Hamôsa
Toko faha-2
13 Noho izany, dia tsy hahemotro ny sazy momba anareo. Indro hataoko mikonainaika eo amin'izay misy anareo avy ianareo tahaka ny ikonainaihan'ny sarety vesaram-bary.14 Ka ny haingam-pandeha tsy hahita fierena, ny matanjaka tsy afaka hampiasa ny heriny, ary ny miaramila voafantina tsy hahavonjy ny tenany.
15 Tsy hahajoro ny mpandefa zana-tsipika, tsy ho afa-mitsoaka ireo faingan-tongotra, ary tsy hahavonjy ny ainy ny mpitaingin-tsoavaly.
16 Amin'izany andro izany, na ny mahery fo indrindra amin'ireo miaramila voafantina aza dia hanary fiadiana ka handositra. Teny hentitra avy amiko TOMPO izany.
Toko faha-3
1 Ry taranak'i Israely, dia ianareo ankohonana rehetra izay nampiakarin'ny TOMPO avy tany Ejipta, henoy izao teny nambarany momba anareo izao:2 Amin'ny fianakaviana rehetra eto ambonin'ny tany, dia ianareo ihany no nofidiko sy nokarakaraiko; noho izany, dia hampamoahako anareo ny fahadisoana rehetra nataonareo.
3 Hiara-dalana ve ny olon-droa, raha tsy efa nifanaiky?
4 Hanerona ao anaty ala ve ny liona, raha tsy mahita remby? Hanerongerona ao an-davany ve ny liona tanora, raha tsy misy zavatra azony?
5 Voan'ny fandrika amin'ny tany ve ny vorona, raha tsy nisy sakafo nisarika azy? Mikatona ve ny fandrika-harato raha tsy mahazo zavatra?
6 Tsofina ao an-tanana ve ny trompetra, ka tsy hisahotaka ny vahoaka? Misy loza ve ao an-tanana, raha tsy ny TOMPO no nanao azy?
7 Satria tsy manao zavatra ny Tompo ANDRIANANAHARY, raha tsy efa mampahafantatra ny fikasany amin'ireo mpaminany mpanompony.
8 Ny liona no nierona, ka iza no tsy hatahotra? Ny Tompo ANDRIANANAHARY no niteny, ka iza no tsy hampita ny hafatra ampitondrainy?
9 Ataovy re eny an-tafon-tranon'ireo lapa ao Asdoda sy eny an-tafon-tranon'ireo lapa any Ejipta, ka lazao hoe: Mivoria eny an-tendrombohitr'i Samaria ianareo, ka jereo ny korontana marobe eo anivony sy ny famoretana mihatra ao anatiny.
10 Fa izao no teny hentitry ny TOMPO: Tsy nahalala hanao asa marina ry zareo; zavatra vokatry ny herisetra sy ny fandrobana no angoniny ho ao an-dapany.
11 Noho izany, ry Samaria, izao no lazain'ny Tompo ANDRIANANAHARY: Hohodidinin'ny fahavalo ny taninao, harodany hiala aminao ny manda-fiarovanao, ary horobainy ireo lapanao.
12 Izao no lazain'ny TOMPO: Rehefa misy ondry azon'ny liona, dia tongotra roa na sombin-tsofina no tsoahan'ny mpiandry ondry avy eo am-bavan'ny liona; toy izany ny amin'ireo Israelita izay mipetraka ao Samaria, eo an-joron'ny saofa na eo ambony fandriana malemilemy: Vitsivitsy ihany no hovonjena.
13 Henoinareo ka ambarao amin'ny taranak'i Jakoba: ny teny hentitry ny Tompo ANDRIANANAHARY, dia ilay Andriamanitr'izao rehetra izao:
14 Amin'ny andro hamaliako ny Israely noho ny helony, dia horavako ireo alitara ao Betela; hopotehiko ny tandroky ny alitara isanisany, ka hianjerazera amin'ny tany.
