Tsefanià
Toko voalohany
6 Holevoniko izay mihataka miala amiko TOMPO ka tsy mitady AHY sady tsy mila hevitra amiko.7 Mangina eo anatrehan'ny Tompo ANDRIANANAHARY fa efa akaiky ny andro hirotsahany an-tsehatra! Efa nanomana sorona ny TOMPO, ary efa nanadio ireo olona nasainy.
8 Izao no teny hentitra ataon'ny TOMPO: Amin'izany andro hanaovako sorona izany dia hofaiziko ny mpitondra sy ny zanaky ny mpanjaka ary izay rehetra manaraka fomba fitafy vahiny.
9 Amin'izany andro izany dia hofaiziko avokoa izay rehetra mandingana ny tokonan-tempoliny sy izay rehetra mameno ny tranon'ny tompony amin'ny harena azo an-kosoka sy an-keriny.
10 Amin'izany andro izany, hoy ny teny hentitra lazaiko, ao Jerosalema dia handrenesana kiaka mafy eo am-bavahadin-trondro sy fitomaniana ao Antanambao ary firodanan-trano eny amin'ny havoana.
11 Midradradradra ianareo, ry mponina an-tanana ambany, fa ho faty avokoa ny mpivarotra, ho lany ringana avokoa ny mpandranto.
12 Amin'izay fotoana izay dia handray fanala Aho ary hosavaiko ny tananan'i Jerosalema; ka hofaiziko ny olona izay mandry fahalemana toy ny faikan-divay efa mifetaka, dia izay manao anakampo hoe: Sady tsy hanao soa ny TOMPO no tsy hanao ratsy!
13 Koa dia hobaboina ny hareny ary horavana ny tranony; hanao trano izy nefa tsy hitoetra ao; hamboly voaloboka izy, nefa tsy hisotro ny divay avy aminy.
14 Manakaiky ilay andro lehibe hiavian'ny TOMPO, manakaiky sady ho tamy faingana tokoa. Vao migadona izany dia kiakam-pahakiviana, fa na ny lehilahy mahery fo aza dia hiantsoantso mafy vonjeo!
15 Ho androm-pahatezeran'ny TOMPO izany, ho androm-pahoriana sy tebiteby, ho androm-paharavana sy fahapotehana, eny, ho andro maizina mikitroka, ho andro rako-drahona sy zavona.
16 Izany andro izany no handrenesana ny miaramila hitsoka trompetra sy hanao akoran'ady hamelezana ireo tanana mimanda sy ny tilikambo avo eny amin'ny zorony.
17 Hoy ny TOMPO hoe: Hampahoriko ny olona ka hitsapatsapa toy ny jamba, noho izy efa nanota tamiko; ka ny rany dia hiraraka toy ny vovoka, ary ny fatiny ho lo tahaka ny zezika.
18 Amin'ny androm-pahatezeran'ny TOMPO, dia samy tsy hahavonjy ny olona na ny volafotsiny na ny volamenany. Fa hiredareda ny fahasaro-piaron'ny TOMPO ka handevona ny tany tontolo. Eny, hahatsiravina tokoa izany, satria haringan'ny TOMPO ny mponina rehetra amin'ny tany.
Toko faha-2
1 Mandiniha ka mieritrereta, ry vahoaka lany henatra,2 dieny ianareo tsy mbola tonga toy ny akofa izay miely indray andro monja, dieny tsy mbola mahazo anareo ny afom-pahatezeran'ny TOMPO, ary dieny tsy mbola tonga aminareo ny andro hirehetan'izany.
3 Mitadiava ny TOMPO ianareo rehetra, ry mpanetry tena eto amin'ny tany sady mpanatanteraka ny fitsipiny. Manaova ny marina, manetre tena eo anatrehan'ny TOMPO. Angamba ho voatsimbina ihany ianareo amin'ny androm-pahatezerany.
4 Fa hilaozana i Gaza, ary ho lao i Askelona. Horoahina mitataovovonana ny mponin'i Asdoda, ary hofongorana ny an'i Hekrona.
