Bena-Siràka

Toko faha-39

¹² Tahaka ny volana fenomanana aho, rehefa avy nieritreritra; satria hevitra isan-karazany no mameno ahy, ka tiako mbola ho lazaina izany.

¹³ Ry zaza tia vavaka, henoy aho mba hitomboanareo hoatra ny raozy maniry eo amoron'ny renirano.

¹⁴ Aoka ianareo ho tahaka ny emboka manitra izay mandraradraraka fofona tsara, ho tahaka ny lisy izay rakotra ny felany! Manandrata feo ka miaraha-mihira ianareo ary mankalaza ny Tompo amin'ny asa rehetra vitany.

¹⁵ Ambarao fa lehibe ny anarany ary iekeo Izy amin'ny fiderana Azy omban'ny hira ventesinareo sy ny lokanganareo; ka toy izao no teneno amin'ny fiekena Azy:

¹⁶ Tsara dia tsara avokoa ny asa vitan'ny TOMPO; ary izay nalahany dia ho tanteraka amin'ny fotoany.

¹⁷ Tsy mety ny manontany hoe: "Inona ity? Nahoana izany?", fa ho valiana amin'ny fotoany avy ny fanontaniana rehetra. Noho ny baikon'ny Tompo, dia niavosa ny rano ho toy ny antontan-javatra iray ihany; ary noho ny teny naloaky ny vavany no niangonan'ny rano tao amin'ny fitobiany.

¹⁸ Noho ny didiny, dia tonga izay rehetra sitraky ny fony; ary tsy misy mahasakana ny famonjena entiny.

¹⁹ Eo anatrehany avokoa ny asan'ny voaary rehetra ary tsy misy azo afenina amin'ny masony.

²⁰ Mahita hatrizay hatrizay ka ho mandrakizay Izy; ary tsy misy na inona na inona mahagaga Azy.

²¹ Tsy mety ny manontany hoe: "Inona ity? Nahoana izany?", satria ny naharian'Andriamanitra ny zava-drehetra dia samy misy tanjona kendreny aminy avy.

²² Ny fitahian'ny TOMPO dia tahaka ny ony mihoatra morona, ary tahaka ny tondra-drano mihanaka mamonto tany.

²³ Toy izany koa no iamparan'ny fahatezerany mba ho anjaran'ny firenena mpanompo sampy, tahaka ny hita tamin'ny nanovany faritra vonton-drano ho tanin-tsira.

²⁴ Ho an'ny olona tia vavaka dia mahitsy ireo lalana soritan'ny Tompo; fa ho an'ny tsy mpivavaka kosa dia fanakantsakanana ireny.

²⁵ Ny zava-tsoa hatramin'ny voalohany, dia noarina ho an'ny tsara fanahy; fa ny zava-dratsy kosa no ho an'ny mpanota.

²⁶ Ireto no zavatra ilaina indrindra mba hiveloman'ny olombelona: dia ny rano, ny afo, ny vy, ny sira, ny lafarinina, ny ronono, ny tantely, ny divay, ny diloilo ary ny fitafiana.

²⁷ Mahasoa avokoa ireo ho an'ny olona tia vavaka, fa miova ho ratsy kosa ho an'ny mpanota.

²⁸ Misy rivotra noarina mba hanaovana famaizana, ka ny fisafoahany no mampitombo ny loza afitsony; amin'ny andro fandravana, dia hanampatra hery izany ary hampitony ny fisafoahan'Ilay nanao azy.

²⁹ Afo sy havandra, mosary sy fahafatesana: ireny rehetra ireny dia noarina hanaovana famaizana.

³⁰ Ireo vangin'ny biby masiaka, ireo maingoka sy ireo menarana, ary ny sabatra izay manasazy ny mpankahala fivavahana

³¹ dia samy faly mampihatra ny baikon'ny TOMPO. Eto ambonin'ny tany ireo zavatra ireo dia samy vonona ho amin'ny ilany azy; ka rehefa tonga ny fotoanandro, dia tsy hodikainy ny teniny.

³² Izany no nampiorina mafy ny hevitro, nanomboka hatreo am-boalohany; ka nony efa nanao fandinihana aho, dia nampandry azy an-tsoratra toy izao:

³³ "Tsara avokoa ny asa rehetra vitan'ny TOMPO ary ataony vonona amin'ny vanim-potoany ny zavatra isan-karazany tokony ho ilaina.

³⁴ Tsy mety ny milaza hoe: Ratsy noho io ity; fa samy hoekena ho tsara avokoa ireny rehetra ireny amin'ny fotoanandrony.

³⁵ Koa ankehitriny, mihira eram-po eram-bava ary mankalaza ny anaran'ny Tompo!"

Toko faha-40

¹ Fahasahiranana goavana no voatendrin'Andriamanitra hianjady amin'ny olombelona tsy an-kanavaka, ary zioga mavesatra no manindry ireo taranak'i Adama, hatreo amin'ny andro nivoahany tao an-kibon-dreniny ka hatramin'ny andro hiverenany ao an-kibon'ny tany, dia ilay tany reny iombonan'ny miaina rehetra.

