Salamo
Toko faha-37 (36)
15 Fa hifotitra ny sabatra eny an-tanany ka hitsatoka amin'ny fony ihany; ary ny tsipikany ho tapatapaka.16 Aleo ny kely ananan'ny olo-marina toy izay ny harem-ben'ny olon-dratsy,
17 satria ho potika ny fahefan'ny olon-dratsy fa ny olo-marina kosa hotohanan'ny TOMPO.
18 Ny TOMPO mitsimbina ny fiainan'ny manan-tsiny, ka ny tany zara lovany dia ho azy mandrakizay.
19 Amin'ny fotoana mahory dia tsy hiraika izy, ary amin'ny andro mosarena dia hanana izay ilainy.
20 Eny, ho ringana ny ratsy fanahy dia ireo fahavalon'ny TOMPO; ho tahaka ny voninkazo eny an-tsaha izy ka ho levona, eny, ho levona toy ny setroka.
21 Ny ratsy fanahy misambotra tsy mamerina, fa ny olo-marina kosa miantra ka manome.
22 Izay tahin'ny TOMPO no handova ny tany, fa izay ozoniny kosa dia ho fongotra.
23 Rehefa mahafaly ny TOMPO ny fitondrantenan'olona iray, dia Izy no hampahery azy eo amin'ny lalan-kalehany;
24 raha solafaka ilay olona, dia tsy mba hidaraboka satria tantanan'ny TOMPO.
25 Tanora aho fahiny, fa antitra izao; kanefa na oviana na oviana aho tsy nahita olo-marina nilaozan'ny Tompo na ny zanany lasa mpangataka.
26 Miantra isan'andro izy ka mampisambotra, ary andraisan'ny zanany fitahiana izany.
27 Raha manalavitra ny ratsy ka manao ny tsara ianao, dia honina maharitra eo amin'ny tany lovanao.
28 Satria ny TOMPO mitandro ny rariny ka tsy mba mandao ny mpivavaka aminy; hofoanana mandrakizay kosa ny olo-meloka ary hofongorana ny taranaky ny olon-dratsy.
29 Ny olo-marina no handova ny tany, ka honina mandrakizay ao aminy.
30 Fahendrena no lazain'ny olo-marina; ara-drariny ny zavatra ambarany.
31 Ny lalanan'ny Andriamaniny no ao am-pony, ka tsy mba solafa-mamindra izy.
32 Tsikilovin'ny olon-dratsy ny olo-marina ary tadiaviny izay hahafaty azy, fa tsy avelan'ny Tompo ho azony na ho voaheloka any am-pitsarana.
33 Miankina am-paharetana amin'ny TOMPO ka ny lalana soritany no araho;
34 dia hasandrany ho mpandova ny tany ianao sady hahita ny olon-dratsy ho fongotra.
35 Izaho nahita olon-dratsy nanjakazaka ary nisandrahaka toa sederan'i Libano.
36 Nandalo indray aho, dia tsy teo intsony izy, ary nokarohiko fa tsy nety hita.
37 Diniho ny olom-banona, jereo ny olo-mahitsy, dia ho tsapanao tokoa fa ny hasambarana no valiny omena ny olona toy izany.
38 Ny olo-meloka kosa dia haringana avokoa: ny famongorana no valiny omena ny olon-dratsy.
39 Mamonjy ny olo-marina ny TOMPO sy miaro mafy azy amin'ny andro mahory.
40 Manampy sy manafaka azy ny TOMPO, manafaka azy amin'ny olon-dratsy ka mamonjy azy noho ireo mialoka aminy.
Toko faha-38 (37)
1 Salamo nataon'i Davida. Hitaomana an'Andriamanitra hahatsiaroazy.2 TOMPO o, tezitra amiko Ianao nefa aza faizina aho; eny, vinitra amiko Ianao nefa aza sazina aho.
3 Nitsatohan'ny zana-tsipikanao aho, ary niantefan'ny tehamaina famaizanao.
4 Tsy misy tsy marofy ny nofoko noho ny fahatezeranao; tsy misy tsy marary ny taolako noho ny fahotako.
5 Fa mivangongo mihoatra ny lohako ny heloko toy ny enta-mavesatra tsy zakako mihitsy.
6 Maimbo sy mandoaka ny feriko noho ny hadalako ihany;
7 mitanondrika sy manjoretra loatra aho, manjonitra tontolo andro, toa misaona.
8 Mahamay voan'ny tazo ny tenako ka tsy misy tsy marofy ny nofoko.
9 Reraka aho ary drodroka tanteraka; mitoloko ny foko ka midradradradra aho.
10 TOMPO o, hitanao tokoa izay iriko, tsy miafina aminao ny sentosentoko;
11 miemponempona ny foko, lany hery aho, ary efa jambena mihitsy ny masoko.
12 Ny sakaizako sy ny olon-tiako aza mihataka ahy noho ny aretiko; ary ny havako manao tazan-davitra.
13 Ireo maniry ny ahafatesako mamela-pandrika; ireo mitady hanisy ratsy dia miteny hasomparana, sy mamorom-pitaka isan'andro hamelezana ahy.
14 Fa toy ny marenina aho ka tsy mahahaino, ary tahaka ny moana ka tsy mahaloa-bava;
15 Eny, tahaka ny olona tsy mandre aho ka tsy mba manana teny havaly.
16 Ianao, TOMPO o, no antenaiko;Tompo Andriamanitro o, Ianao no hamaly.
17 Fa izao no vavaka nataoko taminao:"Aza avela ho fanesom-pahavalo aho; ary aoka tsy hirehaka ireo, raha sendra mivaona ny famindrako!"
18 Efa mila ho torana mihitsy aho ary ny fanaintainako tsy miala amiko.
19 Eny, miaiky ny fahadisoako aho ary matahotra noho ny amin'ny otako.
20 Mahery ireo mandrafy ahy tsy amin'antony, maro no mankahala ahy tsy an-drariny.
21 Valiany ratsy ny soa nataoko ary ampangainy aho satria manao ny tsara.
22 TOMPO o, aza ilaozanao aho; Andriamanitra o, aza manalavitra ahy.
23 Faingana hamonjy ahy, ry Tompo Mpamonjiko o.
Toko faha-39 (38)
1 Tao amin'ny tahirin-kiran'i Jedoto na, filohan'antoko-mpihira. Salamo nataon'i Davida.