Hamôsa
Toko faha-5
19 toy ny amin'ny olona mandositra liona kanefa mifanehatra amin'ny orsa; na toy ny amin'ny olona tonga ao an-trano sy mitehina amin'ny rindrina, kanefa kaikerin'ny menarana.20 Moa hamiratan-tsoa ve ny androm-pamaizan'ny TOMPO? Tsia, fa ho andro maizim-panahiana izany, ho andro maizina tsy misy mangirana mihitsy.
21 Halako, maharikoriko Ahy ny fety fivahiniananareo; ary tsy sitrako ny fivoriam-pivavahanareo.
22 Na dia anateranareo sorona dorana manontolo sy fanatitra hohanina aza Aho, dia tsy hankasitrahiko izany; ary tsy hojereko akory ny zanak'omby matavy aterinareo ho sorom-pihavanana.
23 Halaviro Ahy ny finaonaonan'ny hiranareo; tsy tiako hohenoina ny feon-dokanganareo.
24 Aoka ny rariny hikoriana toy ny rano ary ny fahamarinana ho tahaka ny renirano tsy mety ritra!
25 Ry taranak'i Israely, moa nanolotra sorona sy fanatitra ho Ahy ve ianareo nandritra ny efapolo taona tany an-taniefitra?
26 Ary nentinareo ve ny sarin'i Sikota, ilay sampy mpanjakanareo, sy ny sarin'i Kiona, ilay kintana andriamanitrareo, izay samy sary nataonareo ho anareo? Tsia!
27 Koa halefako ho babo any ambadika lavitr'i Damasy ianareo. Izaho TOMPO no miteny izany; ilay Andriamanitr'izao rehetra izao no anarako.
Toko faha-6
1 Lozanareo izay manorina fiadanana amin'i Tsiona sy mitoky amin'ny tendrombohitr'i Samaria, dia ianareo mihevi-teny ho sangany eo amin'ilay firenena malaza indrindra ka hatonin'ny taranak'i Israely!2 Mankanesa any Kalne ianareo ka mijere; avy ao dia mandehana any Hamata, tanana lehibe; ary midina ho any Gata tananan'ny Filistinina. tsy miroborobo noho ireo fanjakana ireo ny anareo, na dia kely noho ny taninareo aza ny taniny!
3 Mitady hampihemotra ny andron'ny loza ianareo nefa mampanatona ny fanjakan'ny herisetra;
4 mandrimandry eo ambony farafara miravaka ivoara ianareo ary mitsilailay eo ambony diva sady mihinana zanak'ondry avy tamin'ny andriany sy zanak'omby matavy.
5 Mihirahira manaraka ny feon-dokanga ianareo sy mamorona zava-maneno tahaka an'i Davida.
6 Misotro divay amin'ny kaopy lehibe ianareo sady manosotra ilomanitra ny lohanareo, fa tsy mba malahelo amin'ny fahavoazan'ny fokon'i Josefa.
7 Noho izany, ankehitriny dia ianareo no ho voalohany amin'izay ho lasan-ko babo ka hifarana hatreo ny korananareo mpanao filibana.
8 Ny TOMPO efa mianiana amin'ny tenany; Ilay TOMPO Andriamanitr'izao rehetra izao dia manao teny hentitra hoe: Mahatsiravina Ahy ny avonavon'ny fanjakan'i Israely ary halako ireo lapany, ka hatolotro ny fahavalony ny renivohitra Samaria mbamin'izay rehetra ao anatiny.
9 Koa raha mbola misy olona folo sisa ao amin'ny trano iray dia ho faty ao ireo.
10 Ny tompo-manjo no haka ny faty, sy voatery hamoaka azy hiala ny trano, sady hiteny amin'izay anankiray sisa velona ao an-trano hoe: Mbola misy ve miaraka aminao? Ka hovaliany hoe: Tsy misy intsony! Ary hampiany hoe: Mangina! Fa aza tonontononina ny anaran'ny TOMPO.
