Eksôdy

Toko faha-28

²⁰ ny laharana fahefatra dia krizolita sy berila ary jaspa. Samy apetaka anaty bokom-bolamena avy ny vato tsirairay.

²¹ Hosoratana an-tsokitra eo amin'ny vatosoa tsirairay avy ny anaran'ireo zanakalahin'i Jakoba izay miisa 12; hatao toy ny fisokitra tombokase izany, ka ireo vato ireo no ho solotenan'ny foko israelita 12.

²² Rojo volamena madio anankiroa, miolanolana toy ny tady voarandrana, no hatao eo amin'ny saron-tratra;

²³ hisy haba volamena roa hamboarina ka hapetaka eo amin'ny zorony roa ambony amin'ny saron-tratra.

²⁴ Hafatotra tsirairay amin'ireo haba amin'ny saron-tratra ireo ny rojo volamena madinika;

²⁵ ary ny lanin'ny rojo roa kosa dia hapetaka amin'ny bokom-bolamena izay eo ambonin'ny beritelon'ny efoda mba hahatonga ny saron-tratra ho eo anoloana.

²⁶ Hisy haba volamena roa hafa koa hamboarina ka hapetaka eo amin'ny zorony roa ambany amin'ny saron-tratra manolotra ny efoda.

²⁷ Mbola hisy haba volamena roa hafa koa hamboarina ka hapetaka eo ambanin'ny beritelon'ny efoda eo anoloana, eo amin'ny fikambanany; eo ambonin'ny samboadin'ny efoda no hametrahana ireo haba volamena ireo.

²⁸ Hatohy tady volomparasy ny haban'ny saron-tratra sy ny haban'ny efoda mba ho eo ambonin'ny beritelon'ny efoda ilay saron-tratra ka tsy hifindrafindra eo amin'ny efoda.

²⁹ Amin'izay, rehefa miditra ao amin'ny Toeramasina i Aharona, dia hitondra eny an-tratrany ny saron-tratra fitsarana misy ny anaran'ny fokon'i Israely; ka Izaho TOMPO amin'izay dia tsy hanadino anareo na oviana na oviana.

³⁰ Ary ianao, ry Mosesy, apetaho eo amin'ny saron-tratra fitsarana ny Orima sy Tomima mba hoentin'i Aharona eny an-tratrany rehefa hiseho eo anatrehako Izaho TOMPO izy; tsy maintsy entin'i Aharona mandrakariva eny aminy manko ireny isaky ny ho ao amin'ny Toeramasina izy mba hahazoany mamantatra ny sitrapoko momba ny Israelita.

³¹ Ny akanjo lava ivelany izay hitondran'i Aharona ny efoda dia hatao manontolo amin'ny volon'ondry miloko volomparasy.

³² Hasiana vavany eo afovoany mba hidiran'ny loha, ka hotenomina sy hohamafisina ny sisiny manodidina io vavany io mba tsy ho rovitra.

³³ Ny moron-tongotr'akanjo manodidina dia horavahana sarin'ampongabendanitra vita amin'ny volon'ondry miloko volomparasy sy mena ary jaky, sady hasiana lakolosy kely volamena.

³⁴ Ny sarin'ampongabendanitra dia hifanelanelana amin'ny lakolosy kely.

³⁵ Hanaovan'i Aharona io fanamiana io rehefa manao ny raharaha maha mpisorona izy: koa rehefa hiseho eo anatrehako ao amin'ny Toeramasina izy, na hiala tao, dia ho heno ny feon'ny lakolosy kely ka tsy ho faty izy.

³⁶ Hisy takela-bolamena madio iray hamboarina, ka hatao miendrika voninkazo ary eo amboniny hasiana soratra voasokitra toy ny amin'ny tombokase hoe: 'Voatokana ho an'ny TOMPO'.

³⁷ Dia hafatotra amin'ny tady volon'ondry miloko volomparasy eo ambonin'ny satroka fehiloha, eo anoloana izy.

³⁸ Hoentin'i Aharona mandrakariva eny amin'ny handriny io takela-bolamena io rehefa hiseho eo anatrehako Izaho TOMPO izy, ka amin'izay dia hoekeko ny fanatitra rehetra izay hatokan'ny Israelita ho Ahy na dia manao hadisoana aza ireo amin'ny fanolorana azy.

³⁹ Farany dia hanenomana akanjo lava vita rongony i Aharona, ary hanaovana satroka fehiloha rongony sy fehikibo vita peta-kofehy.

⁴⁰ Ary ireo zanakalahin'i Aharona koa dia hanaovana fanamiana mihaja sy be voninahitra, dia akanjo lava sy fehikibo ary satroka boribory.

⁴¹ Ry Mosesy, hampiakanjoinao ireo fanamiana ireo i Aharona zokinao sy ny zanany lahy ary hohosoranao diloilo ny lohany, dia hapetrakao amin'ny toerany izy; toy izany no hanokananao azy hanompo Ahy amin'ny maha mpisorona azy.

⁴² Mba hanaronana ny fitanjahany, dia hanaovana kilaoty rongony izy hanarona ny hatreo amin'ny tehezany ka hatramin'ny feny.

⁴³ Hiakanjoan'i Aharona sy ny zanany izany rehefa hiditra ao amin'ny Tranolay fihaonana izy, na manatona eo amin'ny alitara hanao ny raharaha maha mpisorona ao amin'ny Toeramasina. Izany no tsy hahazoany heloka hahafaty azy. Ho fepetra raikitra izany ho an'i Aharona sy ny taranany.