² Ny eritreretiny sy mampanahy ny fony dia ny fiheverana ilay zavatra ampoiziny, izany hoe ny andro fahafatesana.

³ Manomboka amin'ny olona mipetraka eo ambony sezafiandrianana be voninahitra ka hatramin'ny ory mietry tena ao anaty vovotany sy lavenona,

⁴ manomboka amin'ny olona miakanjo jaky sy manao satroboninahitra ka hatramin'ny mitafy vorokitsay,

⁵ dia samy azon'ny fahatezerana sy ny fialonana mbamin'ny tebiteby sy ny fikorontanana, samy azon'ny fatahoram-pahafatesana mbamin'ny lolom-po sy ny fifandirana; amin'ny fotoana ialan-tsasatra eo am-pandriana aza, dia ny mamohafoha ny zavatra mampitebiteby azy no ataon'ny torimaso mandritra ny alina.

⁶ Vao miala sasatra kely tsy ampy toy inona ny olona, dia kotranin'ny nofy miaraka amin'izay, ka sahirana mafy toy ny amin'ny antoandro sady ampahorin'ny fahitana atrehin'ny fony toy ny miaramila mandositra mitsoaka ady.

⁷ Amin'ny fotoam-panafahana azy, dia mifoha izy ka talanjona satria voan'ny tahotaho-poana.

⁸ Ireto no zavatra manjo ny miaina rehetra, manomboka amin'ny olona ka hatramin'ny biby, ary ny an'ny mpanota aza ho impitohenin'izany:

⁹ fahafatesana sy vonoan'olona ary fifandirana sy sabatra, ady sy mosary ary fandringanana sy loza.

¹⁰ Ireo antambo rehetra ireo dia voatendrin'Andriamanitra mba hamaizana ny olona mpandika ny lalanany; sady hadisoan'ny olona koa no nahatonga ny safodrano.

¹¹ Izay rehetra avy amin'ny tany dia hiverina amin'ny tany; ary izay avy amin'ny rano dia hiverina any amin'ny ranomasina.

¹² Ny fanaovana kolikoly sy tsy an-drariny dia samy ho levona avokoa.

¹³ Ny harena azon'ny olona tamin'ny tsy an-drariny dia ho tankina tahaka ny ranon-driaka sy hihelina tahaka ny kotrobaratra izay manakoako mafy mandritra ny orana.

¹⁴ Hifaly amin'ny loza hihatra amin'ireo ny ampahorina; toy izany no haharingana tanteraka ny mpandika ny lalanan'Andriamanitra.

¹⁵ Tsy ho maro fara ny taranaky ny tsy mpivavaka, fa ho tahaka ny foto-kazo mitsipozipozy eo ambonin'ny vatolampy mandondona.

¹⁶ Ny volotara maniry akaikin-drano eo amoron'ny ony dia ho voaongotra alohan'ny ahitra hafa rehetra.

¹⁷ Tahaka ny saha mahavokatra kosa ny soa atao; ary ho tsarovana mandrakizay ny asa fiantrana.

¹⁸ Ho mamy ny fiainan'ny olona mahavita tena sy afa-miasa; fa mamy noho ny fiainan'izy roa tonta ireo ny an'ny olona izay mahita raki-tsoa.

¹⁹ Ny manan-janaka na manorin-tanana no mampahateza ny lazan'ny olona; fa mihoatra noho ireo zavatra roa tonta ireo no anombanana ny vehivavy tsy manan-tsiny.

²⁰ Mahafaly ny fo ny divay sy ny mozika; fa mahafaly noho izy roa tonta ireo ny fitiavana ny fahendrena.

²¹ Manao feo mifanaraka mahafinaritra ny sodina sy ny lokanga; fa mihoatra noho izy roa tonta ireo ny lela mivolana teny mamy.

²² Hafinaretana ho an'ny maso ny bika soa sy ny endrika tsara; fa mihoatra noho izy roa tonta ireo ny hakanton'ny zava-maitso eny an-tsaha.

²³ Tafahaona amin'ny fotoana mety ny sakaiza sy ny namany; fa mihoatra noho ny azy roa tonta ny fihaonan'ny vehivavy sy ny vadiny.

²⁴ Ny mpiray tampo sy ny mpanampy dia manohana amin'ny andro fahoriana; fa famonjena lehibe noho izy roa tonta ny fanaovana asa fiantrana.

²⁵ Ny manana volamena sy volafotsy dia mahamatotra ny fandeha; fa ambony lavitra noho izy roa tonta no hanombanana ny torohevitra tsara.

²⁶ Ny harena sy ny hery dia mampahazo toky; fa toky mihoatra noho ny azy roa tonta no omen'ny fanajana ny Tompo. Tsy misy zavatra mahafaty antoka ao anatin'ny fanajana ny Tompo; raha eo izany, dia tsy hisy zavatra mahory ary tsy ilaina intsony ny hitady fanampiana hafa.