Ohabolana

Toko faha-16

²⁰ Izay mahay mandini-draharaha no hahita soa; ary izay matoky ny TOMPO no ho sambatra.

²¹ Izay hendry fa nomban-javatra no atao hoe manan-tsaina; ary ny teny mamy no maharesy lahatra kokoa.

²² Loharanom-piainana ho an'izay manana azy ny fahaizana; fa ny hadalany ihany no manafay ny adala.

²³ Ny hendry mieritreritra aloha vao miteny, ka mahatonga ny teniny haharesy lahatra kokoa.

²⁴ Ny teny mamy dia toy ny toho-tantely, ka sady hafinaretam-panahy no fahasalamam-batana.

²⁵ Misy toetra heverin'ny olona homahitsy kanjo mankany amin'ny fahafatesana no iafarany.

²⁶ Ny hanoanana no mahatonga ny mpiasa hiasa, satria ny fanirian-kanina no manesika azy.

²⁷ Mikotrika faharatsiana ny olon-tsy vanona, ary toa misy afo mandevona eo amin'ny molony.

²⁸ Ny mpihatsaravelatsihy manangana ady, ary ny mpanendrikendrika mampisaraka ny mpisakaiza.

²⁹ Ny olona lozabe manangoly ny namany, ka mitarika azy ho amin'ny lalan-tsy mahasoa.

³⁰ Izay mikimpy maso sy manaikitraiki-molotra dia miteti-dratsy sy mikasa hanao izany.

³¹ Satroboninahitra marevaka ny volofotsy; fizorana amam-pahamarinana no ahazoana azy.

³² Ny tena mahery dia izay maharesy ny hatezerany; fa aleo mahafehy tena toy izay mahafehy tanana.

³³ Ahontsankontsana ny kodia kely hahalalan-javatra, fa izay mipoitra eo kosa dia avy amin'ny TOMPO.

Toko faha-17

¹ Aleo tapa-mofo maina hanina amim-piadanana, toy izay fanasam-be ao amin'ny trano misy fifandirana.

² Ny mpanompo hendry hisongona ny zanaka manala baraka, ka handray anjara lova eo amin'ny mpirahalahy.

³ Misy ny memy fisedrana ny volafotsy ary ny fatana fandrendrehana ny volamena, fa ny TOMPO no mizaha toetra ny fon'ny olona.

⁴ Ny mpanao ratsy manongilan-tsofina amin-dresaka lainga, ary ny mpandainga mihaino ny tenim-panaratsiana.

⁵ Izay maneso ny mahantra miteny ratsy ny Mpanao azy; ary izay faly amin'ny fahorian'ny sasany dia hofaizina.

⁶ Satroboninahitry ny antitra ny zafikeliny; ary reharehan'ny zanaka ny rainy.

⁷ Tsy an'ny ketrina mihitsy ny hanao teny mihaja, ary vao mainka tsy an'ny olo-manankaja ny hilaza lainga.

⁸ Ny kolikoly dia heverina hanambinany mpanolotra azy, ka hampahomby ny zavatra rehetra hataony.

⁹ Izay mitady fihavanana manadino ny hadisoana; fa izay mamoha fota-mandry mampisaraka ny mpisakaiza.

¹⁰ Mandaitra kokoa ny anatra iray amin'ny olona misaina noho ny kapoka injato amin'ny olona adala.

¹¹ Ny maditra dia fatra-pitady ny hanao ratsy, ka handefasan'ny Tompo iraka lozabe hamely azy.

¹² Aleo tojo orsa vavy very anaka, toy izay sendra adala mihetsika hadalana.

¹³ Izay olona mamaly ratsy ny soa dia tsy hialan'ny ratsy ao an-tranony.

¹⁴ Ny fiandoham-pifandirana dia toy ny mamaky toha-drano; koa ajanony izany dieny tsy mbola mihombo ny ady.

¹⁵ Samy halan'ny TOMPO avokoa na ny fanamarinana ny olo-meloka na ny fanamelohana ny olo-marina.

¹⁶ Hatao inona ny vola eo an-tanan'ny adala? Hamidy fahendrena ve? Tsy manan-tsaina hanao izany izy.

¹⁷ Ny namana dia izay tia amin'ny fotoana rehetra, ka miseho toy ny mpiray tampo izy amin'ny fahoriana.

¹⁸ Olona tsy ampy saina izay mipai-tanana manaiky hiantoka ny trosan'ny hafa.

¹⁹ Izay tia fifandirana tia fahotana; ary izay manana hambom-po diso tafahoatra dia mitady fahavoazana ho an'ny tenany.

²⁰ Izay be hafetsen-dratsy dia tsy hahita hasambarana; ary izay miolakola-piteny nohianjadian'ny loza.

²¹ Izay miteraka adala, hahazo alahelo; fa ny rain'ny ketrina tsy mba ho faly.

²² Ny fo falifaly mahasoa ny vatana; fa ny fahakiviana mahamaina ny taolana.

²³ Mandray kolikoly mangingina ny olon-dratsy hamadihany ny fizotran'ny ara-drariny.

²⁴ Misoritra amin'ny endriky ny manan-tsaina ny fahendrena, fa ny mason'ny adala mibirioka any am-paran'ny tany.

²⁵ Ny zanaka adala manome alahelo ny rainy ary fahoriana mangidy ny reniny.

²⁶ Tsy tsara ny manasazy olo-marina; tsy ara-drariny ny mamely olona manan-kaja.

²⁷ Izay mahalanjalanja ny teniny no feno fahalalana; ary izay mahatsindry fo no olona manan-tsaina;

²⁸ na ny adala aza, rehefa tsy miteny, dia toy ny hendry; rehefa mikombom-bava izy, dia toa manan-tsaina.

Toko faha-18

¹ Ny tia tena dia tsy mitady afa-tsy ny tombontsoany; fa mampisafoaka azy rehefa mety fanampiana.

² Tsy mahaliana ny adala izay fahaiza-manavaka, fa ny haneho ny heviny hatrany no sitrany.

³ Ny haratsiam-panahy dia mahatonga fanesoana; ary ny toetra manala baraka dia arahin-kenatra.

⁴ Ny teny aloaky ny vavan'ny olona dia mety ho lalina toy ny ranomasina sy hamelombelona toy ny ranondriaka, ary mety ho loharanom-pahendrena.

⁵ Tsy tsara ny miandany amin'ny olon-dratsy mba hahatonga ny marina ho resy amin'ny fitsarana.

⁶ Mahatonga fifandirana ny tenin'ny adala, ary miantso kapoka ny zavatra lazainy.

⁷ Fandringanan-tena ny lazain'ny adala ary fandrika ho azy ny teny ataony.

⁸ Toa hani-matsiro ny tenin'ny mpanendrikendrika, ka any anaty kibo no mikorotsaka.