15 Hazerako ny trano ririnina sy trano fahavaratra, ary ho simba ny trano miravaka ivoara sady ho fongana ny trano miezinezina. Teny hentitry avy amiko TOMPO izany.
Toko faha-4
1 Ianareo andriambavilanitr'i Samaria, izay mihamatavy tahaka ny ombivavin'i Basana, henoy izao teniko izao: Manitsakitsaka ny madinika ianareo, sy mampahory ny mahantra, ary milaza amin'ny vadinareo hoe: Mitondra hosotrointsika!2 Izany no ianianan'ny Tompo ANDRIANANAHARY hoe: Noho ny fahamasinako dia manizingizina Aho, fa indro ho avy aminareo ny andro izay hitarihana amin'ny farango ny tenanareo sy ny mpanotrona anareo.
3 Ary eo amin'izay banga tandrify anareo avy no hivoahanareo ny tanana, dia horoahina ho any Hermona ianareo. Teny hentitra avy amiko TOMPO izany.
4 Izao no teny hentitry Tompo ANDRIANANAHARY: Mankanesa any Betela, ry taranak'i Israely, ka manota ianareo; mankanesa any Gilgala, ka ampitomboy ny helokareo. Ento ny soronareo ny ampitson'ny ahatongavana, ary ny fahafolon-karenareo ny afakampitso.
5 Dory hanetona eo amin'ny alitara ny mofo misy leviora fanati-pisaoranareo; ary ataovy antso avo ampahibemaso ny fanatitra an-tsitrapo ataonareo, satria izany no tianareo.
6 Izaho mihitsy no efa nahatonga mosary tao amin'ny tanananareo rehetra, ary tsy fahampian-tsakafo tao amin'ny fonenanareo rehetra; nefa tsy niverina tamiko ihany ianareo; teny hentitra avy amiko TOMPO izany.
7 Izaho mihitsy no efa nampihantona ny orana tsy ho eo aminareo, raha mbola telo volana mialoha ny fararano. Ka tamin'ny tanana anankiray nandatsahako orana, fa tamin'ny tanana iray kosa tsy nandatsahako; ny saha anankiray nilatsahan'ny orana, fa ny saha iray kosa tsy mba nilatsahany ka maina.
8 Nivembena nankao amin'ny tanana iray ny mponina tamin'ny tanana roa na telo mba hisotro rano tsy nahafa-ketaheta, nefa tsy niverina tamiko ihany ianareo; teny hentitra avy amiko TOMPO izany.
9 Nasiako tamin'ny vary main'ny rivotra sy maty fotsy ianareo; nofongorako ny zaridainanareo sy ny voalobokareo, nohanin'ny valala ny aviavinareo sy ny olivanareo, nefa tsy niverina tamiko ihany ianareo; teny hentitra avy amiko TOMPO izany.
10 Nalefako teo aminareo ny pesta mpamely biby fiompy tahaka ny pesta nalefako tany Ejipta; novonoiko ho faty tamin'ny sabatra ny zatovolahinareo, sady nobaboina koa ny soavalinareo; ary nampiakariko hatrany am-bavoronareo ny hamaimbon'ny faty ao an-tobinareo; nefa tsy niverina tamiko ihany ianareo; teny hentitry ny TOMPO izany.
11 Efa natsimbadiko ambony ambany ny tao aminareo tahaka izay nataoko tamin'i Sodoma sy Gomora; ka ianareo izao dia toy ny tapa-porohana nosarihina avy ao amin'ny afo nefa tsy niverina tamiko ihany ianareo; teny hentitra avy amiko TOMPO izany.
12 Koa dia hisy sazy hataoko aminao, ry Israely; ary rehefa izany no hataoko aminao, dia miomana ianao hihaona amin'Andriamanitrao.
13 Satria tandremo fa Izy no mpamorona ny tendrombohitra sy mpahary ny rivotra, Izy no manambara amin'ny olombelona ny fikasany, mahatonga ny maraina ho haizina sady mandeha eny am-paratampon'ny tany: Ny TOMPO Andriamanitr'izao rehetra izao no anarany.
