Mikà
Toko faha-5
8 Dia toy izany koa, aoka ny tananareo hiainga hamely izay manohitra anareo ary aoka ho ringana avokoa ny fahavalonareo!9 Ary hoy ny TOMPO hoe: Izao no ho tonga amin'izany andro izany. Haringako tsy ho eo afovoanareo ny soavalinareo, ary holevoniko ny kalesinareo.
10 Horavako ny tanana eo amin'ny taninareo, ary harodako avokoa ny mandanareo.
11 Hofoanako tsy ho eo an-tanananareo ny fanaovana ody ratsy ary tsy hisy eo aminareo intsony ny mpanandro.
12 Hofoanako tsy ho eo afovoanareo intsony ny sampinareo sy ny tsangambaton-tsampinareo, ka tsy hiankohoka amin'ny zavatra izay nataon'ny tananareo intsony ianareo.
13 Hongotako tsy ho eo afovoanareo ny tsatokazo ho an'i Asera ary hofongorako ireo sampinareo.
14 Fahatezerana mirehitra mafy no hanatanterahako valifaty amin'ny firenena izay tsy nihaino Ahy.
Toko faha-6
1 Mitsangana Ianao, ry TOMPO! Mandahara eo anoloan'ny tendrombohitra. Mihainoa ny adin'ny TOMPO, ianareo ry tendrombohitra sy ianareo ry fanorena-matezan'ny tany, fa manana ady amin'ny vahoakany ny TOMPO; ny Israelita no ifandaharany. Henoinareo ary izay lazain'ny TOMPO:3 Ry vahoakako, inona moa no nataoko anareo? ary inona no nanasarako anareo? Valio Aho!
4 Fa nampiakariko avy tany Ejipta ianareo ary nafahako avy tamin'ny fanandevozana, ka nirahiko hitarika anareo i Mosesy sy i Aharona ary i Miriama.
5 Ry vahoakako, mba tsarovy izay nokasain'i Balaka mpanjakan'i Moaba hatao sy ny navalin'i Bilehama zanakalahin'i Behora azy, ary izay niseho hatreo Sitima ka hatrany Gilgala, mba hahafantaranareo asa nanasoavako anareo.
6 Inona ary no hoentiko, rehefa manatona aho hiankohoka eo anatrehan'ny TOMPO, Andriamanitra avo indrindra? Moa zanak'omby iray taona hatao sorona dorana manontolo ve no hoentiko rehefa manatona Azy aho?
7 Ho sitraky ny TOMPO ve ny ondrilahy an'arivony na ny menaka mikoriana toy ny renirano? Hatolotro Azy ve ny zazalahy voalohan-terako ho fanalana ny heloka amam-pahotako?
8 Tsia, ry olombelona, fa efa nampianarina anao ny fitondrantena tsara sy izay tadiavin'ny TOMPO aminao: dia ny hanao ny rariny sy handala ny fitiavana ary ny hanaraka an'Andriamanitrao amim-panetrentena.
9 Fahendrena ny manaja ny TOMPO! Miantso ny ao an-drenivohitra Izy manao hoe: Mihainoa, ianareo ry fokon'i Joda sy ry loholona mivory eto an-drenivohitra!
10 Moa hohadinoiko ve ny harena maloto nangonin'ny ratsy fanahy ao an-tranony sy ny famarana tsy ampy? Zavatra mahatsiravina izany!
11 Moa heveriko ho madio izay mampiasa mizana mandainga sy mitondra an-kitapo ny vato tsy marina?
12 Mpanao herisetra ny mpanan-karena amin'ity renivohitra ity; ary mandainga sy mamitaka ny hafa ireo mponina ao aminy.
13 Izaho kosa nanomboka nikapoka anareo, mba handringanana anareo noho ny fahotanareo.
14 Hihinana ianareo nefa tsy ho voky, fa mbola eo aminareo ihany ny mosary, Hampirina ianareo nefa tsy hahatahiry; ary izay voatahirinareo aza dia holevoniko amin'ny ady.
15 Hamafy ianareo, nefa tsy hijinja; hanery oliva, nefa tsy hihosotra menaka; hanosihosy voaloboka, nefa tsy hisotro divay.
16 Fa tandremanareo fatratra ny ohatra ratsy nasehon'i Homry mpanjaka sy ny fihetsiky ry i Ahaba mianakavy, ka narahinareo ny fomba amam-panaony. Noho izany, dia hatolotro horavana ity renivohitrareo ity ary ho fihomehezana ianareo mponina ao aminy; ka ianareo no hitondra ny latsa mianjady amin'ny vahoakako.
Toko faha-7
1 Indrisy, tahaka ny olona mioty aviavy aorian'ny fiotazam-boankazo aho ka tsy mahita aviavy masaka ifotony izay ankafiziko tokoa; ary tahaka ny olona mitsimpona sampaho aorian'ny fiotazam-boaloboka aho, ka tsy mahita voaloboka firy hohanina!2 Fa foana teo amin'ny tany ny olona tena mpivavaka; ary tsy misy olo-marina intsony eo amin'ny olombelona. Samy manotrika handatsa-dra avokoa izy rehetra; ary samy mihaza mpiray tampo amin'ny fandrika harato ny tsirairay.
3 Vonona hanao ratsy ny tanany; ny mpitondra sy ny mpitsara mitaky tsolotra; ary ny lehibe milaza izay zavatra iriny, ka miara-miteti-dratsy hahatanteraka azy,
4 Ny tsara indrindra aminy dia toy ny roy, ary ny mahitsy indrindra aminy dia ratsy noho ny fefy tsilo. Ho avy ny andro famaizana anareo araka ny nambaran'ireo mpaminany mpitilinareo; ary, ankehitriny aza, dia efa manahy mafy ianareo.
