Eksôdy

Toko faha-30

³⁴ Hoy koa ny TOMPO tamin'i Mosesy: -Maka zava-manitra ianao: dia natafa, oniksa, galbanoma, ary ramy madio. Ataovy mitovy fatra ireo.

³⁵ Mpamboatra zava-manitra no hampifangaroharo azy miaraka amin'ny sira mba hahatonga azy ho voatokana sy madio.

³⁶ Hotorotoroina ho vovoka madinika izany ka hampiasaina ao amin'ny Tranolay fihaonana, manoloana ny Vatamasina izay toerana hihaonako aminao. Hanan-kasina miavaka aminareo izany.

³⁷ Aza manamboatra zava-manitra mitovy aminy mba hampiasainareo ho anareo, fa aoka hoheverinareo ho voatokana ho Ahy TOMPO ihany izany.

³⁸ Fa raha misy manamboatra zava-manitra mitovy aminy hamofonany azy, dia hoesorina tsy ho anisan'ny firenena israelita izy.

Toko faha-31

¹ Hoy koa ny TOMPO tamin'i Mosesy:

² -Jereonao fa nofidiko i Betsalela, zanakalahin'i Ory sady zafikelin'i Hora, avy amin'ny fokon'i Joda,

³ ary nofenoiko ny Fanahiko mba ho tena kinga sy marani-tsaina ka mahalala ny haitao isan-karazany:

⁴ hainy ny manao vinavinan'asa, ny miasa volamena sy volafotsy ary halimo,

⁵ ny mandidy ny vatosoa sy mandrafitra azy, ny manao sokitra ny hazo, izany hoe hainy atao ny asa kanto samihafa.

⁶ Ary indro nomeko ho lefiny i Oholiaba, zanakalahin'i Ahisamaka, avy amin'ny fokon'i Dana, sady efa nomeko ny fahakingana lehibe izay an'ireo mpahay taozavatra hafa koa. Izy ireo no hiaraka hanatanteraka izay rehetra nandidiako anao hatao:

⁷ dia ny Tranolay fihaonana, ny Vatamasina misy ny raki-tsoratry ny fanekempihavanana, ny saron'ny Vatamasina, ny fitaovana rehetra momba ny tranolay masina,

⁸ ny latabatra voatokana, ny fitoeran-jiro volamena madio sy ny fitaovana rehetra miaraka aminy, ny alitara fandoroana vovo-javamanitra,

⁹ ny alitara fanaovana sorona sy ny fitaovana rehetra miaraka aminy, ny tavy fidiovana sy ny faladiany,

¹⁰ ny lamba fandrakofana ny fanaka, ny fanamiana voatokana hiakanjoan'i Aharona sy ny zanany lahy eo am-panaovana ny raharahany,

¹¹ ny ilomasina fampiasa amin'ny fanokanana, ary ny vovo-javamanitra voatokana ho an'ny Toeramasina. Hanaraka tanteraka ny torolalana izay nandidiako anao ny mpahay taozavatra amin'ny fanaovana ireo rehetra ireo.

¹² Niteny tamin'i Mosesy ny TOMPO,

¹³ mba hamepetra ny Israelita hoe: -Tsy maintsy hajainareo mihitsy ny andro sabata, satria ny sabata no mariky ny fifandraisako aminareo isaky ny taranaka mifandimby, ka hiekena fa Izaho no TOMPO Izay nifidy anareo ho vahoakako.

¹⁴ Koa manaja ny sabata, fa andro voatokana aminareo izany. Fa izay tsy manaja ny andro sabata fa manao raharaha amin'io andro io dia hoesorina tsy ho anisan'ny firenena israelita ary hovonoina ho faty mihitsy.

¹⁵ Misy andro enina hiasana isan-kerinandro, fa ny andro fahafito dia sabata, andro fitsaharana voatokana ho Ahy TOMPO. Koa izay olona rehetra miasa amin'ny andro sabata dia hovonoina ho faty.

¹⁶ Tsy maintsy hajain'ny Israelita isaky ny taranaka mifandimby ny sabata satria fanekempihavanana raikitra izany.

¹⁷ Io andro io hatrany hatrany no ho mariky ny fifandraisana amiko sy amin'ny Israelita; enina andro manko no namoronako ny lanitra sy ny tany, fa tamin'ny andro fahafito dia nitsahatra Aho ary niala sasatra.

¹⁸ Rehefa vitan'Andriamanitra ny resaka nataony tamin'i Mosesy tao an-tendrombohitra Sinay, dia nomeny an'i Mosesy ny vatofisaka misy ny lalana izay nosoratan'ny rantsan-tanan'Andriamanitra.

Toko faha-32

¹ Nony hitan'ny vahoaka israelita fa tara ny fidinan'i Mosesy avy any an-tendrombohitra, dia nivory teo amin'i Aharona izy, ka nanao taminy hoe: -Ndeha anaovy andriamanitra iray izahay handeha eo alohanay, satria tsy fantatray izay nanjo an'i Mosesy, ilay lehilahy namoaka anay hiala tany Ejipta.

² Fa novalian'i Aharona hoe: -Esory ny kavim-bolamena eny an-tsofin'ny vadinareo sy ny zanakalahinareo ary ny zanakavavinareo, ka ento aty amiko.

³ Dia samy nanaisotra ny kavim-bolamena teny an-tsofiny ny Israelita rehetra, ka nitondra ny azy tany amin'i Aharona.

⁴ Noraisin'i Aharona ireny ka nempoiny ary nararany tamin'ny lasitra, dia nanaovany sarivongana ombilahikely iray. Dia nihoraka ny Israelita hoe: -Ity no andriamanitsika izay namoaka antsika hiala tany Ejipta!

