Isaià

Toko faha-22

¹⁹ Horoahiko hiala amin'ny toeranao ianao ary hoesoriko amin'ny andraikitrao.

²⁰ Amin'izany andro izany, dia hantsoiko i Eliakima, zanakalahin'i Hilkia mpanompoko,

²¹ ka hampitafiako ny akanjonao, sy hampietrako ny fehikibonao ary hotolorako ny fahefanao. Ho an'ny mponin'i Jerosalema sy ny fanjakan'i Joda dia hanjary ray i Eliakima.

²² Hapetrako eo an-tsorony ny fanalahidin'ny lapan'i Davida; ka raha hamoha varavarana izy dia tsy hisy hanidy, ary raha hanidy izy dia tsy hisy hamoha.

²³ Halentiko toy ny tsatoka eo amin'ny toerana mafy izy, ka ho tonga anaram-boninahitra ho an'ny fianakavian-drainy."

²⁴ Kanefa hihantona hitambesatra eo amin'i Eliakima avokoa ny sampan'ny fianakavian-drainy na ny lehibe na ny kely, ka tahaka ny fanaka madinika isan-karazany, hatramin'ny lovia ka hatramin'ny siny, mihantona amina tsatoka anankiray.

²⁵ Amin'izany andro izany, hoy ny teny hentitry ny TOMPOn'izao rehetra izao, dia hiletsy ilay tsatoka natsatoka teo amin'ny toerana mafy; hiala izy ka hianjera, ary ho vaky avokoa ireo entana rehetra nahantona teo. Izany no nambaran'ny TOMPO.

Toko faha-23

¹ Hafatra momba an'i Tiro. "Midradradradra mafy ianareo, ry sambon'i Tarsisy o, satria rava ny serananareo. "Fony izy tonga avy any amin'ny nosy Siprano nandrenesany izany vaovao izany.

² Aoka tsy hahateny tsy hahavolana ianareo mponina amoron-tsiraka,dia ianareo mpandranto ao Tsidona izay mandefa iraka hamakivaky ny ranomasim-be.

³ Izay afafy eny amoron'i Neily dia i Tsidona no mioty azy; izy no mandray ny tombombarotr'ireo firenena.

⁴ Koa fahavoazana moa izato manjo anao, ry Tsidona, tanana mimanda eo amoron-dranomasina! Fa hoy indrindra ny ranomasina hoe: "Laviko ny hihetsi-jaza na hiteraka, laviko ny hitaiza zazalahy na hanabe tovovavy."

⁵ Raha mandre izany i Ejipta, dia hihoron-koditra tahaka ny hampihoron-koditra azy koa noho izay efa hanjo an'i Tiro.

⁶ "Ndeha mamaky ranomasina hatrany Tarsisy ka manaova antsoantsom-pitarainana, ianareo mponina amoron-tsiraka.

⁷ Dia ity tokoa ve ilay tananareo izay naresaka dia naresaka fahiny, sy efa niorina hatry ny ela ary nandeha nanjana-tany hatrany lavitra any ?"

⁸ Iza no nanapa-kevitra hamely an'i Tiro izay mpizara satroboninahi-panjakana? Ny mpandrantony dia tahaka ny printsy ary ny mpandraharahany anisan'ireo olona nohajaina tety an-tany, ka iza no nanapa-kevitra hamely an'i Tiro?

⁹ -Ny TOMPOn'izao rehetra izao no nanapa-kevitra hanao izany mba hanetrena ny fireharehanao amin'izay rehetra mpitady voninahitra sy hanaovana tsinontsinona ireo rehetra nohajaina tety an-tany.

¹⁰ Voleo ny taninao, ry Tiro, ka ataovy toy ny eny amoron'i Neily, satria tsy hisy seranana intsony ho an'ny sambon'i Tarsisy.

¹¹ Efa naninji-tanana ny TOMPO, mba handrahonana ny ranomasina, efa nampangorohoro ny fanjakana maro Izy, ary efa nanome baiko handravana ireo tanana mimanda teo amin'ny Kanahanita.

¹² Fa hoy ny TOMPO hoe: "Tsy afaka hiravoravo intsony ianareo mponina ao Tsidona fa afa-baraka toy ny virijiny naolana. Na hiainga aza ianareo ka hiampita hatrany amin'ny nosy Sipra, dia tsy hanam-pitsaharana any akory.

¹³ Mba jereo ange ity tanin'i Sipra! Tsy misy intsony ny maha firenena azy. Nataon'ny Asirianina tobim-pamaharana eo anivon-dranomasina io nosy io, ary nananganany tilikambo fitiliana sy nanorenany tanana mimanda; kanefa lasa korontam-bato miavovona ireny.

¹⁴ Midradradradra mafy ianareo, ry sambon'i Tarsisy o, satria rava ny fialofanareo."

¹⁵ Amin'izany andro izany, dia hohadinoina mandritra ny fitopolo taona i Tiro, izany hoe mandritra ny andro iainan'ny mpanjaka iray. Rehefa afaka fitopolo taona, dia hihatra amin'i Tiro izay nolazain'ny tonon-kira momba ny mpivarotena hoe:

¹⁶ Raiso ny lokanganao ka tetezo ny tanana, ry kala janga hadino. Mitendre tsara ianao ka mahereza mivazovazo mba hahatsiarovana anao.

¹⁷ Rehefa afaka fitopolo taona, dia hirotsaka an-tsehatra ao Tiro ny TOMPO. Hiverina hanao ny fanaony indray izy ka haka tombony mihoa-pampana amin'ny firenena rehetra eran-tany.

