Isaià

Toko faha-53

¹² Noho izany, dia homeko anjara lova eo amin'ny sehatry ny besinimaro izy ka olona alikisa no hataony babo, satria ny Mpanompoko efa nanolo-tena ho faty sy nanaiky hatao ho isan'ny mpanao ratsy ; eny, izy no nitondra ny fahotan'ny besinimaro ary nanao fanelanelanana ho an'ny olo-meloka."

Toko faha-54

¹ Miravoravoa ianao, ry Jerosalema izay momba tsy niteraka; ianao izay tsy nihetsi-jaza akory, manaova horakora-pifaliana ka mihobia satria hoy ny TOMPO aminao: "Ry ilay mpitondratena, maro ny zanakao noho ny zanaky ny manam-bady."

² Halalaho ny faritry ny lay fonenanao, asio fanitarana ny ambain'ny lainao, ka aza anaovana fitsitsiana. Halavao ny tadin-dainao ka hamafiso ny tsatoka,

³ satria miely miankavanana sy miankavia ianao: ny taranakao hahazo indray ny tanin'ny firenen-kafa, ary koa hipetraka indray amin'ireo tanananao efa aolo.

⁴ Aza matahotra satria tsy ho menatra intsony ianao; aza mivoara mena fa tsy ho afa-baraka intsony ianao; eny, hohadinoinao ny henatra tamin'ny fahatanoranao, ary tsy hotsarovanao intsony ny fahafaham-baraka tamin'ny naha mpitondra tena anao.

⁵ Fa ilay mpanao anao no ho vadinao; ny TOMPOn'izao rehetra izao no anarany. Ilay Masin'i Israely no mpanavotra anao, dia ilay antsoina hoe "Andriamanitry ny tany tontolo."

⁶ Fa tahaka ny vady nariana ka ory am-panahy ianao nefa nampodin'ny TOMPO indray. Fa hoy ny Andriamanitrao aminao: "Ahoana no hanariana tanteraka ny vadin'ny fahatanorana?

⁷ Vetivety foana no nanariako anao, fa amin'ny indrafo lehibe no hampodiko anao.

⁸ Tamin'ny firongatry ny hatezerako no nandavako vetivety tsy hijery anao; fa amin'ny fitiavana mandrakizay kosa no anehoako indrafo aminao. Izaho TOMPO mpanavotra anao no milaza izany.

⁹ "Tamin'ny andron'i Noa, dia nianiana Aho fa tsy hanafotra ny tany intsony ny rano ; mianiana toy izany koa Aho ankehitriny fa tsy hisafoaka aminao na handrahona anao intsony.

¹⁰ Fa na dia hifindra hiala aza ny tendrombohitra ary na dia hihozongozona aza ny havoana, dia tsy hiala aminao ny fitiavako ary tsy hihozongozona ny fanekem-pihavanako mikendry ny hampiadam-pinaritra anao. Izaho TOMPO mpamindra fo aminao no milaza izany."

¹¹ Ry ilay Jerosalema ory o, nasafotofoton'ny tafio-drivotra ianao saingy tsy nisy olona nampahery! Ka hoy ny teny hentitry ny TOMPO aminao: "Indro Aho hanangana anao amin'ny vato miloko, ary hamboatra ny fanorenanao amin'ny vato safira.

¹² Hataoko vato robisa ny tilikambo madinika eny an-tampon'ny mandanao, hataoko vato kristaly ny vavahadinao ary hataoko vatosoa ny manda izay manodidina anao manontolo.

¹³ Izaho TOMPO no hahatonga ny zanakao rehetra ho mpianatro , ka hiadam-pinaritra fatratra ireo.

¹⁴ Hitombina mafy amin'ny fahamarinana ianao: hampanalaviriko anao ny famoretana, ka tsy hatahotra na inona na inona intsony ianao; hampanalaviriko anao ny fampihorohoroana, ka tsy hananontanona anao intsony.

¹⁵ Na dia misy miara-mioko aza, dia tsy avy amiko izany; sady na iza na iza miara-mioko hamely anao, dia ho lavo eo anoloanao izy.

