Eksôdy

Toko faha-26

²⁷ barany dimy koa hihazona ireo hazo fisaka amin'ny lafiny iray hafa; ary barany dimy hafa ho an'ireo hazo fisaka amin'ny lafiny ivoho ao andrefana.

²⁸ Ny barany afovoany dia handalo eo am-pisasahan'ny haavon'ny hazo fisaka, ary hatao mahatakatra ny sisiny an-daniny roa amin'ny fonena-masina.

²⁹ Horakofana takela-bolamena, na ny hazo fisaka na ny barany; ary hisy haba volamena hotefena hanatsofohana ny barany.

³⁰ Rehefa izany, ry Mosesy, dia asaovy atsangana araka ny modely izay efa nasehoko anao teto an-tendrombohitra ny fonena-masina.

³¹ Mpahay taozavatra no hanao efitra lamba iray amin'ny rongony mafy mifangaro volon'ondry miloko volomparasy sy mena ary jaky, ravahana kerobima roa vita amin'ny peta-kofehy tsara.

³² Io efitra lamba io dia hahantona amin'ny fantsika volamena eo amin'ny andry efatra vita amin'ny hazo mimoza voarakotra takela-bolamena sady mipetraka amin'ny faladia volafotsy efatra.

³³ Eo ambanin'ny farango no hanantonana ny efitra lamba. Any aorian'ny efitra lamba no hametrahana ny Vatamasina mirakitra ny raki-tsoratry ny fanekempihavanana. Ny efitra lamba amin'izay no hampisaraka ny Toeramasina sy ny Toeramasina indrindra.

³⁴ Avy eo, dia hapetraka eo ambonin'ny Vatamasina ilay sarony, ao amin'ny Toeramasina indrindra.

³⁵ Hapetraka ao amin'ny fonena-masina, eo amin'ny lafiny avaratra, ny latabatra; ary ny fitoeran-jiro kosa manoloana ny latabatra amin'ny lafiny atsimo.

³⁶ Momba ny fidirana ao amin'ny tranolay masina dia aoka hanaovan'ny mpanenona za-draharaha varavarana lamba iray hafa amin'ny rongony mafy, mifangaro volon'ondry miloko volomparasy sy mena ary jaky.

³⁷ Hisy andry dimy hatao amin'ny hazo mimoza, sady horakofana takela-bolamena, ka eo no hanantonana io varavarana lamba io amin'ny farango volamena. Faladia halimo dimy no harendrika hitsatohan'ireo andry ireo.

Toko faha-27

¹ Hisy alitara fisoronana hamboarina amin'ny hazo mimoza. Ho efamira izy io, ka mirefy roa metatra sy sasany ny lafy tsirairay, ary iray metatra sy sasany ny haavony.

² Hatao miendrika tandroka ny zorony efatra ambony sady harafitra miaraka amin'ny tenan'ny alitara, izay horakofana takelaka halimo.

³ Halimo koa no hanaovana ny fanaka rehetra momba ny alitara: dia ny tavy fasiana lavenon-jabora, ny sotrobe fangaronana afo, ny tsatokaty famafazana, ny fitrebi-kena ary ny fitondrana afo.

⁴ Hisy makarakara halimo miendrika harato hamboarina; ary haba halimo iray no hapetaka isaky ny zorony.

⁵ Hapetraka eo akaikin'ny fisasahan'ny aty alitara io makarakara io, eo ambanin'ny fehivavany.

⁶ Hisy bao roa hatao amin'ny hazo mimoza, dia horakofana takelaka halimo;

⁷ ary hatsofoka ao anatin'ny haba izay manatrika ny lafiny roa amin'ny alitara ireo bao ireo, rehefa lanjaina ny makarakara.

⁸ Hazo fisaka no handrafetana ny alitara, ka hatao holoka aty izany, araka ny modely izay efa nasehoko anao teto an-tendrombohitra.

⁹ Ny fonena-masina dia hohodidinina kianja izay fefen'ny temitra vita amin'ny kiran-drongony mafy. Amin'ny lafiny atsimo, dia hivelatra eo amin'ny dimampolo metatra ny halavan'ny temitra;

¹⁰ farango sy anjaka volafotsy no hanantonana azy eo amin'ny andry halimo roapolo, izay mitsatoka amin'ny faladia halimo roapolo.

¹¹ Ho tahaka izany koa ny lafiny avaratra, ka hivelatra dimampolo metatra ny halavan'ny temitra, ary mitovy amin'ny teo ihany ny fanantonana azy.

¹² Amin'ny lafiny andrefana, manaraka ny sakan'ny kianja, dia hivelatra 25 metatra ny temitra, ary hahantona amin'ny andry folo misy faladia folo.

¹³ Ho 25 metatra koa ny velaran'ny kianja amin'ny lafiny fidirana atsinanana,

¹⁴ ka eo an-daniny roa amin'ny fidirana dia samy hisy temitra fito metatra sy sasany ny halavany miaraka amin'ny andry telo sy faladiany telo avy.

