Ohabolana
Toko faha-8
8 Rariny avokoa izay tenin'ny vavako, fa tsy misy lainga na fitaka.9 Mazava avokoa izy ho an'ny mahira-tsaina ary mahitsy ho an'ny manam-pahalalana.
10 Ny fampianarako no raiso fa tsy ny volafotsy ary aleo fahalalana toy izay ny volamena voafantina.
11 Satria Izaho Fahendrena dia tsara noho ny perla; tsy misy zava-tsarobidy azo ampitahaina amiko."
12 "Izaho Fahendrena no manana ny fahamalinana ka nahazo ny fahaiza-manao drafitrasa.
13 Ny fankahalana ny ratsy no fanajana ny TOMPO. Samy halako na ny fiavonavonana na ny fireharehanana ny fitondrantena ratsy na ny vava fandainga.
14 Ahy ny fahaiza-mamolavola sy mampihatra; Ahy koa ny fahaiza-manavaka sy ny hery manatanteraka.
15 amin'ny alalako no anjakan'ny mpanjaka, sy ahazoan'ny mpitondra manao didy ara-drariny;
16 amin'ny alalako no ifehezan'ireo mpifehy sy anaovan'ireo loholona fitsarana ara-drariny.
17 Izaho dia tia izay tia ahy; ary izay mikatsaka ahy no hahita ahy.
18 Miaraka amiko ny harena sy ny voninahitra, dia fananana mateza sy fanambinana sahaza.
19 Izay omeko dia tsara noho ny volamena, eny, noho ny volamena madio indrindra; ary izay azo avy amiko dia tsara noho ny volafotsy voafantina.
20 Ny soritry ny fahamarinana no izorako dia ny lalana anjakan'ny rariny,
21 mba hampahazoako zava-tsoa ireo tia ahy ka hamenoako ny tranon-drakiny.
22 Nateraky ny TOMPO ho voalohan'asany aho, dia talohan'ny asa nataony hatry ny elabe."
23 Natokany hatramin'ny fahagola aho, eny, natokany hatrany am-piandohana, dia fony tsy mbola nisy akory ny tany.
24 Fony tsy mbola ary ny rano lalimbe no efa teraka aho, dia fony tsy mbola ary ny loharano miboiboika.
25 Talohan'ny niorenan'ny tendrombohitras y talohan'ny havoana no efa teraka aho,
26 dia fony tsy mbola nataon'Andriamanitra na ny tany na ny saha midadasika eo aminy na ny vovotany singany voalohany teo amin'izao tontolo izao.
27 Efa teo aho, fony Andriamanitra namorona ny lanitra, sy namaritra ny faravodilanitra teo ambonin'ny rano lalimbe.
28 Nampivangongo ny rahona eny ambony Izy ary nampiboiboika ny loharano lalina;
29 nanisy faritra ho an'ny ranomasina Izy , dia faritra tsy azony hihoarana, ary nametraka ny fanorenan'ny tany.
30 Tamin'izany asa rehetra nataony izany dia nanampy azy toy ny mpanao mari-trano aho ka sady antom-piravoravoany isan'andro isan'andro no nibita-kafaliana tsy tapaka teo anatrehany;
31 nibita-kafaliana aho teo amin'ny tany noariny ary naharavoravo ahy teo amin'ny olombelona."
32 "Ary ankehitriny henoinareo aho, rey anaka; fa sambatra ianareo manaraka ny sori-dalako.
33 Henoy ny anatro ary aza lavina fa hampahendry anareo izany.
34 Sambatra izay olona mihaino ahy ka miandry isan'andro eo am-baravarako sy miambina eo an-tokonako!
35 Izay mahita ahy dia mahita ny fiainana sady mahazo sitraka amin'ny TOMPO.
36 Fa izay diso amiko dia handratra ny tenany, ary izay mankahala ahy dia tia fahafatesana. "
Toko faha-9
1 Nanangana ny tranony ny Fahendrena , rehefa avy nipaika ireo andry fito.2 Novonoiny ireo bibiny, noharoharoiny ny divainy ary namboariny ny latabany.
3 Ireo mpanompovaviny no nirahiny eny amin'ny toerana avo indrindra ao an-tanana mba hiantsoantso izao fanasana izao:
4 Ianareo kely saina, mankanesa aty. Ireo bado koa dia nampilazany hoe:
5 "Avia mihinana amin'ny mofoko ary misotro amin'ny divay nomaniko.
6 Ialao ny hakelezan-tsaina, dia ho velona ianareo! ka mizora amin'ny lalan'ny fahaiza-manavaka. "
7 Izay mananatra ny mpaniratsira dia hahazo fanarabiana; ary izay manaraka ny olon-dratsy dia ho afa-baraka.
8 Aza mananatra ny mpaniratsira, fandrao hankahala iny ianao; fa ny hendry no anaro, dia ho tiany ianao.
9 Manomeza ho an'ny hendry, dia hihahendry izy; ampianaro ny olo-marina, dia hitombo traikefa izy.
10 Ny fanajana ny TOMPO no loharanom-pahendrena ; ny fahalalana Ilay Masina no tena fahaiza-manavaka.
11 Eny, izaho Fahendrena no mahamaro ny andronao sy mampahalava ny taona hiainanao.
12 Raha hendry ianao, dia tombontsoa ho anao izany. Fa raha miavonavona kosa ianao, dia ianao ihany no hilanja ny vokany.
13 Ny Fahadalana dia toy ny vehivavy mpitabataba, kely saina ary tsy manam-pahalalana.
14 Mipetraka amin'ny seza izy eo am-baravaran'ny tranony, eny amin'ny toerana avo ao an-tanana,
15 mba hiantso ny mpandalo izay mizotra amin'ny alehany avy hoe:
16 Ianareo kely saina, mankanesa aty. Hoy koa izy tamin'ireo bado:
17 Mamy ny rano nangalarina ary matsiro ny mofo hani-miafina.
18 Tsy fantatr'ireo fa ny maty no ao, ary efa any amin'ny toeran'ny maty no mihitsoka ireo nasain'ny fahadalana.
Toko faha-10
1 Ohabolan'i Salomona. Ny zanaka hendry mahafaly ny rainy; fa ny zanaka adala mampalahelo ny reniny.2 Ny fananana azo tamim-pomba ratsy, dia tsy mitondra soa; fa ny fahamarinana no manafaka amin'ny fahafatesana.
3 Tsy avelan'ny TOMPO ho noana ny marina, fa laviny kosa ny fanirian'ny olon-dratsy.