¹⁶ Jereo fa Izaho ihany no nahary ny mpanefy izay mifofotra ny afon'arina ka mahavita fitaovam-piadiana hampiasaina amin'izay ilana azy; nefa Izaho ihany koa no nahary ny mpandrava izay hamotika izany fitaovam-piadiana izany.

¹⁷ Ny fiadiana isan-karazany tefena hamelezana anao dia tsy hahomby mihitsy; ary ny olona rehetra izay miampanga anao eo anoloan'ny fitsarana dia horesenao lahatra. Izany no ho anjaran'ireo mpanompoko, ary izany no rariny hananany avy amiko."

Toko faha-55

¹ He! Ianareo rehetra izay mangetaheta, mankanesa amin'ny rano omeko! Na dia tsy manam-bola aza ianareo, avia maka sakafo, dia mihinana fa tsy ialam-bola izany ; avia maka divay na ronono, fa tsy vidina izany.

² Nahoana ianareo no mandany vola amin'izay sakafo tsy tena mahavoky? Nahoana ianareo no misahirana amin'ny zavatra tsy mahafa-po? Henoy tsara Aho, dia hihinan-javatra matsiro ianareo ary ho finaritra amin'ny sakafo mafilotra.

³ Mankanesa aty amiko ianareo, ka manongilana sofina; henoy Aho, dia ho velombelona indray ny tenanareo. Hanaovako fanekem-pihavanana mandrakizay ianareo ka homeko ny fitahianana mpanantenaiko an'i Davida:

⁴ Indro izy fa nataoko vavolombelon'ny fahefako eo amin'ny foko isan-tokony sady ho mpitarika sy mpibaiko ny hafa firenena.

⁵ Ary ianao koa, ry Israely, dia hiantso ny firenena hafa izay tsy fantatrao; ary firenen-kafa tsy mahalala anao akory no hirohotra hanatona anao, satria ny TOMPO Andriamanitrao, Ilay Masin'i Israely, no nanome anao izany voninahitra izany.

⁶ Tadiavo ny TOMPO, dieny mbola manaiky ho hita, antsoy Izy, dieny mbola akaiky anareo.

⁷ Aoka ny olon-dratsy handao ny fanaony, ary ny mpanao ratsy hahafoy ny heviny. Aoka hiverina amin'ny TOMPO ireny fa hamindra fo aminy Izy. Aoka hiverina amin'Andriamanitsika ireny fa hihoa-pampana ny famelan-keloka homeny azy.

⁸ Teny hentitry ny TOMPO izao: "Ny hevitro tsy hevitrareo ary ny lalanareo tsy mba lalako.

⁹ Tahaka ny haavon'ny lanitra amin'ny tany no haavon'ny lalako amin'ny lalanareo sy haavon'ny hevitro amin'ny hevitrareo.

¹⁰ Ny ranonorana sy oram-panala milatsaka avy any an-danitra dia tsy miverina any raha tsy efa mahavonto ny tany sy mahalonaka azy ary mampahavokatra azy ka mampahazo masomboly hafafy sy hanin-kohanina ;

¹¹ dia ho tahaka izany koa ny teny aloaky ny vavako: tsy hiveri-maina foana aty amiko izy, raha tsy efa nahatanteraka izay sitrako sy nahatratra ny tanjona nanirahako azy.

¹² Fa amim-pifaliana no hialanareo eto Babilona ary amim-piadanana no hampodina anareo. Ny tendrombohitra sy ny havoana dia hihorakora-pifaliana rehefa mandalo ianareo, ary ny hazo rehetra any an-tsaha hiteha-tanana.

¹³ Ny hazo kipreso no haniry ho solon'ny tsilo, ary ny rotra no haniry ho solon'ny amiana. Ho voninahitra ho an'ny TOMPO izany, ka ho famantarana tsy ho kosehina na oviana na oviana ny amin'izay nataony ho anareo."

Toko faha-56

¹ Izao no lazain'ny TOMPO: "Tandremo ny rariny ka manaova ny marina, satria akaiky ho tonga ny famonjeko ary efa hiharihary ny fanafahako.

² Sambatra ny olona manatanteraka izay lazaiko sy mifikitra mafy amin'izany, ka mitandrina ny sabata fa tsy manimbazimba azy, ary mitandrina ny tanany tsy hanao ratsy."

