Estera Grika

Toko faha-2

²³ Nofotopotorin'ny amperôra izy roalahy, ary nahantona tamin'ny hazo. Ho mari-piderana an'i Môrdôkay sy hahatsiarovana ny asa soa nataony, dia nodidian'ny amperôra ny hanoratana izany zava-nitranga izany tao amin'ny Firaketam-panjakana.

Toko faha-3

¹ Tatỳ aorian'izany, dia nomen'ny amperôra Artakserksesa laharana ambony i Hamàna, ilay atao hoe Bogeo sady zanakalahin'i Hamadatà, ka nasandrany hipetraka amin'ny toerana voalohan'ireo samy «sakaizan'ny amperôra». ² Ny tandapa rehetra dia niankohoka teo anatrehan'i Hamàna, satria izany no didin'ny amperôra; fa i Môrdôkay kosa tsy mba nety nanao izany. ³ Ka nanontanian'ireto tandapan'ny amperôra tamin'i Môrdôkay ny nahatonga azy tsy miraharaha izay voalazan'ny amperôra. ⁴ Na dia naverimberin'ireo tamin'i Môrdôkay isan'andro aza izany fanontaniana izany, dia tsy niraika izy fa nampahafantatra ny maha-Jiosy ny tenany.
Dia notaterin'ireo tandapa tamin'i Hamàna fa toherin'i Môrdôkay ny tenin'ny amperôra. ⁵ Nony fantatr'i Hamàna fa tsy mba nety niankohoka teo anatrehany tokoa i Môrdôkay, dia tezitra mafy izy, ⁶ ka nanapa-kevitra ny handringana ny Jiosy rehetra tao anatin'ny fanjakàn'i Artakserksesa. ⁷ Nanao didy izy tamin'ny taona faha- ¹² nanjakàn'i Artakserksesa ary nifidy antsapaka ny andro sy ny volana mba handringanana anatin'ny indray andro monja ny olona iray karazana amin'i Môrdôkay. Ka ny andro faha- ¹⁴ amin'ny volana Adara no voatondron'ny antsapaka.

⁸ Ary hoy i Hamàna tamin'ny amperôra Artakserksesa: «Ry andriamanjaka, misy firenena iray efa miely eo anivon'ny firenen-kafa sady manerana ny fanjakanao; hafa lalàna mihitsy noho ny firenena isan-tokony ry zareo sady tsy miraharaha ny lalànanao. Tsy mahasoa anao ny mamela azy fotsiny amin'izao. ⁹ Koa raha sitrakao, dia aoka ianao hanome baiko ny amin'ny handringanana azy; izaho kosa dia hanoratra volafotsy telonjato taonina haiditro ao amin'ny tahirim-bolam-panjakana.» ¹⁰ Dia nesorin'ny amperôra teny an-tanany ny peratra tombokase ka napetrany teo an-tanan'i Hamàna mba hanasiany fitomboka ny taratasy fanoherana ny Jiosy. ¹¹ Ary hoy izy tamin'i Hamàna: «Afoy ho anao ny volafotsy, ary ataovy izay sitrakao hatao amin'izany firenena izany.»

¹² Tamin'ny volana voalohany, nony andro faha-13, dia nantsoina ireo mpitantsoratry ny amperôra. Araka izay nandidian'i Hamàna no nanoratany taratasy ho an'ny filohan-tafika sy ho an'ny governora isam-paritany ary ho an'ireo lehibe isam-pirenena; ho an'ny faritany 127 isanisany, manomboka any India ka miafara any Etiôpia, no nanoratana tamin'ny anaran'i Artakserksesa, araka ny fomba fiteniny avy.

¹³ Mpitondra hafatra no nalefa manerana ny fanjakàn'i Artakserksesa mba hampandringana ny taranaka jiosy ao anatin'ny indray andro amin'ny volana faha-12, izany hoe ny volana Adara, ary koa mba hampandroba ny fananany.

Toko faha-B

^14[1] Izao no kopian'io taratasy io:
«Izaho Artakserksesa, andriamanjaka lehibe, no manoratra aminareo governora sy mpiasam-panjakana lefitra any amin'ny faritany 127 manomboka any India ka miafara any Etiôpia, ary mampita izao manaraka izao:

^15[2] «Mifehy firenena marobe aho ary efa nampihatra ny fahefàko eran'ny tany tontolo; kanefa tsy hiavonavona hanjakazaka aho, fa te hampahazo fandriampahalemana ny vahoakako mandritra ny andro iainany. Iriko ny hahatonga ny fanjakàko mandroso sy milamina azo antoka mipaka any amin'ny sisintany ary ny hampirobona ny fiadanana izay mamin'ny olona rehetra.