Toko faha-29

¹ Toy izao no zavatra hataonao rehefa hanokana an'i Aharona sy ny zanany lahy ho mpisorona ho Ahy ianao: -Maka vantotr'ombilahy iray sy ondrilahy roa tsy misy kilema.

² Maka kobam-barimbazaha, ka manaova mofo tsy misy leviora, mofo mamy misy diloilo saingy tsy misy leviora, ary mofo manify tsy misy leviora sady voararaka diloilo.

³ Ataovy ao anaty harona iray ireo, ary ento ao amin'ny Toeramasina miaraka amin'ny vantotr'ombilahy sy ny ondrilahy roa.

⁴ Ento hankeo am-baravaran'ny Tranolay fihaonana i Aharona sy ireo zanany lahy, dia ampandroy amin'ny rano fandroana.

⁵ Avy eo dia ampiakanjoy an'i Aharona ny fanamiana voatokana: dia ny akanjo lava ivelany, ny akanjo vita peta-kofehy, ny efoda ary ny saron-tratra, ka afatory ny samboadin'ny efoda.

⁶ Apetraho eo an-dohany ny satroka fehiloha, ary apetraho amin'ny satroka fehiloha kosa ny marika maha voatokana.

⁷ Dia alao ny ilomasina fanokanana ka araraho eo an-dohany, ary atokany izy.

⁸ Ampanatony ireo zanakalahin'i Aharona, ary ampanaovy ny akanjo vita peta-kofehy;

⁹ apetaho ny fehikibony sy ny satroka boribory. Manomboka hatreo dia ho anjara raikitra ho azy ireo ny fisoronana. Ary toy izao no hanamarihanao ny fidiran'i Aharona sy ny zanany lahy amin'ny raharahany:

¹⁰ Hoentina eo anoloan'ny Tranolay fihaonana ny ombilahy, ka hametrahan'i Aharona sy ny zanany lahy tanana eo an-dohan'ny ombilahy.

¹¹ Hovonoina ho faty eo anatrehako Izaho TOMPO izany, eo akaikin'ny varavaran'ny Tranolay fihaonana.

¹² Hanalanao ny rany ka hatentinao amin'ny fanondro eo amin'ny tandroky ny alitara, ary ny sisa kosa dia haidinao eo am-pototry ny alitara.

¹³ Halainao ny sabora izay mandrakotra ny tsinainy mbamin'ny saron'atiny ary ny voany roa mbamin'ny sabora eo aminy, dia hodoranao eo ambony alitara avokoa.

¹⁴ Ho sorona fanalana ny otan'ny mpisorona izany. Fa ny sisa rehetra amin'ilay ombilahy kosa, toy ny henany, ny hoditra mbamin'ny tain-drorohany, dia dory amin'ny afo any ivelan'ny toby.

¹⁵ Avy eo dia halaina ny ondrilahy iray, ka hametrahan'i Aharona sy ny zanany lahy tanana eo amin'ny lohany.

¹⁶ Hovonoinao ho faty ilay ondrilahy ary hotantazanao ny rany, dia hafafinao amin'ny lafiny alitara manodidina.

¹⁷ Hotetehinao ho vongana madinika ny ondrilahy; hosasanao ny tsinainy sy ny tongony ka hapetrakao eo ambony alitara, eo ambonin'ireo vongana madinika sy ny lohany.

¹⁸ Hodoranao ilay biby manontolo mba ho sorona dorana manontolo ho Ahy TOMPO: ho hanitra ankasitrahina ho AHY io sorona io.

¹⁹ Avy eo dia halaina koa ny ondrilahy faharoa, ka hametrahan'i Aharona sy ny zanany lahy tanana eo amin'ny lohany.

²⁰ Hovonoinao ho faty ilay ondrilahy, ary hanalanao ny rany ka hatentinao amin'ny tendron-dravintsofina ankavanan'i Aharona sy ny zanany, ary amin'ny ankiben-tongotra aman-tanany ankavanana avy; avy eo dia hafafinao amin'ny lafin'ny alitara ambony manodidina ny ra sisa.

²¹ Hanalanao kely ny ra eo ambony alitara sy ny ilomasina fanokanana, dia hafafinao amin'i Aharona sy ny fanamiany ary amin'ny zanany lahy sy ny fanamiany; amin'izay dia ho masina i Aharona sy ny zanany lahy mbamin'ny fanamiany.

²² Ny ondrilahy faharoa dia mariky ny fametrahana ny mpisorona amin'ny raharahany. Koa halainao ny hofany, ny sabora mandrakotra ny tsinainy sy ny saron'atiny, ny voany roa mbamin'ny sabora eo aminy, ary ny sorony havanana.

²³ Hakanao mofo boribory iray sy mofomamy misy diloilo iray, ary mofo manify iray avy ao amin'ny harona misy ny mofo tsy misy leviora izay apetraka eo anatrehako Izaho TOMPO.

²⁴ Hapetrakao eo am-pelatanan'i Aharona sy ny zanany ireo, ka hasainao ahevahevany eo anatrehako ho fanatitra ahevaheva.

²⁵ Avy eo dia halainao eny an-tanany ireo ka hodoranao hanetona eo ambony alitara miaraka amin'ny sorona dorana manontolo: ho sorona atolotra Ahy TOMPO izany, ka ho hanitra ankasitrahina ho AHY.

²⁶ Ary halainao ny tratran'ny ondrilahy faharoa izay nanokanana an'i Aharona ka hahevahevanao eo anatrehako Izaho TOMPO toy ny fanatitra ahevaheva fa iny no anjara ho anao.