Salamo
Toko faha-33 (32)
1 Manaova horakora-pihobiana, ry olo-marina, noho ny amin'izay nataon'ny TOMPO; fa tombontsoa ho anareo ny midera Azy, ry olo-mahitsy.2 Midera ny TOMPO amin'ny lokanga; ka salamo arahim-baliha torifolono ataovy ho fankalazana Azy.
3 Mihira hira vaovao ho Azy. Manaova feon-java-maneno kanto miaraka amin'ny fihobiana.
4 Fa mahitsy ny tenin'ny TOMPO ka azo antoka avokoa izay ataony.
5 Ny rariny sy ny hitsiny lalainy; ny fitiavany manenika ny tany.
6 Nandidy ny TOMPO, dia vita ny lanitra; niteny Izy, dia ary ny planeta sy ny kintana.
7 Angoniny sy fefeny ny rano an-dranomasina ataony am-pitahirizana azy ny rano lalimbe.
8 Hatahotra ny TOMPO anie ny tany tontolo; hangovitra eo anatrehany anie ny mponina rehetra ao aminy!
9 Fa niteny Izy, dia tonga izay voalazany; nandidy Izy, dia nisy avy hatrany ireny.
10 Ny TOMPO maharava ny fikasan'ny firenena ary mahasakana ny hevitry ny vahoaka;
11 fa ny fikasan'ny TOMPO no maharitra mandrakizay, ny hevitry ny fony manerana ny taranaka mifandimby.
12 Sambatra ny firenena manana ny TOMPO ho Andriamanitra; sambatra ny vahoaka nofidiny mba ho Azy manokana.
13 Avy eny an-danitra ny TOMPO no mitsinjo sy mijery ny olombelona rehetra;
14 Avy eo an-tseza fiandrianany no andinihany ny mponina rehetra ety ambonin'ny tany.
15 Mpamorona ny saina amam-piniavana Izy, ka mahalala izay rehetra ataon'ny olona.
16 Raha handresy amin'ny ady ny mpanjaka, dia tsy noho ny hamaroan'ny miaramilany; ary raha afa-doza ny mpiady, dia tsy noho ny haben'ny heriny.
17 Fa ny soavaly tsy azo itokiana hahazoam-pandresena; ary na matanjaka be aza izy, dia tsy mahavonjy ny mpitaingina azy.
18 Tsinjovin'ny Tompo kosa ireo mpanaja Azy, dia ireo olona miantehitra amin'ny fitiavany,
19 mba hanafaka ny ainy amin'ny fahafatesana sy hamelona azy na dia misy mosary aza.
20 Miandry ny TOMPO tokoa isika: famonjena sy fiarovana ho antsika Izy.
21 Eny, Izy TOMPO no ifalian'ny fontsika; masina ny anarany ka itokiantsika.
22 TOMPO o, ho aminay anie ny fitiavanao araka ny ianteheranay aminao!
Toko faha-34 (33)
1 Nataon'i Davida, fony izy nody adala teo anatrehan'i Abimeleka , dia noroahiny ka lasa nandeha.2 Hisaotra ny TOMPO lalandava aho ary tsy hitsahatra hidera Azy ny vavako.
3 Ny TOMPO no reharehako; koa mifalia, ry mpandefitra, rehefa mandre ny fiderako Azy.
4 Mankalaza ny TOMPO miaraka amiko ianareo, ary aoka hiara-manandratra ny voninahiny isika.
5 Nitady ny TOMPO aho, dia novaliany vavaka; ka nafahany avokoa ny tahotro rehetra.
6
Mijere Azy ianareo, dia aoka ho mirana;
ny tavanareo tsy ho safo-kenatra intsony.
7 Niantso vonjy aho fa olo-mahantraka nohenoin'ny TOMPO sy novonjeny tamin'izay fahoriako rehetra.
8 Ny anjelin'ny TOMPO miambina manodidina ny mpanaja an'Andriamanitraka manafaka azy amin'ny loza.
9 Andramo sy jereo fa tsara ny TOMPO. Sambatra ny olona mialoka aminy!
10 Mankatoava ny TOMPO, ianareo vahoakany: fa tsy misy mahory ny mpankato Azy.
11 Na dia ireo mpanankarena aza, mety tsy ampy hanina ka ho noana; fa izay mitady ny TOMPO tsy mba ho orin-java-tsoa.
12 Avia hihaino ahy ianareo, rey anaka, fa hampianariko hanaja ny TOMPO.
13 Raha misy olona mankamamy fiainana ka te ho ela velona sy ho sambatra,
14 dia tsy maintsy mitandrina tsy hiteny ratsy ary koa mitandrina tsy hilaza fitaka,
15 hiala amin'ny ratsy ka hanao ny tsara ary haharitra hikatsaka fiadanana.
16 Tsinjovin'ny TOMPO ireo olo-marina ary henoiny hatrany ny antsony.
17 Toherin'ny Tompo kosa ny mpanao ratsy , ka fongorany tsy eo amin'ny tany ny fahatsiarovana azy ireny.
18 Vao miantso vonjy ny olo-marina, dia henoin'ny TOMPO sy afahany tamin'izay fahoriany rehetra.
19 Fa akaikin'ny torotoro fo izy sady mamonjy ny rera-tsaina.
20 Na maro fahoriana aza ny olo-marina, dia afahan'ny TOMPO amin'izany rehetra izany.
21 Arovan'ny TOMPO avokoa ny rantsam-batany ka tsy hisy tapaka na taolana iray aza.
22 Ho fatin'ny haratsiany kosa ny olon-dratsy ary hohelohina ny mpankahala olo-marina.
23 Vonjen'ny TOMPO hatrany ny ain'ny mpanompo ny ary tsy hisy hohelohina izay mialoka aminy.
Toko faha-35 (34)
1 Salamo nataon'i Davida. TOMPO o, tohero izay mpanohitra ahy ary iadio izay miady amiko.2 Raiso ny ampinga kely sy lehibe ka midira an-tsehatra hamonjy ahy.
3 Arangarangao ny lefona sy famaky ka sakano ireo mpanenjika ahy; ary lazao ho tokin'aiko ny hoe:"Izaho no ho mpamonjy anao!"
4 Ho menatra sy ho afa-baraka anie izay olona mitady hahafaty ahy! Hihemotra sy hangaihay anie izay mikasa hanao ratsy ahy!
5 Aoka ho toy ny akofa aelin-drivotra ireo, rehefa handroaka azy ny anjelin'ny TOMPO;