Genesỳ
Toko faha-50
3 nandritra ny efapolo andro ngarangidina mba hitahirizana azy. Ary nisaona an'i Jakoba nandritra ny fitopolo andro ny Ejiptianina.4 Nony afaka ny andro fisaonana, dia hoy i Josefa tamin'ireo olona akaikin'ny Farao: -Raha mba mahita sitraka aminareo aho, dia mba ampitao amin'ny Farao izao teniko izao:
5 Alohan'ny nahafatesan-draiko, dia nampianiana ahy izy mba handevina azy any amin'ny fasana izay efa nomaniny any Kanahana. Koa ankehitriny aoka aho mba hiakatra handevina ny raiko; rehefa izany dia hiverina indray aho.
6 Nomen'ny Farao lalana i Josefa mba handeha handevina ny rainy araka izay efa nianianany.
7 Dia niainga i Josefa handevina ny rainy; niaraka taminy ireo olona ambony tao an-dapan'ny Farao sy ny loholona rehetra tao Ejipta,
8 ny ankohonan'i Josefa manontolo mbamin'ireo rahalahiny ary ireo olon-kafa rehetra tao amin'ny fianakavian-drainy. Tsy nisy najanona tao amin'ny faritr'i Gosena, afa-tsy ny ankizy sy ny biby fiompy ihany.
9 Nisy andian-kalesy sy mpitaingin-tsoavaly koa niara-niakatra taminy, ka nafonja tokoa ny andian'olona mpanotrona.
10 Tonga tao Gorena-Atada, any am-pitan'i Jordana izy ireo. Tao no nankalazany tamin'ny fomba manetriketrika sy manohina tokoa ny famoizana an'i Jakoba, fa naharitra fito andro ny fisaonan'i Josefa an-drainy.
11 Nony nahita izany fomba fisaonana tao Gorena-Atada izany ny Kanahanita nonina tamin'iny faritra iny, dia loa-bolana hoe: -Fisaonana mangidy ho an'i Ejipta ity! Izany no niantsoana io toerana any am-pitan'i Jordana io hoe Abela-Mitsiraima, izany hoe Fisaonan'i Ejipta.
12 Avy eo dia notanterahin'ireo zanakalahin'i Jakoba izay nanafaran-drainy azy.
13 Nentiny nankany amin'ny tany Kanahana ny fatin-drainy ary naleviny tao amin'ny zohy tao an-tsahan'i Makpela, teo akaikin'i Mamre. Fa novidin'i Abrahama tamin'i Hefrona izay hetita io saha io mba ho tany fandevenana.
14 Rehefa avy nandevina ny rainy i Josefa, dia niverina tany Ejipta ny tenany sy ireo rahalahiny mbamin'ireo olona rehetra izay niara-niakatra taminy handevina ny rainy.
15 Rehefa hitan'ireo rahalahin'i Josefa fa maty ny rainy, dia nifampiresaka izy hoe: Mety hankahala antsika i Josefa ka hamaly faty ireo ratsy nataontsika taminy.
16 Noho izany, dia nandefa teny nankany amin'i Josefa izy hoe: -Ny rainao, talohan'ny nahafatesany, dia nanafatra hoe:
17 Izao no holazainareo amin'i Josefa: Mamindra fo ka avelao ny heloka amam-pahotan'ireo rahalahinao fa ratsy no nataony taminao. Koa ankehitriny mba avelao ny helokay mpanompon'Ilay Andriamanitry ny rainao. Dia nitomany i Josefa noho ny teny nalefan'izy ireo taminy.
18 Tonga tany amin'i Josefa rahateo koa ireto rahalahiny ka niankohoka teo anatrehany sady nilaza hoe: -Indreto izahay ho mpanomponao
19 Fa hoy i Josefa taminy: -Aza matahotra ianareo, fa tsy haka ny toeran'Andriamanitra aho.
20 Nikendry hanisy ratsy ahy ianareo fa Andriamanitra kosa nanova izany ratsy izany ho soa mba hamonjeny vahoaka marobe araka izao hitanareo ankehitriny izao.
21 Koa aza matahotra ianareo, fa izaho no hiahy ny sakafo ho anareo sy ny ankohonanareo. Ary nampahery azy i Josefa sady nanao teny nanohina ny fony.
22 Nipetraka tany Ejipta i Josefa sy ny ankohonan-drainy. Folo amby zato taona no andro niainan'i Josefa,
23 ka nahita ny zafiafin'i Efraima zanany lahy izy ary nanangana ireo zanak'i Makira izay zafikeliny sady zanakalahin'i Manase.
24 Indray andro dia hoy i Josefa tamin'ireo rahalahiny: -Ho faty aho, nefa hamangy anareo tokoa Andriamanitra ka hampiala anareo amin'ity tany ity ho any amin'ny tany izay efa nianianany homena an'i Abrahama sy i Itsehaka ary i Jakoba.
