2 Mpanjaka
Toko faha-12
4 Saingy tsy nofoanany ny toeram-panasinana, ka mbola tonga nitondra sorona sy nandoro azy hanetona teny ihany ny olona.5 Indray andro dia hoy i Joasy tamin'ireo mpisorona: Angoninareo izay vola rehetra entina ato an-tranon'ny TOMPO, dia ny vola nandoavan'ny olona ny hetrany na ny vola natolotra an-tsitrapo. Asaivo hangonin'ireo mpandray vola voatendry izany ka hampiasainareo hanamboarana izay hitanareo fa simba amin'ny tempoly.
7 Kanjo tamin'ny taona faha-23 nanjakan'i Joasy dia tsy mbola voavoatr'ireo mpisorona ihany ny simba tamin'ny tempoly.
8 Koa nampiantso an'i Joiada sy ny mpisorona hafa i Joasy mpanjaka ka nanao taminy hoe: Nahoana no tsy namboarinareo ny simba tamin'ny tempoly? Noho izany dia tsy mahazo maka vola amin'ny mpandray volanareo intsony ianareo, fa avelao kosa izany hanamboarana ny tempoly.
9 Dia nanaiky tsy handray vola amin'ny olona intsony sy tsy hiandraikitra ny fanamboarana ny tempoly ny mpisorona.
10 Fa naka vata iray i Joiada mpisorona, dia noloahiny ny sarony ka napetrany teo akaikin'ny alitara teo ankavanan'ny fidirana amin'ny tranon'ny TOMPO; dia nalatsaky ny mpisorona mpiandry varavarana tao ny vola rehetra nentina tao an-tranon'ny TOMPO.
11 Rehefa hitany fa be ny vola tao am-bata, dia nangonin'ny mpitantsoratry ny mpanjaka sy ny mpisorombe ny vola tao an-tranon'ny TOMPO ka nisainy.
12 Rehefa voaisa ny vola, dia natolony ny mpiandraikitra ny tranon'ny TOMPO izay nampiasa izany hanakaramana ny mpandrafitra sy ny mpanao mari-trano niasa tao an-tranon'ny Tompo
13 mbamin'ny mpandatsa-biriky sy ny mpipai-bato ary koa hividianana hazo sy vato voapaika hanamboarana ny simba amin'ny tranon'ny TOMPO sy hiantohana izay fandaniana hafa rehetra ilaina amin'izany.
14 Nefa tsy mba nanaovana koveta na antsy na tsatokaty famafazana, na trompetra na zavatra hafa vita volamena na volafotsy ireny fanomezana nentina tao an-tranon'ny TOMPO ireny.
15 Dia nomena ny mpanao raharaha izany hanamboarana ny tranon'ny TOMPO.
16 Tsy nampamoahina ny mpanome karama ny mpiasa satria nahatoky tamin'ny fiasany.
17 Ny vola narotsaky ny olona ho solon'ny sorom-panonerana na sorona fanalana ny ota dia tsy mba natolotra ho an'ny tranon'ny TOMPO, fa an'ny mpisorona kosa izany.
18 Tamin'izany dia niakatra nanafika ny tananan'i Gata i Hazaela mpanjakan'i Siria, ka nahazo azy; rehefa izany, dia niomana hanafika an'i Jerosalema ihany koa izy.
19 Fa nangonin'i Joasy mpanjakan'i Joda avokoa ny zava-tsarobidy rehetra izay natolony na natolotr'ireo razany mpanjakan'i Joda, dia i Josafata sy i Jorama ary i Ahazia ho an'ny TOMPO, mbamin'ireo volamena napetraka tao amin'ny efitrano firaketan'ny tempoly sy tao an-dapan'ny mpanjaka; ka nampanateriny ho an'i Hazaela izay nisinda tsy nanafika an'i Jerosalema.
20 Ny sisa amin'ny tantaran'i Joasy ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Joda.
21 Ary nioko hanohitra an'i Joasy ny manamboninahiny; ka ny anankiroa taminy, dia i Jozabada zanakalahin'i Simehata sy i Jehozabada zanakalahin'i Somera no namono azy ho faty tao Bety-Milao iny Joasy nidina hankany Sila iny. Dia nalevina tao amin'ny fasam-pianakaviany tao an-Tananan'i Davida izy; ary i Amatsia zanany lahy no nanjaka nandimby azy.
