Isaià

Toko faha-13

¹⁴ Amin'izany ny olona ho tahaka ny gazela hazaina na ho tahaka ny ondry aman'osy tsy misy mpiandry, ka samy ho lasa any amin'ny fireneny avy sy handositra any amin'ny taniny avy.

¹⁵ Izay rehetra ho hita ao Babilona dia ho gorobaky ny tsipika, ary izay rehetra ho tratra ao dia hovonoina ho faty amin'ny sabatra.

¹⁶ Hotorotoroina eo imasony ny zanany madinika ary horobaina ny tranony sady hosavihina ny vadiny.

¹⁷ Hoy ny TOMPO hoe: "Indro hampirisihiko hamely azy ny Medianina izay tsy tia volafotsy sady tsy mankamamy volamena.

¹⁸ Haringany amin'ny tsipikany ny tanora, tsy hamindrany fo ny zaza vao teraka, ary tsy hiantrany akory ny ankizy."

¹⁹ I Babilona, izay ravaky ny fanjakana sady tabiha sy reharehan'ny Babilonianina, dia ho ravan'Andriamanitra tahaka an'i Sodoma sy i Gomora.

²⁰ Tsy honenana intsony i Babilona ary tsy hisy mponina mandrakizay. Tsy hanorin-day ao ny mpifindrafindra lasy ary tsy hampandry ondry ao ny mpiandry ondry.

²¹ Sakadia no hiorim-ponenana ao ary vorondolo no hameno ny tranony. Vorombe no hanao akany ao ary osidia no hifalihavanja ao.

²² Ny fosa no hinaonaona ao an-tranobeny, ary ny amboadia no honina ao an-dapany. Akaiky ho tonga ny oran'i Babilona; ary tsy hisy hataka andro intsony ho azy.

Toko faha-14

¹ Fa hamindra fo amin'ny taranak'i Jakoba ny TOMPO; eny, mbola hifidy an'i Israely ihany Izy, ka hampiorina azy indray eo amin'ny taniny. Hikambana amin'ireo ny vahiny mpifindra monina ka hitambatra amin'ny ankohonan'i Jakoba.

² Ny vahoakan'ny firenen-kafa no handray adidy hampody azy any an-tanindrazany. Ary eo amin'ny tanin'ny TOMPO, dia ho fananan'ny taranak'i Israely ireo hafa firenena, ka hataony ankizilahy sy ankizivavy; ireo namabo azy no hobaboiny, ary ireo nampahory azy no hataony mpanompo.

³ Ary rehefa homen'ny TOMPO fitsaharana ianao, ry Israely, ka afaka amin'ny fijaliana sy ny tebiteby ary ny fanompoana mafy izay nampanaovina anao,

⁴ dia ho redoninao izao hira fanarabiana ny mpanjakan'i Babilona izao: Fa ahoana no niafaran'ilay mpanjakazaka ary koa niafaran'ny famoretany!

⁵ Nopotehin'ny TOMPO ny fahefana mandoza, dia ny tehin'ilay mpanjakazaka,

⁶ izay nikapoka ny vahoaka tamim-pahavinirana; nikapoka azy tsy an-kiato izy ka namolaka azy tamim-pahatezerana sady nanenjika azy tsy nisy indrafo.

⁷ Mandry fahalemana ny tany tontolo ka velon-kiram-pihobiana ny olona.

⁸ Ny kipreso sy ny sederan'i Libano koa, noho izao manjo ilay mpanjakazaka izao, dia samy faly ka nanao hoe: "Hatrizay nahafatesanao izay, dia tsy nisy niakatra hanjera anay intsony."

⁹ Mihotakotaka noho ny aminao, ry ilay mpanjakazaka, ny any amin'ny toeran'ny maty any ambany any. Fohazina hitsena ny fiavianao ireo ambiroa, dia ireo lehibe rehetra fony tety an-tany. Ampitsanganina hiala eo amin'ny sezafiandrianany ireo mpanjaka rehetra nifehy firenena fahizay.

¹⁰ Samy hiteny izy rehetra ka hanao aminao hoe: "Ianao koa hay malemy tahaka anay, efa tonga mitovy aminay!"

¹¹ Aty amin'ny toeran'ny maty aty no navarina ny fireharehanao niaraka tamin'ny feom-balihanao. Kankana no ho kidoronao ary olitra no ho firakotrao.

¹² Fa nahoana ianao no latsaka avy any an-danitra ambony any, ry ilay kintana mamirapiratra toy ny kintana fitarikandro ! Nazera amin'ny tany ianao ity, ry ilay nandresy firenena maro!

¹³ Fa hoy ianao anakampo hoe: "Hiakatra any an-danitra any aho ka hametraka ny seza fiandrianako ho avo noho ny kintan'Andriamanitra; dia eo amin'ilay tendrombohitra fivoriana, izay any am-parany avaratra, no hipetrahako.

¹⁴ Hiakatra eny an-tampon'ny rahona aho ka hitovy amin'Andriamanitra Avo Indrindra."

¹⁵ Kanjo any amin'ny toeran'ny maty, any amin'ny fanambanin'ny lavaka, no tsy maintsy nidinanao.

¹⁶ Izay mahita anao any dia hibanjina anao, sy handinika anao fatratra ka hanao hoe: "Ity tokoa ve ilay lehilahy izay nampihorohoro ny tany sy nandrodana fanjakana maro,

¹⁷ nanova izao tontolo izao ho taniefitra fa sady nandrava tanana no tsy nandefa ireo gadra hody!"

