Fahendrena

Toko faha-14

³ Kanefa , Ray o, ny fitiavanao mahatsinjo mialoha no mitana ny familiana azy. Ianao no manoritra izay halehany eny amin'ny ranomasina, dia lalana azo antoka mamakivaky ny onja.

⁴ Asehonao amin'izany fa mahavonjy amin'ny loza rehetra Ianao, na dia miondrana tsy havanana mitondra sambo aza ny olona.

⁵ Tsy mba tianao handamoka ny asan'ny Fahendrenao, ka izany no anankinan'ny olona ny ainy amin'izay hazo marefo kely, ary itetezany ny onja amin'ny zahatra nefa ieren-doza.

⁶ Ary toy izany koa fahiny, fony naringana ireo rapeto mpiavonavona. Nahita fialofana tamin'ny zahatra iray ny fanantenan'izao tontolo izao, fa nentin'ny tananao izy ka namela loharanon-taranaka vaovao ho an'ny ho avy.

⁷ Ombam-pitahiana ny hazo izay tonga fitaovam-pahamarinana!

⁸ Fa voaozona kosa ny sampy izay asan-tanana ihany mbamin'ilay olona nanao azy: ilay olona, satria izy no nanao azy; ary ny sampy, satria nantsoina hoe andriamanitra izy, kanefa dia zavatra mety lo.

⁹ Samy halan'Andriamanitrana ny olona tsy mpivavaka na ny faharatsiam-panahiny,

¹⁰ ka samy miaraka ho faiziny na ny asa vita na ny mpanao azy.

¹¹ Noho izany dia hihatra amin'ny sampin'ireo firenena ny famaizan'Andriamanitra; satria mba zava-boaarin'Andriamanitra ihany ireny, kanefa tonga zava-maharikoriko eo imasony. Ankoatra izany, dia mahasolafaka fanahin'olombelona amin'ny fahotana ireny sampy ireny ary tonga fandrika mahasoa ny tongotry ny adala.

¹² Ny hevitra hanamboatra sampy no nipoiran'ny fanitsakitsahana an'Andriamanitra; ary ny famoronana ireny no nitarika fahalovan-toetra teo amin'ny fiainan'ny olona.

¹³ Tany am-piandohana dia tsy nisy akory ireny sady tsy haharitra mandrakizay koa.

¹⁴ Fa ny fisainana adalan'ny olona ihany no nampiditra ireny teto amin'izao tontolo izao; koa famongorana haingana no efa voatendrin'Andriamanitra ho azy.

¹⁵ Nitambesaran'alahelo ity raim-pianakaviana noho ny fahafatesan'ny zanany menavava, ka nampanamboatra sarin'ny zanany izay nalana tampoka taminy. Dia nanomboka nanaja hoatra ny andriamanitra izany fatin-janany izany izy, ary nampita fanao miafinafina sy fombam-pivavahana tamin'ny ankohonany.

¹⁶ Tsikelikely anefa dia niharaikitra izany fomba mifanohitra amin'ny finoana izany, ka notandremana tahaka ny lalana. Tonga nivavahana ihany koa ireo sarin-tsampy noho ny didin'ny mpitondra mpanjakazaka.

¹⁷ Raha misy olona tsy afaka nanaja azy eo anatrehany satria lavi-ponenana, dia naka tahaka ny endriny avy lavitra izy ary namboatra sarin'ny mpanjaka hajainy hita maso. Izany no nahazoana midera azy amin-kafanam-po; ka nadia tsy eo aza izy, dia toy ny manatrika ihany.

¹⁸ Ny fanirian-dazan'ny mpanao sary no nampandroso ny fanompoan-tsampy tamin'izay tsy nahalala akory ny mpanjaka aza.

¹⁹ Fa te hila sitraka tamin'ny mpanjaka izy, ka nampiasa hakingana hahatafavoaka sary kanto kokoa noho ny tena izy.

²⁰ Voasinton'ny hakanton'ny asa ny vahoaka ka ilay nohajainy teo aloha kely ho olombelona no nataony ho andriamanitra ivavahana.

²¹ Fandrika mahafaty tokoa ho an'ny olombelona izany; satria rehefa ianjadian'ny fahoriana nateren'ny mpanjakazaka izy, dia nampihatra amin'ny vato aman-kazo ny anarana izay voatokana ho an'Andriamanitra irery ihany.

²² Tsy mba ampy ny olona anefa ny diso lalana tamin'ny fahalalana an'Andriamanitra; fa noho ny niainany tao anatin'ny fifanolanana goavana vokatr'izany tsy fahalalana izany, dia sahiny omena anarana hoe fiadanana izany loza izany.

²³ Fa manolotra sorona zaza sy manaraka fanao miafinafina izy ary mitolo-batana amin'ny filerana mihoa-pampana ombam-pomba mamoa fady,

²⁴ ka dia tsy mitandro intsony na ny ain'olombelona na ny fahadiovan'ny fanambadiana; fa ny andaniny mamono ny ankilany am-pitaka na mampahory azy amin'ny fangalarana ny vadiny.

²⁵ Misafotofoto ny zavatra rehetra: ra mandriaka, vono olona, halatra, fitaka, fanakolikolena, fivadiham-pitokiana, korontana, fianianan-tsy to,

²⁶ fanenjehana ny tsara fanahy, tsy fankasitrahana, fahalovam-pitondrantena, fifampilana mifotitra, korontam-panambadiana, fakam-badin'olona ary fanaranam-batana.

²⁷ Ny fanompoan-tsampy izay tsy tokony ho tononina anarana akory no fototry ny ratsy isan-karazany sady antony sy faraidiny.