³ Aoka ny hafa firenena efa miraiki-po amin'ny TOMPO tsy hanao anakampo hoe: "Hoesorin'ny TOMPO tokoa aho tsy ho anisan'ny vahoakany. "Ary aoka ny eonoka tsy hanao anakampo hoe: "Indro efa hazo maina aho."

⁴ Satria izao no lazain'ny TOMPO: "Ny eonoka mitandrina ny sabatako ka mifidy ny hanao izay sitrako sy mifikitra mafy amin'ny fanekempihavanako,

⁵ dia hanokanako takela-bato misy ny anarany eo amin'ny rindrin'ny tempoliko. Izany no tsara kokoa ho azy noho ny zanakalahy sy zanakavavy maro. Hampitoeriko eo mandrakizay ny anarany ka tsy hisy na inona na inona hahakosoka azy."

⁶ Ho an'ny hafa firenena miraiki-po amin'ny TOMPO mba hanao fanompoam-pivavahana aminy sady tia Azy ary tonga mpanompony dia izao no teny hentitra ataon'ny TOMPO aminy: "Raha mitandrina ny sabata izy ka tsy manimbazimba azy sy mifikitra mafy amin'ny fanekem-pihavanako,

⁷ dia ho entiko eo an-tendrombohitro masina, ka hampifaliko ao an-trano fivavahana amiko; ny sorona isan-karazany hatolony dia hankasitrahiko eo ambonin'ny alitarako; satria ny tranoko hatao hoe: 'Trano fivavahana ho an'ny firenena rehetra'.

⁸ Izaho TOMPO ANDRIANANAHARY, Ilay nanangona ny vahoaka Israely tafaely, dia mbola manao teny hentitra hoe: 'Efa nanangona Aho, nefa mbola hanangona hafa koa'. "

⁹ Ianareo bibidia rehetra any an-tsaha sy ianareo bibidia rehetra any an'ala, avia hanao fihinanam-be!

¹⁰ Jamba avokoa ireo mpiahy ny vahoaka Israely ka samy tsy mahalala na inona na inona. Alika moana izy rehetra ka tsy mahavovo, fa manonofy fotsiny sy mitsotsotra satria ny matory no tiany.

¹¹ Alika tendan-kanina koa ireo ka tsy mahalala voky na oviana na oviana, nefa dia lazaina hoe mpiandry! Tsy mahay mandinika akory ireo fa samy manaraka ny lalany avy ary samy mikendry ny tombontsoany avy.

¹² Avia ianareo, hoy izy fa haka divay isika ary hiboboka fisotro mahery! Ho toraka ny androany ihany koa ny rahampitso, fa mbola be dia be ny sisa ho sotroina.

Toko faha-57

¹ Levona ny olo-marina nefa tsy misy miraharaha izany; alaina an-keriny ny olom-banona nefa tsy misy miraika amin'izany. Eny, ny famelezan'ny mpisompatra no akana an-keriny ny olo-marina.

² Nefa ho tonga ny fandriampahalemana, ka hatory milamina eo am-pandriany avy izay mizotra amin'ny hitsiny.

³ Fa ianareo kosa manatona eto, ry zanaky ny mpamosavy, taranaky ny lehilahy mpanitsakitsa-bady sy ny vehivavy janga !

⁴ Iza moa no esoesoinareo? Iza no isanasananareo vava sy itrangatranganareo lela? Tsy ianareo ve no zanaka mpikomy sy taranaka mpandainga?

⁵ Maimay ery ianareo teny akaikin'ny hazo terebinta sy ny hazo maitso rehetra matevin-dravina. Nanao sorona zaza ianareo teny amoron'ny lohasahan-driaka sy teny an-tsefatsefaky ny harambato.

⁶ Koa ny vato kilonjy eny amin'ny lohasahan-driaka no indreo zavatra ifikiranao, ry Israely; eny, ireny tokoa no zavatra ifikiranao! Fa ireny no andrarahanao fanatitra divay sy anoloranao fanatitra ho hanina; ka dia hahatsindry fo ve IzahoTompo amin'izany toe-javatra izany?

⁷ Teny an-tendrombohitra avo manerinerina no nametrahanao ny fandrianao; teny koa no niakaranao hanolotra sorona.