaja ny TOMPO,

¹⁵ satria eo amin'ilay Mpamonjy azy no iorenan'ny fanantenany.

¹⁶ Izay manaja ny TOMPO dia tsy matahotra na inona na inona; tsy manahy na oviana na oviana izy satria ny Tompo no fanantenany.

¹⁷ Sambatra ny fanahin'izay manaja ny TOMPO!

¹⁸ Iza no ianteherany? Ary iza no fiankinany?

¹⁹ Ny mason'ny TOMPO dia eo amin'izay tia Azy; fiarovana mahery sy fiankinana mafy Izy, fialofana amin'ny rivotra mahamay, fialofana amin'ny hafanana mandoro; ambenany tsy ho tafintohina ireo ary sakanany mba tsy ho potraka.

²⁰ Mampahery fanahy sy mampahazava fijery Izy sady manome fahasitranana sy fiainana amam-pitahiana.

²¹ Raha biby azo tsy an-drariny no atao sorona, dia fanatitra misy kilema izany;

²² ary tsy ankasitrahin'Andriamanitra ny fanomezan'ireo mpandika ny lalanany.

²³ Tsy ankasitrahin'ilay Avo Indrindra ny fanatitr'ireo tsy mpivavaka; ary tsy araka ny hamaroan'ny sorona atao no amelany ny fahotana.

²⁴ Tahaka ny mamono zanaka eo imason-drainy ny manatitra sorona nalaina tamin'ny fananan'ny mahantra.

²⁵ Mofo kely nisasarany no iveloman'ny mahantra, ka mpandatsa-dra izay maka izany aminy.

²⁶ Mamono mahafaty namana izay manaisotra ny fivelomany;

²⁷ ary mandatsa-dra izay manaisotra ny karaman'ny mpikarama.

²⁸ Raha ny anankiray manorina ary ny anankiray mandrodana, inona no soa azon'izy roa tonta afa-tsy ny fisahiranana ihany?

²⁹ Raha ny anankiray mirary soa ary ny anankiray manozona, feon'iza no ho henoin'ny Tompo?

³⁰ Raha misy mandro avy nanendry faty kanefa mbola manendry azy indray, inona no soa azony tamin'ny fandroany ?

³¹ Toy izany koa raha misy mifady hanina mba hahazoany famelana ny fahotany, kanefa mbola mamerina ireny fahotana ireny ihany, inona no soa azony tamin'ny fietreny tena ?

Toko faha-35

¹ Ny mitandrina ny Lalanan'Andriamanitra, dia mitovy amin'ny fanatitra marobe ;

² ary ny miraikitra amin'ny didiny dia toy ny manolotra sorom-pihavanana.

³ Ny mankasitraka ny soa azon'ny tena dia toy ny manao fanatitra lafarininy tsara;

⁴ ary ny manao soa fiantrana dia toy ny manolotra sorom-piderana.

⁵ Ny zavatra sitraky ny TOMPO dia ny miala amin'ny ratsy; ary toy ny sorona fanalana ny ota ny miala amin'ny tsy fahamarinana.

⁶ Aoka ianao tsy ho foan-tanana no miseho eo anatrehan'ny Tompo ,

⁷ satria ireny sorona rehetra ireny dia noho ny didiny no anaovana azy!

⁸ Ny fanatitra ataon'ny olo-marina dia fanatitra jabora eo amin'ny alitara , ary miakatra eo anatrehan'ilay Avo Indrindra ny hanitra manetona avy aminy.

⁹ Ny sorona ataon'ny olo-marina dia sitraky ny TOMPO; ary ny fampahatsiarovana Azy tsy mba hohadinoiny.

¹⁰ Manomeza voninahitra ny TOMPO amin'ny fo mahafoy be, ary aza anesorana mihitsy ny voaloham-bokatry ny asanao.

¹¹ Amin'ny fanatitrao isan-karazany dia aoka ho mirana endrika ianao; ary amin-kafaliana no anokany ny fahafolon-karena hatolotrao.

¹² Araka izay nomen'ilay Avo Indrindra anao no aoka hahafoizanao be ho Azy; eny, araka ny azon'ny tananao no aoka hahafoizanao be ho Azy,

¹³ satria mpamaly soa ny TOMPO ka hamaly anao impito heny!

¹⁴ Aza mitady hanangoly ny TOMPO amin'ny fanatitra ataonao ianao, satria tsy horaisiny akory izany.

¹⁵ Aza miantehitra amin'ny fisoronana izay biby azonao tsy ara-drariny satria ny Tompo no mpitsara, ary tsy misy fizahan-tavan'olona eo aminy.

¹⁶ Tsy mba mizaha tavan'olona hamelezany ny mahantra Izy ary mihaino ny vavak'izay ampahorina.

¹⁷ Tsy mba hamavoiny na oviana na oviana ny kamboty izay mitalaho aminy na ny mpitondratena mamboraka taraina.

¹⁸ Hitany tokoa ny ranomaso mitsororoka eo amin'ny takolany;

¹⁹ ary henony ny fidradradradrany miampanga an'izay mampitomany azy.

²⁰ Izay manompo ny TOMPO dia horaisiny amim-pitiavana; ary ny fangatahana ataony dia ho tafasondrotra any an-danitra.

²¹ Ny fivavahan'ny manetry tena no maninteraka ny lanitra, ary tsy hiala sasatra mihitsy izy, raha tsy mby eo akaikin'ny Tompo izany; tsy hitsahatra mivavaka izy, raha tsy efa mitsinjo azy ny Avo Indrindra

²² ka nanome rariny ny olo-marina sy namoaka ny didim-pitsarany.Tsy hiandry ela hamaly vavaka ny Tompo sady tsy handefitra amin'ireo mpampahory mandra-panorotorony ny valahany satria olona tsy manam-piantrana ireo.

²³ Hiharan'ny famaizan'ny TOMPO ireo hafa firenena mandra-pandringany ny mpiavonavona maro be sy hanapotehany ny fanjakan'ireo mpanao tsy an-drariny,

²⁴ mandra-pamaliany ny olona araka ny nataony avy sy hamaliany ny asan'ny olona araka ny nokasainy avy ,

²⁵ mandra-pandrainy an-tanana ny adin'ilay vahoakany ary hampifaliany azy amin'ny famindrampony.

²⁶ Tsara fiavy ny famindrampon'ny TOMPO amin'ny androm-pahoriana, tahaka ny fiavin'ny rahona mitondra orana amin'ny fotoana main-tany.

Toko faha-36

¹ Ry Andriamanitra TOMPOn'izao rehetra izao o, amindrao fo izahay ka tsinjovy,

² ary androtsahy fanajana Anao amin'ireo firenena isan-tokony.

³ Atsangano handrahona ny hafa firenena ny tananao ary aoka izy ireo hahatsapa ny fahefanao!

⁴ Nasehonao taminy ny fahamasinanao izay nanasazianao ny hadisoanay. koa asehoy aminay ny fahalehibiazanao izay hamelezanao ny fireharehany.