Eksôdy

Toko faha-9

¹⁸ Noho izany, rahampitso amin'ny ora toy izao aho dia hampilatsaka havandra be dia be izay tsy mbola nisy toa azy hatramin'ny andro niorenan'ny Ejipta ka mandraka androany.'

¹⁹ Koa ankehitriny ary, hoy i Mosesy, maniraha hampanangona ny biby fiompinao sy izay rehetra anao any an-tsaha. Fa ny olona rehetra sy ny biby rehetra izay hita any an-tsaha, fa tsy tafiditra ao an-tranony, dia ho tratry ny havandra ka ho faty.

²⁰ Ny sasany tamin'ireo tandapan'ny Farao dia natahotra ny tenin'ny TOMPO ka nampialoka ny mpiasany sy ny biby fiompiny tany an-trano.

²¹ Ny sasany kosa tsy niraharaha ny tenin'ny TOMPO, ka namela ny mpiasany sy ny biby fiompy teny an-tsaha ihany.

²² Hoy ny TOMPO tamin'i Mosesy: -Atsangano manondro lanitra ny tananao! Aoka ny havandra hirotsaka amin'ny tany Ejipta manontolo, amin'ny olona sy ny biby fiompy ary amin'ny voly rehetra any an-tsaha.

²³ Natsangan'i Mosesy nanondro lanitra ny tehiny, dia nampisy kotrokorana sy havandra ny TOMPO: nilatsaka ny varatra, ary nampirotsaka havandra tamin'ny tany Ejipta ny TOMPO.

²⁴ Dia nisy havandra niaraka amin'ny tafiotra sy ny varatra, ka tsy mbola nisy havandra be toy izany manerana Ejipta manontolo hatramin'izay nahafirenena azy.

²⁵ Nanerana an'i Ejipta manontolo ny havandra ka namely izay rehetra tany an-tsaha na olona na biby; nasiany koa ny voly rehetra ary nopotehiny ny hazo rehetra tany an-tsaha.

²⁶ Ny faritany Gosena izay nonenan'ny Israelita ihany no tsy nisy havandra.

²⁷ Dia nampiantso an'i Mosesy sy Aharona ny Farao ka nilaza taminy hoe: -Diso aho tamin'ity indray mandeha ity. Izao sy ny vahoakako no meloka, fa ny TOMPO dia manao ny marina.

²⁸ Mangataha amin'ny TOMPO mba hitsahatra ny kotro-baratra sy ny havandra, dia halefako ianareo fa tsy hotazoniko intsony.

²⁹ Dia namaly azy i Mosesy hoe: -Raha vao mivoaka ny tanana aho, dia hanandra-tanana amin'ny TOMPO hivavaka. Hitsahatra ny kotroka ary tsy hisy intsony ny havandra, mba hahafantaranao fa an'ny TOMPO ny tany.

³⁰ Fantatro anefa izao fa ianao sy ny mpanomponao dia tsy mbola tena hatahotra ny TOMPO Andriamanitra ihany.

³¹ Simba avokoa ny rongony sy ny vary orza, fa efa niteraka ny orza ary efa mamony ny rongony.

³² Fa ny varim-bazaha sy ny ampemby voly aoriana, dia tsy maninona.

³³ Dia niala teo anatrehan'ny Farao i Mosesy ary nivoaka ny tanana. Nanandra-tanana tamin'ny TOMPO izy ka nivavaka dia nitsahatra ny kotroka sy ny havandra, ary tsy nilatsaka intsony ny orana.

³⁴ Nony hitan'ny Farao fa nitsahatra ny orana sy ny havandra ary ny kotroka, dia hadisoana toy ny teo aloha indray no nataony; fa samy nihadonto fo izy sy ireo tandapany.

³⁵ Ary araka izay nambaran'ny TOMPO tamin'ny alalan'i Mosesy, dia manamafy fo ny Farao ka tsy nandefa ny Israelita.

