Eksôdy

Toko faha-6

⁵ Efa reko ny fitarainan'ny Israelita amin'ny asa fanandevozana ampanaovin'ny Ejiptianina azy; koa nahatsiaro ny fanekempihavanako Aho.

⁶ Noho izany, dia lazao amin'ny Israelita hoe: Izaho no TOMPO! Havoakako hiala amin'ny asa an-terivozona ampanaovin'ny Ejiptianina ianareo sy hoafahako amin'ny fanompoana azy; ka amin'ny heriko tsy hay tohaina sy amin'ny famaizana lehibe no hanavotako anareo.

⁷ Halaiko ho vahoakako ianareo, ary Izaho ho Andriamanitrareo; dia ho fantatrareo fa Izaho TOMPO Andriamanitrareo no namoaka anareo hiala amin'ny asa an-terivozona nampanaovin'ny Ejiptianina.

⁸ Hoentiko any amin'ny tany izay efa nianianako tamin'ny tsangan-tanana fa homeko an'i Abrahama sy i Itsehaka ary i Jakoba ianareo. Homeko ho fanananareo izany. Izaho no TOMPO.

⁹ Notaterin'i Mosesy tamin'ny Israelita izany teny izany; nefa tsy nihaino azy akory ireo, fa kivy noho ny hamafin'ny fanompoana.

¹⁰ Niteny tamin'i Mosesy indray ny TOMPO hoe:

¹¹ -Mandehana miteny amin'ny Farao, mpanjakan'i Ejipta, mba halefany hiala amin'ny taniny ireo Israelita.

¹² Fa nanambara teo anatrehan'ny TOMPO i Mosesy hoe: -Na dia ny Israelita aza tsy nihaino ahy, koa ahoana no hihainoan'ny Farao ahy izay votsa vava ity?

¹³ Nefa mbola niteny tamin'i Mosesy sy i Aharona ihany ny TOMPO, ka nandidy azy hankany amin'ny Israelita sy amin'ny Farao, mpanjakan'i Ejipta, mba hamoaka ny Israelita hiala tao Ejipta.

¹⁴ Toy izao no lisitry ny filoham-pianakaviana teo amin'ny Israelita: Ny zanakalahin'i Reobena, lahimatoan'i Jakoba, dia i Hanoka, i Palo, i Hetsirona ary i Karmy. Izy efa-dahy no razamben'ny tarika reobenita.

¹⁵ Ny zanakalahin'i Simehona dia i Jemoela, i Jamina, i Ohada, i Jakina, i Tsohara, ary i Saola; ity Saola ity dia zanany tamin'ilay vehivavy kanahanita. Izy enin-dahy no razamben'ireo tarika simehonita.

¹⁶ Ary ireto kosa no anaran'ny taranak'i Levy, tao amin'ny taranaka maro nifandimby: Telo no zanakalahin'i Levy, dia i Gersona sy i Kehata ary i Merary. Naharitra fito amby telopolo amby zato taona ny andro niainan'i Levy.

¹⁷ Ny zanakalahin'i Gersona dia i Zibny sy i Simehy, izay samy manana ny tarika tandrify azy avy.

¹⁸ Ny zanakalahin'i Kehata dia i Hamrama, i Jitsehara, i Hebrona ary i Hoziela. Naharitra telo amby telopolo amby zato taona ny andro niainan'i Kehata.

¹⁹ Ny zanakalahin'i Merary dia i Mahely sy i Mosy. Ireo no razamben'ny tarika levita samy araka ny taranany avy.

²⁰ I Hamrana dia nanambady an'i Jokebeda anabavin-drainy ka niteraka an'i Aharona sy i Mosesy. Naharitra fito amby telopolo amby zato taona ny andro niainan'i Hamrama.

²¹ Ny zanakalahin'i Jitsehara dia i Kora sy i Nefega ary i Zikry.

²² Ny zanakalahin'i Hoziela dia i Misaela sy i Elitsafana ary i Sitry.

²³ I Aharona dia nanambady an'i Eliseba, zanakavavin'i Haminadaba sady anabavin'i Nahasona; io Eliseba io no niterahan'i Aharona an'i Nadaba sy i Abiho ary i Elehazara sy i Itamara.

²⁴ Ny zanakalahin'i Kora dia i Asira sy i Elkana ary i Abiasafa; ireo no razamben'ny tarika korahita.

²⁵ I Elehazara, zanakalahin'i Aharona, dia nanambady anankiray tamin'ny zanakavavin'i Potiela; ka io no niterahany an'i Pinehasa. Ireo rehetra ireo no filoham-pianakaviana tao amin'ny taranak'i Levy, samy araka ny tarika tandrify azy avy.

²⁶ Fa i Aharona sy i Mosesy kosa nobaikoin'ny TOMPO hoe: Ataovy izay hamoahanareo ny Israelita avy any Ejipta amim-pilaminana tsara.

²⁷ Koa nandeha niteny tany amin'ny Farao, mpanjakan'i Ejipta, i Mosesy sy i Aharona mba handefasany ny Israelita hiala amin'ny taniny.

²⁸ Tamin'ny andro izay nitenenan'ny TOMPO tamin'i Mosesy tany Ejipta,

²⁹ dia hoy Izy taminy: -Izaho no TOMPO! Koa lazao amin'ny Farao, mpanjakan'i Ejipta, izay rehetra ambarako aminao.

