2 Tantara
Toko faha-11
8 i Gata sy i Maresa ary i Zifa,9 i Adoraima sy i Lakisy ary i Hazeka,
10 mbamin'i Tsoreha sy i Aialona ary i Hebrona, izay samy tanana mimanda ao anatin'ny faritr'i Joda sy i Benjamina.
11 Nohamafisin'i Rehabohama ny mandan'ireo tanana ireo sady nametrahany mpifehy ary koa sakafo sy menaka aman-divay tao aminy.
12 Isan-tanana dia nasiany ampinga lehibe sy lefona avokoa. Ny nanamafisany tsara ireo tanana ireo no nitazonan'i Rehabohama ny faritr'i Joda sy i Benjamina ho azy.
13 Ny mpisorona sy ny levita izay nonina tany Israely avaratra manontolo dia niainga avy any amin'ny faritra rehetra nisy azy ka niandany tamin'i Rehabohama.
14 Fa nandao tanim-bilona amam-pananana ny levita ka nankany Joda sy Jerosalema, satria i Jerobohama sy ireo zanany lahy efa nisakana azy tsy hanao ny raharaham-pisoronany ho an'ny TOMPO;
15 nanendry olona hompisorona manko izy hisahana ireo toeram-panasinana sy hikarakara ireo sarin'osilahy na ombilahikely izay sampy nampamboariny.
16 Na iza na iza anisan'ny foko rehetra tamin'i Israely avaratra, ka nafana fo hitady ny TOMPO Andriamanitr'i Israely, dia nanaraka ireo levita nankany Jerosalema mba hanolotra sorona amin'ny TOMPO Andriamanitry ny razany.
17 Ka dia nampahery ny fanjakan'i Joda izy ireny sady nijoro ho mpanohana an'i Rehabohama zanakalahin'i Salomona, nandritra ny telo taona; fa ny fitondrantena tsara narahin'i Davida sy i Salomona no nizoran'i Rehabohama nandritra ny telo taona.
18 I Rehabohama dia nanambady an'i Mahalato izay i Jerimota zanakalahin'i Davida no rainy ary i Abihaila zanakavavin'i Eliaba sady zafin'i Jisay no reniny.
19 I Mahalato dia nahazo an'i Rehabohama zazalahy telo, dia i Jehosa sy i Semaria ary i Zahama.
20 Ankoatran'i Mahalato dia nalain'i Rehabohama ho vady koa i Maheka zanakavavin'i Absaloma sady niteraka an'i Abiasy i Hatahy ary i Ziza sy i Selomita.
21 I Maheka, zanakavavin'i Absaloma, dia notiavin'i Rehabohama mihoatra noho ny vadiny sy ny vaditsindranony rehetra; fa vady 18 ary vaditsindrano enimpolo no nananany, ka niterahany zazalahy 28 sy zazavavy enimpolo.
22 I Abia, zanakalahin'i Maheka, no nataon'i Rehabohama ho filohan'ireo rahalahiny, satria izy no niriny hampanjakaina.
23 Kinga i Rehabohama ka nanaparitaka ny zanakalahiny hafa rehetra eran'ny faritr'iJoda sy i Benjamina, dia tany amin'ny tanana mimanda samihafa; nomeny sakafo betsaka ireo sady nitadiavany vady maro.
Toko faha-12
1 Rehefa nampandry ny fanjakany sady nanamafy fahefana i Rehabohama, dia nandao ny lalanan'ny TOMPO na ny tenany na ny Israelita rehetra tatsimo.2 Ary tamin'ny taona fahadimy nanjakan'i Rehabohama dia niakatra i Sisaka mpanjakan'i Ejipta mba hamely an'i Jerosalema, satria nivadika tamin'ny TOMPO ireo mponina tao.
3 Nitondra kalesy 1200 sy mpitaingin-tsoavaly 60 000 i Sisaka; ary tsy hita isa ny miaramila nanaraka azy avy any Ejipta, dia ny Libianina sy ny Sokita ary ny Etiopianina.