Toko faha-13
1 Tamin'ny faha-23 taona nanjakan'i Joasy zanakalahin'i Ahazia mpanjakan'i Joda no tonga mpanjakan'i Israely tany Samaria i Joahaza zanakalahin'i Jeho; ary naharitra 17 taona no nanjakany.2 Nanao izay ratsy eo imason'ny TOMPO izy, satria nanahaka ny fahotana izay nitarihan'i Jerobohama zanakalahin'i Nebata ireo Israelita.
3 Koa dia tezitra tamin'ny Israelita ny TOMPO, ka natolony an'i Hazaela mpanjakan'i Siria sy an'i Beny-Hadada zanany izy nandritra ny fotoana ela.
4 Nifona tamin'ny TOMPO anefa i Joahaza, dia nihaino azy IZY satria hitany ny fampahorian'ny mpanjakan'i Siria an'i Israely;
5 ary ny TOMPO kosa nanome mpamonjy izay hanafaka ny Israelita amin'ny fifehezan'ny Sirianina. Dia nandry feizay toy ny teo aloha ny Israelita.
6 Saingy tsy nialany fa nizorany hatrany ny fahotana izay nitarihan'i Jerobohama mianakavy ireo Israelita; ary na dia ilay tsatokazo fanajana an'i Asera aza dia mbola nijoro tao Samaria ihany.
7 Tamin'ny farany ny tafik'i Joahaza dia tsy nisy afa-tsy mpitaingin-tsoavaly dimampolo sy kalesy folo ary miaramila mpandeha an-tongotra antokony folo; fa maro taminy no efa naringan'ny mpanjakan'i Siria sy nataony ho toy ny vovoka hohitsahin'ny olona.
8 Ny sisa amin'ny tantaran'i Joahaza ary koa ny zavatra hafa rehetra nataony sy ny herimpo nasehony dia voasoratra ao amin'ny boky milohateny hoe Asan'ireo mpanjakan'i Israely.
9 Rehefa maty i Joahaza, dia nalevina tao Samaria; ary i Joasy zanany lahy no nanjaka nandimby azy.
10 Tamin'ny faha-37 taona nanjakan'i Joahaza mpanjakan'i Joda no tonga mpanjakan'i Israely tao Samaria i Joasy zanakalahin'i Joahaza; ary naharitra 16 taona no nanjakany tao.
11 Nanao izay ratsy eo imason'ny TOMPO izy, satria tsy nialany fa nizorany hatrany ny fahotana rehetra izay nitarihan'i Jerobohama zanakalahin'i Nebata ireo Israelita.
12 Ny sisa amin'ny tantaran'i Joasy ary koa ny zavatra hafa rehetra nataony sy ny herimpo nasehony, fony izy niady tamin'i Amatsia mpanjakan'i Joda, dia voasoratra ao amin'ny boky milohateny hoe Asan'ireo mpanjakan'i Israely.
13 Rehefa lasa nodimandry any amin'ny razany izy, dia nalevina tao Samaria, tao amin'ny fasan'ny mpanjakan'i Israely; ary i Jerobohama no nitoetra teo amin'ny sezafiandrianan'i Joasy.
14 Raha voan'ny aretina hahafaty azy i Elisa, dia lasa hamangy azy i Joasy mpanjakan'i Israely ary nihohoka teo ambony tavan'i Elisa izy ka sady nitomany no nanao hoe: Ry dada o! Ry dada o! Mahery mihoatra noho ny kalesin'i Israely sy ny mpitaingin-tsoavaliny rehetra ianao! 15 Ary hoy i Elisa taminy: Maka tsipika iray sy zana-tsipika maro ianao. Dia nampaka ireo ny mpanjaka.
16 Fa hoy indray i Elisa hoe: Vohay ny varavarankely atsinanana. Dia novohan'ny mpanjaka izany. Ary hoy koa ny mpaminany hoe: Raiso dia henjano ny tsipikanao. Dia nohenjanin'ny mpanjaka ny tsipika; napetrak'i Elisa teo amin'ny tanan'ny mpanjaka ny tanany ary nobaikoiny izy mba hitifitra. Rehefa nitifitra ny mpanjaka, dia nilazan'ny mpaminany hoe: Zana-tsipika manambara ny fandresena omen'ny TOMPO iny, dia fandresena ny tafika sirianina. Eny, hamely ny Sirianina ao Afeka ianao mandra-paharingany.
18 Dia hoy i Elisa tamin'i Joasy: Raiso indray ny zana-tsipika hafa. Dia noraisin'ny mpanjaka ireo. Ary hoy ny mpaminany taminy: Kapohy ny tany Ary nokapohin'ny mpanjaka intelo ny tany, dia nijanona izy.
