Bena-Siràka
Toko voalohany
8 Iray ihany no hendry sy mahatahotra indrindra, dia ny Tompo Izay mipetraka eo amin'ny seza fiandrianany.9 Ny TOMPO mihitsy no nahary ny fahendrena; Izy no nahita azy sy nanombantombana ny lanjany sady nandrotsaka azy tamin'ny asany rehetra ,
10 dia tamin'ny olona rehetra araka ny halalaham-pony; ary nomeny betsaka an'izany ireo tia Azy Tompo.
11 Ny fanajana ny TOMPO dia voninahitra ireharehana ary koa fehiloha ifalifaliana sy iravoravoana.
12 Ny fanajana ny TOMPO dia mahamirana ny fo, mahafaly sy mahasariaka ary manome andro lava.
13 Izay manaja ny TOMPO no ho tsara fiafara ary hotahina izy amin'ny andro hahafatesany.
14 Ny loharanom-pahendrena dia ny manaja ny TOMPO; ho an'ireo mpivavaka, dia hatrany an-kibon-dreny no miara-miforona amin'ny tenany ny fahendrena.
15 Nanorina fonenana mandrakizay teo amin'ny olona izy ary mendrika hitokiana eo amin'ny taranak'ireo.
16 Ny hafenoam-pahendrena dia ny manaja ny TOMPO. Vokisan'ny fahendrena amin'ireo vokany ny olona;
17 fenoiny izay irin'ny olona ny tranony manontolo, ataony ampoky ny vokany ny sompitra fitehirizany.
18 Ny fehiloham-pahendrena dia ny fanajana ny TOMPO, izay mampahavokatra fiadanana sy fahasalamana tsara.
19 Atosaky ny fahendrena toa ranonorana ny fahaizana amam-pahalalana ho an'ny saina; asondrony voninahitra ireo manana azy.
20 - 21. Ny foto-pahendrena dia ny manaja ny TOMPO ary ny sampany dia ny andro lava iainana.
22 Tsy azo omen-drariny velively ny hatezerana tsy ara-drariny; fa ny fisafoakan'ny olon-tezitra toy izany dia mitarika azy amin'ny fahaverezana.
23 Hatramin'ny fotoana mety no hiandrasan'ny mahari-po, ka haverina aminy indray avy eo ny hafaliana.
24 Hatramin'ny fotoana mety no hitanany mangina ny heviny; ka ho tantarain'ny besinimaro ny fahamalinany.
25 Anisan'ny raki-pahendrena ireo ohabolana vokatry ny fahaizana; fa ny fanajana an'Andriamanitra kosa dia maharikoriko ny mpanota.
26 Ianao izay maniry ny fahendrena, tandremo ny didin'Andriamanitra, dia homen'ny Tompo anao izany.
27 Ny fahendrena amam-pahalalana manko dia ny fanajana an'Andriamanitra; ary ny zavatra mahafinaritra Azy dia ny toetra mahatoky sy ny halemem-panahy.
28 Aza manda ny fanajana ny TOMPO, ary aza fo miefitrefitra no anatonanao Azy.
29 Aza mihatsaravelatsihy eo imason'ny olona, fa tandremo ny teny avoakanao.
30 Aza manandra-tena ianao fandrao miongana, ka hitarika henatra ho an'ny tenanao; fa ny Tompo hanambara ny zavatra afeninao ka hampietry anao eo afovoan'ny fivoriam-bahoaka, noho ianao tsy niroso tamin'ny fanajana ny Tompo ary satria feno fihatsarambelatsihy ny fonao.
Toko faha-2
1 Anaka, raha miroso hanompo ny TOMPO ianao, dia omany amin'ny fizahan-toetra ny fanahinao.2 Ahitsio ny fonao ka manana finiavana ary aza mitebiteby amin'ny andro fahoriana.
3 Miraiketa amin'Andriamanitra ka aza misaraka aminy ianao mba ho fiadanana no hiafaranao.
4 Ekeo avokoa izay zavatra manjo anao, ary mahareta rehefa tonga aminao ny fietrena;
5 fa ny volamena dia sedraina amin'ny afo, ary ny olona sitrak'Andriamanitra kosa dia sedraina amin'ny memin'ny fietrena.
6 Matokia an'Andriamanitra, dia hanarina anao Izy; ahitsio ny fitondrantenanao ary manantena Azy.
7 Ianareo izay manaja ny TOMPO, matokia ny indrafony; ary aza mivilivily lalana, fandrao ho solafaka.
8 Ianareo izay manaja ny TOMPO, matokia Azy; dia tsy ho very valisoa ianareo.
9 Ianareo izay manaja ny TOMPO, manantena ny hasambarana sy ny hafaliana mandrakizay ary ny famindrampony.
10 Diniho ary ny taranaka fahagola ka fantaro: Iza no natoky ny Tompo ka diso fanantenana? Iza no naharitra tamin'ny fanajana Azy, ka nilaozany? Iza no niantso Azy ka tsy noraharahainy ?
11 Fa miantra sy mamindrafo ny TOMPO, sady mamela heloka sy mamonjy amin'ny andro mahory.
12 Ireo rera-po sy miraviravy tanana ary ny mpanota miroa lalana no mampalahelo !
13 Mampalahelo koa ireo kanosa fo satria tsy manam-pitokiana, izany no tsy hiarovan'Andriamanitra azy!
14 Mampalahelo ianareo very faharetana, hanao ahoana ianareo rehefa ho hadinin'ny Tompo?
15 Izay manaja ny TOMPO dia manaiky ny teniny; ary izay tia Azy dia mitandrina ny sori-dalany.
16 Izay manaja ny TOMPO dia mitady ny sitrany; ary izay tia Azy dia mivoky amin'ny lalanany.
17 Izay manaja ny TOMPO dia vonombonona hatrany ary mietry fanahy eo anatrehany ka manao hoe:
18 Eo an-tanan'ny TOMPO no hiantorahanay fa tsy eo an-tanan'ny olombelona, satria arakaraka ny fahalehibiazan'ny Tompo no haben'ny famindrampony koa.
Toko faha-3
1 Henoy, rey anaka, ny anatry ny rainareo ary ampiharo izany mba hamonjena anareo ;2 fa ny TOMPO manome voninahitra ny ray eo amin-janany, ary manorina ny fahefan'ny reny eo amin'ny naterany.
3 Izay manaja ny rainy dia manoni-pahotana
4 ary izay manome voninahitra ny reniny dia tahaka ny olona manangon-karena.
5 Izay manaja ny rainy dia hampifalin-janaka ary ho henoina amin'ny andro ivavahany.
6 Izay manaja ny rainy ho lava andro iainana, izay manaiky ny Tompo hahafa-po ny reniny ;
7 tahaka ny mpanabe azy no anompoany ray aman-dreny.
8 Hajao ny rainao, na amin'ny ataonao amin'ny teny, mba hirotsahan'ny tsodrano ny aminao ;
9 fa ny tsodranon-dray aman-dreny manamafy ny tranon'ireo zanany, ary ny ozony kosa mampiongotra ny fanorenany.
10 Aza atao voninahitra ho anao ny fahafaham-barakan-drainao, satria tsy ahazoanao voninahitra ny fahafaham-baraka mihatra aminy;