Fahendrena

Toko faha-16

³ Koa na dia lian-kihinana aza ireo fahavalonao, dia tsy nazoto homana nahita ireo biby ratsy nalefa hamely azy ; fa ny olonao kosa, na dia sendra tsy fisiana vetivety aza, dia nahazo sakafo matsiro.

⁴ Mosary tsy azo ihodivirana no tsy maintsy nampijaliana ireo mpampahory, fa ampy ho an'ny vahoakanao kosa ny nanehoana ny fampijaliana ireo fahavalony.

⁵ Marina fa romotra namely ny vahoakanao ny biby misy poizina ka maro no maty voakaikitry ny menarana miolikolika. Kanefa tsy naharitra hatramin'ny famongorana azy ny fahatezeranao.

⁶ Ho fampitandremana no namelanao azy hitebiteby fotoana fohy, Tompo o; dia nahazo mari-pamonjena izy mba hahatsiarovany ny didin'ny lalananao.

⁷ Fa izay nitodika tamin'izany marika izany dia sitrana, tsy noho ilay zavatra nojereny akory fa noho Ianao Mpamonjy ny olona rehetra.

⁸ Koa noporofoinao tamin'ny fahavalonay fa Ianao no manafaka amin'ny ratsy isan-karazany.

⁹ Ireo moa dia maty voakaikitry ny valala sy ny lalitra, ka tsy hita izay fanafody hamonjena ny ainy, satria mendrika ho faizin'ny biby toy izany izy.

¹⁰ Fa ireto zanakao kosa tsy mba resin'ny kaikitr'ireo bibilava misy poizina, satria tonga namonjy sy nanasitrana azy ny fitiavanao.

¹¹ Mba hahatsiarovany ny teninao no nahavoatsindrona azy, kanefa dia nalaky voavonjy izy fandrao hadinony tanteraka izany ka ho very anjara amin'ny soa ataonao izy.

¹² Ary tsy mba ahitra na menaka ahosotra, Tompo o, no namerim-pahasalamana azy, fa ny Teninao izay mahasitrana ny rehetra.

¹³ Satria manam-pahefana amin'ny fiainana sy ny fahafatesana Ianao, ka mampidina hatrany am-bavahadin'ny toeran'ny maty sady mampiakatra avy any indray.

¹⁴ Noho ny haratsiam-panahin'ny olona, dia mety hainy ny mamono mahafaty kanefa tsy hainy kosa ny mamerina indray ny aina efa lasa na ny manafaka izay fanahy voagadran'ny toeran'ny maty.

¹⁵ Tsy azo atao anefa ny miala amin'ny fahefanao.

¹⁶ Koa nokapohin'ny sandrinao mahery ireo hafa firenena izay nanda tsy hahalala Anao fa nianjadian'ny oram-be mivatravatra sy havandra aman'oram-baratra tsy mifaditrovana izy, ary nolevonin'ny afo.

¹⁷ Ary ny mahagaga indrindra dia izao: vao mainka niredareda ny afo tao amin'ny rano izay mamono ny zavatra rehetra, satria miady ho an'ny olo-marina izao tontolo izao!

¹⁸ Mbetika anefa dia nihamalefaka ny lelafo mba tsy handevona ireo biby nalefa hamely ny tsy mpivavaka ka hahafantarany kosa fa manaraka azy hatrany ny fitsaranao, Andriamanitra o.

¹⁹ Mbetika mahery vaika tsy toy ny fahita ny firedaredan'ny afo, na dia ao afovoan'ny rano aza, mba handevona ny vokatra amin'io tany voaozona io.

²⁰ Ny vahoakanao kosa anefa tsy mba toy izany, fa novokisanao hanin' anjely; koa na dia tsy misasatra aza izy, dia nomenao mofo voavoatra avy any an-danitra izay manan-tsiro isan-karazany sady sahaza ny fitiavan'ny tsirairay.

²¹ Izany sakafo avy aminao izany dia maneho ny halemem-panahinao amin'ireo zanakao sady mifanaraka amin'ny fanirian'izay mihinana azy no mifanentana koa amin'ny fitiavan'ny tsirairay.

²² Fa na dia tahaka ny oram-panala sy ny rano mandry aza izy, dia nahatanty ny afo ka tsy niempo; izany no hahafantaran'ny vahoakanao fa nandevona ny vokatr'ireo fahavalo ny afo izay nirehitra sy nitselatra tao anaty havandra aman'orana.

²³ Ho setrin'izany kosa, mba hahafahan'ny olo-marina mivelona, dia nanadino ny maha hery mpandrava azy izany afo izany.

²⁴ Satria ny voaary izay vonon-kanompo Anao Mpahary azy dia manampatra ny heriny hamaizana ny ratsy fanahy, fa milefaka kosa ho fanasoavana ireo matoky Anao.

²⁵ Izany no nanekeny izay mety ho fiovana rehetra ka nanompoany ilay fanomezana avy taminao izay hamelona ny besinimaro araka ny fanirian'izay mila izany.

²⁶ Avy amin'izany, Tompo o, no hianaran'ireo zanakao tianao ireo, fa tsy ny vokatry ny namboleny akory no mamelona ny olona, fa ny teninao no mitahiry ny mino anao.

