Estera Grika
Toko faha-A
12 Indray andro i Môrdôkay dia niala sasatra teo an-kianjan'ny lapa; tamin'izay koa i Bagatà sy i Tarà, izay samy mpandraharahan'ny amperôra, no niambina ny kianja. 13 Henon'i Môrdôkay nanao tetika izy roalahy ka niriny ny hahalala ny zavatra nokotrehiny; dia fantany fa nikasa hamono an'i Artakserksesa ireo ka nampilazainy ny amperôra izany. 14 Nofotopotorin'i Artakserksesa kosa izy roa lahy mpandraharaha ka niaiky, ary nalefany hovonoina ho faty. 15 Nasain'ny amperôra nosoratana tao amin'ny boky Fanangonan-tantara izany zava-nitranga izany, ary naraikitr'i Môrdôkay an-tsoratra koa. 16 Nohamafisin'ny amperôra ho mpandraharaha ao an-dapa i Môrdôkay sady notolorany fanomezana noho io fiampangana io. 17 Saingy i Hamàna, ilay atao ho Bogeo sady zanakalahin'i Hamadatà, dia nanam-boninahitra koa teo anatrehan'ny amperôra; ka notadiavin'io Hamàna io ny hanisy ratsy an'i Môrdôkay sy ny fireneny, noho ny nahafatesan'i Bagatà sy i Tarà mpandraharahan'ny amperôra.
Toko voalohany
18[1] Ireo zavatra ireo dia nitranga tamin'ny andron'ny amperôra Artakserksesa. Io Artakserksesa io no nanjaka tamina faritany 127 izay any India no anombohany. 19[2] Tamin'izay andro izay izy no tonga naka toerana teo amin'ny sezafiandrianana maha-amperôra azy tao an-tanànan'i Soza, 20[3] nony taona fahatelon'ny nanjakany; ka nanaovany fanasambe ireo sakaizany, ireo andriambaventy persianina sy medianina, ireo governoram-paritany sy ireo solotenan'ny firenen-kafa. 21[4] Nandritra ny enim-bolana dia nasehon'ny amperôra azy ny harena avy amin'ny fanjakàny mbamin'ny harevaka mahafinaritra vokatr'izany harembe izany. 22[5] Nony tapitra ireo andro filanonana ireo, dia nanaovan'ny amperôra fanasana koa ny olona avy amin'ny firenen-drehetra, izay nonina tao Soza; nandritra ny enina andro no naharetan'izany, tao an-kianjan'ny lapa. 23[6] Tamin'izay no nandravahana ny kianja tamina lamba temitra karazany manify, ka tady rongony sy jaky no nihantonany tamina masom-bolamena sy masom-bolafotsy sy tamina andry vatokaranana sy alabasitra; nisy sôfà volamena sy volafotsy nalahatra teo ambony lampivato emeralda sy hara ary vatokaranana; tao koa ireo firakotra nasiana petakofehy maro loko sy voahaingo raozy manodidina. 24[7] Tsatokaty volamena sy volafotsy no fampisotroana, ary nisy anankiray voaravaka vatosoa ka notombanana mihoatra noho ny volafotsy valonjato taonina ny vidiny. Nitobaka ny divay tsara avy amin'ny fisotron'ny amperôra. 25[8] Samy nisotro tsy nisy naneritery azy ny olona, satria izany no sitraky ny amperôra; ary nodidiany koa ireo mpanompony hanao araka irin'ny tenany sy irin'ny isam-batan'olona voaasa. 26[9] Tetsy ankilany ny mpanjakavavy Astîna koa dia nanao fanasana ho an'ny vehivavy tao amin'izany lapan'ny amperôra Artakserksesa izany.27[10] Tamin'ny andro fahafiton'ny lanonana, dia falifaly ny amperôra Artakserksesa ka niteny tamin'ny tandapa fito lahy izay nanompo azy manokana, dia i Hamàna sy i Bazàna, i Tarà sy i Bôraze, i Zatôltà sy i Abatazà ary i Tarabà. 28[11] Nasainy nentin'ireo hankeo aminy ny mpanjakavavy. Nirin'i Artakserksesa manko ny hampipetraka azy eo amin'ny sezafiandrianana sy hampisatroka ny satroboninahitra maha-mpanjakavavy ary koa ny haneho ny hatsaran-tarehiny amin'ny minisitra sy amin'ireo olo-nasainy avy amin'ny firenen-kafa; satria tsara bika tokoa ravehivavy. 29[12] Fa tsy nety hanaraka ireo tandapa kosa i Astîna; dia nisafoaka ny amperôra ka nirehi-pahatezerana 30[13] ary niteny tamin'ireo sakaizany hoe: «Izany no navalin'i Astîna, ka diniho ny momba io raharaha io ary tsarao araka ny lalàna.»
