Eksôdy
Toko faha-29
27 Hambaranao fa masina ny tratrany sy ny sorony nalaina tamin'ny ondry fanokanana an'i Aharona ka nahevaheva sy nasandratra teo anatrehako.28 Noho izany, rehefa manao sorom-pihavanana amiko ny Israelita rehetra, dia hanavaka ny soron-kena sy ny tratrany amin'ireo biby mba ho anjara raikitra ho an'i Aharona sy ny taranany: zavatra avahana ho Ahy TOMPO izany.
29 Rehefa maty i Aharona, dia hafindra amin'ny taranany ny fanamiana masina; ka ireo no hiakanjo azy amin'ny andro hanokanana sy hametrahana azy amin'ny raharahany.
30 Ny mpisorona hisolo an'i Aharona dia hitondra ireo akanjo ireo mandritra ny fito andro, rehefa miditra ao amin'ny Tranolay fihaonana mba hanatanteraka ny raharahany ao amin'ny Toeramasina.
31 Halaina ny ondrilahy fanokanana, ilay faharoa, dia handrahoina ao amin'ny toerana iray voatokana ny henany.
32 Hohanin'i Aharona sy ny zanany, miaraka amin'ny mofo sisa ao amin'ny harona, eo am-baravaran'ny Tranolay fihaonana izany.
33 Izy ireo ihany no mahazo mihinana izay nampiasaina tamin'ny fanokanana sy ny fametrahana azy eo amin'ny raharahany mba hahazoany famelan-keloka amin'ny Tompo. Tsy misy olon-kafa mahazo mihinana ireo, fa sakafo masina ireo.
34 Raha misy sisa tsy lany tra-maraina ny hena sy ny mofo, dia hodorana fa tsy azo hanina satria sakafo masina.
35 Mifanaraka tanteraka amin'ny torolalana efa nomeko anao no hataonao amin'i Aharona sy ny zanany. Haharitra fito andro ny lanonana fametrahana azy amin'ny asany.
36 Isan'andro dia hanolotra ombilahy iray ho sorona ahazoana famelan-keloka ianao. Hataonao izany hanadiovana ny alitara fisoronana; ary horarahanao diloilo ny alitara mba hanokanana azy.
37 Haharitra fito andro koa io lanonana io; ka raha afaka izany, dia ho masina indrindra ny alitara, ary izay rehetra mahakasika azy na olona na zavatra dia hiharan-doza.
38 Zanakondry iray taona roa isan'andro no hatolotra tsy tapaka eo ambony alitara.
39 Ny iray hatolotra ny maraina, ary ny iray hatolotra ny hariva.
40 Miaraka amin'ny zanakondry amin'ny maraina sy ny hariva, dia hitondrana koba telopolo kilao efa voakapoka amin'ny diloilo tsara iray litatra sy sasany sy fanatitra divay iray litatra sy sasany. Ireo dia ho sorona atolotra Ahy TOMPO, ka ho hanitra ankasitrahina ho Ahy.
42 Amin'ny hoavy dia tsy ho tapaka na oviana na oviana ny fanolorana sorona dorana manontolo ho Ahy TOMPO eo am-baravaran'ny Tranolay fihaonana, fa eo no hihaonako aminareo sy hitenenako aminao.
43 Eo amin'io toerana io no hihaonako amin'ny Israelita, ka ny voninahitro hanome hasina izany.
44 Ny tenako mihitsy no hanokana ny Tranolay fihaonana sy ny alitara, tahaka ny hanokanako an'i Aharona sy ny zanany lahy ho mpisorona ho Ahy.
45 Hitoetra eo anivon'ny Israelita Aho sady ho Andriamaniny.
46 Ka amin'izay no hiekeny fa Izaho no TOMPO Andriamaniny, dia Izaho Ilay namoaka azy hiala tany Ejipta mba hahazoako miara-monina aminy. Izaho no TOMPO Andriamaniny.
Toko faha-30
1 Alitara iray no hamboarina amin'ny hazo mimoza mba handoroana ny vovo-javamanitra.2 Ho efamira izy io, ka hirefy dimampolo santimetatra ny lafiny tsirairay, ary iray metatra ny haavony. Hisy tandrony hatao miray aminy avy eo amin'ny zorony efatra ambony.
3 Horakofana takela-bolamena madio ny tampony sy ny lafiny manodidina ary ny tandrony, ary hasiana sisiny volamena manodidina.
4 Hisy haba volamena roa avy hapetraka eo ambonin'ny sisiny an-daniny roa amin'ny alitara, ka hampidirana bao mba hilanjana azy.
5 Hazo mimoza no hanaovana ny bao ary horakofana takela-bolamena.
6 Hapetraka eo anoloan'ny efitra lamba izay manafina ny Vatamasina misy ny raki-tsoratry ny fanekempihavanana io alitara io, dia eo anoloan'ny saron'ny Vatamasina izay hihaonako aminao.
