Salamo
Toko faha-49 (48)
7 izay mitoky amin'ny hareny miavosa sy mirehareha amin'ny fananam-beny?8 Tsy misy olona mahavotra ny hafa tsy akory na mahaloa tamby ho azy amin'Andriamanitra;
9 satria lafo loatra ny avotra aina, tsy ho voaloa na oviana na oviana
10 mba hahavelomana mandrakizay sy tsy hahitana ny fasana
11 Samy iaraha-mahita tokoa fa ny olon-kendry dia maty, ny adala sy ny ketrina koa levona, ka mamela ny hareny ho an'ny hafa.
12 Ny fasana no tranony mandrakizay sy fonenany amin'ny taona mifandimby, na ohatra aza ka ny anarany no niantsoana ireo taniny fahiny.
13 Eny, rehefa ao anaty voninahitra ny olona, dia tsy mahatsapa fa mbola ho faty ka ho tahaka ny biby ihany.
14 Izao no hanjo ny mpitoky tena sy hiafaran'ny olona mpirehaka:
15 horoahina toa andian'ondry izy mba ho any amin'ny toeran'ny maty ka Rafahafatesana no mpiandry hampiraotra azy; hanitsy izy no midina am-pasanaka tsy hotsaroana ny bikany; ary ny toeran'ny maty no fonenany.
16 Hotsimbinin'Andriamanitra kosa ny aiko mba ho afaka amin'ny herin'ny fahafatesana, satria Izy Andriamanitra no handray ahy.
17 Aza mba mialona raha misy tonga mpanana, raha mitombo voninahitra ny tranony.
18 Fa tsy hitondra na inona na inona izy, rehefa maty ; tsy ho avy hanaraka azy tsy akory ny voninahiny.
19 Fony izy velona no miarahaba tena sady noderain'ny olona satria nahomby.
20 Kanjo lasa tafaray amin'ny razany izy, tsy hahita hazavana na oviana na oviana.
21 Eny, rehefa ao anaty voninahitra ny olona, dia tsy mahatsapa fa mbola ho faty ka ho tahaka ny biby ihany.
Toko faha-50 (49)
1 Salamo nataon'i Asafa. Ny TOMPO Andriamanitra Avo Indrindra no miteny ka miantso ny olona eran'ny tany, dia hatreo amin'izay iposahan'ny masoandro ka hatrany amin'izay ilentehany.2 Avy ao Tsiona, tanana fatratra tokoa, no amirapiratan'Andriamanitra.
3 Tonga ilay Andriamanitray ka tsy hangina Izy fa hiteny. Afo mandevona no mialoha Azy, tafio-drivotra mahery no manodidina Azy.
4 Nidina avy any ambony Izy mba hitsara ny vahoakany, ka miantso ny tany amana habakabaka hoe:
5 "Vorio hanketo anoloako ny mpivavaka marina, dia ireo nanao sorona fanekem-pihavanana tamiko.
6 Aoka hambaran'ny habakabaka fa marina ny Tompo, sady Izy no ilay Andriamanitra Mpitsara! "
7 -Ry Israely vahoakako, mandrenesa, fa hiteny aminareo sy hampitandrina anareo Aho, dia Izaho Andriamanitra Andriamanitrareo.
8 Tsy ireo sorona amam-panatitrareo no aniniako anareo: eo anatrehako mandrakariva ireny rehetra ireny.
9 Tsy izay ombilahy ao am-balanareo no halaiko na izay osilahy ao am-pahitrareo;
10 fa Ahy avokoa ny biby any an'ala sy ny biby fiompy manerana ny tanety;
11 fantatro ny vorona rehetra eny an-tendrombohitra ary Ahy koa ny zava-mihetsiketsika eny an-tsaha.
12 Raha mba noana Aho, tsy hilaza aminao; satria Ahy ny tontolo sy izay eo aminy.
13 Nofon'ombilahy angaha no fihinako sa ran'osilahy no fisotroko?
14 Ny fiderana no ataovy sorona ho Ahy Andriamanitrareo; ny voadinareo no efao amiko, fa Izaho no Avo Indrindra.
15 Dia antsoy amin'ny andro mahory Aho, fa hanafaka anareo ka homenareo voninahitra.
16 Fa amin'ny ratsy fanahy kosa dia izao no lazain'Andriamanitra:-Ahoana no itanisanisanareo ny didiko sy itenitenenanareo ny fanekempihavanako,
17 ianareo izay mpankahala anatra sy mpanipy ny teniko any ivoho?
18 Raha tojo mpangalatra ianareo, dia miombona aminy; ny olona mpanitsakitsa-bady no fiarahanareo.
19 Mailaka ianareo raha hanaratsy olona, kinga tokoa raha hiteny fitaka;
20 mipetrapetraka ianareo no manebaka namana sy manendrikendrika ny mpiray tampo.
21 Izany ve no ataonareo ka dia hangina Aho sa heverinareo Aho fa mitovy aminareo? Horeseko lahatra mihitsy ianareo ary ny toetranareo hasehoko eo imasonareo!
22 Koa hevero izany, ry mpanadino Ahy, ndrao viraviraiko tsy hisy hanafaka ianareo.
23 Ny fiderana no sorona anomezam-boninahitra Ahy; ary izay mahitsy fitondrantena no hanehoako ny famonjeko.
Toko faha-51 (50)
1 Tao amin'ny tahirin-kiran'ny filohan'antoko-mpihira. Salamo nataon'i Davida,2 fony i Natana mpaminany nankao aminy, rehefa naka an'iBaty-Seba ity mpanjaka.
3 Andriamanitra o, iantrao aho satria fatra-pitia Ianao; koseho re ny hadisoako satria be indrafo Ianao.
4 Sasao tanteraka aho ho afa-keloka ary diovy mba ho afa-pahotana.
5 Eny, miaiky ny fahadisoako aho sady tsaroako lalandava ny fahotako.
6 Ianao irery tokoa no nanotako, ny ratsy eo imasonao no nataoko; hany ka ara-drariny Ianao raha miteny, ary tsy omen-tsiny raha manadidy.
7 Jereo fa meloka aho no teraka, mpanota raha notorontoronina;
8 nefa ny hahitsy ao anaty no sitrakao, koa ny fahendrena am-po no atoroy ahy.
9 Ataovy afa-pahotana tokoa aho, dia hadio; sasao aho, dia ho fotsy mangatsakatsaka.
10 Ataovy reko ny famelanao, dia hifaly sy hiravo indray aho; ary aoka hibitaka ny taolako izay efa voamontsamontsanao.
11 Hadinoy tanteraka ny fahotako ary koseho avokoa ny heloka vitako.
12 Amorony fo madio aho, Andriamanitra o, fanahy mahatoky no aoreno ato anatiko.