^16[3] «Ka dia nanontaniako ireo mpanolotsaina ahy ny fomba hanatrarana izany tanjona izany. Ny anankiray tamin'izy ireo dia i Hamàna izay maningana ara-pahendrena eto aminay. Mitana ny laharana faharoa izy amin'ny fanjakana ary nanaporofo hatrany fa mahafoy tena sady miraiki-po mafy amiko. ^17[4] Io Hamàna io no nampahalala ahy fa misy vahoaka ratsy toetra izay tafaharo amin'ny firenen-kafa rehetra eto ambonin'ny tany; kanefa manan-dalàna manohitra ny didiko, hany ka misakana ny hisian'ny fitondrana iombonana tarihiko amim-pahitsiana sy amin'ny fomba tsy misy hokianina. ^18[5] Tsapako fa izany vahoaka izany no hany manohitra lalandava ny olon-kafa sady miavaka aminy araka ny lalàna maningana arahiny; mitsivalana ny zavatra ataoko izy ary mahavanon-doza mahatsiravina ka manembantsembana ny filaminam-panjakàko. ^19[6] Izany no nandidiako ny handringanana ireo rehetra voatondro ao amin'ny taratasin'i Hamàna izay filohan'ny raharaham-panjakana sy hajaina manarakaraka ahy ho rain'ny vahoaka. Fahavalontsika ireo ka haringan-tsabatra mbamin'ny vady aman-janany, tsy hasiana miangana ary tsy hananana antra na indrafo; amin'ity taona ity no hampiharana izany, dia ny andro faha-14 amin'ny volana faha-12 na hoe volana Adara. ^20[7] Ho voavono ho faty amin'ny andro iray ihany sy hiara-midina any amin'ny toeran'ny maty ireo olona mpanohitra hatry ny taloha ka mandraka ankehitriny ireo; ary ho azo antoka hilamina sy hirindra feizay ny raharahantsika amin'ny hoavy.»

Toko faha-3

^21[14] Ny kopian'ireny taratasy ireny dia navoaka hiely isam-paritany, ka nisy baiko nomena ny firenena rehetra mba hivonona ho amin'izany andro izany. ^22[15] Nohafainganina ny fizotran'ny raharaha, indrindra tao Soza renivohitra. Dia nipetraka hisotro ny amperôra sy i Hamàna, fa very hevitra kosa i Soza iray tanàna.

Toko faha-4

¹ Nony fantatr'i Môrdôkay ny zava-nitranga, dia nandriatra ny fitafiany izy ka nitafy gony sady nihosin-davenona; ary nidodododo nitety ny kianjan'ny tanàna izy sy nihorakoraka mafy hoe: «Tiana hofoanana ny firenena anankiray tsy nahavita ratsy!» ² Tonga hatrany anoloan'ny lapa aza i Môrdôkay, saingy nijanona teo satria tsy azony nidirana ny kianjan'ny lapa noho izy nitafy gony sy nihoson-davenona. ³ Tany amin'ny faritany tsirairay nampielezana ny taratasy dia nidradradradra ny Jiosy sady nandondon-tratra; nitafy gony ireo sy nandry teo ambony lavenona.

