2 Tantara
Toko faha-13
19 Nanenjika an'i Jerobohama i Abia ka nisy azony ny tananany, dia i Betela sy i Jesana ary i Hefrona mbamin'ireo tanana madinika manodidina azy avy.20 Tamin'ny andron'i Abia, dia tsy nanan-kery intsony i Jerobohama; ary namely azy ny TOMPO, ka maty izy.
21 I Abia kosa nitombo fahefana; ary nanam-bady 14 izy,ka zazalahy 22 sy zazavavy 16 no naterany.
22 Ny sisa amin'ny tantaran'i Abia ary koa ny zava-bitany sy nataony dia efa voasoratra ao amin'ny boky miloha teny hoeTsiahin'i Hidao mpaminany.
23 Rehefa lasa nodimandry any amin'ny razany i Abia , dia nalevina tao an-Tananan'i Davida;ary i Asa zanany lahy no nanjaka nandimby azy.
Toko faha-14
1 Nandritra ny andro nanjakan'i Asa, dia nandry folo taona ny tany. Nanao izay tsara sy mahitsy eo imason'ny TOMPO Andriamaniny i Asa,2 fa noravany ny alitara aman-toeram-panasinan'ireo firenena vahiny, notorotoroiny ny tsangambaton-tsampy ary nokapainy ny tsatokazo fanajana an'i Asera.
3 Nomeny baiko ny Jodeanina hitady ny TOMPO Andriamanitry ny razany sy hankato ny lalanany sy ny didiny.
4 Noravan'i Asa ny toeram-panasinana sy ny alitara fandoroana vovo-javamanitra teny amin'ny tanana rehetra manerana an'i Joda; ka nandry feizay ny fanjakana nandritra ny fitondrany.
5 Eny, nandry feizay tokoa ny tany fa tsy nisy nia-dy tamin'i Asa nandritra ireo taona ireo, satria ny TOMPO no nanome azy fiadanana ary nanamafy tanana maro tao Joda ny mpanjaka nandritra izany fotoam-pilaminana izany
6 sady niteny tamin'ny Jodeanina hoe:-Ndeha ho hamafisintsika ireto tanana ireto ka hasiantsika manda manodidina ary koa tilikambo sy vavahady mafy hidy, satria mbola eo ambany fitondrantsika ny tany. Ny TOMPO Andriamanitsika manko no efa notadiavintsika; eny, nitady Azy isika ka nomeny fiadanana amin'ny sisin-tany manodidina. Dia nohamafisin'ny Jodeanina ireo tanana ireo ka tontosa tsara.
7 Ary nanan-tafika i Asa, dia miaramila jodeanina nisy antokony telonjato samy mpirongo ampinga lehibe sy lefona ary koa miaramila benjaminita nisy antokony 280 samy mpirongo ampinga maivana sy tsipika;ireo rehetra ireo dia vantan-dehilahy maherifo avokoa.
8 Ary i Zera, ilay Etiopianina,dia niainga hiady tamin'izany tafika izany sady nitondra miaramila nisy antokony arivo sy kalesy telonjato, ka tonga tao Maresa.
9 Ary niroso hifanandrina aminy kosa i Asa; ka samy nilahatra hiady teo an-dohasaha Tsefata akaikin'i Maresa izy roa tonta.
10 Dia niantso vonjy tamin'ny TOMPO Andriamaniny i Asa ka nanao hoe:-TOMPO o, tsy misy afa-tsy Ianao no mahavonjy ny tsy manan-kery, raha iadian'ny matanjaka izy; ka vonjeo izahay, ry TOMPO Andriamanitray o, fa Ianao no iankinanay ary ny anaranao no irosoanay hiady amin'ity tafika goavana ity. TOMPO o, Ianao no Andriamanitray, ka aza avela hisy olombelona haharesy Anao.
11 Dia noresen'ny TOMPO teo anoloan'i Asa sy ny miaramila jodeanina ireo Etiopianina ka nandositra
12 ary nenjehin'i Asa sy ny tafiny hatrany Gerara. Ary nahafatesana be tokoa ny Etiopianina sady tsy nisy afa-nitsoaka akory aza, satria montsana teo anoloan'ny TOMPO sy ny tafika nombany. Babo betsaka no azon'ny Jodeanina tamin'izay.
