Eksôdy

Toko faha-16

¹⁴ Rehefa nisava ny ando dia indro nisy zavatra mivaingana nijanona teny an-taniefitra, boriborikely toy ny fanala nifafy tamin'ny tany.

¹⁵ Hitan'ny Israelita ireny nefa tsy fantany, ka nifanontany izy hoe: -Inona itony? Fa novalian'i Mosesy hoe: -Itony no mofo izay nomen'ny TOMPO hohaninareo.

¹⁶ Ary izao no zavatra nandidian'ny TOMPO anareo: Samia manangona izay tokony ho sahaza azy avy; manangona ankevitry ny inefatry ny zingan-drano isan'olona, araka ny isan'ny olona miara-belona ao amin'ny isan-dainy avy.

¹⁷ Notanterahin'ny Israelita izany, ka nisy nanangona betsaka, ary nisy kosa nanangona kely.

¹⁸ kanefa rehefa nafatra tamin'ny famarana, dia tsy nanana tombony ireo nanangona be, ary tsy nanana ny tsy ampy ireo nanangona kely, fa samy nahazo ny sahaza hohaniny avy ny tsirairay.

¹⁹ Dia hoy i Mosesy tamin'ny Israelita: -Aoka tsy hisy olona hamela sisa ho tra-maraina.

²⁰ Nisy ihany anefa olona tsy nankato an'i Mosesy ka namela sisa ho tra-maraina, saingy nivoaka olitra ireny ka maimbo; koa tezitra tamin'ireo i Mosesy.

²¹ Hatreo dia nanangona izay sahaza hohaniny avy isa-maraina ny olona; ary rehefa nafana ny andro dia nitsonika ireny.

²² Tamin'ny andro fahenina dia sakafo indroa heny no nangonin'ny olona, izany hoe imbalon'ny zingan-drano isan'olona. Dia lasa nanao tatitra tamin'i Mosesy ireo mpitarika ny vahoaka,

²³ ka hoy i Mosesy hoe: -Izany indrindra no nandidian'ny TOMPO anareo. Rahampitso dia sabata, andro fitsaharana voatokana ho an'ny TOMPO; koa andrahoy izay tokony handrahoina, ary ampangotrahy izay tokony hampangotrahina, fa ny ambiny kosa dia tehirizo ho tra-maraina.

²⁴ Dia navahan'izy ireo hotahirizina mandra-maraina ny ambiny araka izay nodidian'i Mosesy, nefa tsy maimbo na feno olitra.

²⁵ Ary hoy i Mosesy taminy: -Hano izany anio, fa sabata ho an'ny TOMPO anio, ka tsy hahita an'ireny eny an-tsaha ianareo androany.

²⁶ Andro enina no ahazoanareo manangona sakafo; fa amin'ny andro fahafito, andro sabata, dia tsy hisy.

²⁷ Tamin'ny andro fahafito anefa dia mbola nisy ihany Israelita sasany nivoaka ny toby mba hanangona, fa tsy nahita na inona na inona.

²⁸ Ka hoy ny TOMPO tamin'i Mosesy: -Mandra-pahoviana no handavanareo tsy hitandrina ny didiko sy ny lalanako?

²⁹ Fantaro tsara fa ny nanomezako anareo ny sabata dia ny mba hitsaharanareo. Izany no antony anomezako mofo sahaza ny indroa andro amin'ny andro fahenina; ka amin'ny andro fahafito dia samia mitoetra ao an-tranony avy, fa aoka tsy hisy olona hiala tao.

³⁰ Dia nitsahatra ny vahoaka Israelita tamin'ny andro fahafito.

³¹ Nataon'ny Israelita hoe mana ny anaran'izany sakafo izany. Mitovy amin'ny voarafy izy sady fotsy, ary tahaka ny mofo misy tantely ny tsirony.

