Isaià
Toko faha-6
1 Tamin'ny taona nahafatesan'i Hozia mpanjaka no nahitako ny TOMPO nipetraka teo amin'ny sezafiandrianana avo dia avo; ary nahafeno ny tempoly ny rebareban'akanjony.2 Nisy serafima nitsangana teo amboniny, izay samy manana elatra enina avy: ka ny roa nanakona ny endrika, ny roa nanakona ny vatana, ary ny roa nanidinany.
3 Ary niantso mafy ireo ka nifamaly hoe:"Masina, masina, masina ny TOMPOn'izao rehetra izao! Feno ny voninahiny ny tany manontolo!"
4 Nipararetra ny fanambanin'ny tokonana noho ny hamafin'ny feon'ireo serafima ireo, sady feno setroka ny trano.
5 Dia hoy aho hoe: "Lozako, very aho satria olona maloto molotra sady eto amin'ny firenena maloto molotra no itoerako; kanefa ny Mpanjaka, ilay TOMPOn'izao rehetra izao, no hitan'ny masoko!"
6 Kinanjo nanidina nanatona ahy ny iray tamin'ireo serafima, nitondra vainafo teny an-tanany, dia vainafo avy nalainy tamin'ny tandra teo amin'ny alitara.
7 Natehiny tamin'ny vavako izany, ary hoy izy tamiko:"Indro efa nitehika ny molotrao ity; koa afaka ny helokao, ary voavela ny fahotanao."
8 Dia reko ny feon'ny TOMPO nanontany hoe:-Iza no hirahiko, ary iza no ho mpitondrateninay? Dia namaly aho hoe:-Inty aho, iraho aho.
9 Dia hoy indray Izy hoe:-Ndeha lazao amin'ity firenena ity hoe:"Mihainoa ihany ianareo fa tsy handre, mijere ihany fa tsy hahita."
10 Ataovy tonga mafy fo ity firenena ity, ataovy tonga mafy sofina izy ary ataovy tonga jamba ny masony, fandrao ny masony hahita, ny sofiny handre ary ny fony hahafantatra ka hiverina amiko izy ary hositrana.
11 Tamin'izay dia nanontany aho hoe:-Mandra-pahoviana anefa,Tompo o? Dia namaly Izy hoe:-Mandra-pahasimba ny tanana ka tsy hisy mponina intsony, mandra-paharava ny trano ka tsy hisy olona tavela ary mandra-pahalao tokoa ny tany.
12 Eny, halefan'ny TOMPO any lavitra any ny mponina ka ho betsaka ny saha hilaozana eo amin'io tany io.
13 Raha misy ampahafolon-tany tsy tratry ny loza aza, dia mbola hodorana amin'ny afo ihany koa izany; saingy ho tahaka ny hazo terebinta na ny oaka izay mamela fototra ihany na voakapa aza. Kanefa avy amin'izany fototra tavela izany no hisian'ny taranaka masina indray.
Toko faha-7
1 Tamin'ny andro nanjakan'i Ahaza, zanakalahin'i Jotama sady zafikelin'i Hozia mpanjakan'i Joda, dia niakatra i Retsina mpanjakan'i Siria sy i Peka, zanakalahin'i Remalia sady mpanjakan'i Israely, mba hanafika an'i Jerosalema, kinanjo tsy nahazo azy.2 Dia nampandrenesina i Ahaza, taranak'i Davida, sy ny tao an-dapany fa efa mitoby any Efraima ny Sirianina. Koa taitra ny fon'ny mpanjaka sy ny an'ny vahoakany, tahaka ny hazo any an'ala rehefa tsofin'ny rivotra.
3 Dia hoy ny TOMPO tamin'i Isaia: -Mivoaha ny trano ianao mba hitsena an'i Ahaza, dia ianao sy i Seara-Jasoba zanakao lahy, fa efa mby amin'ny lakandrano ambony izy, eo amin'izay lalana mankany amin'ny sahan'ny mpanasa lamba.
4 Ary lazao aminy hoe: "Tandremo! Aza taitaitra foana, aza matahotra. Aoka tsy ho ketraka ny fonao noho ny fahatezeran'i Retsina avy any Siria sy ny fahatezeran'ny zanakalahin'i Remalia, fa tapa-porohana midonaka ihany ireo.
5 Ny Sirianina ary i Peka sy ny Efraimita dia efa niray tetika tokoa hanisy ratsy anao ka nanao hoe:
6 Andeha isika hiakatra hamely an'i Joda mba hampitahotra azy, ka hoterentsika hanaraka antsika izy; dia ilay zanakalahin'i Tabeela no hatsangantsika hanjaka ao aminy.
7 Izao kosa no lazain'ny TOMPO ANDRIANANAHARY:" Tsy ho tanteraka sady tsy hisy izany
8 I Damasy manko no renivohitr'i Siria, ary ao ihany i Retsina no filoha;
9 i Samaria no renivohitr'i Efraima, ary ao ihany i Peka no filoha. I Efraima, ao anatin'ny 65 taona, dia tsy ho vanon-ko firenena intsony."Kanefa raha tsy ny TOMPO noitokianareo, dia tsy ho azo itokiana haharitra koa ianareo."
10 Dia mbola nanafatra an'i Ahaza ny TOMPO ka nanao hoe:
11 -Angataho famantarana ny TOMPO Andriamanitrao mba ho antoka ho anao, na any amin'izay fanambanin'ny toeran'ny maty izany na eny an-danitra ambony eny.