31[14] Tamin'izay i Arkeseo sy i Sarsateo ary i Maleseara no nanatona ny amperôra. Ireo minisitry ny Persianina sy Medianina ireo dia nitàna toerana voalohany tokoa teo anilan'i Artakserksesa. 32[15] Ireo no nampahafantatra azy ny sazy tokony hampiharina amin'i Astîna, araka ny lalàna, noho ravehivavy tsy nanatanteraka ny baiko nampitain'ny amperôra tamin'ny alalan'ireto tandapa. 33[16] Dia niteny tamin'ny amperôra sy tamin'ireo minisitra i Mokeo nanao hoe: «Tsy ny amperôra ihany no nanaovan'i Astîna mpanjakavavy izao fihetsika ratsy izao, fa ny minisitra rehetra sy ny governora rehetra solotenan'ny amperôra. 34[17] Efa notantaraina tamin'ireo manampahefana ireo manko ny teny amam-pihetsika namalian'ny mpanjakavavy an'ity amperôra. Koa tahaka ny namalian'i Astîna ny amperôra Artakserksesa 35[18] no hataon'ny andriambavilanitra rehetra vadin'ireo minisitry ny Persianina sy Medianina ireo: ho sahiny fotsifotsina toy izany ireo minisitra, rehefa henony ny valintenin'i Astîna tamin'ny amperôra. 36[19] Raha heverinao àry fa tsara, ry amperôra, dia aoka ianao hamoaka didim-panjakana izay hosoratana ao amin'ny lalàna mifehy ny Medianina sy Persianina. Aoka ny mpanjakavavy Astîna tsy hiseho eo anatrehanao intsony, ary vehivavy mendrika kokoa noho izy no homenao ny voninahitra maha-mpanjakavavy! Enga anie tsy hisy fanapahan-kevitra hafa noho izany! 37[20] Aoka io lalàna havoakanao io haely ary hampiharina eran'ny fanjakànao! Dia samy homen'ny vehivavy rehetra voninahitra ny vadiny, hatramin'ny lehibe indrindra ka hatramin'ny kely indrindra.» 38[21] Sitraky ny amperôra sy ireo mpanapaka izany hevitra izany. Koa araka izay voalazan'i Mokeo no nataon'ny amperôra.
39[22] Nandefasany taratasy isam-paritany eran'ny fanjakàny, dia taratasy araka ny fomba fitenin'ilay faritany, mba hisy fanoavana ireo loham-pianakavina any amin'ny ankohonany any.
Toko faha-2
1 Tatỳ aorian'izany, dia nionona ny fahatezeran'ny amperôra. Kanefa tsy niraharaha an'i Astîna intsony ny amperôra izay nitadidy ny teny nataony sy ny fanamelohana efa tinapany momba azy. 2 Ka hoy ireo mpanolotsain'ny amperôra hoe: «Aoka ianao, ry andriamanjaka, hitadiavana tovovavy virijiny sady tsara tarehy! 3 Anendreo olona any amin'ny faritany isan-tokony eran'ny fanjakànao, dia aoka ireo no hifidy tovovavy virijiny sady tsara tarehy sy hitondra azy ao amin'ny tranom-behivavinao eto Soza. Ilay tandapa mpiandraikitra io tranom-behivavy io no hanankinana azy sy hanome azy ny fitaovana hikarakarany tena; 4 ka izay vehivavy sitrakao no ho mpanjakavavy solon'i Astîna.»Sitraky ny amperôra izany torohevitra izany ka dia narahiny. 5 Nisy Jiosy anankiray nantsoina hoe Môrdôkay tao amin'ny tanàna Soza; izy io dia lehilahy benjaminita zanak'i Jaîra, izay taranak'i Simehỳ sy i Kisy. 6 Voababo izy, ka ny fiaviany dia i Jerosalema izay nentin'i Nebokadnetsara mpanjakan'i Babilôna ho an-tsesitany ny mponiny. 7 I Môrdôkay dia niahy ny zanakavavin'i Haminadaba rahalahin-drainy; i Estera no anaran-drazazavavy. Maty ray aman-dreny i Estera ka notezainy hataony vady. Tsara tarehy razazavavy.
