Ohabolana
Toko faha-11
22 Ny hatsaran-tarehin'ny vehivavy tsy misaina dia toy ny kavim-bolamena eo amin'ny oron-kisoa.23 Ny soa ihany no kendren'ny olo-marina; fa ny fahatezeran'Andriamanitrao kosa no arehitry ny fanirian'ireo olon-dratsy.
24 Misy izay malala-tanana nefa mitombo harena hatrany; ary misy kahihitra loatra nefa mihamahantra ihany.
25 Hiavosam-panambinana ny olona mpanao soa, ary izay manome rano hosotroina dia ho afa-ketaheta.
26 Ozonim-bahoaka izay mitahiry ny variny fa tsofiny rano kosa izay mivarotra ny azy.
27 Izay fatra-pikatsaka ny soa dia misarika ny fanambinan'Andriamanitra; fa izay mitady ny ratsy kosa dia hahita loza.
28 Hihareraka izay mitoky amin'ny hareny, fa ho tahaka ny ravin-kazo maitso kosa no handrobonan'ny olo-marina.
29 Izay mitondra korontana ao an-tranony dia adala, ka handova rivotra sy ho tonga mpanompon'ny hendry.
30 Ny vokatry ny fahamarinana dia toy ny hazon'aina; ary ny hendry no mahataona olona.
31 Omem-balisoa ety an-tany ny olo-marina; koa ny ratsy fanahy sy ny mpanota dia vao mainka hahazo ny setry sahazao !
Toko faha-12
1 Izay tia fananarana tia fahalalana; fa adaladala izay mankahala tsikera.2 Ny tsara fanahy dia mahazo sitraka avy amin'ny TOMPO, fa izay manana sain-dratsy kosa helohiny.
3 Tsy haratsiam-panahy no mahatafaorina ny olona; fa ny marina kosa mamaka tsy misy mahozongozona.
4 Satroboninahitry ny vadiny ny vehivavy tsara fanahy, fa homamiadana mikiky azy kosa ny vehivavy tsy mendrika.
5 Ny olo-marina mihevitra ny rariny; fa ny olon-dratsy kosa misaina fitaka.
6 Ny tenin'ny olon-dratsy dia fandrika mahafaty; ny lazain'ny olo-marina kosa mamonjy ny hafa.
7 Raha miongana ny olon-dratsy, dia tsy misy tafajanona; fa ny ankohonan'ny olo-marina kosa maharitra hatrany.
8 Ny fahaizan'ny olona no hiderana azy, fa izay adaladala kosa hatao tsinontsinona.
9 Aleo olon-tsotra manana mpanompo anankiray, toy izay mpirehaka ho maro mpanompo nefa tsy manan-kohanina.
10 Ny olo-marina mahalala mitsimbina ny bibiny; fa ny olon-dratsy kosa masiaka hatramin'ny atiny.
11 Izay miasa ny taniny ho voky hanina, fa izay manao hevi-dravina kosa tsy ampy saina.
12 Ny olon-dratsy maniry tombontsoa tsy ara-drariny; fa ny olo-marina kosa maharitra sy mamokatra.
13 Ny olon-dratsy voafandriky ny laingany ihany; fa ny olo-marina kosa afa-miala amin'ny fahoriana.
14 Ny tenin'ny olona no ahazoany fahombiazana sy andraisany ny vokatr'izay asan'ny tanany.
15 Ny adala dia mihevitra ho mahitsy toetra; fa hendry kosa ny olona izay mandray torohevitra.
16 Ny adala maneho hatezerana eo noho eo, fa ny hendry alaim-baraka kosa mahatsindry fo.
17 Izay milaza ny marina no manambara ny rariny; fa fitaka kosa no ambaran'ny vavolombelona mandainga.
18 Izay mitsaontsaona dia mety handratra toy ny sabatra; fa ny tenin'ny hendry kosa dia fanasitranana.
19 Ny teny marina dia mitombina hatrany; fa ny lainga kosa dia indray mipi-maso ihany.
20 Fitaka no ao am-pon'izay miteti-dratsy;fa fifaliana kosa ho an'izay misaina fihavanana.
21 Tsy misy ratsy manjo ny olo-marina; fa ny olon-dratsy kosa heniky ny loza.
22 Mankahala ny mpandainga ny TOMPO, fa mankasitraka kosa ny olona mahatoky.
23 Ny olona malina tsy mampideradera ny fahalalany; fa ny fon'ireo adala kosa mamoaka hafokana.
24 Ny olona mazoto miasa no homena fitondrana; fa ny olona kamo kosa dia hampanaovina asa an-terivozona.
25 Ny ahiahy mandreraka ny fon'ny olona; fa ny teny soa kosa mahafaly azy.
26 Ny olo-marina dia mpitari-dalana ny namany; fa ny toetran'ny olon-dratsy kosa mamery azy.
27 Ny mpihaza kamo tsy mba manana haza hatono; fa soa sarobidy kosa ny olona mazoto miasa.
28 Ny lalan'ny fahamarinana no misy ny fiainana; fa ny lalam-paharatsiana kosa mankany amin'ny fahafatesana.
Toko faha-13
1 Ny zanaka hendry mihaino ny anatry ny rainy, fa ny zanaka mpaniratsira kosa manda fitsikerana.2 Ny olona tsara dia mijinja ny vokatry ny teniny, fa ny mpanao ratsy kosa mivelona amin'ny herisetra.
3 Izay mahafehy ny vavany maharo ny ainy; fa izay basivava mandringan-tena.
4 Ny kamo no mitsiriritra tsy mety afa-po; fa ny mazoto kosa mahazo izay iriny.
5 Ny olo-marina dia mankahala ny lainga; fa ny olon-dratsy kosa manevateva sy manala baraka.
6 Ny fahamarinana miaro izay mizotra tsy misy tsiny; fa ny faharatsiana kosa mamery ny mpanota.
7 Misy miseho ho manankarena nefa tsy manam-bariraiventy; fa misy kosa mody mahantra nefa manana harem-be.
8 Ny haren'ny olona no antoky ny ainy; fa ny mahantra tsy matahotra fandrahonana.
9 Ny olo-marina dia toy ny hazavana tsara famiratra; fa ny olon-dratsy kosa dia toy ny jiro efa ho faty.
10 Fifandirana no hany ateraky ny avonavona; fa izay mandray torohevitra kosa no misy fahendrena.
11 Ny harena azo amim-pahamaikana dia mihena an-toerana; fa izay manangona izany tsikelikely no mampitombo azy.
12 Ny fanantenana mihemo-dava dia mankarary fo; fa ny firarian-tsoa tanteraka kosa mampahazo aina.