Toko faha-5
1 Ry taranak'i Israely, henoinareo izao teniko izao, dia hira fisaonana ventesiko momba anareo:2 Tahaka ny tovovavy maty i Israely, ka potraka tsy mahatsangana intsony; miampatra eo amin'ny taniny izy, fa tsy misy manarina.
3 Satria izao no lazain'ny Tompo ANDRIANANAHARY ny amin'ny vahoakan'i Israely: Misy tanana mamoaka miaramila arivo hiantafika, kanefa zato no sisa hiverina; Misy tanana mamoaka miaramila zato hiantafika, kanefa folo no sisa hiverina.
4 Izao no lazain'ny TOMPO amin'ny vahoakan'i Israely: Tadiavo Aho, dia ho velona ianareo.
5 Fa aza mitady Ahy any Betela, aza miditra ao Gilgala, ary aza mankany Beera-Seba; satria ho lasan-ko babo tokoa i Gilgala, ary i Betela dia ho tonga tsinontsinona.
6 Tadiavo ny TOMPO, dia ho velona ianareo. Fa raha tsy mitady Azy ianareo, ry taranak'i Josefa, dia hilatsaka aminareo tahaka ny afo Izy ka handevona an'i Betela, ary tsy hisy olona hahafaty ny afo.
7 Ianareo no mamadika ny rariny ho zava-mahafaty ary mampitsingidina ny fahamarinana amin'ny tany.
8 Fa ilay nanao ny kintana Kotokelimiadilaona sy ny kintana Telonohorefy, manova ny haizim-pito ho maraina sy manamaizina ny andro ho alina, miantso ny rano any an-dranomasina sy manapariaka azy eny ambonin'ny tany, dia ny TOMPO no anarany.
9 Izy no mampipoaka ny fandravana hamelezana ny mahery, ka iharan'ny fandravana tokoa ny tanana mimanda.
10 Halanareo ny olona mananatra eo amin'ny fitsarana ary maharikoriko anareo ny vavolombelona milaza ny marina.
11 Nohosihosenareo ny malahelo ka nangalanareo am-paham-bary ny vokatra avy aminy. Noho izany, dia tsy hitoetra amin'ny trano vato voapaika nataonareo ianareo, ary tsy hisotro ny divay avy amin'ny voaloboka tsara nambolenareo.
12 Hoy koa ny Tompo hoe: Fantatro fa marobe ireo helokareo ary mahatsiravina ireo fahotanareo; ianareo no mpandray tsolotra sy mpanenjika ny olo-marina, ka manodinkodina ny zon'ny mahantra eo amin'ny fitsarana,
13 Noho izany, dia mangina ny olon-kendry amin'izao fotoana izao satria fotoana ratsy izao.
14 Ny tsara no tadiavo fa aza ny ratsy, mba ho velona ianareo; amin'izay ny TOMPO Andriamanitr'izao rehetra izao dia hiaraka aminareo araka ny lazainareo.
15 Ankahalao ny ratsy, tiavo ny tsara, ary ampitoero ao amin'ny fitsarana indray ny rariny; Angamba ny TOMPO Andriamanitr'izao rehetra izao hamindrafo amin'izay sisa amin'ny taranak'i Josefa.
16 Koa izao no lazain'ny TOMPO, ilay Andriamanitr'izao rehetra izao sady Tompoko: Eny an-kalamanjana rehetra dia hisy tomanim-pisaonana; ary eny amin'ny arabe rehetra dia hisy hanao hoe: Indrisy! Indrisy!' Ny mpamboly koa hantsoina hiaraka ory; ary ireo mpiantsa fahoriana hanao hiram-pisaonana.
17 Any amin'ny tanimboaloboka rehetra dia hisy tomanim-pisaonana, satria handalo ao aminareo Aho. Izaho TOMPO no miteny.
18 Lozan'izay miandrandra ny androm-pamaizan'ny TOMPO! Fa ho inona moa aminareo io androm-pamaizan'ny TOMPO io? Ho andro maizim-panahiana izany fa tsy hamiratan-tsoa,