¹⁶ Ny vavahadin'ny kianja kosa dia hasiana varavarana lamba folo metatra, hamboarin'ny mpanao peta-kofehy amin'ny kiran-drongony mafy mifangaro volon'ondry miloko volomparasy sy mena ary jaky, ka hahantona amin'ny andry efatra misy faladiany efatra.

¹⁷ Hisy anjaka volafotsy hampitohy ny andry rehetra izay mamaritra ny kianja; ny farangony koa dia ho volafotsy, fa ny faladiany halimo.

¹⁸ Koa ny kianja dia hirefy dimampolo metatra ny lavany, 25 metatra ny sakany; ary ny haavon'ny lamba temitra rongony dia ho roa metatra sy sasany.

¹⁹ Ny fitaovana rehetra fanampiny mba hahatomombana ny fonena-masina dia hatao halimo avokoa, ka isan'izany ny tsimatra rehetra momba azy sy ny tsimatra rehetra momba ny fefin'ny kianja.

²⁰ Ary ianao, ry Mosesy, mandidia ny Israelita hitondra aminao menaka oliva tsara sy madio mba handrehetana ny jiro tsy tapaka.

²¹ I Aharona sy ny taranany no hametraka ny fitoeran-jiro ao amin'ny Tranolay fihaonana, eo anoloan'ny efitra lamba izay manafina ny Vatamasina; ny jiro dia hirehitra manomboka ny hariva ka hatramin'ny maraina eo anatrehako Izaho TOMPO. Fepetra raikitra hotanterahin'ny Israelita isaky ny taranaka mifandimby izany.

Toko faha-28

¹ Ry Mosesy, ampanatony ho eo akaikinao i Aharona rahalahinao sy ny zanany efa-dahy, dia i Nadaba sy i Abiho ary i Elehazara sy i Itamara. Avaho amin'ny Israelita ireo mba hanompo Ahy amin'ny fisoronana.

² Hanaovana fanamiana voatokana i Aharona ho mariky ny voninahitra amam-piandrianany.

³ Ny torohevitra rehetra dia ambarao amin'ireo mpahay taozavatra izay nofenoiko hakingana, ka ireo no hanao ny fanamiana izay hoentin'i Aharona amin'ny fanokanana azy ho mpisorona ho Ahy.

⁴ Ireo fanamiana izay hataony dia ny saron-tratra, ny efoda, ny akanjo lava ivelany, ny akanjo vita peta-kofehy, ny satroka fehiloha ary ny fehikibo. Hanaovan'i Aharona rahalahinao sy ny taranany ireo rehefa manao fisoronana amiko izy.

⁵ Volon'ondry miloko volomparasy sy mena ary jaky mbamin'ny rongony madinika sy kofehy volamena no hampiasain'ireo mpahay taozavatra.

⁶ Mpahay taozavatra no hanao ny efoda amin'ny kiran-drongony mafy, mifangaro volon'ondry miloko volomparasy sy mena ary jaky, ka asiana peta-kofehy volamena.

⁷ Beritelo zairina amin'ny sisiny roa no hitondrana ny efoda.

⁸ Hotenomina ho iray amin'ny efoda sady hatao amin'ny kofehy mitovy amin'ny nanaovana azy ny samboady fitazonana ny efoda.

⁹ Avy eo dia halaina ny vato berila roa izay hanoratana an-tsokitra ny anaran'ireo zanakalahin'i Jakoba:

¹⁰ ka ny anarana enina amin'ny vato voalohany, ary ny anarana enina amin'ny vato faharoa, arakara-jokiny.

¹¹ Mpivaofy vato no hisokitra ny anarana amin'ireo vato roa ireo; hataony toy ny fisokitra tombokase izany ka hapetaka anaty bokom-bolamena anankiroa.

¹² Avy eo dia hapetany eo ambony beritelon'ny efoda ireo vato roa ireo mba ho fahatsiarovana ny Israelita foko 12. Amin'izay i Aharona dia hitondra ny anaran'izy ireo eny an-tsorony ao amin'ny Toeramasina, ka Izaho TOMPO tsy hanadino anareo.

¹³ Rehefa vita ny bokom-bolamena anankiroa,

¹⁴ dia hapetaka eo koa ny rojo volamena madinika anankiroa miolanolana toy ny tady voarandrana.

¹⁵ Mpahay taozavatra no hanao ny saron-tratra fitsarana amin'ny kiran-drongony mafy, mifangaro volon'ondry miloko volomparasy sy mena ary jaky, sady hasiana peta-kofehy volamena toy ny efoda.

¹⁶ Ho paosy efamira izy io, ka mirefy 25 santimetatra ny lafiny tsirairay

¹⁷ ary horavahana laharam-batosoa efatra: ny laharana voalohany dia sardoanina sy topaza ary emeralda;

¹⁸ ny laharana faharoa dia robisy sy safira ary diamondra;

¹⁹ ny laharana fahatelo dia opaka sy agata ary ametista;