Ohabolana
Toko faha-18
9 Izay malaina amin'ny asany dia efa naman'ny mpanimba zavatra.10 Tilikambo mafy ny anaran'ny TOMPO, ka ny olo-marina miezaka ho ao dia voaaro tokoa;
11 ho an'ny mpanankarena kosa dia ny fananany no toa tanana mafy, ary heveriny ho manda avo miaro azy tokoa izany.
12 Ny fireharehan'ny olona no mialoha ny faharavany; fa ny fanetren-tena kosa mialoha ny voninahitra.
13 Izay mamaly teny tsy henony akory dia hadalana sy henatra ho azy izany.
14 Ny toe-panahy mavitrika dia mandresy ny aretina; fa zovy kosa no hanarina ny toe-panahy kivy?
15 Ny fon'ny manan-tsaina maniry hahazo fahalalana, ary ny olon-kendry liana hihaino izany.
16 Ny fanomezana dia mamoha varavarana ny mpanolotra ary mampiditra azy eo anatrehan'ny lehibe.
17 Amin'ny fitsarana dia izay miteny aloha no toa marina, mandra-piavin'ny ankilany hanohitra ny voalazany.
18 Ny fanontsanan-ko dia kely mety mampitsahatra fifandirana ary mamaha olana eo amin'ny samy mahery.
19 Sarotra kokoa noho ny mananika manda ny manatona rahalahy tafintohina; ary ny fifandirana dia mafy toy ny hidin-dapa.
20 Ny vokatry ny tenin'ny olona no hamelomany tena, eny, ny vokatr'izay lazainy no hivelomany;
21 ny mahafaty sy mahavelona dia miankina amin'ny teny, ka izay mankamamy miteny no hihinana ny vokany.
22 Izay mahita vady mahita fahasambarana; sady mahazo fanambinana avy amin'ny TOMPO izy.
23 Mitalaholaho ny mahantra, rehefa miteny; fa mihenjana kosa ny mpanankarena, rehefa mamaly.
24 Izay maro namana tsy maintsy ho sahirana, nefa misy sakaiza izay mifikitra noho ny mpiray tampo aza.
Toko faha-19
1 Aleo mahantra mizotra ho olom-banona toy izay mpanankarena milaza lainga.2 Tsy tsara ny finiavana tsy ombam-pahalalana; ary izay mirotoroto fandeha no ho tafintohina.
3 Rehefa simban'ny hadalany ny lalan'ny olona, dia ny TOMPO indray no itezeran'ny fony.
4 Ny mpanankarena dia manan-tsakaiza maro; fa ny mahantra kosa mety hilaozan'ilay hany sakaizany.
5 Tsy ho afa-maina ny vavolombelona mandainga; ary tsy ho dify famaizana ny mpamafy lainga.
6 Maro no mandokadoka ny olona ambony; ary ny besinimaro dia sakaizan'ny mpanome zavatra.
7 Ny ory tsy havan-drahalahy manana; koa mainka va tsy handao azy ny sakaizany? Fa na mbola miteny aminy aza ilay ory, dia efa tsy misy eo intsony ireo.
8 Izay mianatra misaina no tia ny tenany ary izay mitandro fahaiza-manavaka no hahita fahasambarana.
9 Tsy ho afa-maina ny vavolombelona mandainga, ary ho very ny mpamafy lainga.
10 Tsy mety ho an'ny adala ny miaina ao amin'ny renty, koa mainka ny hibaikoan'ny mpanompo ireo lehibeny.
11 Ny olona hendry mahafehy ny hatezerany, ary voninahitra ho azy ny manadino ny ratsy nozakainy.
12 Ny fahatezeran'ny mpanjaka dia mampatahotra toy ny fieron'ny liona; fa ny fitsimbinany kosa dia mahasoa toy ny ando amin'ny ahitra.
13 Ny zanaka adala dia fahoriana ho an'ny rainy; ny vehivavy tia ady kosa dia toy ny fantsona tsy mitsaha-mitete.
14 Trano aman-karena no lova avy amin-drazana; fa ny vady hendry kosa dia avy amin'ny TOMPO.
15 Ny hakamoana maharendremana, ka ny kibon'ny malaina ho noana.
16 Izay mitandro ny didy no miaro ny ainy; fa ho faty kosa izay tsy miraharaha ny toetrany.
17 Izay manome ny mahantra dia mampisambotra ny TOMPO, fa Izy ihany no hanonitra ny soa nataon'ilay mpiantra.
18 Faizo ny zanakao dieny mbola misy fanantenana; nefa aza sendaotra, fandrao mahafaty azy.
19 Mendrika handoa sazy ny olona lozabe; fa raha tsy atao izany izy, dia vao mainka hamerina indray.
20 Henoy ny torohevitra ary raiso ny anatra mba hahatonga anao ho hendry any aoriana.
21 Maro ny tetika ao am-pon'ny olona, fa ny fikasan'ny TOMPO ihany no tanteraka.
22 Ny fitiavan-karenan'ny olona dia henatra ho azy; fa aleo mahantra toy izay mpandainga.
23 Ny fanajana ny TOMPO mitondra ho amin'ny fiainana, fa izany no hananam-piadanana sy tsy hahitan-doza.
24 Ny kamo mangarom-bilia amin'ny tanany, nefa tsy mahatonga izany ao am-bavany.
25 Kapohy ny mpanirasira, dia ho hendry ny kely saina; anaro ny manan-tsaina fa ho takany ny fahalalana.
26 Ny zanaka mahamenatra sy manalabaraka dia mampahory an-drainy sy mampidifidify an-dreniny.
27 Anaka, raha mitsahatra tsy mandray anatra ianao, dia hanadino faingana izay nianaranao.
28 Ny vavolombelona tsy vanona manevateva ny fitsarana, ary ny olon-dratsy dia fatra-pitelina haratsiana.
29 Ny famaizana dia natao ho an'ny mpaniratsira, ary ny kapoka ho amin'ny lamosin'ny adala.
Toko faha-20
1 Ny divay mahatonga ho mpaniratsira, ny toaka mahatonga ho mpitabataba, koa izay mimamo amin'izany tsy ho hendry.2 Ny fandrahonan'ny mpanjaka dia mampatahotra toy ny fieron'ny liona; ka izay mampahatezitra azy tandindomin-doza.
3 Voninahitry ny olona ny mandositra fifandirana; fa ny adala rehetra kosa no mikiribiby amin'izany.
4 Tsy mety miasa ny kamo fa ririnina ny andro; nefa hitady izy amin'ny fotoam-pijinjana fa tsy hahita na inona na inona.
5 Ny hevitra ao am-pon'ny olona dia miafina toy ny rano ao an-kibon'ny tany, ka ny manan-tsaina no afaka hanovo aminy.