Hamôsa
Toko faha-8
11 Ny Tompo ANDRIANANAHARY dia manao teny hentitra hoe: Indro avy ny andro izay handefasako mosary amin'ny tany: tsy hoe ho mosarena mofo ny olona na hangetaheta rano fa haniry mafy handre ny teniko.12 Dia hivezivezy avy any atsimo ka hatrany andrefana ary hitotototo avy any avaratra ka hatrany atsinanana ny olona mba hitady ny teniko, nefa tsy hahita.
13 Amin'izany andro izany, dia ho torana azon'ny hetaheta ireo tovovavy tsara tarehy mbamin'ny tovolahy.
14 Ireo mpianiana amin'ny sampin'i Samaria sy ireo mpiteny hoe: 'Velona ny andriamanitrao, ry Dana!' na hoe: 'Velona ny andriamanitrao, ry Beera-Seba...!' dia ho lavo ka tsy hiarina intsony.
Toko faha-9
1 Hitako ny Tompo, nitsangana teo ambonin'ny alitara sady niteny hoe: Asio ny lohan'ireo andry amin'ity tempoly ity dia hihozongozona ny fiorenany. Hotorotoroiko avokoa ireo lohandohany amin'izay rehetra eto ary izay sisa tavela dia haringako amin'ny ady; tsy hisy ho afa-mandositra ary tsy hisy ho afa-mitsoaka.2 Na hibosesika any amin'ny toeran'ny maty aza ireo, dia hotsoahan'ny tanako avy any; na hiakatra ho any an-danitra aza ireo, dia hampidiniko avy any;
3 na hiery any an-tampon'i Karmela aza ireo, dia hokarohiko sy halaiko any; na mihevitra hiafina tsy ho hitan'ny masoko any amin'ny fanambanin'ny ranomasina aza ireo, dia homeko didy ny trozonabe hanaikitra azy any;
4 na ho lasan-ko babo eo anatrehan'ny fahavalony aza ireo, dia homeko baiko ny sabatra handringana azy any. Tapa-kevitra Aho tsy hahatonga soa ho azy fa hahatonga loza.
5 Ny Tompo ANDRIAMANITR'izao rehetra izao, vao manendry ny tany, dia mampihovotrovotra azy; misondrotra sy mietry ny tany manontolo tahaka an'i Neily, onin'i Ejipta; ary misaona ny maty ireo mponina rehetra ao aminy.
6 Nanorina ny lapany any an-danitra Andriamanitra, ka ny tany no iorenan'ny andohalambon'ny lanitra; miantso ny rano eny an-dranomasina Izy ka mampilatsaka azy ety ambonin'ny tany. Ny TOMPO no anarany.
7 Izao no teny hentitry ny TOMPO: Amiko ve ianareo, ry taranak'i Israely, tsy tahaka ny taranaka etiopianina ihany? Moa tsy nampiakariko avy tany Ejipta ve ianareo, tahaka ny nampiakarako ny Filistinina avy tany Kaftora sy nampiakarako ny Sirianina avy tany Kira?
8 Indro ny Tompo ANDRIANANAHARY mampifantoka ny masony amin'ity fitondram-panjakana mpanota ity sady manao teny hentitra hoe: Hamongotra azy tsy ho eto ambonin'ny tany intsony Aho, Kanefa tsy hamongotra manontolo ny taranak'i Jakoba.
9 Indro Aho hamoaka baiko mba hisivanana ny taranak'i Israely mba hosivanina any anivon'ny firenena rehetra tahaka ny anasivanam-bary amin'ny sivana ka tsy hisy vato latsaka amin'ny tany.
10 Ho faty an'ady ny mpanota rehetra amin'ny vahoakako, dia ireo nilaza hoe: Ny loza tsy hananontanona anay sady tsy hahatratra anay!
11 Hoy ny teny hentitry ny TOMPO hoe: Ilay tananan'i Davida izao dia toy ny tranobongo efa nianjera. Fa ho avy ny andro izay hananganako indray izany tanana izany, ka hofefeko ireo banga amin'ny mandany hatsangako ny rava tao aminy, ary haoriko indray ny tanana ho tahaka ny taloha.
12 Amin'izay no hakan'i Israely ny tany sisa amin'i Edoma sy amin'ny firenena hafa rehetra izay nomarihina ny anarako hananako azy. Izaho Tompo no hahatanteraka izany.
