Eksôdy

Toko faha-34

²⁰ Kanefa ny lahy voalohan-teraky ny borikivavy dia hosoloinareo zanakondry na zanakosy lahy, na hovonoinareo ka haolanareo ny tendany. Ary ny zanaka lahimatoanareo kosa dia havotanareo. Aza mankao amin'ny Toeramasina mitondra tanam-polo.

²¹ Manana andro enina isan-kerinandro ianareo hiasanareo, fa amin'ny andro fahafito dia hitsahatra amin'ny raharahanareo ianareo na dia amin'ny fotoam-pamafazana sy fijinjana aza.

²² Ankalazao ny fetin'ny Pentekosta amin'ny fotoana hijinjanareo ny santa-bary, ary ny fetim-bokatra amin'ny fararano.

²³ Intelo isan-taona ny lehilahy rehetra ao aminareo no hiseho eo anatrehako TOMPO Andriamanitr'i Israely.

²⁴ Fa haka ny tanin'ny firenen-kafa Aho mba hanitarana ny faritaninareo, nefa tsy hisy olona hihevitra handrombaka ny taninareo mandritra ny intelo isan-taona hiakaranareo hiseho eo anatrehako TOMPO Andriamanitrareo.

²⁵ Aza ampiarahina amin'ny mofo misy leviora ny sorona alatsa-dra, ary aza avela ho tra-maraina ny henan'ny sorona atao harivan'ny fetin'ny Paska.

²⁶ Haterinareo ao an-tranoko ny santa-bokatry ny taninareo satria Izaho no TOMPO Andriamanitrareo; nefa aza mahandro zanak'osy amin'ny rononon-dreniny.

²⁷ Mbola nandidy an'i Mosesy koa ny TOMPO hoe: -Soraty ireto didy ireto fa fototry ny fanekempihavanana ataoko aminao sy ny vahoaka israelita.

²⁸ Dia nijanona tao niaraka tamin'ny TOMPO efapolo andro sy efapolo alina i Mosesy, nefa tsy nihinana na nisotro; ary izy no nanoratra tamin'ny vatofisaka roa ny didy folo, fototry ny fanekempihavanana.

²⁹ Dia nidina avy eny an-tendrombohitra Sinay indray i Mosesy, nitondra teny an-tanany ny vatofisaka roa misy ilay raki-tsoratry ny fanekempihavanana; tsy fantany anefa fa namirapiratra ny tarehiny noho ny niresahany tamin'Andriamanitra.

³⁰ Koa raha nahita ny tarehin'i Mosesy namirapiratra i Aharona sy ny Israelita rehetra, dia natahotra ny hanatona azy.

³¹ Niantso an-dry zareo i Mosesy, koa nanatona i Aharona sy ny lehiben'ny vahoaka, dia niresaka taminy.

³² Avy eo dia nanatona koa ny Israelita sisa rehetra, ka nampitain'i Mosesy taminy ny baiko rehetra izay nandidian'ny TOMPO azy tao an-tendrombohitra Sinay.

³³ Rehefa vitan'i Mosesy ny teny nataony, dia nosaronany voaly ny tarehiny.

³⁴ Hatreo dia esorin'i Mosesy ny voaly manarona ny tarehiny isaky ny tonga eo anatrehan'ny TOMPO izy hiresaka aminy. Rehefa mivoaka ny tranolay hampita ny baiko voarainy ho an'ny Israelita izy,

³⁵ dia azon'izy ireo jerena ny tarehiny mamirapiratra. Avy eo dia saronany voaly indray ny tarehiny mandra-piveriny hiresaka amin'Andriamanitra.

Toko faha-35

¹ Novorin'i Mosesy ny Israelita rehetra ka nilazany hoe: -Ireto no zavatra nandidian'ny TOMPO hotanterahinareo:

² misy andro enina hiasanareo isan-kerinandro, fa ny andro fahafito dia sabata, andro fitsaharana hatokanareo ho an'ny TOMPO. Koa izay olona rehetra manao raharaha amin'io andro io dia hovonoina ho faty.

³ Na aiza na aiza honenanareo, dia tsy azonareo atao na dia ny mandrehitra afo aza amin'ny andro sabata.

⁴ Nanohy nampita ny baiko avy amin'ny TOMPO ihany i Mosesy ka niteny tamin'ny Israelita tafangona teo nanao hoe:

⁵ -Angony ny fanomezana avy aminareo ho an'ny TOMPO; izay rehetra manome an-tsitrapo no aoka hitondra fanomezana isan-karazany ho an'ny TOMPO: dia volamena, volafotsy, halimo,

⁶ volon'ondry miloko volomparasy sy mena ary jaky, rongony madinika, volon'osy,

⁷ hoditr'ondry miloko mena, hoditra mafy, hazo mimoza,

⁸ solika hampiasaina amin'ny fitoeran-jiro, ilomanitra hafangaro amin'ny ilomasina fanokanana sy amin'ny vovo-javamanitra hodorana,

⁹ vato berila sy vatosoa hafa hatao amin'ny efoda sy ny saron-tratran'ny mpisorombe.