5 Lozanareo avy any Kaftora, izay mipetraka amoron-dranomasina! Izao no tenin'ny TOMPO mitsara anareo: Ry Kanahana tanin'ny Filistinina, haringako tsy hisy mponina intsony eo aminao.
6 Ny taninao eo amorontsiraka dia ho lasa fiandrasam-biby fiompy ka hiriariavan'ny mpiandry ondry ary hasiana valan'ondry aman'osy.
7 Ny sisa velona amin'ny taranak'i Joda no hanana izany faritra izany; ao no hiandrasany biby fiompy, ary ny tranon'i Askelona no hatoriany amin'ny hariva. Fa hanasoa azy ny TOMPO Andriamaniny ary hanome fanambinana azy indray.
8 Ny TOMPOn'izao rehetra izao sady Andriamanitr'i Israely: dia manao teny hentitra hoe: Reko ny olon'i Moaba sy Hamona nandatsa sy nanaratsy ny vahoakako. Eny, nandatsa azy izy roa tonta, ary nanitatra ny taniny teo amin'ny azy.
9 Koa velona AHO ary mianiana fa ho levona i Moaba sy i Hamona, ho tahaka ny tananan'i Sodoma sy Gomora ka ho kirihitra tsilo sy lava-tsira ary ho tany lao mandrakizay; ho avy handroba sy haka ny taniny ireo sisa velona amin'ny vahoakako.
10 Izany no famaizana setrin'ny avonavony satria izy roa tonta dia samy nandatsa ny vahoakan'ilay TOMPOn'izao rehetra izao ary nanitatra ny taniny teo amin'ny azy.
11 Hahatsiravina ny hataon'ny TOMPO aminy; hofoanany avokoa ireo andriamanitry ny olombelona. Koa na ireo hafa firenena faran'izay lavitra aza dia hiankohoka avokoa hitsaoka Azy, samy any amin'ny taniny avy.
12 Ianareo koa, ry Etiopianina, hoy ny Tompo, hovonoiko amin'ny ady ianareo.
13 Haninji-tanana koa ny TOMPO hamely ny faritra avaratra ka handringana an'i Asiria; Izy no hahalao ny tananan'i Ninive ka hahatonga azy ho karankaina toy ny taniefitra.
14 Ao amin'ny toerana nisy an'i Ninive dia handrian'ny omby aman'ondry sy ireo karazam-biby samy hafa; honenan'ny vorondolo sy tararaka eny an-tampon'ireo andrin-tranony, feom-borona no ho re eo am-baravarankely, faharavana no ho hita raha vao mby eo an-tokonana satria ho voaendaka ny rafitra hazo sedera.
15 Izany no hiafaran'ilay tanana fatra-pirehareha, sady niaina tamim-pilaminana ary nihevi-tena ho tsy manan-tsahala. Indrisy, efa tonga lao izy izao ary fierem-biby! Izay rehetra mandalo eo akaikiny dia hisioka sy hanakifi-tanana ho fanesoana azy.
Toko faha-3
1 Lozan'i Jerosalema ilay tanana mpikomy, feno fahalovana sy fampahoriana!2 Tsy nohenoiny ny tenin'ny TOMPO, tsy noraisiny ny fampitandremany! tsy nametra-pitokiana taminy izy; ilay Andriamaniny tsy nohatoniny.
3 Toy ny liona mierona ireo lehibeny; toy ny amboadia mihaza hariva ny mpitsarany, ka tsy mitahiry remby ho tra-maraina.
4 Mpieboebo sady mpamitaka ireo mpaminaniny; zimbazimbain'ireo mpisorony kosa ny zavatra voatokana ho an'Andriamanitra ary dikainy ny lalana.
5 Kanefa ny TOMPO mpandala fahamarinana no eo afovoan'ny tanana; ka tsy manao faharatsiana Izy, fa isa-maraina tsy diso no amoahany ny fitsarany. Na izany aza ny ratsy fanahy dia tsy mahalala menatra!