13 Hoy koa ny teny hentitry ny TOMPO hoe: Indro avy ny andro izay hahavokatra ny vary ka efa hasaina ny tany vao vita ny fijinjana, sy hahavokatra ny voaloboka ka efa hafafy ny voambary vao vita ny fihosemboaloboka. Divay no hiboiboika eny an-tendrombohitra sy hikoriana eny an-tampon-kavoana rehetra.
14 Haveriko avy amin'ny fahababoana ny Israely vahoakako, ka ireo tanana efa rava hatsangany sy honenany indray. Hamboly voaloboka izy ka hisotro ny divay avy aminy, ary hanao zaridaina ka hihinana ny vokatra avy aminy.
15 Hamboleko eo amin'ny tany izany nomeko azy izy, ka tsy hongotana hiala eo intsony. Izaho TOMPO Andriamanitrao no efa niteny.
Hôbadià
1 Nisehoam-pahitana i Hobadia, ka izao no voalazan'ny Tompo ANDRIANANAHARY ny amin'i Edoma. Nisy iraka nalefa ho any amin'ny hafa firenena, ka renay nanambara filazana avy amin'ny TOMPO hoe: Mitsangana ianareo! Aoka isika hiara-mitsangana hanafika an'i Edoma!2 Indro ianao, ry Edoma, fa hataoko osa indrindra eo amin'ny firenena; ka hotsiratsiraina izaitsizy ianao!
3 Ny avonavon'ny fonao no nahavery saina anao! Mitoetra eny an-tsefatsefaky ny harambato ianao, faritra avobe no misy ny fonenanao, ka hoy ianao anakampo hoe: Iza no hampivarina ahy ho eny an-tany ambany?
4 Na dia miakatra ambony tahaka ny voromahery aza ianao sy mametraka ny akaninao eny amin'ny kintana, dia havariko avy eny ianao: teny hentitra avy amiko TOMPO izany!
5 Raha misy mpangalatra na mpandroba tonga alina ao aminao, moa tsy hindaosiny avokoa ve izay zavatra azony entina? Indrisy fa fongotra ianao! Raha misy mpioty voaloboka tonga eo aminao, moa tsy voaloboka hotsimponina ve no havelany?
6 Endrey izany fisavan'ny olona ireo fanananao, ry taranak'i Hesao! Endrey izany fikarohana ny harenao miafina!
7 Ny olona rehetra izay nanao fifanekena taminao no mandroaka anao hatrany ivelan'ny sisin-taninao. Ny olona tsara fihavanana taminao no mamitaka anao ka naharesy anao. Ireo niara-nisakafo taminao no mamela-pandrika eo amin'ny lalan-kodiavinao. Ka hoy ireo ny aminao hoe: 'Tsy misy matsilo saina intsony ao aminy'.
8 Amin'izany andro izany manko no hamongorako ireo olon-kendry ao Edoma sy ireo matsilo saina ao amin'ny tendrombohitr'i Hesao: teny hentitra avy amiko TOMPO izany!
9 Dia ho raiki-tahotra mafy ny lehilahy maherinao, ry Temana; ka haringana avokoa ny mponina ao amin'ny tendrombohitr'i Hesao.
10 Noho ny taranak'i Jakoba rahalahinao efa nisetrasetranao sy novonoinao, dia ho safo-kenatra ny haringana mandrakizay ianao!
11 Nitsangan-kamely ny Israelita ianao, tamin'ny andro nandresen'ny vahiny ny tafiny sy nidiran'ny hafa firenena tao an-tananany; fony nozarain'ny vahiny antsapaka ny fananan'i Jerosalema, dia niray tetika taminy koa ianao.
12 Tsy tokony ho finaritra nijery ireo rahalahinao ianao tamin'ny andro nahitany loza; tsy tokony ho nifaly ny amin'ny taranak'i Joda ianao tamin'ny andro nandringanana azy; ary tsy tokony ho nanao teny miavonavona ianao tamin'ny andro nampahory azy;
13 tsy tokony ho niditra ilay tananan'ny vahoakako ianao tamin'ny andro nandravana azy; tsy tokony ho finaritra nijery ny fahantrany ianao tamin'ny andro nandravana azy; ary tsy tokony ho naninji-tanana haka ny fananany ianao tamin'ny andro nandravana azy;
14 tsy tokony ho namitsaka teo an-tsampanan-dalana ianao mba hamono izay afa-nandositra taminy; tsy tokony ho natolotrao ny fahavalo ireo sisa tavela tamin'ny andro nampahory azy;
15 satria efa antomotra ny andro hiavian'ny TOMPO ka hamelezany ny firenena rehetra. Amin'izany, dia araka ny nataonao ny hafa no hatao anao koa; ary hatsingerina aminao ny asa ratsinao.