³⁰ Fa novalian'i Mosesy hoe: -Indro votsa vava aho, ka tsy hihaino ahy mihitsy ny Farao!

Toko faha-7

¹ Dia hoy ny TOMPO tamin'i Mosesy: -Jereonao fa omeko fahefan'Andriamanitra ianao manoloana ny Farao; ary i Aharona rahalahinao kosa dia mpitondrateninao.

² Ambarao amin'i Aharona rahalahinao izay rehetra handidiako anao, ary izy kosa no hiteny amin'ny Farao mba handefasany ny Israelita hiala amin'ny taniny.

³ Izaho anefa hanamafy fo ny Farao; ka na dia maro aza ireo famantarana sy zava-mahagaga izay hataoko ao amin'ny taniny,

⁴ dia tsy hihaino anareo izy. Koa hataoko tsapan'ny Ejiptianina ny heriko, ka famaizana lehibe no hamoahako am-pilaminana tsara ny Israelita vahoakako hiala amin'ny tany Ejipta.

⁵ Ho fantatry ny Ejiptianina amin'izay fa Izaho no TOMPO, rehefa haninji-tanana hamely azy Aho ka hamoaka ny Israelita hiala eo anivony.

⁶ Dia notanterahin'i Mosesy sy i Aharona izany, ka araka izay nandidian'ny TOMPO azy no nataony.

⁷ Feno valopolo taona i Mosesy ary telo amby valopolo taona i Aharona fony nandeha niteny tamin'ny Farao izy mirahalahy.

⁸ Ary hoy ny TOMPO tamin'i Mosesy sy i Aharona:

⁹ -Raha mangataka anareo hanao zava-mahagaga ny Farao, dia lazaonao i Aharona, ry Mosesy, mba handray ny tehinao ka hanipy azy eo anatrehan'ny Farao, dia hanjary fanany iny.

¹⁰ Dia nankao amin'ny Farao i Mosesy sy i Aharona ka nanatanteraka izay nandidian'ny TOMPO azy; natsipin'i Aharona teo anatrehan'ny Farao sy ny mpanompony ny tehiny ka nanjary fanany.

¹¹ Nantsoin'ny Farao ihany koa ireo olon-kendry sy mpanao majia tao Ejipta; ary ireo ombiasy ireo dia nanao toy izany koa tamin'ny fitokavany:

¹² Samy nanipy ny tehiny tamin'ny tany avy izy ka nanjary fanany ireny. Saingy ny tehin'i Aharona dia nitelina ny tehin'ireo.

¹³ Kanefa nihamafy fo ny Farao ka tsy nihaino an'i Mosesy sy i Aharona araka izay efa nolazain'ny TOMPO rahateo.

¹⁴ Hoy ny TOMPO tamin'i Mosesy: -Mafy fo ny Farao ka tsy mety mandefa ny Israelita.

¹⁵ Koa mankanesa any aminy ianao rahampitso maraina, rehefa mivoaka hankeo amoron-drano izy. Ento eny an-tananao ilay tehina tonga bibilava, dia andraso eo amoron'i Neily izy.

¹⁶ Ka izao no ambarao aminy: Ny TOMPO, Andriamanitry ny Hebreo, no naniraka ahy hilaza aminao hoe: 'Alefaso ny vahoakako mba hanao fanompoam-pivavahana amiko any an-taniefitra.' Nefa tsy nihaino ianao mandraka ankehitriny.

¹⁷ Noho izany, dia lazain'ny TOMPO fa hahafantatra ny maha IZY AZY ianao amin'ity indray mandeha ity. Hokapohiko amin'ity tehina eto an-tanako ity manko ny ranon'i Neily, dia hiova ho ra.

¹⁸ Ho faty ny trondro ka ho maimbo ny ony, dia tsy ho azon'ny Ejiptianina sotroina intsony ny rano ao.

¹⁹ Ary hoy koa ny TOMPO tamin'i Mosesy: -Lazao i Aharona handray ny tehinao ka haninjitra ny tanany manandrify ny rano rehetra eto Ejipta, izany hoe ny renirano sy ny lakan-drano mbamin'ny farihy rehetra; dia hiova ho ra ny rano amin'ireny. Ary hisy ra manerana ny tany Ejipta manontolo, hatrany an-tsinibe hazo sy vato.

²⁰ Dia notanterahin'i Mosesy sy i Aharona izay nandidian'ny TOMPO azy; ary teo imason'ny Farao sy ny tandapany no nanaingan'i Aharona ny tehiny ka nikapohany ny ranon'i Neily, dia niova ho ra ny rano rehetra tao amin'ny ony.

²¹ Maty ny trondro ka maimbo ny ony, dia tsy azon'ny Ejiptianina nosotroina intsony ny rano, fa nisy ra manerana ny tany Ejipta manontolo.

²² Dia mba nanao toy izany tamin'ny fitokavany koa ireo mpimasy ejiptianina; koa nihamafy fo ny Farao ka tsy nihaino akory izay nangatahan'i Mosesy sy i Aharona, araka izay efa nambaran'ny TOMPO.

²³ Lasa nody ny Farao, dia nankao an-tranony fa tsy nahoany akory io raharaha io.

²⁴ Nihady lava-drano manodidina an'i Neily ny Ejiptianina satria tsy azony nosotroina ny rano tamin'ny ony.