4 Dia azony ny tanana mimanda eran'i Joda, ka tonga hatrany Jerosalema izy.
5 Noho ny fiavian'i Sisaka, dia tafavory tao Jerosalema i Rehabohama sy ireo mpifehy ny faritr'i Joda. Nanatona ny mpivory kosa i Semahia mpaminany ka nanao taminy hoe:-Izao no lazain'ny TOMPO: "Ianareo efa nandao Ahy; Izaho koa mba mandao anareo ho eo ambany fifehezan'i Sisaka."
6 Dia niaiky hadisoana ny mpanjaka sy ireo mpifehy ny Israelita tatsimo ka nanao hoe:-Rariny ny an'ny TOMPO!
7 Ary nony hitan'ny TOMPO izany fiekena hadisoana izany, dia nisy indray tenin'ny TOMPO tamin'i Semahia nanao hoe:-Efa niaiky hadisoana ireo, ka tsy handringana azy Aho fa tsy ho ela dia hanafaka azy;ary ny fahatezerako tsy hatosako amin'i Jerosalema avy amin'ny famelezan'i Sisaka.
8 Kanefa hilefitra hanompo an'i Sisaka ihany izy ireo, mba hahafantarany fa tsy mitovy ny manompo Ahy sy ny manompo ireo mpanjakan'ny tany vahiny.
9 Dia niakatra i Sisaka mpanjakan'i Ejipta mba hamely an'i Jerosalema ka namabo ny raki-tsoa tao an-tranon'ny TOMPO sy tao an-dapan'ny mpanjaka; nobaboiny avokoa ireo, indrindra ny ampinga volamena rehetra izay nataon'i Salomona.
10 Ho solon'ireny kosa dia nampanao ampinga halimo i Rehabohama; ka ny lehiben'ny mpiambina, izay niandry ireo varavaran'ny lapan'ny mpanjaka, no nanankinany azy.
11 Ary na oviana na oviana nidiran'ny mpanjaka tao an-tranon'ny TOMPO, dia tonga ny mpiambina naka ireo ampinga ireo, ka avy eo namerina azy ho ao an'efitranon'ny mpiambina indray.
12 Niaiky hadisoana kosa i Rehabohama, ka niala taminy ny fahatezeran'ny TOMPO mba tsy hahalany ringana azy; sady mbola nisy hatsaram-panahy ihany tao Joda.
13 I Rehabohama mpanjaka dia nanamafy ny fahefany tao Jerosalema, ka dia nanjaka;feno 41 taona izy fony tonga mpanjaka, ary naharitra 17 taona no nanjakany tao Jerosalema, ilay tanana nofidin'ny TOMPO tamin'ireo fokon'i Israely rehetra mba hampitoerany ny voninahiny. Ny anaran-drenin'i Rehabohama dia i Nahama izay Hamonita.
14 Ary nanao ratsy i Rehabohama,satria tsy nampifantoka ny fony hitady ny TOMPO.
15 Ny tantaran'i Rehabohama, na tamboalohany na tafara, dia voasoratra ao amin'ny boky miloha teny hoe Asan'i Semahia mpaminany sy i Hidao mpahita sady voavisavisa tsara. Ary niady mandrakariva i Rehabohama sy i Jerobohama.
16 Rehefa lasa nodimandry any amin'ny razany i Rehabohama, dia nalevina tao an-Tananan'i Davida; ary i Abia zanany lahy no nanjaka nandimby azy.
Toko faha-13
1 Tamin'ny taona faha-18 nanjakan'i Jerobohama no tonga mpanjakan'i Joda i Abia;2 ary naharitra telo taona no nanjakany tao Jerosalema. Ny anaran-dreniny dia Mikaia, zanakavavin'i Oriela avy any Gibeha. Niady i Abia sy i Jerobohama.
3 Ary i Abia no nanomboka izany ka nitondra miaramila maherifo, dia vatan-dehilahy voafantina nisy andiany efajato. I Jerobohama kosa nandahatra ny azy hiady aminy, dia vatan-dehilahy voafantina nisy andiany valonjato sady samy maherifo avokoa.
