Ohabolana

Toko faha-10

⁴ Ny tanana tsy miasa no mampahantra; fa ny tanana mazoto kosa mampanan-karena.

⁵ Izay manangom-batsy amin'ny fararano dia olo-misaina; fa izay matory amin'ny fotoam-pijinjana kosa tebahina.

⁶ Fitahiana noho amin'ny tenan'ny olo-marina; fa ny tenin'ny olon-dratsy kosa mifono herisetra.

⁷ Hotahina ny fahatsiarovana ny olo-marina; fa ho hadino hatramin'ny anarany kosa ny olon-dratsy.

⁸ Ny hendry am-po dia mandray torolalana; fa ny adala miteniteny foana kosa ho very.

⁹ Izay mizotra ho olom-banona no mizotra amim-pitokiana; fa izay manan-toetra miolikolika kosa hiharan-doza.

¹⁰ Izay manafina ny zava-nitranga dia mahatonga alahelo; fa izay mananatra tsy misorona kosa mitondra fiadanana.

¹¹ Ny tenin'ny olo-marina dia loharanon'aina fa ny tenin'ny olon-dratsy kosa mifono herisetra.

¹² Ny fankahalana dia manetsika ady; fa ny fitiavana manarona ny hadisoana rehetra.

¹³ Ahitana fahendrena ny tenin'ny manan-tsaina; fa tsorakazo kosa no ho an'ny lamosin'ny bado.

¹⁴ Harem-pahalalana no voaangon'ny hendry; fandringanana antomotra kosa no hateraky ny tenin'ny adala.

¹⁵ Ny fananan'ny mpanankarena no toy ny manda miaro azy; fa ny fahantran'ny ory kosa no hiteraka fandringanana azy.

¹⁶ Ny karaman'ny olo-marina dia hivelomany; fa ny vola azon'ny olon-dratsy kosa hanotany.

¹⁷ Izay mitandro fifehezan-tena dia mizotra ho amin'ny fiainana; fa izay manda anatra kosa no haniasia.

¹⁸ Mpihatsaravelatsihy izay manafina ny fankahalany; fa adala izay mampiely endrikendrika.

¹⁹ Ny teny maro tsy ilaozam-pahadisoana; fa olo-misaina kosa ny mahatam-bava.

²⁰ Volafotsy voafantina ny tenin'ny olo-marina; fa ny fon'ny olon-dratsy kosa tsisy vidiny.

²¹ Mampianatra ny maro ny tenin'ny olo-marina; fa matin'ny habadoana kosa ny adala.

²² Ny fitahian'ny TOMPO no mampanankarena; ary tsy manampy inona amin'izany ny ezaky ny olona.

²³ Ny fanaovan-dratsy no lalaon'ny adala; fanehoam-pahendrena kosa no an'ny mahay manavaka.

²⁴ Izay ahin'ny olon-dratsy no ho tonga aminy; fa izay irin'ny olo-marina kosa no homena azy.

²⁵ Rehefa mipaoka ny rivo-maherin'ny fitsapana, dia indaosiny tsy ho eo intsony ny olon-dratsy; fa mahatanty lalandava izany kosa ny olo-marina.

²⁶ Mampangirifiry nify ny vinaingitra, mampangirifiry maso ny setroka; toy izany koa ny olona kamo dia mampangirifiry ny mpampiasa azy.

²⁷ Izay manaja ny TOMPO ho ela velona; fa ny olon-dratsy kosa malaky maty.

²⁸ Miteraka fifaliana ny fanantenan'ny olo-marina; fa ny fanampoizan'ny olon-dratsy kosa ho levona.

²⁹ Fialofana ho an'ny olom-banona ny lalan'ny TOMPO, fa fandringanana kosa ho an'ny mpanao ratsy.

³⁰ Tsy hihontsona na oviana na oviana ny olo-marina, fa ny olon-dratsy kosa tsy hahajanona amin'ny tany.

³¹ Fahendrena no mikoriana avy eo am-bavan'ny marina; fa ny lela fandainga kosa tokony ho tapahina.

³² Ny molotry ny olo-marina dia miboiboika halemem-panahy, fa fitaka no mameno ny vavan'ny olon-dratsy.

Toko faha-11

¹ Halan'ny TOMPO ireo mizana mandainga; fa ny lanja marina no tiany.

² Setrin'ny fiavonavonana ny fahafaham-baraka; fa ao amin'ny manetry tena no misy fahendrena.

³ Ny toetra vanona no mitarika ny olo-mahitsy; fa ny haratsiana kosa mandringana ny mpamitaka.

⁴ Tsy misy ilana ny harena amin'ny andro fitsarana; fa ny fahamarinana no manafaka amin'ny fahafatesana.

⁵ Ny fahamarinan'ny olom-banona manamora ny fiainany; fa ny olon-dratsy kosa verin'ny faharatsiany.

⁶ Ny fahamarinan'ny olo-mahitsy manafaka azy; fa voafandriky ny filan-dratsy kosa ny mpamitaka.

⁷ Rehefa maty ny olon-dratsy, dia miara-maty aminy koa ny fanantenany, indrindra fa izay nankininy tamin'ny harena.

⁸ Ny olo-marina dia afahana amin'ny tebiteby; fa ny olon-dratsy kosa no hiditra hisolo azy ao.

⁹ Ny mpanda an'Andriamanitra dia manimba namana amin'ny teniny; fa ny fahalalana kosa no hanafahana ny olo-marina.

¹⁰ Mifaly amin'ny fahombiazan'ny olo-marina ny tanana, ary velom-pihobiana amin'ny fahafatesan'ny olon-dratsy.

¹¹ Ny tsodranon'ireo olo-mahitsy no isandratan'ny tanana; fa ny tenin'ireo olon-dratsy kosa no aharavany.

¹² Izay manambany ny namany no bado; fa aleon'ny manan-tsaina mangina.

¹³ Ny mpanely fanaratsiana no manambara tsiambaratelo; fa ny olo-mahatoky kosa mahay manafin-javatra.

¹⁴ Ho very ny vahoaka tsy misy mpitondra; fa raha maro mpanolo-tsaina izy no handry feizay.

¹⁵ Izay miantoka ny trosan'ny hafa dia hanenina mafy; milamin-tsaina kosa izay tsy manaiky hanao izany.

¹⁶ Ny vehivavy tsara tarehy mahazo haja; ary ny lehilahy mavitrika mahazo harena.

¹⁷ Ny olona tsara fanahy dia manasoa tena; fa ny olona masiaka kosa mampahory tena.

¹⁸ Karama manodoka no raisin'ny olon-dratsy; fa valisoa azo antoka no an'izay mamafy fahamarinana.

¹⁹ Izay mitandro fahamarinana dia ho velona; fa izay mpanaraka ny ratsy kosa ho faty.

²⁰ Halan'ny TOMPO ny olona fetsifetsy; fa izay manan-toetra vanona kosa no tiany.

²¹ Azo antoka tokoa fa hofaizina ny ratsy fanahy; fa ny taranaky ny marina kosa ho voavonjy.