19 Tezitra taminy anefa ilay olon'Andriamanitra ka nanao hoe: Raha mba nikapoka indimy na inenina ianao, dia ho nahavoa ny Sirianina mandra-paharingany; ankehitriny anefa dia intelo ihany no hahafahanao mamely azy.
20 Ary maty i Elisa ka nalevina. Isan-taona dia tonga mamakivaky ny tanin'i Israely ny tontakely moabita.
21 Indray andro, dia nisy olona nandevina fatin-dehilahy ka sendra nahatazana tampoka andiany iray tamin'ireo tontakely. Ary nanipy faingana ny faty tao am-pasan'i Elisa ny mpandevina, dia lasa nandositra. Saingy vao nahakasika ny taolan'i Elisa io faty io, dia velona indray ary nitsangana.
22 Nandritra ny andro rehetra nanjakan'i Joahaza, dia nampahory ny Israelita i Hazaela mpanjakan'i Siria.
23 Nefa niantra azy ihany ny TOMPO sady namindrafo taminy noho ny fanekempihavanana nataony tamin'i Abrahama sy i Itsehaka ary i Jakoba; ka tsy ta handringana azy Izy ary tsy mbola nandroaka azy ho voasesitany lavitra ny fanatrehany.
24 Nony maty i Hazaela mpanjakan'i Siria, dia i Bena-Hadada zanany lahy no nanjaka nandimby azy.
25 Tamin'izay dia norombahin'i Joasy zanakalahin'i Joahaza teo an-tanan'i Bena-Hadada zanakalahin'i Hazaela indray ny tanana izay efa nalain'i Hazaela teo an-tanan'i Joahaza rain'i Joasy. Intelo no nandresen'i Joasy an'i Bena-Hadada, ka dia azony indray ny tananan'i Israely.
Toko faha-14
1 Tamin'ny taona faharoa nanjakan'i Joasy zanakalahin'i Joahaza sady mpanjakan'i Israely no tonga mpanjakan'i Joda i Amatsia zanakalahin'i Joasy;2 feno 25 taona izy tamin'izay, ary naharitra 29 taona no nanjakany tao Jerosalema. Ny anaran-dreniny dia i Johadana, izay avy ao Jerosalema ihany.
3 Nanao izay mahitsy eo imason'ny TOMPO izy, nefa tsy dia tahaka an'i Davida razambeny, fa nanahaka an'i Joasy rainy.
4 Tsy mba nofoanany ireo toeram-panasinana ka mbola nanao sorona sy nandoro azy hanetona teny ihany ny olona.
5 Rehefa nohamafisin'i Amatsia ny fahefam-panjakany, dia nasainy novonoina ho faty ireo manamboninahitra izay nahafaty an'i Joasy mpanjaka rainy.
6 Kanefa ny zanakalahin'ireto mpamono an'i Joasy dia tsy mba novonoin'i Amatsia ho faty, fa nataony araka izay voasoratra ao amin'ny bokin'ny lalanan'i Mosesy; ao manko no nandidian'ny TOMPO hoe: Ny ray aman-dreny tsy hatao maty noho ny fahotan-janany, na ny zanaka noho ny fahotan'ny ray aman-dreny, fa ny olona dia hatao maty noho ny fahotan'ny tenany ihany.
7 I Amatsia koa no nahafaty miaramila edomita antokony folo tao amin'ny Lohasahan-Tsira tamin'ny ady nandrombahany ny tananan'i Sela, izay lasa hoe Jokteela, anarany mandraka ankehitriny.
8 Tamin'izay i Amatsia dia nandefa iraka tany amin'i Joasy zanakalahin'i Joahaza sady zafikelin'i Jeho mba hilaza aminy hoe: Avia hifanandrina an'ady isika
9 Fa i Joasy mpanjakan'i Israely dia nandefa iraka tany amin'i Amatsia mpanjakan'i Joda hamaly azy hoe: Ny kirihitra tsilo izay tany Libano, hono, dia nandefa iraka tany amin'ny sedera izay tany Libano mba hiangavy azy hoe: 'Omeo ho vadin'ny zanako lahy ny zanakao vavy'; kanjo nisy bibidian'i Libano namaky teo ka nanosihosy ny kirihitra tsilo.
10 Ary hoy ihany i Joasy: Satria efa resinao ny Edomita, ka dia nirehareha ny fonao; aoka hahafa-po anao izany voninahitra izany ka mitoera ao an-tranonao ihany! Fa nahoana ianao no mitady loza izay hahavoa ny tenanao sy ny tafik'i Joda manontoloy