⁴ Tonga nilaza izany tamin'i Estera mpanjakavavy ireo mpanompovaviny sy tandapany. Dia very hevitra tokoa izy nandre izany toe-javatra izany, ka nampanatitra akanjo hitafian'i Môrdôkay mba hanesorany ny gony teny aminy; kanefa tsy neken'io izany. ⁵ Ary nantsoin'i Estera i Hakrateo, ilay tandapa nanompo azy, ka nalefany hanontany an'i Môrdôkay ny zava-niseho marina. ⁷ Dia nambaran'i Môrdôkay taminy ny zava-nitranga sy ny fampanantenana nataon'i Hamàna tamin'ny amperôra momba ny volafotsy telonjato taonina natokany ho an'ny Tahirim-panjakana noho ny handringanana ny Jiosy. ⁸ Nomeny an'i Hakrateo koa ny kopian'ny rijan-teny naely tao Soza handringanana ny Jiosy mba hasehony an'i Estera. Nilazan'i Môrdôkay koa i Hakrateo mba hiangavy an'i Estera hankao amin'ny amperôra ka hangataka famindrampo aminy sy hitalaho ho an'ny firenena nipoirany. «Tsarovinao hoe, ry Estera, ny andro izay niainanao tsotsotra, fony aho nanabe anao. I Hamàna izay laharana faharoa eo amin'ny fitondrana manko dia niteny tamin'ny amperôra mba hampamono antsika Jiosy ho faty. Antsoy ny Tompo ary iteneno momba antsika ny amperôra. Afaho amin'ny fahafatesana isika!» ⁹ Dia lasa i Hakrateo nitatitra ireo teny ireo tamin'i Estera; ¹⁰ fa mbola nirahin'ity mpanjakavavy indray izy hilaza amin'i Môrdôkay hoe: ¹¹ «Ny firenena rehetra ato amin'ny fanjakana dia samy mahalala fa na iza na iza, na lehilahy na vehivavy, miditra ao an-kianjan'ny lapa mba hankeo amin'ny amperôra kanefa tsy nantsoiny, dia tsy maintsy hovonoina ho faty; izay hotondroin'ny amperôra amin'ny tehim-bolamena ihany no ho velona. Izaho kosa efa telopolo andro izay no tsy nantsoina hankao amin'ny amperôra.» ¹² Rehefa nilazan'i Hakrateo ny teny rehetra avy amin'i Estera i Môrdôkay, ¹³ dia izao no nasainy havaly azy: «Aza mihevitra anakampo fa ianao irery ato anatin'ny fanjakana no ho afaka amin'ny Jiosy rehetra. ¹⁴ Raha hangina mihitsy ianao amin'ity toe-javatra ity, dia hisy fanampiana sy fiarovana hipoitra avy any an-kafa ho an'ny Jiosy; fa ny tenanao sy ny fianakavianao no haringana. Ary iza no mahalala fa angamba hiatrika 'ity toe-javatra ity mihitsy no nanandratana anao ho mpanjakavavy?» ¹⁵ Dia nampiverenin'i Estera ilay mpitondra hafatra mba hilaza amin'i Môrdôkay hoe: ¹⁶ «Ndeha vorio àry ny Jiosy rehetra eto Soza; dia manaova fifadian-kanina noho ny amiko ianareo, ka aza mihinana na misotro mandritra ny telo andro sy telo alina. Tsy hitendry hanina koa ny tenako sy ireo tovovavy mpanotrona ahy. Avy eo dia hankao amin'ny amperôra aho, na dia tsy ara-dalàna aza izany ary na dia tsy maintsy ho faty aza aho!» ¹⁷ Dia lasa i Môrdôkay nanao araka izay rehetra nandidian'i Estera azy.

Toko faha-C

^18[1] Ary nahatsiaro ny asa rehetra nataon'ny Tompo i Môrdôkay ka nivavaka taminy ^19[2] nanao hoe:
«Tompo ô, Tompo ô, mpanjakan'izao rehetra izao Ianao ary eo ambany fahefànao ny tontolo. Tsy misy olona mahasakana anao, rehefa tianao hovonjena i Israely. ^20[3] Ianao mihitsy manko no nanao ny lanitra sy ny tany mbamin'ny zava-mahagaga rehetra eto ambanin'ny lanitra. ^21[4] Ianao no Tompon'izao rehetra izao; ary tsy misy olona mahatohitra Anao Tompo. ^22[5] Mahalala ny zavatra rehetra Ianao, Tompo ô, ka mahafantatra fa tsy mba rehaka na avonavona na fitsiriritam-boninahitra no nanesika ahy tsy hiankohoka eo anoloan'i Hamàna mpiavonavona. ^23[6] Vonon-kanoroka ny tongotr'io lehilahy io manko aho mba ho famonjena an'i Israely. ^24[7] Fa ny tsy niankohofako teo anatrehany, dia ny mba tsy hanaovako ny voninahitr'olombelona ho ambonin'ny voninahitr'Andriamanitra; ka dia tsy hisy olona hiankohofako afa-tsy Ianao, Tompo ô, ary tsy mba fiavonavonana no hanaovako izany.

^25[8] «Koa ankehitriny, ry Tompo Andriamanitra sy Mpanjaka, Andriamanitr'i Abrahama, amindrao fo izahay vahoakanao fa kendren'ny fahavalonay hovonoina ho faty; ary fofoiny haringana izahay fanananao efa hatry ny faharazanay. ^26[9] Aza atao tsinontsinona izahay voatokana ho fanananao, satria navotanao avy tany Ejipta.