Salamo
Toko faha-55 (54)
16 Aoka ireo mpanohitra ahy ho faty tampoka; aoka hidina velona any an-toeran'ny maty izy, fa toe-dratsy no ao amin'ny fonenany, hevi-dratsy no ao anatin'ny fony!17 Izaho kosa miantso an'Andriamanitraka Izy TOMPO mihitsy no hamonjy ahy.
18 Na hariva na maraina na antoandro no anaovako sento sy toloko, dia ho henony hatrany aho.
19 Ho hatoniny akaiky aho ka hafahany; eny, ho tsoahiny soa aman-tsara aho amin'ny ady am-parimbona atao ahy.
20 Hihaino anie Andriamanitra ka hampietry an'ireo, satria Izy no Mpanjaka hatrizay hatrizay! Tsy mety miova toetra ireo olon-dratsy ireo sady tsy matahotra an'Andriamanitra.
21 Ny olona nihavanany, aninjirany tanana; ny fifanekena nataony, ivadihany.
22 Malemy noho ny hero-dronono ny firesany, kanjo ady no mameno ny fony; malefaka noho ny diloilo ny teniny, kanjo toy ny sabatra vonon-kamely.
23 Apetraho amin'ny TOMPO ny fiahianao, fa Izy no hanohana anao; na oviana na oviana ny olo-marina tsy havelany hangozohozo.
24 Ianao, Andriamanitra o, hampidina ao am-pasana ny olona mpandatsa-dra sy mpamitaka, na tsy mbola misasaka aza ny androm-piainany. Fa izaho kosa dia hatoky Anao hatrany.
Toko faha-56 (55)
1 Tao amin'ny tahirin-kiran'ny filohan'antoko-mpihira. hohiraina arakany feon'ny hoe "Voromahailala gina any an-tany lavitra." Salamo nataon'i Davida, fony izy voasambo ry ny Filistinina tao Gata.2 Iantrao aho, Andriamanitra o, fa enjehina; tontolo andro aho iadiana sy ampahorina,
3 tontolo andro enjehin'ny mpandrafy ahy, fa maro tokoa ireo no mirehareha miady amiko.
4 Kanefa amin'ny andro atahorako, Ianao, ry ilay Avo, no itokiako.
5 Deraiko Andriamanitra noho ny teniny; Izy no itokiako ka afa-tahotra aho. Inona no ho vitan'izay olona osa amiko?
6 Ny hampahory ahy no resahina tontolo andro, ny hanisy ratsy ahy ihany no heverin'ireo.
7 Mivorivory izy, dia miery mitsongodia satria ny hahafaty ahy no kendreny.
8 Valio araka ny haratsiany izy, Andriamanitra o, aripaho amin-katezerana ireo olona ireo.
9 Ny nirenireneko efa voasoratrao ho ao anaty bokinao; angony koa ny ranomasoko ho ao anaty sinikelinao.
10 Andriamanitra o, amin'ny andro iantsoako Anao, dia hiamboho ireo fahavaloko ka hitsoaka; satria fantatro tokoa fa Ianao no momba ahy.
11 Deraiko Andriamanitra noho ny teniny; eny, deraiko Izy TOMPO noho ny teniny.
12 Izy no itokiako ka afa-tahotra aho. Inona no ho vitan'izay olona osa amiko?
13 Andriamanitra o, nanao voady taminao aho ka hanefa sorom-pisaorana ho Anao,
14 satria narovanao tsy ho faty aho. Eny, Andriamanitra o, nambenanao aho mba tsy ho solafa-mamindra ka hizotra eo anoloanao, anatin'ny hazavana mahavelona.
Toko faha-57 (56)
1 Tao amin'ny tahirin-kiran'ny filohan'antoko-mpihira. hohiraina araka ny feon'ny hoe "Aza ravana...." Salamo nataon'i Davida fony izy nandositra lavitra an'i Saoly ka niery tao anaty zohy.2 Iantrao aho, Andriamanitra o, iantrao satria Ianao no fialofako; eo ambany elatrao tokoa no ialofako mandra-pidifin'ny loza.