²⁸ Izay mivavaka amin'ireny sampy ireny dia miontan-kafaliana mirediredy na maminany sandoka, ary miaina amin'ny faharatsiana na mianiana tsy to mora foana.

²⁹ Fa sampy tsy miaina no ianteherany, ka dia heveriny fa tsy hahitan-doza ny fianianana tsy marina ataony.

³⁰ Hiharan'ny famaizana ihany izy noho ireto antony roa ireto: voalohany, satria diso fihevitra an'Andriamanitra izy tamin'ny niraiketany tamin'ny sampy; faharoa, satria nanao fianianana sandoka nanohitra ny fahamarinana izy ka naniratsira ny fahamasinana.

³¹ Tsy mba avy amin'ny herin'ny sampy nianianany anefa izany, fa famaizana voatokana ho an'ny mpanota ka manasazy mandrakariva ny hadisoan'ireo meloka.

Toko faha-15

¹ Fa Ianao, ry Andriamanitray o, no tsara sady marina ary koa mahari-po, ka mitondra izao rehetra izao amim-pitiavana.

² Na dia manota aza izahay, dia mbola Anao ihany, satria ekenay ny fahefanao. Fantatray anefa fa isan'ny anao izahay, koa dia tsy te hanota aminao izahay.

³ Ny mahalala Anao no tena fahamarinana; ary ny miaiky ny fahefanao no fototry ny tsifahafatesana.

⁴ Tsy voafitaky ny zavatra mampidi-doza noforonin'ny hairahan'olombelona izahay, na voasodokan'ny zava-poana nataon'ny mpanosodoko manonofy ka mamokatra sary mifotetaky ny loko isan-karazany.

⁵ Ny fahitana izany no manaitra ny filan-dratsin'ireo adala ka mamelona ny faniriany endri-tsary maty sady tsy misy aina akory.

⁶ Fa izay manao ireny sampy ireny namaniry azy na mivavaka aminy, dia samy mpitia ny ratsy ary mendrika fanantenana poakaty toy izany.

⁷ Indro mpanefy tanimanga iray izay miasa mafy mandity tanimanga malemy, ka mamolavola fitaovana isan-karazany fampiasantsika andavanandro. Iny tanimanga iny no amolavolany ireo kojakoja fampiasa amin'ny raharaha mihaja na izay fampiasa amin'ny raharaha tsotsotra. Fa ny mpanefy tanimanga ihany no manapaka ny amin'izay fampiasana azy avy.

⁸ Ankoatra izany, mifofotra amin'ny asa tsy manjary izy, fa io tanimanga io ihany no mbola anamboarany andriamanitra sandoka. Ny tenany anefa vao tsy ela no nipoitra avy amin'ny tany ka hiverina faingana amin'ny tany izay nangalana azy rehefa hotakina aminy ny fanahy nampindramina azy.

⁹ Saingy tsy mampaninona azy akory ny fahafatesana tsy azo ialana sy ny hafohin'ny fiainany, fa mifaninana ireo mpanefy volamena sy volafotsy izy ary maka tahaka ny mpandrendrika halimo ka mihevitra ho voninahitra ny mamolavola zavatra sandoka.

¹⁰ Fa toy ny lavenona ihany ny fony; latsa-danja noho ny vovo-tany ny fanantenany ary tsy misy vidiny noho ny tanimanga ny fiainany.

¹¹ Satria tsy nahalala Ilay nanao azy izy, dia Ilay nampisy fanahy miasa ao aminy ary nanome azy fofonaina mahavelona.

¹² Noheveriny ho kilalao ny fiainantsika ary nataony ho tsena hitadiavan-tombombarotra ny fisiana. Ny zava-drehetra, hoy izy, dia tokony hahazo an-tombontsoa, eny fa na dia ny ratsy aza.

¹³ Mahafantatra tsara noho ny besinimaro anefa io lehilahy mpanefy io fa manotaraha manamboatra kojakoja mora vaky sy sarivongan-tsampy avy amin'ny akora tany iray ihany.

¹⁴ Kanefa, Tompo o, tena adala avokoa sady latsa-danja noho ny fanahin-jaza aza ireo fahavalo sy mpamoritra ny vahoakanao.

¹⁵ Nataony ho andriamanitra avokoa ireo sampin'ny firenena izay mana-maso ihany fa tsy mahita, manana orona fa tsy miaina, manan-tsofina fa tsy mandre, manan-drantsan-tanana fa tsy mahatsapa ary manan-tongotra fa tsy mahay mandeha.

¹⁶ Satria olombelona manam-pofonaina nindramina no nanao sy namolavola ireny. Fa tsy misy olona afaka mamolavola andriamanitra mitovy aminy akory.

¹⁷ Noho izy mety maty, dia asa maty no azon'ny tanan-dratsiny atao. Fa na izy aza dia ambony noho ireo zavatra ivavahany, satria mba manana aina ahay ny tenany, fa ireo kosa dia tsy hanana izany mihitsy.

¹⁸ Ivavahany koa ireo biby faran'izay maharikoriko, dia ireo biby ratsy indrindra amin'ny fahadalany.

¹⁹ Tsy mba misy hatsarana mahasintona toy ireo biby hafa eo aminy, fa nidifiany aza ny fankatoavana amam-pitahian'Andriamanitra.

Toko faha-16

¹ Izany no antony namaizana ara-drariny ireo Ejiptianina ireo tamin'ny biby mitovy amin'izay nivavahany ihany sy nampijaliana azy tamin'ny biby maro sesehena.

² Fa ny vahoakanao, Tompo o, tsy mba nataonao toy izany fa nosoavinao kosa; ary hampitony ny hanoanany mivaivay, dia papelika sakafo mafilotra no nomaninao ho azy.