13 Nasian'ny tafik'i Asa koa ny tanana rehetra manodidina an'i Gerara, satria nataon'ny TOMPO voagejan'ny horohoro ireo; dia norobain'ny tafik'i Asa avokoa ny tanana, ka nahazoany babo betsaka.
14 Nasiany koa ny vala fitobian'ny biby fiompy, ka namaboany ondry aman'osy marobe sy rameva. Avy eo dia niverina ho any Jerosalema i Asa sy ny tafiny.
Toko faha-15
1 Tonga tamin'i Hazaria zanakalahin'i Hodeda ny Fanahin'Andriamanitra;2 ka niainga hitsena an'i Asa izy ary nanao taminy hoe:-Mihainoa ahy, ry Asa mbaminareo Jodeanina sy i Benjaminita rehetra. Miaraka aminareo ny TOMPO, raha miaraka aminy ianareo. Raha mitady Azy ianareo, dia hahita Azy; fa raha mandao Azy ianareo, dia hilaozany.
3 Nandritra ny fotoana ela ny Israelita no tsy nanana an'ilay Andriamanitra marina, na mpisorona hampianatra na lalana.
4 Fa rehefa azom-pahoriana izy, dia niverina tamin'ny TOMPO Andriamanitr'i Israely, ka nitady Azy ary nahita Azy.
5 Tamin'izay fotoana izay dia tsy afaka nifamoivoy tamim-pilaminana ny olona; fa horohorobe no nanjo ny mponina rehetra tamin'ny tany.
6 Nifandringana ny firenena sy ny tanana, satria Andriamanitra efa nampangorohoro azy tamin'ny fahoriana isan-karazany.
7 Koa mahereza ianareo, fa aza miraviravy tanana;satria hisy valim-pitia tokoa ny ataonareo.
8 Rehefa ren'i Asa izany teny izany na hoe ny faminanian'i Hazaria mpaminany zanakalahin'i Hodeda , dia nihasahy izy ka nanaisotra ny sampy tamin'ny faritanin'i Joda sy i Benjamina manontolo ary tamin'ny tanana izay azony tany amin'ny faritra be tendrombohitra any Efraima. Avy eo dia nohavaoziny ny alitaran'ny TOMPO, izay teo anoloan'ny fidirana amin'ny tranon'ny TOMPO.
9 Nisy Israelita betsaka, avy tamin'ny foko efraimita sy manasita ary simehonita, nifindra monina sy nanatona an'i Asa rehefa nahita fa niaraka tamin'i Asa ny TOMPO Andriamaniny. Novorin'ny mpanjaka ireo mbamin'ny Jodeanina sy ny Benjaminita rehetra
10 ka tafavory tokoa tao Jerosalema tamin'ny volana fahatelon'ny taona faha-15 nanjakan'i Asa.
11 Androtrizay no nanolorana sorona ho an'ny TOMPO tamin'ny babo izay nentiny, dia omby fitonjato sy ondry aman'osy fito arivo.
12 Ary nanao ny fanekem-pihavanana ny besinimaro fa samy vonon-kitady ny TOMPO Andriamanitry ny razany amin'ny fony manontolo sy amin'ny fanahiny manontolo;
13 ka na iza na iza tsy mety mitady ny TOMPO Andriamanitr'i Israely, dia hatao maty, na kely na lehibe, na lahy na vavy.
14 Ary nianiana tamin'ny TOMPO izy ireo, ka nampombainy horakoraka sy fihobiana ary feon-trompetra sy anjomara izany.
15 Nifalian'i Joda tsivakivolo io fianianana io, satria tamin'ny fony manontolo no nanaovany azy ary tamin'ny finiavany manontolo no nitadiavany ny TOMPO; ka dia nahita Azy tokoa ireo sady nomeny fiadanana tamin'ny sisin-tany manodidina.