¹⁰ Ary aoka ny mpahay taozavatra kinga rehetra ao aminareo hivory mba hanatanteraka izay rehetra nodidian'ny TOMPO:

¹¹ dia ny fonena-masina miaraka amin'ny tranolay sy ny rakotra hiaro azy, ny farango, ny hazo fisaka, ny barany, ny andry miaraka amin'ny faladiany;

¹² ny Vatamasina sy ny baony ary ny sarony; ny efitra lamba,

¹³ ny latabatra voatokana sy ny baony ary ny fitaovana rehetra miaraka aminy mbamin'ny mofo fanolotra an'Andriamanitra;

¹⁴ ny fitoeran-jiro sy ny fitaovana miaraka aminy, ny jiro sy ny solika fandrehitra,

¹⁵ ny alitara fandoroana vovo-javamanitra sy ny baony, ny ilomasina fanokanana, ny vovo-javamanitra hodorana, ny varavarana lamba eo amin'ny fidirana mankao amin'ny fonena-masina;

¹⁶ ny alitara fanaovana sorona sy ny makarakarany halimo ary ny baony mbamin'ny fitaovana rehetra miaraka aminy; ny kovetabe sy ny faladiany,

¹⁷ ny temitry ny kianja miaraka amin'ny andry sy ny faladiany, ny varavarana lamba eo am-bavahadin'ny kianja;

¹⁸ ny tsimatra momba ny fonena-masina sy ny fefin'ny kianja miaraka amin'ny tady mifandraika aminy;

¹⁹ ny lamba fandrakofana ny fanaka ao amin'ny Toeramasina ary ny fanamiana voatokana hiakanjoan'i Aharona sy ny zanany lahy eo am-panaovana ny raharahany.

²⁰ Dia nandao an'i Mosesy ny vahoaka israelita rehetra.

²¹ Nony avy eo, dia tonga avokoa izay olona rehetra nentanin'ny fony sy malala-tanana, ka samy nitondra fanomezana ho an'ny TOMPO mba hanamboarana ny Tranolay fihaonana, hanaovana fanompoam-pivavahana sy hanamboarana ny fanamiana voatokana.

²² Tonga ny lehilahy sy ny vehivavy rehetra malala-tanana nitondra firavaka volamena isan-karazany, fisisika, kavina, peratra na vakana, ka nanolotra azy ho an'ny TOMPO araka ny fihetsika fanolorana izany.

²³ Ireo rehetra nanana volon'ondry miloko volomparasy sy mena ary jaky, rongony madinika, na volon'osy, na hoditr'ondry miloko mena na hoditra mafy ihany koa dia samy nitondra ny azy.

²⁴ Ireo nanavaka volafotsy na halimo ho an'ny TOMPO koa dia samy nitondra ny azy; izay nanana hazo mimoza azo ampiasaina amin'ny fanatanterahana ny asa dia nitondra ny azy.

²⁵ Samy nitondra ny kiran-drongony madinika sy ny volon'ondry miloko volomparasy sy mena ary jaky izay efa nofolesin'ny tanany koa ireo vehivavy kinga.

²⁶ Nisy koa vehivavy kinga hafa nazoto namoly volon'osy.

²⁷ Ireo lehiben'ny vahoaka israelita kosa nitondra ny vato berila sy ny vatosoa hafa hatao amin'ny efoda sy ny saron-tratran'ny mpisorombe,

²⁸ mbamin'ny ilomanitra sy ny solika hatao amin'ny jiro sy ho an'ny ilomasina fampiasa amin'ny fanokanana ary ny vovo-javamanitra hodorana.

²⁹ Ny Israelita malala-tanana rehetra, na lahy na vavy, dia nitondra fanatitra an-tsitrapo ho an'ny TOMPO mba ho enti-manao ireo asa izay efa nandidian'ny TOMPO an'i Mosesy.

³⁰ Hoy i Mosesy tamin'ny Israelita: -Jereonareo fa nofidin'ny TOMPO i Betsalela, zanakalahin'i Ory sady zafikelin'i Hora, avy amin'ny fokon'i Joda,

³¹ ary nofenoiny ny Fanahiny mba ho tena kinga sy marani-tsaina, ka mahalala ny haitao isan-karazany:

³² hainy ny manao vinavinan'asa, ny miasa volamena sy volafotsy ary halimo,

³³ ny mandidy ny vatosoa sy mandrafitra azy, ny manao sokitra ny hazo, izany hoe hainy atao ny asa kanto samihafa.

³⁴ Nomen'ny TOMPO azy ny fahaiza-mampianatra, tahaka izay nomeny an'i Oholiaba, zanakalahin'i Ahisamaka, avy amin'ny fokon'i Dana.