25 Koa mianiana amiko fa rehefa hamangy anareo tokoa Andriamanitra, dia hoentinareo miakatra avy aty ny taolam-baloko.
26 Maty i Josefa, rehefa feno 110 taona. Nohosorana zava-manitra ny fatiny; ary tao anaty vata vato no nametrahana azy tany Ejipta.
Eksôdy
Toko voalohany
1 Ireto no anaran'ireo zanakalahin'i Jakoba na Israely tonga tany Ejipta niaraka tamin'ny rainy, samy nombam-bady aman-janaka:2 Reobena, Simehona, Levy, Joda,
3 Jisakara, Zebolona, Benjamina,
4 Dana, Naftaly, Gada ary Asera.
5 Miisa fitopolo izy rehetra taranak'i Jakoba, fa i Josefa dia efa tany Ejipta rahateo.
6 Taty aoriana dia maty i Josefa sy ireo rahalahiny ary ny taranaka indray nihira taminy.
7 Taorian'izany dia niteraka betsaka ny Israelita ka nihamaro fatratra sady nihanahery tokoa ka nameno ny tany.
8 Mpanjaka vaovao kosa no nanomboka nanjaka tany Ejipta tamin'izay ka tsy nahalala an'i Josefa.
9 Hoy izy tamin'ny vahoakany: -Jereonareo fa betsaka ny vahoaka israelita sady mahery noho isika.
10 Koa tsy maintsy itadiavana tetika hamerana ny isany. Rehefa misy ady manko, dia homba ireo fahavalontsika izy ka hiady amintsika ary hiala ny tany.
11 Dia nanendry lehiben'ny asa fanompoana ny Ejiptianina mba hampikoy ny Israelita amin'ny asa mafy. Koa nanangana ny tanana Pitoma sy Rahamsesa ny Israelita mba ho fitahirizam-bokatra ho an'ny Farao.
12 Kanefa arakaraka ny namoretana azy no vao mainka nitomboany sy nahazoany vahana ka natahoran'ny Ejiptianina azy.
13 Nampanompoin'ny Ejiptianina mafy tokoa ny Israelita
14 sady nataony nangidy ny fiainany tamin'ny fanompoana mafy: dia ny mandona tanimanga sy manao biriky ary manao ny asa any an-tsaha rehetra. Izany hoe ny asa fanompoana isan-karazany no nanereny azy mafy tokoa.
15 Nisy mpampivelona hebreo anankiroa nantsoina hoe Sifra sy Poha. Nandidy azy ireo ny mpanjakan'i Ejipta,
16 ka nanao hoe: -Rehefa mampiteraka ny vehivavy hebreo ianareo, dia jereo ny zaza vao teraka; ka raha zazalahy dia vonoy ho faty, fa raha zazavavy kosa dia velomy.
17 Natahotra an'Andriamanitra anefa ireo mpampivelona ireo ka tsy nanao araka izay nodidian'ny mpanjakan'i Ejipta, fa namela ireo zazalahy ho velona.
18 Koa nampanantsoin'ny mpanjaka ireo mpampivelona ka nanontaniany hoe: -Nahoana no nanao izany zavatra izany ianareo, ka namela ireo zazalahy ho velona?
19 Fa namaly ireo mpampivelona hoe: -Tsy mba tahaka ny vehivavy ejiptianina ireo vehivavy hebreo fa matanjaka; koa raha tsy mbola tonga akory ny mpampivelona, dia efa teraka izy.
20 Noho izany, dia nihamaro hatrany hatrany ireo Israelita sady nihanahery tokoa. Nasian'Andriamanitra soa ireo mpampivelona,
21 ka nomeny fara aman-dimby satria natahotra Azy.
22 Fa ny Farao kosa dia nandidy ny vahoakany rehetra ka nanao hoe: -Atsipazo ao amin'ny ony Neily ny zazalahy hebreo rehetra raha vao teraka, fa ny zazavavy kosa avelao ho velona.
Toko faha-2
1 Nisy lehilahy iray, anisan'ny fokon'i Levy, nandeha naka vady tao amin'ny mpiray foko aminy.2 Bevohoka ravehivavy ka niteraka zazalahy. Hitany fa tsara tarehy ilay zazalahy ka nafeniny nandritra ny telo volana.
3 Taorian'izany, rehefa tsy afa-nanafina azy intsony izy, dia naka sobika zozoro izay nohosorany dity mineraly sy ditin-kazo, dia napetrany tao ny zaza; ary tao anatin'izany sobika izany no nanaterany azy teny amoron'i Neily teo anivon'ny bararata.
4 Nijanona lavidavitra ny anabaviny mba hijery izay hanjo azy.