4 Teo an-tampon'i Tsemaraima , tendrombohitr'i Efraima, no nijoro i Abia ka niteny hoe:"Henoy aho, ry Jerobohama sy ry Israelita rehetra!
5 Tsy tokony ho fantatrareo ve fa ny TOMPO Andriamanitr'i Israely efa nanome mandrakizay ny fanjakan'i Israely ho an'i Davida sy ny taranany? Eny, nataony fanekena tsy azo foanana izany.
6 Nefa kosa nitsangana i Jerobohama, zanakalahin'i Nebata sady mpanompon'i Salomona zanakalahin'i Davida, ka nikomy tamin'ny tompony.
7 Nisy koa olom-poana, tena ratsy fanahy, tafangona teo amin'i Jerobohama ka nampidrikina azy tamin'i Rehabohama zanakalahin'i Salomona; fa mbola tanora sady marefo toetra i Rehabohama tamin'izay ka tsy nahatohitra azy.
8 Ankehitriny ianareo dia mihambo hanohitra ny fanjakana izay napetraky ny TOMPO eo an-tanan'ny taranak'i Davida. Marobe tokoa ianareo sady tafaraka aminareo ny ombilahikely volamena izay nataon'i Jerobohama ho andriamanitrareo.
9 Noroahinareo ny tena mpisoron'ny TOMPO, dia ny taranak'i Aharona ary koa ny levita; fa nanendry mpisorona ho anareo kosa ianareo, tahaka ny fanaon'ny firenena any amin'ny tany hafa. Na iza na iza nitondra ombilahy iray sy ondrilahy fito hanokanana ny tenany, dia tonga mpisoron'ireny andriamani-tsi izy ireny.
10 Fa ny aminay kosa, dia ny TOMPO no Andriamanitray, ka tsy mba nandao Azy izahay. Ny mpisorona izay manao fanompoam-pivavahana ho an'ny TOMPO dia ny taranak'i Aharona; ary ny levita koa manana ny anjara raharahany.
11 Isa-maraina sy isan-kariva ireo no mampanetona ny sorona dorana manontolo sy ny vovo-javamanitra ho an'ny TOMPO na koa mandahatra eo amin'ny latabatra madio ny mofo atolotra ho an'Andriamanitra; ary isan-kariva ireo no mampirehitra ny jiro eo amin'ny fitoeran-jiro volamena. Izahay manko mitandrina izay nasain'ny TOMPO Andriamanitray ho tandremana; fa ianareo kosa nandao Azy.
12 Indro miaraka aminay Andriamanitra mba ho mpitarika anay; ary indreo ny mpisorony vonona hitsoka ny trompetra avo faneno mba hanaingana hamely anareo. Koa aza miady amin'ny TOMPO Andriamanitry ny razanareo, ry Israelita tavaratra, satria tsy hahomby ange ianareo!"
13 Fa nasain'i Jerobohama nandroso ny miaramila mpanotrika mba hamely tampoka ny fahavalo avy eo ivoho, hany ka ny tafika israelita tavaratra no teo anoloan'ny Jodeanina ary ny mpanotrika no teo ivohony.
14 Rehefa nijery manodidina azy ny Jodeanina, dia indreo teo anoloany sy teo ivohony ny fahavalo; ka niantso vonjy tamin'ny TOMPO izy. Vao nitsoka trompetra ny mpisorona,
15 dia nanao akoran'ady ny miaramila jodeanina; koa tamin'izay no namelezan'Andriamanitra an'i Jerobohama sy ny Israelita tavaratra rehetra teo anoloan'i Abia sy ny Jodeanina.
16 Nandositra teo anoloan'ireto Jodeanina ny Israelita ka natolotr'Andriamanitra ho eo ambany fifehezany.
17 Fa haresena goavana no namaizan'i Abia sy ny tafiny azy, ka nataony niampatrampatra ny fatin'ireo miaramila israelita voafantina nisy andiany dimanjato.
18 Tamin'izany fotoana izany no nampietrena ny Israelita; nandresy kosa ny Jodeanina satria niankina tamin'ny TOMPO Andriamanitry ny razany.