Toko faha-10

¹ Hoy ny TOMPO tamin'i Mosesy: -Mankanesa ao amin'ny Farao, fa Izaho no nanamafy fo azy sy ireo tandapany mba hahazoako manao ireo zava-mahagaga rehetra eo anivony.

² Ary mba hahazoanao mitantara amin'ny zanaka aman-jafinao ny nampijaliako ny Ejiptianina ka nanatanterahako ireo zava-mahagaga tao amin'ny taniny. Ho fantatrareo amin'izay fa Izaho no TOMPO.

³ Dia nankany amin'ny Farao i Mosesy sy i Aharona ka nanao taminy hoe: -Ny TOMPO Andriamanitry ny Hebreo dia manontany anao hoe: mandra-pahoviana no handavanao tsy hanetry tena eo anatrehako? Alefaso handeha ny vahoakako mba hanao fanompoam-pivavahana amiko!

⁴ Raha manda ianao, dia handefasako valala ao amin'ny faritaninao rahampitso.

⁵ Ho rakotry ny valala ny tany ka tsy ho hita intsony. Hohaniny ny voly sisa tsy voan'ny havandra, ary tsy hasiany miangana ny hazo maniry rehetra any an-tsaha.

⁶ Ho feno valala ny lapanao sy ny tranon'ny mpanomponao mbamin'ny an'ny Ejiptianina rehetra. Loza tsy mbola fahita ny toy izany hatramin'ny andron'ny razanao ka mandraka androany. Dia niala teo anatrehan'ny Farao i Mosesy ka lasa.

⁷ Ary hoy ireo mpanompony tamin'ny Farao: -Mandra-pahoviana moa no mbola hamandrika antsika ilehiny? Alefaso handeha hanao fanompoam-pivavahana amin'ny TOMPO Andriamaniny any ny lehilahy israelita: Mbola tsy fantatrao ihany ve fa simba i Ejipta?

⁸ Koa naverina teo amin'ny Farao indray i Mosesy sy i Aharona ka nilazany hoe: -Mandehana manao fanompoam-pivavahana amin'ny TOMPO Andriamanitrareo, nefa iza sy iza avy moa no handeha aminareo?

⁹ Dia hoy i Mosesy hoe: -Izahay rehetra no handeha, na antitra na tanora, na lahy na vavy, miaraka amin'ny ondry aman'osy ary ny ombinay, satria hanao fety ho an'ny TOMPO izahay.

¹⁰ Namaly azy tamin'ny rabiraby kosa ny Farao hoe: -Aoka homba anareo anie ny TOMPO, raha izaho no handefa anareo sy ny fianakavianareo! Jereo fa mitady hanao ratsy ianareo.

¹¹ Tsy raikitra izany. Ianareo lehilahy no aoka handeha hanao fanompoam-pivavahana amin'ny TOMPO, fa izay ihany no tadiavinareo. Dia noroahina hiala teo anatrehan'ny Farao izy roa lahy.

¹² Ary hoy ny TOMPO tamin'i Mosesy: -Ahinjiro eo ambonin'ny tany Ejipta ny tananao mba hiantso ny valala, dia hiakatra ao Ejipta ireny ka hihinana ny zava-maniry rehetra sisan'ny havandra.

¹³ Nahinjitr'i Mosesy teo ambonin'i Ejipta ny tehiny, dia nampitsoka rivotra avy any atsinanana nandritra ny andro sy nandritra ny alina tao Ejipta ny TOMPO. Nony maraina dia nitondra valala ny rivotra.

¹⁴ Niparitaka nanerana an'i Ejipta ireny ka nipetraka tamin'ny faritra rehetra. Betsaka loatra ny valala ka tsy mbola nisy toa izany na tany aloha na taty aoriana.

¹⁵ Nandrakotra ny tany manontolo ireny ka maizina ny tany. Nohanin'ny valala ny ahitra rehetra tamin'ny tany sy ny voankazo rehetra sisan'ny havandra, koa tsy nisy zava-maitso tavela intsony nanerana an'i Ejipta manontolo na tamin'ny hazo na tamin'ny zava-maniry eny an-tsaha.