11 Eny, tandremo fa manome baiko ny TOMPO; dia ho montsamontsana ny trano vaventy ary ho samatsamaka ny trano madinika.
12 Moa mihazakazaka eny an-kisolasola-bato ve ny soavaly, ary moa ampihosena ranomasina ve ny omby, no dia navadikareo ho poizina ny rariny, ary ho zava-mangidy ny fanarahan-dalana?
13 Mifaly amin'ny tanana Lodabara azonareo indray ianareo; dia milaza koa ianareo hoe: Tsy tamin'ny herintsika ve no nakantsika ny tanana Karnaima?
14 Kanefa izao no teny hentitra ataon'ny TOMPO Andriamanitr'izao rehetra izao: Indro Aho, ry taranak'i Israely, hanangana firenena hamely anareo, dia firenena hampahory anareo manomboka hatreo Lebo-Hamata ka hatrany amin'ny lohasahan-driaka Haraba.
Toko faha-7
1 Izao no nasehon'ny Tompo ANDRIANANAHARY ahy tamin'ny fahitana: Indro Izy nanao andiam-balala tamin'ny fiandohan'ny fitsimohan'ny kolokolo, dia ny kolokolo taorian'ny fijinjana vary ho an'ny mpanjaka.2 Ary rehefa tapitra lanin'ny valala avokoa ny ahitra rehetra tamin'ny tany, dia hoy aho hoe: Ry Tompo ANDRIAMANITRA o, mba avelao re ny heloky ny vahoakanao! Fa fomba ahoana no hahajoroan'ny taranak'i Jakoba satria kely izy?
3 Dia niova hevitra tokoa ny TOMPO ka dia IZY mihitsy no niteny hoe: Tsy hisy izany.
4 Izao indray no nasehon'ny Tompo ANDRIANANAHARY ahy tamin'ny fahitana: Indro Izy Tompo ANDRIANANAHARY dia niantso ny afo hanatanteraka ny fitsarany; ka ny afo no nandritra ny ranobe any ambanin'ny tany sady nandoro ny tanin'i Israely.
5 Dia hoy aho hoe: Ry Tompo ANDRIANANAHARY o, mba atsaharo amin'izay re! Fa fomba ahoana no hahajoroan'ny taranak'i Jakoba satria kely izy?
6 Ary niova hevitra tokoa ny TOMPO; ka dia Izy Tompo ANDRIANANAHARY no niteny hoe: Tsy hisy izany.
7 Izao koa no nasehon'ny Tompo ANDRIANANAHARY ahy tamin'ny fahitana: Indro Izy Tompo mihitsy no nitsangana teo ambonina manda fira-potsy sady nitana fira-potsy teny an-tanany.
8 Dia nanontany ahy ny TOMPO hoe: Inona no hitanao, ry Hamosa? Ka novaliako hoe: Fira-potsy. Dia hoy indray ny Tompo hoe: Indro Aho hampiasa fira-potsy hamelezako eo afovoan'i Israely vahoakako, satria tsy holeferiko intsony ny fahadisoany.
9 Fa hofoanako ireo toeram-panasinan'ny taranak'i Itsehaka, horavako ireo toeram-pivavahan'i Israely, ary hitsangana Aho hamely ny taranak'i Jerobohama amin'ny sabatra.
10 Ary i Amatsia, mpisorona tao Betela, dia naniraka hilaza amin'i Jerobohama mpanjakan'i Israely hoe: I Hamosa efa nikotrika fikomiana taminao teo anivon'ny vahoakan'i Israely; tsy zakan'ny tany intsony ireo kabariny rehetra.
11 Fa izao manko no voalazan'i Hamosa: Ho fatin'ny sabatra i Jerobohama ary ny vahoakan'i Israely dia ho entina ho babo lavitra ny taniny.