³² Hoy i Mosesy tamin'ny Israelita: -Izao no zavatra nandidian'ny TOMPO: Fenoy mana ny vata homera iray mba hotehirizina ho an'ny taranakareo. Amin'izay dia mba ho hitany ny mofo izay nomeko hohaninareo tany an-taniefitra fony Aho namoaka anareo hiala tany Ejipta.

³³ Dia hoy i Mosesy tamin'i Aharona: -Maka siny tany ka asio mana inefatry ny zingan-drano, dia apetraho eo anatrehan'ny TOMPO mba hotahirizina ho an'ny taranakareo.

³⁴ Araka izay nandidian'ny TOMPO an'i Mosesy dia teo anoloan'ny Raki-tsoratry ny fanekempihavanana no napetrak'i Aharona ilay siny tany misy mana mba hotahirizina.

³⁵ Nandritra ny efapolo taona no nihinanan'ny Israelita ny mana, ambara-pahatongany tany amin'ny tany misy mponina, izany hoe mandra-pidirany teo amin'ny sisin-tanin'i Kanahana.

³⁶ Ny fatran'ny mana fanangona dia efatra zingan-drano eo ho eo, izany hoe ampahafolon'ny famarana mahazatra.

Toko faha-17

¹ Araka ny baikon'ny TOMPO dia niala tao an-taniefitr'i Sina ny fiangonana Israelita manontolo mba hanohy ny diany. Nitoby tao Refidima izy, kanefa tsy nisy rano hosotroin'ny vahoaka tao.

² Dia nila ady tamin'i Mosesy ny Israelita ka nanao taminy hoe: -Omeo rano hosotroina izahay! Fa nanontany azy ireo i Mosesy hoe: -Nahoana no mila ady amiko ianareo? Nahoana no maka fanahy ny TOMPO ianareo?

³ Fa rehefa main'ny hetaheta mafy ny vahoaka, dia nimonomonona tamin'i Mosesy ka nanao taminy hoe: -Nahoana moa ianao no nampiakatra anay niala tany Ejipta? Moa ny hahatonga anay ho fatin-ketaheta eto miaraka amin'ny zanakay sy ny bibinay ve?

⁴ Dia niantso vonjy tamin'ny TOMPO i Mosesy nanao hoe: -Inona no hataoko amin'ity vahoaka ity? Fa mila hitora-bato ahy mihitsy izy!

⁵ Hoy ny TOMPO tamin'i Mosesy hoe: -Mandalova eo anoloan'ny vahoaka, maka vitsivitsy amin'ny loholon'i Israely hiaraka aminao. Ento eny an-tananao ilay tehinao izay nikapohanao ny ranon'i Neily ka mandehana.

⁶ Izaho kosa dia hijoro eo anoloanao, eo ambonin'ny harambato eny an-tendrombohitra Horeba; hokapohinao ny harambato, dia hamoaka rano hosotroin'ny vahoaka. Dia notanterahin'i Mosesy teo imason'ny loholon'i Israely izany baiko izany.

⁷ Nantsoina hoe Masa sy Meriba io toerana io, izany hoe fakana fanahy sy filana ady satria nila ady tamin'i Mosesy ny Israelita, ary naka fanahy ny TOMPO tamin'ny nitenenany hoe: Moa eto aminay tokoa ve ny TOMPO sa tsia?

⁸ Tonga hiady amin'ny Israelita tao Refidima ny Hamalekita.

⁹ Dia hoy i Mosesy tamin'i Josoa: -Mifidiana lehilahy afaka hiaro antsika, dia mivoaha hiady amin'ny Hamalekita. Izaho kosa rahampitso dia hijoro eo an-tampon'ny havoana miaraka amin'ny tehin'Andriamanitra eny an-tanako.

¹⁰ Dia lasa i Josoa niady tamin'ny Hamalekita araka izay efa nandidian'i Mosesy azy; fa i Mosesy sy i Aharona ary i Hora kosa dia niakatra teny an-tampon'ny havoana.