¹⁶ Niantso an'i Mosesy sy i Aharona haingana ny Farao ka nanao taminy hoe: -Diso tamin'ny TOMPO Andriamanitrareo sy taminareo aho.

¹⁷ Mba mamela ny heloko amin'ity indray mandeha ity, ary mangataha amin'ny TOMPO Andriamanitrareo mba hanesorany amiko izao loza mahatsiravina izao.

¹⁸ Dia niala teo anatrehan'ny Farao i Mosesy ary nangataka tamin'ny TOMPO.

¹⁹ Koa nampitsoka rivo-mahery avy any andrefana kosa ny TOMPO, rivotra izay nipaoka ny valala, ka namerina azy ireny tao amin'ny Ranomasin'ny Volotara; dia tsy nisy valala tavela intsony tao amin'ny tany Ejipta manontolo na iray aza.

²⁰ Kanefa ny TOMPO mbola nanamafy fo ny Farao ka tsy nandefa ny Israelita izy.

²¹ Hoy ny TOMPO tamin'i Mosesy: -Atsangano manondro lanitra ny tananao hisian'ny haizina manerana an'i Ejipta, dia haizina mikitroka.

²² Natsangan'i Mosesy manondro lanitra tokoa ny tanany, dia nisy haizina mikitroka mandritra ny telo andro teo amin'ny tany Ejipta manontolo.

²³ Tsy afaka nifankahita ny Ejiptianina nandritra ny telo andro, ka tsy nisy nihetsika tao an-tranony. Fa teo amin'ny fonenan'ny Israelita rehetra kosa dia nisy mazava.

²⁴ Koa nampiantso an'i Mosesy ny Farao ary nanao taminy hoe: -Mandehana, manaova fanompoam-pivavahana amin'ny TOMPO. Mahazo mandeha miaraka aminareo koa ny ankizy, fa ny ondry aman'osy sy ny ombinareo kosa dia tsy maintsy mijanona eto.

²⁵ Namaly azy i Mosesy hoe: -Tsia, fa ianao mihitsy no hanolotra eo an-tananay ny biby hataonay sorom-pihavanana sy sorona dorana manontolo amin'ny TOMPO Andriamanitray.

²⁶ Ankoatra izany, hoentinay koa ny andiam-biby fiompinay, ka tsy hisy bibinay havela na iray aza. Tsy maintsy hakanay hatao fanatitra ho an'ny TOMPO Andriamanitray koa mantsy ireo; nefa tsy fantatray hoe iza amin'ireo no hataonay fanatitra, raha tsy efa tonga any an-toerana.

²⁷ Ary ny TOMPO nanamafy fo ny Farao ka tsy nety handefa ny Israelita izy.

²⁸ Fa hoy ny Farao tamin'i Mosesy: -Mandehana miala eto! Ary tandremo mba tsy hiseho eto amiko intsony; fa raha sanatria miverina eto amiko ianao dia maty!

²⁹ Dia novalian'i Mosesy hoe: -Eny ary! Araka ny efa voalazanao, dia tsy hiseho eto anatrehanao intsony aho.

Toko faha-11

¹ Hoy ny TOMPO tamin'i Mosesy: -Mbola asiako loza iray farany ny Farao sy ny Ejiptianina. Aorian'izany vao halefany handeha ianareo; ary horoahiny tanteraka aza ianareo hiala eto.

² Koa ambarao amin'ny Israelita fa ny tsirairay na lahy na vavy dia aoka samy hangataka firavaka sy volamena amin'ny Ejiptianina akaiky azy avy.

³ Nataon'ny TOMPO nahita sitraka teo imason'ny Ejiptianina ny Israelita. I Mosesy koa dia lehilahy najaina fatratra tany Ejipta na teo amin'ny tandapan'ny Farao na teo amin'ny vahoaka Ejiptianina.