Bena-Siràka
Toko faha-3
11 ny voninahitry ny rainy manko no iavian'ny hajan'ny olona; ary ny reny voatevateva dia henatra ho an'ny zanany.12 Karakarao, anaka, ny rainao amin'ny fahanterany ary aza ampalahelovina izy amin'ny andro iainany.
13 Na dia very saina aza izy, dia anehoy fandeferana; ary aza manatsinontsinona azy ianao izay heni-tanjaka.
14 Satria ny fiantrana ataonao amin-drainao dia ho tsaroan'Andriamanitra hatrany; ho solon'ny fahotanao izany sy ho fanambinana ny tranonao.
15 Ho tsarovan'Andriamanitra ianao amin'ny andro mahory; ka toy ny ranomandry levon'ny masoandro no indro hahalevonan'ny fahotanao.
16 Izay mahafoy an-drainy dia mpanevateva an'Andriamanitra, ary izay mampahatezitra ny reniny dia ho voaozon'ny Tompo.
17 Anaka, ataovy amin-kalemen-panahy ny asanao, dia ho tiavina noho ny olona malala-tanana ianao.
18 Arakaraka ny maha lehibe anao no ietreo tena,
19 dia hahita sitraka amin'ny Tompo ianao !
20 Na lehibe aza manko ny fahefan'ny TOMPO, dia ny manetry tena no manome voninahitra Azy.
21 Aoka ianao tsy hitady zava-tsarotra loatra aminao ary tsy hikarokaroka izay tsy tratry ny herinao!
22 ny didy nampitaina taminao no saintsaino, fa tsy ilaina hanadihady ny zava-miafina ianao.
23 Aza milofo amin-draharaha tsy tratran'ny eritreritrao, fa ny naseho anao aza efa tsy takatry ny sain'olona.
24 Efa nampivaona olona maro ny fahadisoan-keviny,
25 ka ny fisainana ratsy no nampivily eritreritra azy.
26 Hiafara amin'ny fahavoazana ny fo maditra, ary izay mankamamy loza no ho fatin'izany.
27 Hivesatra fahoriana ny fo maditra, ary fahotana mifanongoa no havosan'ny mpanota.
28 Tsy laitram-panafody ny voina mahazo ny mpiavonavona, satria efa tsara fototra ao aminy ny tsirim-paharatsiana.
29 Ny fon'ny olona misaina no hieritreritra ny fanoharana; ny sofina malady no zavatra irin'ny hendry.
30 Ny rano mamono ny afo midedadeda ary ny asa fiantrana mikosoka ny fahotana.
31 Izay manao asa soa dia mitsinjo ny hoavy, ka hahita fiankinana fony izy hivembena.
Toko faha-4
1 Anaka, aza lavinao ny fiveloman'ny mahantra ary aza mampipitrapitra maso ny tsy manana ianao ;2 aza mampahory aina ny noana ianao, ary aza mampangirifiry ny olona fadiranovana.
3 Aza vao mainka mampisafoaka ny fo mangirifiry ianao, ary aza mangataka andro rehefa hanome ho an'ny sahirana.
4 Aza atositosikao ny mpangataka ory, ary aza iambohoan-tava ny mahantra.
5 Aza iambohoanao fijery ny tsy manana, ary aza avela hisy antony hanozonany anao;
6 fa raha manozona anao amin'alahelom-po izy, dia ho henoin'ilay Mpahary azy ny fivavahany.
7 Ataovy mahafinaritra eo anivom-bahoaka ny toetranao, ary aoka ianao hiondrika eo anoloan'ny lehibe!
8 Manongilana sofina hihaino ny mahantra ianao; ary amin-kamorampo no amalio azy tenim-pihavanana.
9 Afaho tsy ho voatanan'ny mpampahory azy ny ampahorina; ary aza resin-kenamaso ianao rehefa mitsara.
10 Aoka ho toy ny ray amin'ny kamboty ianao, ary ho toy ny vady manohana ny renin'ireo; dia ho toy ny zanak'ilay Avo Indrindra ianao ary hotiaviny mihoatra ny fitiavan-dreninao anao.
11 Manandratra an'ireo zanany ny Fahendrena ary miahy an'izay mikatsaka azy.
12 Izay tia Fahendrena, tia fiainana; ary izay mifoha maraina hitady azy, ho heni-kafaliana.
13 Izay mitazona ny Fahendrena dia ny voninahitra no anjarany; ka ny toerana izay handehanany dia homban'ny Tompo fitahiana.
14 Izay manompo ny Fahendrena dia mivavaka amin'ilay Masina; ary tia izay tia fahendrena ny Tompo.
15 Izay mihaino ny Fahendrena, hitsara ara-drariny; ary izay mifikitra aminy, hiorim-ponenana feizay.
16 Izay matoky azy no hanana azy ho anjarany; ary ny taranany dia mbola hitazona izany.
17 Eo am-boalohany manko ny Fahendrena dia hiaraka aminy hitety lalan-tsarotra; avy eo izy hampiavy tahotra sy horohoro aminy ary hampijaly azy amin'ny fifehezany mandra-pahatongany azy ho mahatoky, ka amin'ny didiny no hisedrany azy;
18 rehefa izany, dia hiverina mivantana aminy indray Izy ka hampifaly azy sy hamboraka aminy ny zava-miafiny.
19 Raha mania kosa ilay olona, dia hilaozan'ny Fahendrena ary havelany ho eo am-pelatanan'ny fahaverezana.
20 Tandrovy izay mety, ary fadio ny ratsy; ary aza menatra ny amin'izany toetranao izany.
21 Misy manko henatra mitarika amin'ny fahotana, ary misy henatra ho voninahitra amam-pahasoavana.
22 Aza mihenjana loatra amin'ny tenanao, kanefa aza asiana henatra mahatonga ho solafaka.
23 Aza mihenahena amin'ny fotoana tokony hitenenana ,
24 satria amin'ny fiteninao no hahalalana ny fahendrenao, ary amin'ny fivolananao no hisehoan'ny fahaizanao.
25 Aza manohitohitra ny marina; noho ianao tsy ampy fahalalana no aoka hampangasihasy anao!
26 Aza menatra ny hiaiky heloka ianao, ary aza mihambo hanoha ny alehan'ny ony.
27 Aza mety manaiky olona adala, ary aza resin-kenamason'izay manampahefana.
28 Miadia hiaro ny marina mandra-pahafatinao, dia hiady hiaro anao ny Tompo Andriamanitra.
29 Aoka ianao tsy ho sahisahy miteny, kanefa kamo sy mitaredretra manao!