12 Fa novalian'i Ahaza hoe:-Tsia, tsy hangataka na inona na inona aho fa tsy te haka fanahy ny TOMPO.
13 Dia hoy i Isaia taminy: -Mihainoa ahy ianao sy ny fianakavianao izay samy taranak'i Davida. Moa tsy ampy anareo ve ny manasatra ny olombelona no dia hanasatra an'Andriamanitra koa ianareo?
14 Noho izany ary, dia ny TOMPO mihitsy no hanome famantarana ho anareo: jereo fa hitoe-jaza ny vehivavy ka hiteraka zazalahy ary ny anarany hataony hoe Himanoela, izany hoe "Andriamanitra miaraka amintsika."
15 Ronono mandry sy tantely no ho sakafony ambara-pahalalany manda ny ratsy sy mifidy ny tsara.
16 Fa raha tsy mbola mahalala handa ny ratsy sy hifidy ny tsara akory izany zaza izany, dia hilaozan'ny mponina ny tanin'ireo mpanjaka roa izay mampitahotra anao ireo.
17 Kanefa hataon'ny TOMPO tonga aminao sy ny vahoakanao ary ny taranakao ny toe-javatra izay tsy mbola nisy hatramin'ny andro nisarahan'iJoda tamin'ny fanjakan'i Israely ka hatramin'izao, dia ny hanafihan'ny mpanjakan'i Asiria izany.
18 Amin'izany andro izany ny TOMPO dia hisioka hiantso ny lalitra izay any amin'ny vinany misampana iafaran'ilay onin'i Ejipta; ary hisioka koa Izy hiantsony renitantely izay any Asiria.
19 Dia indray ho avy ireny ka hipetraka eny an-tevana kisolasola sy eny an-tsefatsefa-bato ary koa eny amin'ny kirihitra rehetra eny sy eny amin'ny toerana rehetra fampisotroam-biby.
20 Amin'izany andro izany ny TOMPO dia hanofa hareza avy eny am-pitan'i Eofrata: filazana ny mpanjakan'i Asiria izany; ka ho voaharatra avokoa ny lohanareo rehetra sy ny volon-tongotrareo ary koa ny volom-bavanareo.
21 Amin'izany andro izany koa ny isam-batan'olona dia samy hiompy ombivavy iray sy osivavy roa;
22 ka noho ny habetsahan'ny ronono avy aminy dia ronono mandry no hohanin'ny olona fa rononomandry sy tantely no ho foto-tsakafo ho an'izay rehetra sisa tavela eto amin'ny tany.
23 Amin'izany andro izany koa ny saha rehetra nisy voaloboka arivo fototra izay mitentina sekela volafotsy arivo dia ho rakotry ny tsilo sy ny songosongo.
24 Koa ho tonga hihaza ao ny olona miaraka amin'ny tsipika sy ny zana-tsipika. Izany tany manontolo izany tokoa dia ho rakotry ny tsilo sy ny songosongo.
25 Ary ny amin'ireo havoana izay novolena tamin'ny lapika dia tsy ho azo aleha intsony noho ny tahotra ny tsilo sy ny songosongo, fa havela ho kijana fiandrasana omby sy ho tany firaofan'ny ondry aman'osy.
Toko faha-8
1 Ary hoy ny TOMPO tamiko:-Mandraisa takela-tanimanga iray lehibe, dia soraty araka ny fanaon'ny olona izao: "Ho an'i Mahera-Salala-Hasy-Baza" na hoe "Ho an'i Faingana hamabo-Dodona handroba."2 Nasehoko tamin'ny vavolombelona roa mahatoky izany, dia tamin'i Oria mpisorona sy i Zakaria zanakalahin'i Jeberekia.
3 Dia nankao amin'ny mpaminanivavy vadiko aho, ka nitoe-jaza izy ary niteraka zazalahy. Koa niteny tamiko ny TOMPO hoe:-I Mahera-Salala-Hasy-Baza no ataovy anarany.
4 Fa raha tsy mbola mahay miantso Dada sy Neny akory io zaza io, dia ho entina eo anatrehan'ny mpanjakan'i Asiria ny haren'i Damasy sy ny remby voababo tao Samaria.
5 Mbola nanafatra ahy indray ny TOMPO ka nanao hoe:
6 -Ity vahoaka ity dia manao tsinontsinona ny ranon'i Siloa izay misononoka mora; ka kivy izy manoloana an'i Retsina sy manoloana ilay zanakalahin'i Remalia.
7 Noho izany, hakariko hamely ity vahoaka ity ny ranon'i Eofrata, izay rano be sady manonja, dia ny mpanjakan'i Asiria sy ny heriny manontolo. Hiala amin'ny lalany ny ony Eofrata ka hihoatra ny morony rehetra,
8 hibosesika any Joda sady hanafotra azy, ary hiakatra hatreny am-bozony. Eny, hihanaka lavitra amin'ny sisiny roa i Eofrata ka hanenika ny velaran'ny taninao, ry Himanoela.
9 Mangovita ianareo, ry firenena, ka mihorohoroa fatratra! Aoka hanongilan-tsofina ianareo, ry faritra rehetra any lavitra any: hirongo fiadiana tokoa ianareo, nefa hihorohoro fatratra; eny, hirongo fiadiana tokoa ianareo, nefa hihorohoro fatratra.
10 Manaova fikasana fa ho rava izany, manaova lahateny aman-karajia fa tsy hisy ho tanteraka akory ireny, satria Andriamanitra no miaraka aminay.
11 Fony nihazona ahy ny TOMPO ka nampitandrina ahy tsy hanahaka ny toetoetran'ity vahoaka ity, dia niteny tamiko toy izao:
12 Aza ataonareo hoe fikomiana avokoa izay lazain'ity vahoaka ity ho fikomiana, ary aza matahotra na mangovitra akory amin'izay zavatra atahorany.