16 Na dia i Maheka reniben'i Asa aza dia naetrin'ity mpanjaka tsy ho andriambavy intsony, noho izy efa nanao sarivongan-tsampin'i Asera. Noravan'i Asa io sampy io, dia nomontsamontsaniny ary nodorany tao amin'ny lohasahan-driaka Kidrona.
17 Kanefa tsy mbola foana teo amin'i Israely ny toeram-panasinana, na dia nahitsy fo hatrany aza i Asa tamin'ny androm-piainany rehetra.
18 Nampidiriny ho ao an-tranon'ny TOMPO ireo zavatra voatokan-drainy sy voatokan'ny tenany, dia volafotsy sy volamena ary fanaka.
19 Ary tsy nisy ady intsony hatramin'ny taona faha-35 nanjakan'i Asa
Toko faha-16
1 Tamin'ny taona faha-36 nanjakan'i Asa, dia niakatra hanafika ny tanin'i Joda i Bahasa mpanjakan'i Israely ka nanamafy ny tananan'i Rama izy mba hisakanan-dalana an'i Asa mpanjakan'i Joda.2 Koa nangalan'i Asa volafotsy sy volamena ny raki-tsoa tao an-tranon'ny TOMPO sy tao an-dapan'ny mpanjaka; dia nalefany ho an'i Bena-Hadada mpanjakan'i Siria izay nipetraka tany Damasy izany sady nombany hafatra hoe:
3 Aoka hisy fanekena amiko sy aminao, toy izay nisy tamin-draiko sy tamin-drainao. Koa indro mandefa volafotsy sy volamena ho anao aho; fa ndeha tsoahy ny fifanekenao tamin'i Bahasa mpanjakan'i Israely mba hialany amin'ny taniko.
4 Dia neken'i Bena-Hadada ny tenin'i Asampanjaka; ary nirahiny ireo filohan-tafiny hamely ny tananan'i Israely, ka dia nahazo an'i Hiona sy i Dana ary i Abela-Maima mbamin'ny tanana rehetra tany Naftaly izay nisy trano fitahirizam-bokatra.
5 Nony ren'i Bahasa izany vaovao izany, dia nitsahatra tsy nanamafy ny tananan'i Rama intsony izy, fa nampijanona ny asany.
6 Novorin'i Asa mpanjaka ny Jodeanina rehetra; ka ireo no nanaisotra ny vato sy ny hazo tao Rama, izay vao nohamafisin'i Bahasa. Dia nampiasain'i Asa ireo fitaovana ireo hanamafisana an'i Geba sy i Mitsepa.
7 Tamin'izany fotoana izany dia nankeo amin'i Asa, mpanjakan'i Joda, i Hanany mpaminany ka nanao taminy hoe:-Tsy ny TOMPO Andriamanitrao no niankinanao fa ny mpanjakan'i Siria; noho izany, dia votsotra tsy ho eo ambany fahefanao ny tafiky ny mpanjakan'i Siria.
8 Tsy tafika marobe ve ny Etiopianina sy ny Libianina ary tsy betsaka ve ny kalesiny ama-mpitaingin-tsoavaliny? Nefa noho ny niankinanao tamin'ny TOMPO, dia natolony teo an-tananao ireo.
9 Fa manopy maso ny tany tontolo ny TOMPO mba hanohana izay miraiki-po tanteraka aminy. Adalaianao tamin'io fihetsikao io, ka dia hisy ady hihatra aminao manomboka izao.
10 Dia tezitra sy nisafoaka tamin'ilay mpahita i Asa noho izany ka nampiditra azy am-ponja. Ary nisy olona sasany koa nampahorin'i Asa tamin'izay fotoana izay.
11 Ny tantaran'i Asa, na tamboalohany na tafara, dia voasoratra ao amin'ny Bokin'ireo mpanjakan'i Joda sy i Israely.
12 Tamin'ny taona faha-39 nanjakan'i Asa,dia narary mafy tamin'ny tongony izy;kanefa, na niharan'aretina aza izy, dia tsy nitady vonjy tamin'ny TOMPO fa tamin'ny mpitsabo ihany.