¹⁸ Nefa ny tombombarony sy ny vola azony dia hatokana ho an'ny TOMPO. Tsy hangonina ireny na ho tahirizina fa hatao sakafo hamokisana ireo mitoetra eo anatrehan'ny TOMPO, sady hividianana fitafiana mendrika ho azy.

Toko faha-24

¹ Indro ny TOMPO fa hanimba ny tany ka handrava azy; havadiny ambony ambany izy ary haeliny ny mponina eo aminy.

² Koa hitovy ihany ny hanjo ny mpisorona sy ny vahoaka, ny tompolahy sy ny mpanompolahiny, ny tompovavy sy ny mpanompovaviny, ny mpivarotra sy ny mpividy, ny mpampindrana sy ny mpindrana ny mpampisambo-bola sy ny mpisambo-bola.

³ Ho simba sy ho rava tanteraka ny tany. Fa izao teny izao no nambaran'ny TOMPO:

⁴ Misaona sy malazo ny tany, milofika sy malazo izao tontolo izao, milofika miaraka amin'ny tany koa ny habakabaka any ambony any.

⁵ Ny tany dia voaloton'ny mponina ao aminy fa nandika ny lalanan'ny Tompo ireny, tsy nanaraka ny fitsipika fa nivadika tamin'ny fanekem-pihavanana izay maharitra mandrakizay.

⁶ Koa levon'ny ozon'Andriamanitra ny tany; ary mitondra fahoriana ny mponina eo aminy noho ny heloka nataony; hihena ireo ka vitsy dia vitsy no hotavela.

⁷ Misaona ny divay vaovao fa milofika ny rantsam-boaloboka, misento avokoa ireo mpifalifaly am-po.

⁸ Nitsahatra ny gadona firavoana amin'amponga, nijanona ny horakorak'ireo mpanao korana, nitsahatra koa ny feo fifaliana amin-dokanga.

⁹ Tsy misy divay ho sotroina intsony ka foana ny hirahira; mangidy mbamin'ny toaka eo am-bavan'ny mpisotro.

¹⁰ Rava ilay tanana feno zava-poana; mihidy ny trano rehetra ka tsy azo idirana.

¹¹ Mitaraina ny olona eny an-dalambe fa tsy misy intsony ny divay; nanjavona ny firavoravoana rehetra ary tsy nisy fifaliana intsony teo amin'ny tany.

¹² Zava-mampahonena sisa no tao an-tanana, rava sy montsamontsana ny vavahady!

¹³ Ny eto ambonin'ny tany sy eo anivon'ireo firenena dia ho tahaka ny oliva avy nahintsana sy ho tahaka ny voaloboka avy notazana ka tsy ahitana zavatra firy intsony.

¹⁴ Izay sisa velona no manandratra ny feony ka mihoby ny fahalehibiazan'ny TOMPO; avy any andrefana any izy ireo no manao horakora-pifaliana hoe:

¹⁵ Aoka homem-boninahitra ny TOMPO any amin'ny faritra atsinanana! Ilay TOMPO Andriamanitr'i Israely, aoka homem-boninahitra ny anarany eny amin'ny tany amoron-dranomasina!

¹⁶ Hatrany am-paran'ny tany no andrenesanay hira hoe: "Voninahitra anie ho an'Ilay Marina!" Fa hoy kosa aho anakampoko hoe: "Vita ny amiko, vita ny amiko." Lozan'ireo mpamadika! Mamadika tokoa ny mpamadika; eny, mamadika hatrany izy.

¹⁷ Fampihorohoroana sy longoa ary fandrika harato no miandry anareo, ry mponina eto an-tany.

¹⁸ Koa izay mandositra ny kiakiaka vokatry ny fampihorohoroana, dia ho latsaka ao anatin'ny longoa; ary izay tafakatra avy ao amin'ny longoa dia ho voan'ny fandrika harato. Misokatra ny hidin-drano any ambony , ka mihozongozona ny fanorenan'ny tany.

¹⁹ Vakivaky ny tany ary tena mitresaka; voadona mafy izy ka mihotsaka.

²⁰ Mivembena toy ny mamo ny tany ary mihevingevina toy ny trano bongo, fa mitambesatra aminy ny heloka vitany ka potraka izy ary tsy afa-miarina intsony.

²¹ Amin'izany andro izany, dia hirotsaka an-tsehatra any ambony any ny TOMPO ka hamely ny andian'ireo planeta aman-kintana; ary hirotsaka an-tsehatra ety an-tany koa Izy ka hamely ny mpanjakan'ny tany.

²² Hangonina ho ao an-davaka toy ny gadra avokoa ireny, ka hohidiana an-trano maizina; ary rehefa ela ny ela, dia hiseho fitsarana izy rehetra.

²³ Amin'izay noho ny henatra dia hivoaramena ny volana ary hivaloarika ny masoandro; fa ny TOMPOn'izao rehetra izao no hanjaka ao Jerosalema, eo an-tendrombohitra Tsiona, sady hamirapira-boninahitra eo anatrehan'ireo loholony.

Toko faha-25

¹ TOMPO o, Ianao no Andriamanitro. Hanandratra Anao sy hankalaza ny anaranao aho, satria notanterahinao ny zava-mahagaga izay efa nokasainao hatry ny elabe sady mafy orina sy azo itokiana.

² Nataonao lasa antontam-bato ny tanana, noravanao tokoa ny tanana mimanda; tsy vanon-ko tanana intsony ny lapan'ny mpiavonavona sady tsy hatsangana intsony na oviana na oviana.