Ohabolana

Toko voalohany

¹⁰ Anaka, aza manaiky ianao, raha taomin'ny naman-dratsy

¹¹ ka ilazany hoe: "Andao hiaraka aminay; aoka isika hanotrika handatsa-dra, ka hotampohintsika tsy ahoan-tsy ahoana hatramin'ny olon-tsy manan-tsiny aza.

¹² Tahaka ny fitelin'ny toeran'ny maty no hitelemantsika azy mbola velona ka hanaovantsika azy telimoka ho toy ny olona midina any am-pasana.

¹³ Halaintsika avokoa ireo haren-tsarobidiny; ka ho fenointsika babo ny tranontsika.

¹⁴ Dia hiombona anjara aminay ianao fa hiraisantsika rehetra ny kitapom-bolantsika!"

¹⁵ Anaka, aza mba miara-dalana amin'ny olona tahaka izany; halaviro ny lalan-kalehany.

¹⁶ Fa mihazakazaka ho amin'ny ratsy izy sady dodona ery handatsa-dra.

¹⁷ Tsy misy vokany ny famelaram-pandrika, raha toa ka hitan'ny voromanidina izany.

¹⁸ Ireny olon-dratsy ireny kosa dia manotrika handatsaka ny ran'ny tenany ihany; ka mamela-pandrika hamelezan-tena.

¹⁹ Toy izany no iafaran'izay rehetra fatra-pandroba, ka ipaohana ny ain'izay fatra-panao azy.

²⁰ Miantso mafy eny ankalamanjana ny Fahendrena ka manandra-peo eny an-kianja malalaka.

²¹ Mitory eny amin'ny fihaonan-dalanabe olona izy ka manambara eo am-bavahadin'ny tanana hoe:

²² "Ry kely saina, mandra-pahoviana no hitiavanareo hakelezan-tsaina? Ry mpaniratsira, mandra-pahoviana no handalanareo faniratsirana? Ry adala, mandra-pahoviana no hankahalanareo fahalalana?

²³ Miverena hihaino ny fananarako ianareo fa indro haidiko aminareo ny fanahiko ary hampahafantariko anareo ny teniko.

²⁴ Efa niantso aho fa nolavinareo, efa nanolo-tanana anareo fa tsy nahoanareo.

²⁵ Nolavinareo ny torohevitro rehetra ary tsy noraharahainareo ny anatro.

²⁶ Izaho kosa mba hihomehy ny faharavanareo ary handatsa rehefa ho tonga aminareo ny tahotra.

²⁷ Eny, ho tonga aminareo toy ny tafiodrivotra ny tahotra, hiantonta toy ny rivodoza ny faharavanareo, ho tonga aminareo ny zava-mampahory sy mampitebiteby;

²⁸ amin'izay no hisy hiantso ahy fa tsy ho valiako ary koa hisy hitady ahy fa tsy hahita.

²⁹ Hiharan'izany tokoa ianareo, satria nankahala ny fahalalana ary tsy nifidy hanaja ny TOMPO

³⁰ sady tsy nanaiky ny torohevitro ary naniratsira ny anatro rehetra.

³¹ Ny saim-pantatrareo sy ny vokatry ny fitondrantenanareo no hampizihi-kibo ka hankandoa anareo.

³² Fa ny di-doha no mahafaty ny kely saina ary ny fahatokian-tena no mahavery ny adala.

³³ Izay mihaino Ahy kosa dia hitoetra amin-toky; eny, handry feizay izy ka tsy hanahy fahoriana."

Toko faha-2

¹ Anaka, raisonao ny teniko ary ataovy raki-tsoa ho anao ny didiko.

² Henoy ny teny ataon'ny fahendrena ka ampiezaho ny fonao hahay manavaka.

³ Mangataha fanampiana amin'ny fahalalana, miantsoa famonjena amin'ny fahaiza-manavaka.

⁴ Fa raha tadiavinao toy ny fitady volafotsy ireo ary katsahinao toy ny fikatsaka harena nafenina.

⁵ dia ho fantatrao tokoa ny fanajana ny TOMPO ary ho hitanao ny fahalalana an'Andriamanitra.

⁶ Fa ny TOMPO no manome ny fahendrena; ary avy amin'ny vavany no mipoitra ny fahalalana sy ny fahiratan-tsaina.

⁷ Mampahomby ny olo-mahitsy Izy ary toy ny ampinga fiarovana ho an'izay mandeha tsy misy tsiny.

⁸ Miaro ny lalan'ny fahamarinana Izy ary miambina izay mpifikitra aminy.

⁹ Raha mihaino Ahy ianao, dia ho fantatrao ny marina sy rariny ary hizoranao avokoa ny lalam-pahasambarana.

¹⁰ Ho tonga ao am-ponao ny fahendrena, ary hampifaly anao ny fahalalana,

¹¹ hiaro anao ny fahamalinana ary hiambina anao ny fahaiza-manavaka;

¹² ireo no hampiala anao amin'ny toe-dratsy sy amin'ny olona miteny fitaka

¹³ na mandao ny sori-dalam-pahitsiana mba hizotra amin'ny lalan'ny haizina,

¹⁴ dia ny olona faly manao ratsy sady finaritra amin'ny famitaha-namana,

¹⁵ miolikolika sori-dalana ka mivaona amin'ny fitapitaka.

¹⁶ Ny fahamalinana sy fahaiza-manavaka no hampiala anao koa amin'ny teny mandrobo fanaon'ny vehivavy izay vadin'olona,

¹⁷ dia vehivavy nandao ny vadiny sy nanadino ny fifanekena izay nataony teo amin'Andriamaniny.

¹⁸ Mitondra amin'ny fahafatesana ny toetran'izany vehivavy izany, ary mankany amin'ny fahaverezana ny fitapitaka ataony.

¹⁹ Izay mankao amin'izany vehivavy izany dia tsy misy afa-miverina intsony ary tsy mihazo ny lalan'ny fiainana.

²⁰ Noho izany, ny toetran'ny tsara fanahy no hizoranao ary ny sori-dalan'ny olo-marina no ho tandremanao.

²¹ Fa ny olo-mahitsy sady tsy manan-tsiny no honina amin'ny tany sy hitoetra eo.

²² Ny olon-dratsy sy ny mpivadika kosa ho fongorana amin'ny tany sy ho voaroaka tao.

Toko faha-3

¹ Anaka, aza manadino ny fampianarako; ary aoka ho voatandron'ny fonao ny didiko.

² Fa andro lava sy taona maro iainana ka hiadam-pinaritra hatrany no ho vokatr'ireny ho an'ny tenanao:

³ Aoka tsy hialanao mihitsy ny fitiavana sy ny toetra mahatoky; kajio toa firavaka fiambozonanao izany, ary soraty ao am-ponao toy ny amin'ny vato fisaka.

⁴ Fa hahita sitraka sy fahombiazana ianao eo imason'Andriamanitra sy ny olona.