5 Aza matoky namana, ary aza miantehitra amin-tsakaiza. Tandremo tsara ny vavanareo na dia eo anatreham-bady aza.
6 Fa ny zanakalahy maniratsira ny rainy, ny zanakavavy manohitra ny reniny, ny vinantovavy manohitra ny rafozam-baviny, ary ny ankohonan'ny olona ihany no fahavalony.
7 Fa izaho kosa mitodika amin'ny TOMPO ary manantena an'Andriamanitra mpamonjy ahy, fa hihaino ahy ilay Andriamanitro.
8 Aza mihomehy ny aminay ianareo fahavalonay! fa na lavo aza izahay, dia mbola hiarina; ary na mipetraka ao amin'ny maizina aza izahay, dia ny TOMPO no fahazavana ho anay.
9 Satria efa nanota tamin'ny TOMPO izahay, dia hozakainay ny fahatezerany, mandra-piarony ny adinay ka hanomezany rariny anay. Hamoaka anay ho eo amin'ny mazava Izy ka ho finaritra izahay hahita ny soa nataony taminay.
10 Hahita izany ny fahavalonay ka ho rakotry ny henatra, dia ireo niteny taminay hoe: Aiza ihany ny TOMPO Andriamanitrareo? Ho finaritra izahay hahita azy ireo, fa amin'izay dia ho tonga fanosy toy ny fotaka eny an-dalana izy.
11 Ho avy ny andro hananganana indray ny mandan'ny renivohitrao, ry Joda; ka amin'izany andro izany, dia hitarina lavitra kokoa ny faritry ny taninao.
12 Amin'izany andro izany, dia hiverina ho aminao ny mpiray tanindrazana rehetra hatreo Asiria ka hatrany Ejipta, hatreo Tiro ka hatrany Eofrata, hatreo amin'ny ranomasina iray ka hatrany amin'ny ranomasina hafa, hatreo amin'ny tendrombohitra iray ka hatrany amin'ny tendrombohitra hafa.
13 Ary ho tonga lao ny tany sisa noho ny asa ratsy vitan'ireo mponina ao aminy.
14 TOMPO o, ny tehinao no ento miandry ny vahoakanao, dia ny andianondry fanananao, izay mitoka-monina eo amin'ny tany be akata voahodidina saha mahavokatra; aoka izy handrasana any Basana sy Gilehada tahaka ny tamin'ny andro taloha.
15 Toy ny tamin'ny andro nialan'ny vahoakako tany Ejipta, dia hanao zava-mahagaga ho azy Aho.
16 Hahita izany ny firenen-kafa ka ho menatra na dia eo aza ny heriny rehetra. Ho gaga loatra izy ka hitampim-bava sy ho gina sofina.
17 Hilela-bovoka toy ny menarana sy ireo biby mikisaka amin'ny tany izy. Amin-kovitra no hialany avy ao amin'ny tranomimanda fiereny, ka hanatonany Anao TOMPO Andriamanitray. Eny, hangorohoro izy ary hanaja Anao.
18 Tsy misy andriamanitra mitovy aminao, ry TOMPO mpanaisotra ny heloka. sy mpamela ny fahadisoana. Noho ireo sisa velona aminay vahoaka fanananao, dia tsy mitahiry fahatezerana mandrakizay Ianao fa tia maneho fitiavana aminay.
19 Hamindranao fo indray izahay, hohitsakitsahinao ny helokay; ary any ambany ranomasina lalina any no hanarianao ny fahotanay rehetra.
20 Hasehonao aminay taranak'i Abrahama sy i Jakoba ny toetranao mahatoky sy ny fitiavanao, araka izay efa nianiananao tamin'ny razambenay hatramin'ny andro fahagola.
Nahoma
Toko voalohany
1 Izao no hafatra faminaniana momba ny tananan'i Ninive, mitantara izay nasehon'Andriamanitra tamin'i Nahoma avy any Elkosy.2 Andriamanitra sarotiny sy mpanafay ny TOMPO. Manafay tokoa ny TOMPO ary mahatsiravina ny fahatezerany; eny, manafay izay manohitra Azy ny TOMPO, ary mirehi-kavinirana amin'ny fahavalony.
3 Tsy mora tezitra ny TOMPO, nefa lehibe ny heriny, ary tsy avelany ho afa-maina ny meloka. Tafio-drivotra mahery no amin'izay alehan'ny TOMPO; ny rahona no toy ny vovoka apariaky ny dian-tongony.
4 Teneniny mafy ny ranomasina dia tankina; ataony ritra avokoa ny ony rehetra. Tonga maina ny ahitr'i Basana sy i Karmela, ary manjary malazo ny voninkazon'i Libano.
5 Mihovitrovitra eo anoloany ny tendrombohitra, ary mihotsaka koa ny havoana; mihorohoro eo anatrehany ny tany, izao tontolo izao sy ny mponina ao aminy.
6 Iza no mahajanona eo anoloan'ny fahavinirany? Ary zovy no mahatanty ny firehitry ny fahatezerany? Fa mihanaka toy ny afo ny fahatezerany; na dia ny vatolampy aza mitresaka eo anatrehany.
7 Fa tsara ny TOMPO, fialofana amin'ny andro mahory Izy. Izy no miahy izay mialoka aminy,
8 na dia tonga hanafotra aza ny loza. Fa potehiny kosa ny fahavalony ary alefany any amin'ny haizim-pahafatesana.