6 Teny hentitra avy amin'ny TOMPO izao: Nahafongana firenena maro Aho, narodako ny tilikambon'ny mandany, navelako ho foana ny lalany, ka tsy nisy mpandalo intsony; noravako ny tananany ka tsy nisy mponina intsony.
7 Dia hoy Aho anakampoko: Raha manaja Ahy i Jerosalema ary mandray ny fampitandremako, dia tsy horavako ny fonenany araka ny fandrahonana nataoko taminy! Kanefa vao mainka nilomay hanao ratsy ihany izy iray tanana.
8 Koa dia andrasonareo ny famaizako amin'ny andro hiaviako hiampanga anareo. Tapa-kevitra Aho hanangona ny firenena sy fanjakana mba hampidinako manontolo ny fahatezerako mirehidrehitra; ka handevona ny tany manontolo ny afon'ny fahasaro-piaroko.
9 Amin'izany, dia hovako ny firenena isan-tokony ka hodioviko ny molony; dia hivavaka amiko TOMPO izy rehetra ary hiray hina hanompo Ahy.
10 Eny fa hatrany an-dafin'ny onin'i Etiopia ireo mpivavaka amiko izay naeliko no ho avy hitondra fanatitra ho Ahy.
11 Amin'izany andro izany, ry vahoakako, dia tsy ho menatra intsony ianao tamin'izay ratsy rehetra nataonao ka nanotanao tamiko. Hoesoriko tsy ho eo aminao ny mpirehareha rehetra ary tsy hiavonavona intsony ianao eo an-tendrombohitro masina.
12 Nefa hisy olona ory sy malahelo hataoko sisa tavela eo aminao, dia olona hitady fialofana amiko TOMPO.
13 Ny sisa velona amin'ny vahoaka Israely dia tsy hanao heloka na hilaza lainga intsony, ary tsy hanao teny mamitaka intsony. Fa hihinana sy handry feizay izy ka tsy hisy hampatahotra azy.
14 Mihobia, ry tananan'i Tsiona! Manaova firavoravoana, ry vahoakan'i Israely! Mifalia sy mibitaha amin'ny fonareo manontolo, ry mponin'i Jerosalema!
15 Ny TOMPO efa nanaisotra ny fanamelohana izay nitambesatra taminareo; Izy efa nampandositra ny fahavalonareo. Ny TOMPO, mpanjakan'i Israely, no momba anareo ka tsy hisy loza hatahoranareo intsony.
16 Io andro io no hilazana amin'i Jerosalema hoe: Aza matahotra, ry tananan'i Tsiona, aza miraviravy tanana!
17 Ny TOMPO Andriamanitrao no momba anao; mahery Izy ka hampandresy anao. Maneho ny hafaliany noho ny aminao Izy; ny fitiavany no anavaozany anao; noho ny aminao dia mientam-pihobiana Izy
18 toy ny amin'ny andro fety. Hoy ny TOMPO hoe: Hofoanako ny fahoriana, hoesoriko ny henatra mitambesatra aminareo.
19 Indro tonga ny fotoana hamelezako izay rehetra nampahory anareo. Hotsaboiko ny maratranareo, hampodiko ny voasesitany; eny, havadiko ho voninahitra sy laza ny fanaovana tsinontsinona anareo tany amin'ny tany rehetra.
20 Amin'izany fotoana izany tokoa no hampodiako sy hamoriako anareo. Ho hitanareo fa hambiniko indray ianareo; homeko voninahitra sy laza ianareo any amin'ny firenena rehetra eto an-tany.
Hagay
Toko voalohany
1 Tamin'ny taona faharoa nanjakan'i Dariosa, fony andro voalohan'ny volana fahenina, dia nisy tenin'ny TOMPO tamin'ny alalan'i Hagay mpaminany. Hafatra ho an'ny governoran'i Joda, dia i Zerobabela zanakalahin'i Sealtiela, sy ho an'i Josoa mpisorombe zanakalahin'i Jotsadaky izany ka nanao hoe:2 Izao no lazain'ny TOMPOn'izao rehetra izao: Ny vahoakan'ity firenena ity milaza fa tsy mbola tonga ny fotoana hananganana indray ny tranoko.