Jônà
Toko voalohany
11 Hataonay ahoana ary ianao mba hampitony ny ranomasina aminay? Vao mainka nihanahery hatrany ny ranomasina.12 Hoy i Jona tamin'ny matilo: Batao aho ka atsipazo any anaty ranomasina dia hitony aminareo io. Fantatro fa noho ny fahadisoako no mahatonga izao tafio-drivotra mahery izao aminareo.
13 Nivoy mafy ireo matilo hahatrarana ny moron-dranomasina nefa tsy nahafa-piry, satria vao mainka nitroatra ny ranomasina.
14 Dia nitaraina tamin'ny TOMPO ireo ka nanao hoe: TOMPO o, aza avelanao ho faty noho ny amin'ity lehilahy ity izahay. Aza atambesatra aminay ny fahafatesan'ny anankiray izay tsy nanan-tsiny. Fa Ianao ry TOMPO no manao araka izay sitrakao.
15 Dia nobatain'ireo i Jona ka natsipiny tany anaty ranomasina, ary nijanona ny fisafoaky ny tafio-drivotra.
16 Natahotra ny TOMPO noho izany ireo matilo ka nanolotra sorona sady nivoady taminy.
Toko faha-2
1 Nandefa trondro lehibe hitelina an'i Jona ny TOMPO. Koa nitoetra telo andro sy telo alina tao an-kibon'ilay trondro i Jona.2 Tao izy no nanandratra izao vavaka izao tamin'ny TOMPO Andriamaniny
3 ka nanao hoe: Tao an-katerena aho, TOMPO o, no velon-taraina taminao, ka namaly ahy Ianao; tao anatin'ny toeran'ny maty no niantsoako vonjy taminao, ka nihaino ahy Ianao.
4 Natsipinao tao amin'ny lalina aho, dia tao an-kibon'ny ranomasina. Nanafotra ahy ny riaka; natosakao tamiko avokoa ny alon-dranonao aman'onjanao.
5 Dia hoy aho anakampo hoe: Indro aho voaroaka tsy ho eo imasonao, Tompo o, kanefa mbola manatrika ny tempolinao masina ihany.
6 Efa mby hatendako ny rano; nanafotra ahy ny ranomasina, ary ny ahidrano nisaringotra amin'ny lohako.
7 Tany amin'ny fanambanin'ny tendrombohitra no nahatafalatsaka ahy, ka nihidy tamiko mandrakizay ny vavahadin'ny sehatry ny maty. Nefa Ianao, ry TOMPO Andriamanitro o, nampiakatra ahy velona avy tao an-davaka.
8 Raha iny efa ho faty iny aho, dia nahatsiaro Anao, TOMPO o, ary ny vavaka nataoko taminao dia tonga tao an-tempolinao masina.
9 Fa izay mivavaka amin'ny andriamani-tsiizy dia aoka hiala amin'ireny sampy ifikirany ireny.
10 Fa izaho kosa amin-kira fiderana no hanolorako sorona aminao, ary hanefako ny voady izay nataoko. Anao, TOMPO o, ny famonjena!
11 Ary notenenin'ny TOMPO ilay trondro mba hamoaka an'i Jona, dia naloany ho eny amin'ny tany maina izy.
Toko faha-3
1 Ary nisy baikon'ny TOMPO fanindroany tamin'i Jona nanao hoe:2 Mitsangana ka mankanesa any Ninive ilay tanana lehibe; ary torio aminy ny hafatra izay nolazaiko anao.
3 Dia nitsangana i Jona ka niainga nankany Ninive, araka ny baikon'ny TOMPO. Tanana lehibe tokoa i Ninive, fa telo andro no fitetezana azy.
4 Dia nanomboka ny fitetezana tamin'ny andro voalohany i Jona ka nitory hoe: Rehefa afaka efapolo andro, dia horavana i Ninive.
5 Nino an'Andriamanitra ny mponin'i Ninive, ka nanapa-kevitra ny hifady hanina ary nitafy gony hatramin'ny lehibe ka hatramin'ny kely.
6 Rehefa ren'ny mpanjakan'i Ninive ny vaovao, dia nidina avy teo amin'ny sezafiandrianany izy ka nanala ny akanjo maha mpanjaka azy, ary nitafy gony koa sady nipetraka teo amin'ny lavenona.
7 Dia nasainy nambara nanerana ny tanana izao didim-panjakana izao: Araka ny didin'ny mpanjaka sy ny minisitra, dia rarana ny olona sy ny biby tsy hihinana na inona na inona na hisotro rano akory.
8 Na olona na biby dia tsy maintsy misarona lamba fisaonana avokoa. Ary aoka hitaraina mafy amin'Andriamanitra ka hiala amin'ny toetra ratsiny sy ny herisetra nahazatra ny tanany.
9 Iza no mahalala? Angamba hiova fanapahan-kevitra ihany Andriamanitra ka hiala amin'ny fahatezerany mirehitra mba tsy hahafaty antsika.
10 Rehefa hitan'Andriamanitra ny fihetsik'ireo Ninivita izay niala tamin'ny toetra ratsiny, dia niova fanapahan-kevitra Izy ka tsy nampihatra ny loza izay nolazainy hamelezany azy.