¹¹ Ary raha mbola nasandratr'i Mosesy ny tanany, dia nahery ny Israelita; fa rehefa navelany hidina, dia nahery ny Hamalekita.

¹² Ary nony vizaka ireo sandrin'i Mosesy, dia nalain'i Aharona sy i Hora ny vato ka napetrany teo anilan'i Mosesy, ary nipetraka teo ambonin'io i Mosesy. Dia avy i Aharona sy i Hora ka nanohana ny sandriny teo an-daniny sy an-kilany, dia naharitra tsy nidina ny tanany ambara-pilentiky ny masoandro.

¹³ Koa resin'i Josoa tanteraka tamin'ny lelan-tsabatra ny tafika hamalekita.

¹⁴ Ary hoy ny TOMPO tamin'i Mosesy: -Soraty ao amin'ny boky izany mba tsy hohadinoina; ary ambarao amin'i Josoa fa hofoanako tsy ho eto ambonin'ny tany mihitsy ny fahatsiarovana ny Hamalekita.

¹⁵ Dia nanamboatra alitara teo i Mosesy ka nomeny anarana hoe Ny TOMPO fanevako.

¹⁶ Ary hoy izy hoe: -Satria ny Hamalekita efa nanainga tanana hanohitra ny sezafiandrianan'ny Tompo, dia hiady amin'izy ireo hatrany hatrany ny TOMPO.

Toko faha-18

¹ Ary ren'i Jetrao, mpisorona tao Midiana sady rafozan-dahin'i Mosesy, izay rehetra nataon'ny TOMPO ho an'i Mosesy sy ilay Israely vahoakany, dia ny namoahany azy niala tany Ejipta.

² Taorian'ny nandefasan'i Mosesy an'i Tsipora telo mianaka tany amin'i Jetrao, dia nentin'i Jetrao i Tsipora zanany vavy, vadin'i Mosesy,

³ niaraka tamin'ny zanany roa lahy. Ny lahimatoa dia nantsoin'i Mosesy hoe Gersoma na Vahiny aty, fa hoy izy hoe: Efa vahiny aty an-tany hafa aho;

⁴ ary ilay zandriny kosa nantsoiny hoe Elihezera na Andriamanitro mamonjy ahy, fa hoy izy hoe: Ny Andriamanitry ny raiko no namonjy ahy, ka niaro ahy tamin'ny famelezan'ny Farao.

⁵ Dia lasa i Jetrao niaraka tamin'ny vady aman-janak'i Mosesy nankany amin'i Mosesy tany an-taniefitra, dia izay nitobiany teo anilan'ny tendrombohitr'Andriamanitra.

⁶ Nampilaza tamin'i Mosesy i Jetrao hoe: Izaho rafozanao no ho avy any aminao, miaraka amin'ny vadinao sy ny zanakao roa lahy.

⁷ Dia niainga hitsena azy i Mosesy, niankohoka teo anatrehany sady nanoroka azy. Ary rehefa avy nifampiarahaba izy dia niditra tao an-dain'i Mosesy.

⁸ Notantarain'i Mosesy tamin'ny rafozany avokoa izay rehetra nataon'ny TOMPO tamin'ny Farao sy ny Ejiptianina noho ny amin'i Israely; notantarainy koa ny zava-tsarotra rehetra niseho teny an-dalana sy ny nanafahan'ny TOMPO ilay vahoakany.

⁹ Nahafaly an'i Jetrao ny soa rehetra nataon'ny TOMPO tamin'ny Israelita izay nafahany tamin'ny famoretan'ny Ejiptianina,

¹⁰ ka hoy i Jetrao hoe: -Hoderaina anie ny TOMPO Izay nanafaka anareo tamin'ny famoretan'ny Farao sy ny Ejiptianina.

¹¹ Fantatro izao fa ny TOMPO dia lehibe mihoatra noho ny andriamanitra hafa rehetra; ny zavatra izay nataony rehefa nisetrasetra taminareo ny Ejiptianina no nanehoany izany.