⁵ Nony hitan'i Aharona izany, dia namboatra alitara iray teo anoloan'ny sarivongana izy, ary nanambara hoe: -Hisy fety hanomezam-boninahitra ny TOMPO rahampitso!

⁶ Nony ampitso dia nifoha maraina ny vahoaka israelita ka nanolotra sorona dorana manontolo sy sorom-pihavanana teo amin'io alitara io. Ary nipetraka hihinana sy hisotro ny vahoaka, ary avy eo dia nitsangana mba hifalifaly.

⁷ Dia nilaza tamin'i Mosesy ny TOMPO hoe: -Andeha midina izao ianao, fa efa nanao heloka bevava ny vahoaka izay navoakanao hiala tany Ejipta.

⁸ Nalaky nivily hiala tamin'ny lalana izay nasaiko nalehany izy, fa nanamboatra sarivongana ombilahikely ho azy, sady niankohoka taminy ary nanao sorona ho azy. Nilaza aza izy hoe: Ity no andriamanitsika izay namoaka antsika hiala tany Ejipta!

⁹ Ary hoy Izaho TOMPO taminao: Hitako tsara io vahoaka io fa mafy hatoka.

¹⁰ Koa ankehitriny, avelao hanaovako azy: haringako amin'ny fahatezerako izy, fa ianao kosa hataoko firenena lehibe.

¹¹ Fa niangavy ny TOMPO Andriamaniny i Mosesy mba ho tony ka nanao hoe: -TOMPO o, nahoana no hanampatra ny fahatezeranao amin'ny vahoakanao Ianao, rehefa avy nampiasa hery lehibe sy fahefana tsy hay tohaina mba hamoaka azy hiala tany Ejipta?

¹² Raha izany no hataonao, dia hiteny ny Ejiptianina hoe: Halozana no namoahan'ny Tompo ireo Israelita ireo hiala ny tanintsika, mba handringanany azy any an-tendrombohitra, ary hanafoanany azy tsy ho eto ambonin'ny tany intsony. TOMPO o, toneo ny hatezeranao, ary avelao ny loza saika hamelezanao ny vahoakanao.

¹³ Tsarovy i Abrahama sy i Itsehaka ary i Jakoba mpanomponao izay nianiananao ka nilazanao hoe: Hataoko marobe toy ny kintana eny amin'ny habakabaka ny taranakareo. Homeko azy ny tany rehetra izay nampanantenaiko, ka ho fananany raikitra izany.

¹⁴ Dia najanon'ny TOMPO tamin'izay ny loza nolazainy hamelezana ny vahoakany.

¹⁵ Ary nitodi-doha i Mosesy, ka nidina avy eny an-tendrombohitra. Nentiny teny an-tanany ny vatofisaka roa izay nanoratana ny didin'Andriamanitra, samy voasikotra teo amin'ny lafiny anankiray.

¹⁶ Asan'Andriamanitra ireo vatofisaka roa ireo, nosoratan'ny tanan'Andriamanitra mihitsy.

¹⁷ Ren'i Josoa ny feon'ny vahoaka nihorakoraka, ka hoy izy tamin'i Mosesy: -Horakoraky ny ady any an-toby izany!

¹⁸ Fa namaly azy i Mosesy hoe: -Tsia, tsy horakora-pandresena, na kiakiakam-paharesena no reko, fa hiram-pety.

¹⁹ Raha vao nanatona ny toby izy, dia hitan'i Mosesy ny sarivongana ombilahikely sy ny vahoaka nandihy. Tezitra i Mosesy, ka natsipiny ny vatofisaka teny an-tanany sady nopotipotehiny teo am-pototry ny tendrombohitra.

²⁰ Nalain'i Mosesy koa ny sarivongana ombilahikely izay namboarin'ireo ka nodorany tamin'ny afo. Avy eo, notorotoroiny ho vovoka ny sisa tavela, dia naparitany tamin'ny rano, rano izay nasainy nosotroin'ny Israelita.

²¹ Ary nanontany an'i Aharona izy hoe: -Nanao inona anao ity vahoaka ity no dia nentinao amin'izao heloka bevava izao?

²² Fa novaliany hoe: -Aza tezitra ianao, tompoko. Fantatrao ihany fa mailaka hanao ratsy ity vahoaka ity.

²³ Tonga nilaza tamiko izy hoe: Anaovy andriamanitra izahay hitarika anay satria tsy fantatray izay nanjo an'i Mosesy, ilay lehilahy namoaka anay hiala tany Ejipta.

²⁴ Dia nanontany azy aho hoe: Iza ary no manana volamena? Niaraka tamin'izay dia nesorin-dry zareo ny firavaka teny aminy ka natolony ahy. Narendriko tamin'ny afo kosa izany, ary io ombilahikely io no nivoaka avy tao.

²⁵ Tsapan'i Mosesy tamin'izay fa navelan'i Aharona hanao izay tiany hatao ny vahoaka, sady navelany hataon'ny fahavalony ho fihomehezana.

²⁶ Koa nitsangana teo am-bavahadin'ny toby izy, ary niantso hoe: -Izay an'ny TOMPO, mankanesa ety amiko! Dia nitangorona teo amin'i Mosesy ny Levita rehetra,

²⁷ ka nitenenany hoe: -Izao no baikon'ny TOMPO, Andriamanitr'i Israely: Samia mandray ny sabany avy ianareo, ka mandehana mivezivezy isam-baravarana ato amin'ny toby, vonoy ny rahalahinareo sy ny namanareo ary ny mpifanolo-bodirindrina aminareo.