12 Dia hoy i Amatsia tamin'i Hamosa: Ry mpahazo fahitana, mandehana mandositra any amin'ny tanin'i Joda ianao, ka any no ijoroy ny maha-mpaminany anao; dia ry zareo no hanome anao ny mofo hohaninao.
13 Fa aza maminany eto Betela intsony, fa toeram-pivavahana najoron'ny mpanjaka sady lapan'andriamanjaka no eto.
14 Dia namaly an'i Amatsia i Hamosa nanao hoe: Tsy mba mpaminany na anisan'ny tarika mpaminany aho taloha fa mpiandry biby fiompy sady mpanindrona voan'aviavy.
15 Saingy nalain'ny TOMPO teo am-piandrasana biby fiompy aho ka nitenenany hoe: Mandehana ianao ka mijoroa ho mpaminany amin'ny Israely vahoakako.
16 Koa ankehitriny, henoy ny tenin'ny TOMPO. Ianao manao amiko hoe: Aza maminany ny hamelezana an'i Israely ary aza manambara ny hamelezana ny taranak'i Itsehaka;
17 noho izany, ry Amatsia, dia izao no lazain'ny TOMPO: Hijangajanga ao an-tanana ny vadinao; ireo zanakao lahy sy vavy dia haringana amin'ny sabatra; ny taninao dia hozarazaraina amin'ny tady sy homena olon-kafa; ianao dia ho faty any amin'ny tany fanompoan-tsampy ary ny taranak'i Israely dia ho lasan-ko babo lavitry ny taniny.
Toko faha-8
1 Ary izao indray no nasehon'ny Tompo ANDRIANANAHARY ahy tamin'ny fahitana: indro nisy voankazo masaka iray harona.2 Dia nanontany ahy Izy hoe: Inona no hitanao, ry Hamosa? Ka novaliako hoe: Voankazo masaka iray harona! Dia hoy ny TOMPO tamiko: Tonga ny farany ho an'ny Israely vahoakako, tsy holeferiko intsony ny fahadisoany.
3 Amin'izany andro hiaviako izany, ireo vehivavy mpihira ao an-dapa dia hanao hiram-pisaonana. ho marobe ny faty ka fahanginana no hanjaka hatraiza hatraiza. Izaho Tompo ANDRIANANAHARY no manao izany teny hentitra izany.
4 Mihainoa izao ianareo te hitelina ny mahantra sy te hamongotra ny mpandefitra eto amin'ny tany,
5 ka velom-panontaniana anakampo hoe: Rahoviana no hifarana ny fetin'ny tsinam-bolana ka hivarotantsika vary? Rahoviana no hifarana ny sabata, mba hanokafantsika ny sompitra? Hohakelezintsika ny zinga famarana, hampitombointsika ny vato fandanjana, mizana mandainga no hampiasantsika,
6 ary hatramin'ny vary loha-kororoka no hamidintsika. Hovidintsika ho andevo ireo fadiranovana sy mahantra, noho izy tsy mahaloa na ny vidin-kapa iray lomisy aza.
7 Ny TOMPO, Izay reharehan'ny taranak'i Jakoba, dia nanao fianianana hoe: Tsy hisy hohadinoiko mandrakizay ny asa ratsy rehetra nataonareo!
8 Noho izany, dia hihorohoro ny tany ary hisaona ny mponina rehetra ao aminy; eny, hihorohoro tokoa ny tany tontolo, ka hisondrotra sy hietry tahaka an'i Neily onin'i Ejipta.
9 Ny Tompo ANDRIANANAHARY dia manao teny hentitra hoe: Izao no hiseho amin'izany andro izany: halentiko mitatao vovonana ny masoandro ary hohamaiziniko antoandro ny tany;
10 havadiko ho fisaonana ny fetinareo ary ho fitomaniana ny hiram-pifalianareo; hosikinako lamba gony ianareo rehetra sady hosolako loha ka hataoko tahaka ny olona misaona zanaka lahitokana; ary ho tahaka ny androm-pahoriana mangidy no fiafaran'izany.