3 Ilay Andriamanitra Avo Indrindra no antsoiko, dia ilay Andriamanitra manao izay mahasoa ahy.
4 Hirahiny avy any an-danitra anie ny famonjena ahy, hataony ho afa-baraka anie ireo mpanenjika ahy! Eny, hirahin'Andriamanitra ho amiko anie ny fitiavana amam-pahamarinany!
5 Izaho monina afovoan'ny fahavalo masiaka izay tahaka ny liona mandripaka olona: toy ny lefona na zana-tsipika ny nifiny, toy ny sabatra maranitra ny lelany.
6 Andriamanitra o, misandrata Ianao hanerinerina any an-tampon'ny lanitra. Aoka anie ny voninahitrao hamiratra amin'ny tany tontolo!
7 Ireo fahavaloko efa namelatra fandrika harato tamin'ny lalako mba hampitanondrika ahy; nihadiany longoa teo anoloako, kanjo izy ihany no latsaka tao.
8 Andriamanitra o, mitombina dia mitombina ny foko ka hihira sy hankalaza Anao amin-tsalamo aho.
9 Mifohaza, ry fanahiko; mifohaza, ry valiha sy lokanga, fa tiako ho fohazina ny mazavatsinanana.
10 TOMPO o, vory vahoaka no hiderako Anao ary eo anivom-pirenena no hankalazako Anao amin-tsalamo,
11 satria lehibe tafapaka amin'ny lanitra ny fitiavanao ary avo tafapaka amin'ny rahona ny fahamarinanao.
12 Andriamanitra o, misandrata Ianao hanerinerina any an-tampon'ny lanitra; aoka anie ny voninahitrao hamiratra amin'ny tany tontolo!
Toko faha-58 (57)
1 Tao amin'ny tahirin-kiran'ny filohan'antoko-mpihira. Hohiraina araka ny feon'ny hoe "Aza ravana....". Salamo nataon'i Davida.2 Moa dia ny rariny tokoa ve no lazainareo, ry manampahefana ? Moa araka ny hitsiny ve no itsaranareo ny olona?
3 Tsy izany, fa minia manao ny ratsy ianareo; ny herisetra ataonareo no afafinareo amin'ity tany ity.
4 Hatrany am-bohoka ny olon-dratsy no mivaona; hatramin'ny vao teraka ny mpandainga no maniasia.
5 Misy poizina tahaka ny menarana izy; manentsin-tadiny tahaka ny bibilava marenina
6 izay tsy mihaino ny mpanao safosiaka azy, na dia ny mahasondriana indrindra aza.
7 Andriamanitra o, torotoroy ao am-bavany ny nifiny; TOMPO o, montsany ny vangin'ireo zary liona ireo.
8 Hihanaka toa rano abosasaka anie izy, hadisadisa toa ahitra voahosihosy;
9 ho tahaka ny lelosy anie izy, ka hiempo eny am-pandehanana; ho tahaka ny zaza tsy tonga volana ka tsy hahita masoandro na oviana na oviana!
10 Tsy mbola tonga kirihitra akory ny tsilo novolen'ny olon-dratsy, dia hongotan'ny tafiotra sahady na mbola maitso na efa maina.
11 Ny olo-marina hifaly hahita ny famaliana ny mpanota sy hanasa tongotra amin'ny ran'ireo olon-dratsy.
12 Amin'izay ny besinimaro hiaiky hoe: "Eny, valisoa no anjaran'ny olo-marina; eny, misy Andriamanitra mitsara eto an-tany."
Toko faha-59 (58)
1 Tao amin'ny tahirin-kiran'ny filohan'antoko-mpihira. Hohiraina araka ny feon'ny hoe "Aza ravana...". Hira malefaka nataon'i Davida, fony i Saoly naniraka hiambina ny tranon'i Davida mba hamonoany azy.2 Andriamanitra o, afaho amin'ny fahavaloko aho, arovy tsy ho voan'ireo mpamely ahy.
3 Afaho amin'ny mpanao ratsy aho, vonjeo tsy ho azon'ny mpandatsa-dra.