16 Ianareo, ry Israelita, dia efa nisotro ny fahatezerako teo an-tendrombohitro masina; toy izany koa no hisotroan'ny firenena azy tsy an-kiato: eny, hisotro ny fahatezerako izy ka hivembena, ary dia ho fongana toy ny tsy nisy akory.
17 Ho ao an-tendrombohitra Tsiona kosa ireo sisa tavela, ka hanjary masina indray io toerana io; ary ho lasan'ny taranak'i Jakoba ny tanin'ireo naka ny taniny.
18 Ny taranak'i Jakoba ho toy ny afo, ny taranak'i Josefa ho toy ny lelafo; ny taranak'i Hesao kosa ho toy ny mololo ka harehitr'ireo sy holevoniny, ary tsy mba hisy sisa tavela amin'ny taranak'i Hesao. Izaho TOMPO no efa niteny!
19 Ny mponin'i Joda, faritra atsimo, no hahalasa ny tendrombohitr'i Hesao; ny mponin'i Joda, faritr'i Sefela, no hahalasa ny tanin'ny Filistinina sady hahalasa ny tanin'i Efraima, izany hoe ny tanin'i Samaria; ary ny taranak'i Benjamina no hahalasa an'i Gilehada.
20 Ny babo tamin'ny Israelita, izay tafika marobe, no hahalasa ny tanin'ireo Kanahanita hatrany Tsarefata. Ny babo tamin'ny mponin'i Jerosalema, izay any Sefarada, no hahalasa ny tanana any Negeba;
21 rehefa afaka amin'ny fahababoana ireo, dia hiakatra ho ao an-tendrombohitra Tsiona mba hifehy ny tendrombohitr'i Hesao. Amin'izay ny TOMPO mihitsy no ho mpanjaka.
Jônà
Toko voalohany
1 Indray andro dia nisy baikon'ny TOMPO tamin'i Jona zanakalahin'i Amitahy nanao hoe:2 Mitsangana ka mankanesa any Ninive, ilay tanana lehibe. Torio ny amin'ny hamelezana azy, satria tafakatra eto anatrehako ny faharatsian'ny mponiny.
3 Nefa niainga handositra ho any Tarsisy hanalavitra ny TOMPO i Jona. Nankany Jafao izy ka nahita sambo vonona ho any Tarsisy. Naloany ny saran-dalana, dia niondrana niaraka tamin'ny tantsambo rehetra izy ary nihevitra ny hanalavitra ny TOMPO.
4 Fa nampifofofofo rivo-mahery teny amin'ny ranomasina ny TOMPO; dia nanonja mafy ny ranomasina ka nila ho vakin'ny tafiotra ny sambo.
5 Natahotra mafy ny matilo ka samy niantso vonjy tamin'ny andriamaniny avy. Dia natsipy tany an-dranomasina ny entana mba hanamaivana ny sambo. Tamin'izay kosa i Jona efa nidina nandry tao anaty sambo iray ka resin-tory.
6 Dia nanatona azy ny kapitenin-tsambo ary nanontany azy hoe: Fa manao inona eto ianao? Toa matory! Mitsangana, ka mba antsoy koa ny Andriamanitrao, fa angamba hieritreritra antsika Izy ka tsy hamela antsika ho faty.
7 'Ndeha isika hanao antsapaka hahitana izay tompon'andraikitra mahatonga izao loza izao amintsika. Natao ny antsapaka ka nianjera tamin'i Jona.
8 Hoy ireo taminy: Tompon'andraikitra amin'izao loza manjo antsika izao ianao, koa lazao anay izay mahatonga anao eto. Avy taiza ianao? Aiza no tany fiavianao? Olom-pirenena avy aiza ianao?
9 Hoy ny navalin'i Jona ireo: Hebreo aho, ary ny TOMPO Andriamanitry ny lanitra Izay nanao ny ranomasina sy ny tany no ivavahako.
10 Tamin'izay dia raiki-tahotra ireo matilo raha nitantarany fa hay nandositra ny Tompo izy. Ka hoy ireo taminy: Fa naninona ianao no nanao izany?