²⁷ Io sakafo izay tsy mety levon'ny afo io, dia mora miempono ny voataniky ny tana-ma soandro kely fotsiny.

²⁸ Tianao hampianarina hifoha alohan'ny masoandro izahay mba hisaotra Anao sy hivavaka aminao alohan'ny andro miposaka.

²⁹ Fa ny fanantenan'ny olona tsy mahay mankasitraka kosa dia hiempo toy ny fanalan-dririnina sy hanjavona toy ny rano tsy ilaina.

Toko faha-17

¹ Tompo o, lehibe sy sarotra hazavaina ny fitsaranao; ka dia izany no nampivaona ny olona tsy nety nianatra ny aminao.

² Ny haratsiam-panahiny no nahatonga azy hihevitra ny firenenao masina ho eo ambany fahefany; koa dia voagadran'ny haizina sy voababon'ny alina tsy misy fiafarany izy ary voahidy aman-tranony ka nivalampatra tao, niery ny fiahianao mandrakizay.

³ Noheveriny fa hitoetra tsisy mpahita ny fahotany miafina, voasarona voaly matevin'ny fanadinoana; kanjo nihahaka ireo olona ireo fa azon-tahotra mafy ary nivarahontsan'ny fahitana mampihoron-koditra.

⁴ Tsy naharo azy tamin'ny tahotra ny toera-mangina niafenany, fa feo mampatahotra no mirohondrohona manodidina azy ary matoatoa mamohehatra sady maloka endrika no niseho taminy.

⁵ Na ny afo mahery indrindra aza tsy nampahazava azy ary ny fanjopiakan'ny kintana tsy nahatantera-pahazavana izany alina mahatsiravina izany.

⁶ Fa afon'arina mirehitra ho azy no sisa niseho taminy ka nameno tahotra azy ; rehefa dify anefa izany fahitana izany, dia vao mainka nihoron-koditra izy ka nihevitra izay hitany ho mbola ratsy kokoa.

⁷ Fa tsy manan-kery ny fitaka ataon'ny mpanao majika ary tonga henatra ho azy ny fahalalana nihamboany.

⁸ Nilaza tena ho mahay mandroaka ny horohoro aman-tahotra amin'ny fanahin'olona marary izy, kanjo izy aza mba mararin'ny tahotra mahatsikaiky.

⁹ Ary na dia tsy nisy zavatra tokony hampahatahotra azy akory aza, ny fandalovan'ny biby sy ny fisiokan'ny bibilava ihany dia mampangitakitaka azy,

¹⁰ efa ho fatin'ny tahotra izy ka tsy sahy mijery ao amin'ny maizina izay tsy azony ialana.

¹¹ Fa vavolombelon'ny hakanosany ny faharatsiam-panahy ka manamelo-tena; enjehin'ny eritreriny izy ka tonga misaintsaina ny ratsy kokoa hatrany.

¹² Ny tahotra dia tsy inona akory fa fandavana ny fanampian'ny saina.

¹³ Fa arakaraka ny tsy itokiana izany fanampiana izany ao anaty no vao mainka tsy ahalalana izay mahatonga ny fahoriana.

¹⁴ Ireo olona ireo kosa tsy tafandry mandry tamin'izany alina tsy manan-kery sady nipoitra avy any amin'ny fanambanin'ny toeran'ny maty izany, dia toeran'ny maty tsy manan-kery ihany koa.

¹⁵ Fa sady nenjehin'ny matoatoa mahatsiravina izy no nivarahontsana very fanahy noho ny tahotra tampoka tsy nampoiziny.

¹⁶ Izay olon-kafa tonga teo koa dia samy lavo tamin'ny tany ary voagadra sy voatana an-trano maizina tsisy hidiny.

¹⁷ Na mpamboly na mpiandry ondry na mpiasa manao asa mafy any an-kodahoda, dia samy tratry ny loza avokoa, tsy afa-miala amin'izay anjarany.

¹⁸ Ny haizim-pito no toy ny gadra namatotra azy rehetra.

¹⁹ Nampivarahontsana azy rehefa mety feo reny toy ny fitsokan'ny rivotra, ny hiram-borona mahafinaritra anaty kirihitra, ny firohondrohon'ny rian-dranomahery, ny fidoboky ny vato mikodia, ny rodorodo tsy hita maso fanaon'ny biby mifalihavanja, ny faneron'ny biby masiaka, na koa ny ako averin'ny lavaky ny tendrombohitra.

²⁰ Nohazavain'ny hazavana mamirapiratra ny tontolo ka nanohy miadana ny asa fanaony.

²¹ Fa ireo kosa voasaron'ny ali-mampahory izay tandindon'ny haizim-pito efa niandry azy. Nefa mbola navesatra taminy mihoatra noho ny haizim-pito aza ny tenany ianjadian'izany.

Toko faha-18

¹ Nandritra izany fotoana izany dia nisy hazavana lehibe namirapiratra tamin'ny olonao masina. Ren'ireo Ejiptianina fahavalony ny feony saingy tsy hitany kosa ny tavany; ary satria tsy mba nijaly tahaka azy izy, dia nambarany hoe sambatra.

² Nisaorany koa izy satria na dia nasiana ratsy aza, dia tsy mba nitady hamaly faty; ary nangatahiny famelana izy noho ny nankahalany azy.