8 Nony tafaely ny didin'ny amperôra, dia tovovavy maro no voavory tao amin'ny tanàna Soza ka niandraiketan'i Gay. I Estera koa dia nentina tao amin'i Gay, ilay mpitandrina ny vehivavy. 9 Nahazo sitraka tamin'i Gay Estera, satria nahafinaritra azy ny toetran-dazazavavy; nomeny faingana azy ny fitaovana hikarakarany tena sy ny anjara sakafony ary koa mpanompovavy fito izay voafantina manokana avy tao an-dapa. Tao amin'ny tranom-behivavy dia nataon'i Gay tsara fitondra i Estera sy ireo mpanompovaviny. 10 Tsy nolazain'i Estera na ny fireneny na ny tanindrazany, satria nofeperan'i Môrdôkay izy mba tsy hilaza izany. 11 I Môrdôkay kosa nitsangantsangana isan'andro teo anoloan'ny kianjan'ny tranom-behivavy, ka nitsikilo izay zavatra hitranga amin'i Estera.
12 Rehefa nahavita herintaona tao amin'ny tranom-behivavy ny tovovavy tsirairay, vao tonga ny fotoanandro hankanesany any amin'ny amperôra. Io herintaona fiomanana io dia nizotra toy izao: enim-bolana notrorina menaka misy miora ny tovovavy, ary enim-bolana notrorina ilomanitra sy zavatra isan-karazany fampiasam-behivavy. 13 Avy eo dia nankany amin'ny amperôra ny tovovavy tsirairay. Nisy lehilahy nirahin'ny amperôra hanome lalana ilay tovovavy hoentina hatreo amin'ny tranom-behivavy hankany amin'ny efitranon'ny amperôra. 14 Ny hariva izy no mandeha any; ary ny ampitso maraina kosa lasa mankao amin'ilay trano faharoa fitoeram-behivavy izay i Gay, tandapan'ny amperôra, no mpitandrina azy. Tsy mba niverina tany amin'ny amperôra intsony ilay tovovavy, afa-tsy raha antsoin'ny amperôra ka tononiny anarana.
15 Indray andro i Estera, zanakavavin'i Haminadaba rahalahin-drain'i Môrdôkay, dia nahavita ny fotoam-piomanana mba hahazoana mankany amin'ny amperôra. Tsy nisy nolaviny ny torohevitra nataon'ilay tandapa mpitandrina ny vehivavy, ka nahazoan'i Estera sitraka avokoa izay rehetra nahita azy. 16 Nankany amin'ny amperôra i Estera tamin'ny taona fahafito nanjakan'i Artakserksesa, fony volana faharoa ambin'ny folo na volana Adara. 17 Notiavin'ny amperôra i Estera; ka tamin'ireo vehivavy rehetra ireo, dia izy no nahazo sitraka teo imasony sy nosatrohany ny satroboninahitr'i Astîna vadiny taloha. 18 Dia nanao fanasana ho an'ny sakaizany sy ho an'ny manampahefana rehetra i Artakserksesa nandritra ny herinandro sady nankalaza ny fanambadiany an'i Estera. Nisy hetra nofoanany ho an'ireo olona teo ambany fahefàny.
19 Tamin'izay i Môrdôkay dia nisahana andraikitra tao an-dapa. 20 I Estera kosa tsy nilaza ny firazanany, satria i Môrdôkay efa namepetra azy ny amin'izany ary nandidy azy hanaja an'Andriamanitra sy hanatanteraka ny didiny, tahaka ny fony izy mbola niara-nonina taminy; ka tsy niova fitondrantena i Estera.
21 Nomena toerana ambony kokoa i Môrdôkay hany ka sosotra ireo tandapa roalahy filohan'ny mpiambina ary nitady hamono hahafaty ny amperôra Artakserksesa. 22 Fantatr'i Môrdôkay ny toe-javatra; dia nambarany tamin'i Estera izay nampahalala tamin'ny amperôra kosa ny andinindinin'izany teti-dratsy izany.