¹⁸ Ny mpanjaka rehetra nifehy firenena fahizay dia samy mandry amim-boninahitra ao am-pasany avy.

¹⁹ Ianao kosa dia nariana ivelan'ny fasanao toy ny zaza rano maharikoriko; tahaka ny razana voahitsakitsaka ianao, fa olona voavono ho faty no manindry anao, dia ireo olona voatrobaky ny sabatra. Ka naidina eo ambony lampivato ao am-pasana ireny,

²⁰ nefa tsy mba halevina miaraka aminy ianao satria nanimba ny taninao sady namono ho faty ny vahoakanao. Tsy ho voatonona mandrakizay ny anaran'ny taranakao mpanao ratsy.

²¹ Miomana handringana ny zanany ianareo noho ny heloka bevava nataon'ny rainy, fandrao hitsangana haka ny tany indray ireny ka handrakotra tanana an'izao tontolo izao.

²² "Hitsangana hamely ny Babilonianina Aho, hoy ny teny hentitry ny TOMPOn'izao rehetra izao; hofoanako ny anaran'i Babilona sy ny dindony mbamin'ny zanany sy ny taranany rehetra.

²³ Fa hataoko tonga honahona fonenan-tsokina izy, ho fafako amin'ny kifafa i Babilona ka ho levona, hoy ny teny hentitry ny TOMPOn'izao rehetra izao.

²⁴ Ny TOMPOn'izao rehetra izao dia efa nanao fianianana hoe: Izay noheveriko no ho tonga, izay notapahiko no hiseho."

²⁵ Ao amin'ny taniko no hanamontsanako ny Asirianina, eny an-tendrombohitro no hanosihoseko azy. Hoesoriko ny zioga nampitondrainy ny vahoakako , hoesoriko eny an-tsorony ny entana namesarany azy."

²⁶ Fanapahan-kevitry ny TOMPO ho an'ny tany tontolo izany, ary hinji-tanana fandrahonana ataony amin'ny firenena rehetra.

²⁷ Rehefa nanapa-kevitra ny TOMPOn'izao rehetra izao, iza no hahafoana izany? Rehefa naninji-tanana handrahona Izy, iza no hampihemotra izany?

²⁸ Tamin'ny taona nahafatesan'i Ahaza mpanjaka no nisy izao hafatra izao:

²⁹ Aza mifaly ambony ihany ianareo, ry Filistinina rehetra, na dia tapaka aza ny tsorakazo izay nikapohana anareo, satria hisy menarana hipoitra avy amin'ny fatin'ny bibilava ary hisy dragona manidina hipoitra avy amin'ny atodin'ny menarana.

³⁰ Ireo olona faran'izay fadiranovana dia ho tahaka ny ondrikely miraotra, ary ireo mahantra hiadana sy handry feizay; fa hataon'ny fahavalo matin-kanoanana hatrany ifotony kosa ianao, ry Filistia, ary izay sisa ao aminao dia haringana.

³¹ Midradradradra, ry tanana mimanda, ka manaova antsoantsom-pitarainana. Ketraka ny Filistinina rehetra, fa misy setroka miakatra avy any avaratra ; tsy misy mitsoaka an-daharana ny fahavalo.

³² Koa inona no havaly ireo iraky ny Filistinina?-Izao ihany: Ny TOMPO no nanorina an'i Tsiona ary ao no hialofan'ireo mahantra amin'ny vahoakany.

Toko faha-15

¹ Hafatra momba an'i Moaba. Indray alina monja dia rava tsy nisy niangana ny tanana Hara-Moaba, indray alina monja dia rava tsy nisy niangana ny tanana Kira-Moaba.

² Ny mponin'i Dibona dia miakatra eny amin'ny toeram-pivavahany mba hitomany. Any Nebao sy Medeba no idradradradran'i Moaba. Voaharatra avokoa ny loha rehetra ary voaala ny volombava rehetra.

³ Eny an-dalambe dia lamba fisaonana no itafian'ny besinimaro, eny an-tampon-trano sy eny an-kianja eny no idradradradran'izy rehetra sady irotsahan'ny ranomasony.

⁴ Miantso vonjy ny any Hesbona sy Elehaleka re hatrany Jahatsa ny feony; izany no mampilofika an'i Moaba sy mahakivy ny fanahiny.

⁵ Mitaraina ny foko noho ny amin'i Moaba: tonga hatrany Tsohara sy Heglata-Selisia ny mpandositra. Mitomany ny olona mianika ny fiakaran'i Lohita ary midradradradra mamoy fo eny an-dalana ho any Horonaima.

⁶ Nanjary ritra ny ranon'i Nimrima , maina ny vilona, nalazo ny zava-maniry, ary tsy nisy ahi-maitso intsony.

⁷ Ireo harena vitsivitsy hany sisa voatahiry dia nentin'ireo Moabita nitsoaka any am-pitan'ny lohasahan-driakan'ny Hazo malahelo.

⁸ Antsoantsom-pitarainana no heno manodidina ny faritanin'i Moaba; hatrany Eglaima sy hatrany Beera-Elima aza no andrenesana ny fidradradradrany.

⁹ Feno ra ny rano mandalo ao Dibona, fa hoy ny TOMPO hoe: "Eny, hitondra loza vaovao ao Dibona Aho, dia liona hamely izay afa-nandositra tao Moaba, sy izay sisa velona amin'izany tany izany."