Toko faha-4
1 Tsy nahafaly an'i Jona mihitsy izany ka dia nirehitra ny fahatezerany.2 Nivavaka tamin'ny TOMPO izy ka nanao hoe: TOMPO o, izao indrindra no efa nahiko raha mbola tany amin'ny fireneko aho, ka nahatonga ahy handositra hankany Tarsisy. Fantatro manko fa Ianao dia Andriamanitra miantra sy mamindrafo, tsy mora tezitra sady be fitiavana ary vonon-kiova fanapahan-kevitra ny amin'ny loza.
3 Ankehitriny, TOMPO o, avelao aho ho faty, fa aleoko maty toy izay velona.
4 Fa hoy ny TOMPO: Rariny ve raha nirehi-pahatezerana ianao?
5 Dia nivoaka ny tanana i Jona ka nijanona teo atsinanan-tanana. Dia nanamboatra trano bongo ho azy teo izy ka nipetraka teo ambanin'ny alokalony niandry izay hitranga ao an-tanana.
6 Tampotampoka teo dia nampaniry tanantanamanga avo mihoatra ny tsanganan'i Jona ny TOMPO Andriamanitra mba hialokalofany sy hanafaka ny hasosorany; ary nahafaly an'i Jona tokoa io zavamaniry io.
7 Ny ampitso vao mangiran-dratsy anefa dia nandefa fositra kosa Andriamanitra hikiky ilay zavamaniry ka maina tery io.
8 Koa rehefa niposaka ny masoandro, dia nandefa rivotra mahamay avy any atsinanana Andriamanitra. Namely ny lohan'i Jona ny masoandro ka nila hanafotra azy. Dia naniry ny ho faty izy ka nivavaka hoe: Aleoko maty toy izay velona.
9 Fa hoy Andriamanitra taminy: Rariny ve raha mirehi-pahatezerana ny amin'io zavamaniry io ianao? Ary novalian'i Jona hoe: Eny, rariny raha mirehi-pahatezerana aho ka satriko aza ny ho faty.
10 Dia hoy ihany ny TOMPO hoe: Malahelo io zavamaniry io ianao kanefa tsy nisasatra taminy kely akory na nanao izay nampaniry azy. Fa indray alina fotsiny no naniriany, dia maty rehefa avy niaina indray alina izy.
11 Koa Izaho ve tsy mba halahelo an'i Ninive, dia ilay tanana lehibe misy olona maherin'ny roa alina sy iray hetsy izay tsy mahafantatra akory ny mahasoa azy, mbamin'ireo biby fiompy tsy tambo isaina?
Mikà
Toko voalohany
1 Teny nampitain'ny TOMPO tamin'i Mika izay avy any Moreseta, fony mpanjaka tao Joda ry i Jotama sy i Ahaza ary i Hezekia. Fahitana no nampahafantaran'ny Tompo azy ny teniny momba ny tanana Samaria sy Jerosalema.2 Mihainoa ianareo, ry firenena rehetra. Mandrenesa tsara, ry tany sy izay rehetra ao aminy! Ny Tompo ANDRIANANAHARY no ho tonga eo anivonareo mba ho vavolombelona hiampanga, dia ny Tompo avy ao amin'ny tempoliny masina.
3 Fa indro ny TOMPO mivoaka ny toerany, ary midina ka mandeha eny am-paratampon'ny tany;
4 miempo eo ambany tongony ny tendrombohitra tahaka ny savoka taninin'ny afo; ary loadoaka ny lohasaha tahaka ny rehefa misy riaka mivarimbarina eny an-kilahila.
5 Nikomy tamin'Andriamanitra ny taranak'i Jakoba, eny, nanota ny vahoakan'i Israely, ka mahatonga izany rehetra izany. Fa iza no nampikomy ny taranak'i Jakoba? Moa tsy i Samaria renivohiny ve? Ary iza no toeram-panasinana ao Joda? Moa tsy i Jerosalema renivohiny ve?
6 Noho izany, dia hoy ny Tompo hoe: Hataoko antontan-korontam-bato eny an-tsaha i Samaria, hataoko tany fambolena voaloboka; ary havariko any an-dohasaha ny vatony, ka hampihanjahanjaiko ny fototra iorenany.
7 Hotorotoroina ny sampiny voasokitra rehetra hodorana amin'ny afo ny tamby rehetra azony ary hopotehiko ny sarin-tsampiny rehetra; satria tambin'ny vehivavy janga no nanangonany azy, dia hanambazana vehivavy janga any an-kafa indray ireny.
8 Hoy kosa i Mika hoe: Noho izany, dia hitomany sy hidradradradra aho, ary handeha tsy mitafy sady tsy mikiraro. Hikonainaina toy ny amboadia aho ary hikiakiaka toy ny vorombe;
9 satria tsy mety sitrana ny ratran'i Samaria fa mitatra hatrany Joda aza, ka tonga hatreo am-bavahadin'i Jerosalema izay tananan'ny mpiray firenena amiko.
10 Aza ambara any Gata izany fa tazony ny ranomasonareo! Ry mponina ao Bety-Hafra, mihosinkosena amin'ny vovoka ianareo.
11 Ry mponina ao Safira, mandehana hatao sesi-tany omban-kenatra sady tsy mitafy. Tsy mahavoaka ny tanana ireo mponina eo Tsanana. Misaona ny ao Bety-Etsela, ka tsy azo ampiasaina hierena intsony.
12 Mangovitra ny amin'ireo tombon-tsoany ny mponina ao Marota, satria efa nidina ho ao am-bavahadin'i Jerosalema ny loza avy tamin'ny TOMPO.