Ohabolana
Toko faha-15
3 Ny mason'ny TOMPO dia mijery eny rehetra eny ka mahita ny ratsy fanahy sy ny tsara fanahy.4 Ny teny mamy dia mitondra aina; fa ny vava ratsy kosa mandrera-po.
5 Ny adala manamavo ny fananaran-drainy; fa izay mandray tsikera no hita ho hendry.
6 Harem-be no ao an-tranon'ny olo-marina; fa mampiahiahy kosa ny harikaren'ny olon-dratsy.
7 Ny tenin'ny hendry mampiely fahalalana; fa hafa noho izany kosa ny fon'ny adala.
8 Halan'ny TOMPO ny sorona aterin'ny olon-dratsy; fa sitrany kosa ny vavaky ny olo-mahitsy.
9 Halan'ny TOMPO ny fitondrantenan'ny olon-dratsy; fa tiany kosa ny mpandala ny fahamarinana.
10 Hofaizina mafy izay mandao ny toetra tsara; fa ho faty tokoa izay mankahala anatra.
11 Fantatry ny TOMPO na dia izay miseho any amin'ny toeran'ny maty aza; koa mainka fa ny ao am-pon'ny olona.
12 Tsy tian'ny mpaniratsira ny hotsikeraina, ka izany no tsy mba anatonany ny olon-kendry.
13 Ny fo falifaly mahamiran-tava; fa ny fo malahelo maharera-panahy.
14 Ny manan-tsaina mikatsaka fahalalana; fa ny adala kosa miletra fahadalana.
15 Ratsy avokoa ny andron'ny olona ory; fa fety lava kosa ny fiainan'ny olona sambatra.
16 Aleo manan-kely ombam-panajana ny TOMPO, toy izay manan-karembe difotra ahiahy.
17 Aleo mihinana anana ombam-pitiavana, toy izay hena matavy laroam-pankahalana.
18 Ny olona mora tezitra no mihantsy ady; fa izay mahatsindry fo kosa mampitony fifandirana.
19 Ny lalan'ny kamo dia feno korontan-tsilo; fa ny lalan'ny olo-marina kosa milamina tsara.
20 Ny zanaka hendry mahafaly ny rainy; fa ny zanaka adala manamavo ny reniny.
21 Ny fahadalana no mahafaly ny olona tsy ampy saina; fa ny manan-tsaina kosa mahitsy fitondrantena.
22 Foana ny fikasana tsy ampy mpanolotsaina; fa tanteraka kosa izany, raha maro ireny.
23 Fifaliana ho an'ny olona ny fahaiza-mamaly; ary fatratra ny teny atao amin'ny ilana azy.
24 Ny lala-miakatra ho amin'ny fiainana no alehan'ny hendry ka idifiany ny toeran'ny maty any ambany.
25 Ny tranon'ny mpiavonavona dia ravan'ny TOMPO; fa arovany kosa ny tanin'ny mpitondratena.
26 Halan'ny TOMPO ny fikasan-dratsy; fa madio aminy kosa ny teny tsara atao.
27 Ny olona adalam-bola dia mampikorontana ny ankohonana; fa izay mankahala risoriso no hovelona.
28 Ny olo-marina mieritreritra vao mamaly; fa ny olon-dratsy kosa manely fanaratsiana.
29 Ny TOMPO manalavitra ny olon-dratsy, fa mihaino kosa ny vavaky ny olo-marina.
30 Ny endrika sariaka maharavo ny fo; ary ny vaovao mahafaly mamelombelona ny aina.
31 Izay manongilan-tsofina hihaino anatra mahavonjy no hiara-monina amin'ny olon-kendry.
32 Izay manda anatra manamavo ny tenany; fa izay mihaino tsikera mahazo fahalalana.
33 Ny fanajana ny TOMPO dia fianaram-pahendrena ; ary tokony hanetry tena alohan'ny hisondro-boninahitra.
Toko faha-16
1 Fikasana no an'ny olombelona; fa an'ny Tompo kosa ny teny farany.2 Ny olona mihevitra ny ataony ho mety avokoa; fa ny TOMPO no mitsara ny toe-panahy manesika azy.
3 Ankino amin'ny TOMPO ny asanao, dia ho tanteraka izay kasainao.
4 Samy misy antony avokoa ny zava-drehetra nataon'ny TOMPO; ka na dia ny ratsy fanahy aza dia nataony ho amin'ny androm-pamaizana.
5 Halan'ny TOMPO ny olona (miavona; azo antoka fa hofaiziny ireny.
6 Manafa-keloka ny fitiavana sy ny toetra mahatoky; ary ny fanajana ny TOMPO no ialana amin'ny ratsy.
7 Rehefa sitraky ny TOMPO ny fitondrantenan'ny olona, na dia ny fahavalony aza ampihavaniny aminy.
8 Aleo manan-kely ombam-pahamarinana toy izay ny karama be azo amin'ny tsy rariny.
9 Ny fon'ny olona no maminavina ny hizorany; fa ny Tompo kosa no mandavorary ny diany.
10 Teny ombam-pahefan'Andriamanitra no ambaran'ny mpanjaka; ka tsy mba diso ny didim-pitsarana avoakany.
11 Araka ny TOMPO ny mizana sy lela-mizana marina; ary asany avokoa ireo vato tsy mandainga ao an-kitapo.
12 Halan'ny mpanjaka ny fanaovan-dratsy, satria fahamarinana no iorenan'ny seza fiandrianany.
13 Filazana ny marina no sitraky ny mpanjaka, ary izay miteny mahitsy no tiany.
14 Ny fahatezeran'ny mpanjaka dia iraka mahafaty; fa ny hendry kosa no manao izay hitonian'izany.
15 Raha miran-tava ny mpanjaka, dia mamelombelona aina; ary ny hatsaram-pony dia toa rahona mitondra oram-pararano.
16 Aleo mahazo fahendrena toy izay mahazo volamena, ary aleo mahazo fahaiza-manavaka toy izay volafotsy.
17 Ny lalan'ny olo-mahitsy midify ny ratsy; izay mitandrina ny alehany no miaro ny ainy.
18 Ny fiavonavonana mialoha ny faharavana, ary ny fireharehana mialoha ny fahalavoana.
19 Aleo manetry tena miaraka amin'ny olona mahantra toy izay mizara babo miaraka amin'ny mpiavonavona.