7 Isa-maraina dia handoro vovo-javamanitra eo i Aharona rehefa hanadio ny fitoeran-jiro ao amin'ny Toeramasina,
8 ary koa isan-kariva rehefa handrehitra ny jiro izy. Handoroana vovo-javamanitra tsy tapaka eo ho fanomezam-boninahitra Ahy TOMPO.
9 Aza manolotra vovo-javamanitra tsy sahaza eo, na sorona dorana manontolo, na fanatitra vokatry ny tany; tsy handrarahana fanatitra divay koa eo ambonin'io alitara io.
10 Indray mandeha isan-taona i Aharona no hanadio azy; hapetrany eo amin'ny tandroky ny alitara ny ra nalaina avy tamin'ny biby natao sorona ahazoana famelan-keloka. Havaozina isan-taona io lanonana io eo amin'ny taranaka mifandimby. Voatokana ho Ahy TOMPO io alitara io, ka hanan-kasina fatratra.
11 Hoy indray ny TOMPO tamin'i Mosesy:
12 -Rehefa manao ny fanisam-bahoaka amin'ny Israelita ianao, dia samy handoa hetra ho AHY ny olona tsirairay hanavotana ny ainy, mba tsy hisy loza hanjo azy amin'ny fanisana.
13 Izay rehetra voaisa dia samy hanome vola antsasaky ny sekela, araka ny lanja fampiasa ao amin'ny Toeramasina. Io vola io dia haloa ho Ahy TOMPO,
14 avy amin'ny Israelita rehetra voaisa ka roapolo taona no ho miakatra.
15 Ny mpanankarena tsy handoa mihoatra antsasaky ny sekela, ary ny mahantra koa tsy handoa latsak'izany; fa ny tsirairay samy handoa ho AHY ny vola voatondro mba hanavotra ny ainy.
16 Rehefa voaangonao avy amin'ny Israelita rehetra izany vola izany, dia hampiasainao hikojakojana ny Tranolay fihaonana. Izany no hahatsiarovako ny Israelita ka hiarovako ny ainy.
18 -Momba ny fidiovana, dia hisy kovetabe iray ka halimo no hamboarana azy; hasiana faladiany halimo izany, ka hapetraka eo anelanelan'ny Tranolay fihaonana sy ny alitara, sady hofenoina rano.
19 Io rano io no hampiasain'i Aharona sy ny zanany lahy, hanasany ny tongotra aman-tanany,
20 alohan'ny hidirany ao amin'ny Tranolay fihaonana na hanatonany ny alitara mba handoro sorona hanetona ho Ahy TOMPO. Amin'izay dia tsy ho faty izy ireo.
21 Tsy maintsy misasa tongotra aman-tanana izy mba tsy ho faty. Fepetra hanan-kery hatrany eo aminy sy ny taranany izany.
23 -Maka zava-manitra tsara indrindra: dia miora ranony dimy kilao, havozomanitra roa kilao sy sasany, kanelina manitra roa kilao sy sasany,
24 ary kasia dimy kilao, araka ny lanja fampiasa ao amin'ny Toeramasina, miampy diloilon'oliva enina litatra.
25 Mpamboatra zava-manitra no hampifangaroharo azy hanjary ilomasina hampiasaina amin'ny lanonana fanokanana.
26 Io no hampisaina mba hanokanana ny Tranolay fihaonana, ny Vatamasina misy ny raki-tsoratry ny fanekempihavanana,
27 ny latabatra voatokana, ny fitoeran-jiro sy ny fitaovana miaraka aminy, ny alitara fandoroana vovo-javamanitra,
28 ny alitara fanaovana sorona sy ny fitaovana miaraka aminy, ary ny kovetabe sy ny faladiany.
29 Rehefa vita fanokanana ireo, dia ho voatokana ho Ahy tokoa, ka izay rehetra mikasika azy na olona na zavatra dia hiharan-doza.
30 Horarahanao ilomasina koa i Aharona sy ny zanany lahy ho fanokanana azy mba hanompo Ahy amin'ny maha mpisorona.
31 Aorian'izany dia hambaranao amin'ny Israelita hoe: Ity no ilomasina fampiasa amin'ny fanokanana. Fanompoana ny Tompo irery ihany no hampiasana azy eo amin'ny taranaka mifandimby.
32 Koa tsy misy olona mahazo mampiasa azy mba hihosorany, ary tsy misy mahazo manamboatra ilomanitra mitovy aminy; fa voatokana izany, ka tsy maintsy hajaina ny maha voatokana azy.
33 Fa raha misy maka tahaka manamboatra mitovy aminy, ka manosotra azy amin'ny tenan'ny olon-tsotra, dia hoesorina tsy ho anisan'ny firenena israelita izy.